Լեռնային Ղարաբաղի Հանրապետության արդարադատության նախարար

ք.Ստեփանակերտ

Հ Ր Ա Մ Ա Ն

Ղեկավարվելով «Նոտարիատի մասին» ԼՂՀ օրենքի 11-րդ հոդվածի 1-ին մասի պահանջներով.

Հ Ր Ա Մ Ա Յ Ո Ւ Մ  Ե Մ `

1. Հաստատել նոտարների թեկնածուների որակավորման ստուգման կարգը` համաձայն հավելվածի:

2. Սահմանել, որ գործող նոտարների որակավորումն իրականացվում է սույն հրամանով հաստատված կարգի համաձայն:

1. Նոտարի որակավորման ստուգումն իրականացվում է նոտարի թափուր պաշտոնը զբաղեցնելու, նոտարների թեկնածուների ռեզերվ ստեղծելու, ինչպես նաև գործող նոտարների մասնագիտական գիտելիքների ստուգման նպատակով:

Նոտարի որակավորման ստուգման /այսուհետ` որակավորման ստուգում/ համար կարող է դիմել ԼՂՀ գործունակ յուրաքանչյուր քաղաքացի, որն ունի բարձրագույն իրավաբանական կրթություն, չունի դատվածություն:

2. Որակավորման ստուգումները կազմակերպվում են երկու տարին մեկ անգամ: ԼՂՀ արդարադատության նախարարի հրամանով կարող են կազմակերպվել արտահերթ որակավորման ստուգման աշխատանքներ: Որակավորման ստուգում անցկացնելու մասին (բացառությամբ գործող նոտարների որակավորման ստուգման) զանգվածային լրատվության միջոցներով հայտնվում է որակավորման ստուգման օրվանից ոչ ուշ, քան 20 օր առաջ: Որակավորման ստուգման մասին տեղեկատվության մեջ նշվում է ստուգման համար համապատասխան փաստաթղթերը ներկայացնելու վերջին ժամկետը և վայրը:

3. Դիմողը որակավորման ստուգման համար ԼՂՀ արդարադատության նախարարություն է ներկայացնում`

ա/ դիմում, որտեղ պետք է նշվեն`

դիմողի անունը, ազգանունը և հայրանունը /անձը հաստատող փաստաթղթում հայրանվան առկայության դեպքում/,

դիմողի բնակության վայրը, հեռախոսահամարը,

բ/ 2 գունավոր լուսանկար`4 x 6 չափսի,

գ/ անձնագիր,

դ/ բարձրագույն իրավաբանական կրթության վկայականի /դիպլոմի/ պատճենը,

ե/ որակավորման ստուգման համար օրենքով սահմանված չափով վճարված պետական տուրքի անդորրագիրը:

Գործող նոտարները չեն ներկայացնում սույն կետի «գ», «դ» և «ե» ենթակետերում նշված փաստաթղթերը:

Սույն կետի «ա», «բ», «դ» և «ե» ենթակետերում նշված փաստաթղթերից կազմված` դիմողների անձնական գործերը վերցվում են հաշվառման և պահվում ԼՂՀ արդարադատության նախարարությունում:

4. Որակավորման ստուգումն իրականացնում է ԼՂՀ արդարադատության նախարարի կողմից ստեղծված հանձնաժողովը /այսուհետ` հանձնաժողով/:

5. Հանձնաժողովը`

ա/ կազմակերպում է դիմողների որակավորման ստուգման աշխատանքները.

բ/ ընտրում է որակավորման ստուգման համար մշակված հարցերը և խնդիրները, որոնք ենթակա չեն հրապարակման.

գ/ որոշում է որակավորման ստուգման վայրը, ժամանակը և դրանց մասին օրենքով նախատեսված ժամկետներում հայտնում դիմողներին.

դ/ կարգավորում է որակավորումն ստուգող հանձնաժողովի գործունեությանն առնչվող հարցերը.

ե/ քննում է դիմողների բողոքները` կապված որակավորման ստուգման կազմակերպման հետ.

զ/ ընդունում է որակավորման ստուգման կազմակերպման հետ կապված այլ որոշումներ.

է/ իրականացնում է սույն կարգով սահմանված այլ լիազորություններ:

6. Հանձնաժողովի նախագահը`

ա/ ղեկավարում է հանձնաժողովի աշխատանքները, հրավիրում և վարում է հանձնաժողովի նիստերը.

բ/ իրականացնում է հսկողություն որակավորման ստուգման ընթացքի նկատմամբ.

գ/ կազմում է որակավորման ստուգման հարցերը և խնդիրները.

դ/ իրականացնում է սույն կարգով նախատեսված այլ լիազորություններ:

7. Որակավորման ստուգման անցկացման օրվա, ժամի և տեղի, ինչպես նաև հարցերի և խնդիրների քանակի ու դրանց լուծման համար նախատեսված ժամկետի մասին որակավորման ստուգման համար դիմում ներկայացրած անձը հանձնաժողովի կողմից պատշաճ ձևով տեղեկացվում է ստուգումից առնվազն յոթ օր առաջ:

8. Որակավորման ստուգումն անցկացվում է հայերենով, գրավոր և դռնբաց: Որակավորման ստուգման ընթացակարգը կարող է տեսագրվել, նկարահանվել կամ ձայնագրվել:

9. Որակավորման ստուգման նպատակն է ստուգել դիմողների` նոտարական գործողություններ կատարելու համար անհրաժեշտ գիտելիքները:

10. Դիմողի գիտելիքների ստուգման նպատակով նրան տրվում է նոտարական գործունեությանն ու գործողություններին առնչվող հարցեր և խնդիրներ: Դիմողը խնդիրների լուծմանն է անցնում հարցերի գրավոր պատասխանները հանձնաժողովի նախագահին հանձնելուց հետո: Խնդիրները լուծելիս դիմողը իրավունք ունի օգտվելու գրքերից, տեղեկագրերից, այլ փաստաթղթերից և համակարգչային տեխնիկայից: Որակավորման ստուգման ժամանակ արգելվում է օգտվել հեռահաղորդակցության միջոցներից:

11. Հարցերի և խնդիրների լուծման ճշտությունը ստուգում է հանձնաժողովը:

12. Որակավորման ստուգման արդյունքները գնահատում է հանձնաժողովը: Որակավորման ստուգման արդյունքները գնահատվում է 20 միավորային համակարգով: Դրական են համարվում 10 և բարձր միավորները:

Որակավորման ստուգման համար տրվում է 4 հարց և 2 խնդիր, որոնց լուծման համար տրվում է 4 ժամ ժամանակ:

Հարցը գնահատվում է 2.5 իսկ խնդիրը` 5 միավորային համակարգով:

Որակավորման ստուգում չանցած է համարվում այն դիմողը, որի կողմից խնդրի սխալ լուծման արդյունքում վավերացման կամ հաստատման ենթակա է համարվել օրենքով առ ոչինչ կամ չկնքված համարվող իրավական փաստաթուղթը:

13. Որակավորման ստուգման ընթացակարգը չի կարող տևել մեկ շաբթից ավելի, որը չի ներառում բողոքարկման գործընթացը:

14. Ստուգումների արդյունքների մասին որակավորվող անձը պատշաճ ձևով տեղեկացվում է, կամ դրանք նրան են ուղարկվում ոչ ուշ, քան ստուգումների ավարտի օրվան հաջորդող 5 օրվա ընթացքում:

15. Որակավորման ստուգմանը չներկայացած դիմողները զրկվում են տվյալ ստուգմանը մասնակցելու իրավունքից: Նրանք իրավունք ունեն մասնակցելու հաջորդ ստուգմանը:

Որակավորման ստուգմանը մասնակցելուց հրաժարված դիմողներին վերադարձվում են նրանց կողմից ներկայացված փաստաթղթերը` բացի դիմումից:

16. Որակավորման ստուգման արդյունքները կարող են բողոքարկվել դատական կարգով` դրանք ստանալուց հետո 10 օրվա ընթացքում:

17. Դրական միավորներ ստացած անձանց որակավորման ստուգման օրվան հաջորդող 10 օրվա ընթացքում տրվում է որակավորման վկայականներ:

18. Որակավորման վկայականում նշվում են`

ա/ որակավորման վկայական տվող մարմնի անվանումը,

բ/ որակավորման վկայականի համարը,

գ/ որակավորման վկայականը տալու օրը, ամիսը, տարեթիվը,

դ/ որակավորման ստուգում անցած անձի անունը, ազգանունը և հայրանունը /անձը հաստատող փաստաթղթում հայրանվան առկայության դեպքում/,

ե/ որակավորման վկայականն ուժի մեջ լինելու ժամկետը:

Որակավորման վկայականի վրա փակցվում է ստուգում անցած անձի լուսանկարը: Որակավորման վկայականը վավերացվում է ԼՂՀ արդարադատության նախարարի ստորագրությամբ և ԼՂՀ արդարադատության նախարարության` ԼՂՀ զինանշանի պատկերով կնիքով:

Նոտարի պաշտոնում չնշանակված անձանց համար որակավորման ստուգման համար դրական արդյունքներն իրենց ուժը պահպանում են 5 տարի ժամկետով:

19. ԼՂՀ արդարադատության նախարարության կողմից վարվում են որակավորման վկայական ստացած անձանց գրանցամատյան, որտեղ պետք է նշվեն`

ա/ որակավորման վկայականի համարը,

բ/ որակավորման վկայականը տալու օրը, ամիսը, տարեթիվը,

գ/ որակավորման ստուգում անցած անձի անունը, ազգանունը և հայրանունը /անձը հաստատող փաստաթղթում հայրանվան առկայության դեպքում/,

դ/ որակավորման վկայականն ուժի մեջ մտնելու ժամկետը,

ե/ որակավորման վկայական ստացած անձի բնակության վայրը,

զ/ տեղեկություններ որակավորման վկայականի վերաձևակերպման մասին:

Գրանցամատյանի բոլոր էջերը համարակալվում են, իսկ գրանցամատյանը կնքվում է ԼՂՀ արդարադատության նախարարության կնիքով:

20. Որակավորման վկայականը տրվում է 1 օրինակից: Որակավորման վկայականի կորստի /կորցնելու, ոչնչացնելու և այլն/ դեպքում անձը դրա մասին դիմում է ներկայացնում ԼՂՀ արդարադատության նախարարություն և տալիս հայտարարություն զանգվածային լրատվության միջոցներով:

ԼՂՀ արդարադատության նախարարությունը կորած վկայականի կրկնօրինակը դիմողին տալիս է զանգվածային լրատվության միջոցով հայտարարության հրապարակման օրվանից 15 օր հետո` 3 օրվա ընթացքում:

21. Որակավորման վկայականն օգտագործման համար ոչ պիտանի դառնալու դեպքում անձը ԼՂՀ արդարադատության նախարարություն է ներկայացնում դիմում` վկայականի կրկնօրինակը ստանալու համար:

ԼՂՀ արդարադատության նախարարությունը ոչ պիտանի դարձած վկայականի կրկնօրինակն անձին տալիս է նրա կողմից դիմումը ներկայացվելու օրվան հաջորդող երրորդ օրը:

22. Որակավորման վկայականի կրկնօրինակի վերին աջ անկյունում կատարվում է «Կրկնօրինակ» նշագրումը:

23. Որակավորման վկայական ստացած անձի անվան, ազգանվան փոփոխման դեպքում տվյալ անձը պարտավոր է այդ փոփոխության կատարման օրվանից 15-օրյա ժամկետում դիմել ԼՂՀ արդարադատության նախարարություն` որակավորման վկայականում համապատասխան փոփոխություն կատարելու կամ նոր որակավորման վկայական ստանալու համար:

24. Վկայական չստացած անձը նոր ստուգում անցնելու համար կարող է դիմել սույն կարգին համապատասխան: