ք.Ստեփանակերտ

Ղեկավարվելով Լեռնային Ղարաբաղի Հանրապետության ընտրական օրենսգրքի 19-րդ հոդվածի 3-րդ կետով՝ 21-րդ հոդվածի 2-րդ կետով, 80-րդ և 110-րդ հոդվածներով, ԼՂՀ կենտրոնական ընտրական հանձնաժողովը ո ր ո շ ո ւ մ է.

Սահմանել Լեռնային Ղարաբաղի Հանրապետության Ազգային ժողովի ընտրությունների ժամանակ համամասնական ընտրակարգով գրանցված կուսակցությունների (կուսակցությունների դաշինքների) և մեծամասնական ընտրակարգով գրանցված պատգամավորության թեկնածուների կողմից զանգվածային լրատվության միջոցներով նախընտրական քարոզչություն իրականացնելու կարգը՝ համաձայն հավելվածի:

1. Սույն կարգը սահմանված է Լեռնային Ղարաբաղի Հանրապետության ընտրական օրենսգրքի դրույթների համաձայն և կարգավորում է Ազգային ժողովի ընտրությունների ժամանակ համամասնական ընտրակարգով գրանցված կուսակցությունների (կուսակցությունների դաշինքների) և մեծամասնական ընտրակարգով գրանցված պատգամավորության թեկնածուների կողմից զանգվածային լրատվության միջոցներով նախընտրական քարոզչություն իրականացնելու հետ կապված հարաբերությունները:

2. Ազգային ժողովի ընտրությունների ժամանակ համամասնական ընտրակարգով գրանցված կուսակցությունների (կուսակցությունների դաշինքների) և մեծամասնական ընտրակարգով գրանցված պատգամավորության թեկնածուների նախընտրական քարոզչությունը սկսվում է 2005 թվականի մայիսի 16-ին ժամը 00⁰⁰-ից և ավարտվում՝ 2005 թվականի հունիսի 17-ին ժամը 24⁰⁰-ին:

3. Լեռնային Ղարաբաղի Հանրապետության քաղաքացիները, կուսակցությունները, կուսակցությունների դաշինքները, նախաձեռնող խմբերն իրավունք ունեն օրենքով չարգելված ձևերով քարոզչություն կատարել:

4. Նախընտրական քարոզչություն կատարելու իրավունք չունեն՝

ա) պետական և տեղական ինքնակառավարման մարմինները, ինչպես նաև դրանց աշխատակիցներն իրենց աշխատանքային պարտականությունները կատարելիս.

բ) սահմանադրական դատարանի անդամները, դատավորները, ոստիկանության, ազգային անվտանգության ծառայության, դատախազության մարմինների աշխատակիցները (ծառայողները), զինծառայողները.

գ) բարեգործական և կրոնական կազմակերպությունները.

դ) օտարերկրյա քաղաքացիները և կազմակերպությունները.

5. Զանգվածային լրատվության միջոցներով նախընտրական քարոզչությունն իրականացվում է հրապարակային բանավեճերի, կլոր սեղանների, մամուլի ասուլիսների, հարցազրույցների, քաղաքական գովազդի և օրենքով չարգելված այլ ձևերով՝ հավասար հիմունքներով:

6. Համամասնական ընտրակարգով գրանցված կուսակցությունները (կուսակցությունների դաշինքները) հանրային հեռուստառադիոընկերության անվճար և վճարովի (այդ թվում ուղիղ եթերով), իսկ մեծամասնական ընտրակարգով գրանցված թեկնածուները միայն վճարովի (այդ թվում ուղիղ եթերով) հեռուստա- և ռադիոեթերաժամերից օգտվում են սույն կարգի համաձայն:

7. Հանրային հեռուստառադիոընկերության հեռուստաեթերաժամով՝ անվճար և վճարովի հիմունքներով, նախընտրական քարոզչությունն իրականացվում է 2005 թվականի մայիսի 16-ից մինչև հունիսի 17-ը, յուրաքանչյուր օր ժամը 18³⁰-ից մինչև 20³⁰-ը:

Հանրային հեռուստառադիոընկերության անվճար և վճարովի ռադիոեթերաժամը թեկնածուներին հատկացվում է յուրաքանչյուր օր, ժամը 17⁰⁰-ից մինչև 19⁰⁰-ն:

8. Համամասնական ընտրակարգով գրանցված կուսակցությունները (կուսակցությունների դաշինքները) իրավունք ունեն հանրային հեռուստառադիոընկերության հեռուստաեթերաժամից անվճար օգտվել ոչ ավելի, քան 60 րոպե:

9. Համամասնական ընտրակարգով գրանցված կուսակցությունները (կուսակցությունների դաշինքները) իրավունք ունեն իրենց նախընտրական հիմնադրամի հաշվին վճարովի հիմունքներով օգտվել հանրային հեռուստառադիոընկերության հեռուստաեթերաժամից ոչ ավելի, քան 90 րոպե՝ պայմանագրային կարգով:

Մեծամասնական ընտրակարգով գրանցված թեկնածուները իրավունք ունեն իրենց նախընտրական հիմնադրամի հաշվին վճարովի հիմունքներով օգտվել հանրային հեռուստառադիոընկերության հեռուստաեթերաժամից ոչ ավելի, քան 10 րոպե՝ պայմանագրային կարգով:

10. Հանրային հեռուստառադիոընկերության անվճար և վճարովի հեռուստաեթերաժամով համամասնական ընտրակարգով գրանցված կուսակցությունների (կուսակցությունների դաշինքների) և մեծամասնական ընտրակարգով գրանցված թեկնածուների կողմից նախընտրական քարոզչություն իրականացնելու հաջորդականությունը որոշվում է վիճակահանության արդյունքում կազմված ժամկետացանկի համաձայն, որը հաստատվում է կենտրոնական ընտրական հանձնաժողովի կողմից:

11. Հանրային հեռուստառադիոընկերության ղեկավարության կողմից հեռուստաեթերաժամերի ներկայացված ժամանակահատվածը, կախված տեխնիկական անհրաժեշտությունից, կարող է տեղաշարժվել ոչ ավելի, քան 30 րոպե՝ առաջ կամ հետ:

12. Համամասնական ընտրակարգով գրանցված կուսակցությունները (կուսակցությունների դաշինքները) անվճար և վճարովի, իսկ մեծամասնական ընտրակարգով գրանցված թեկնածուները միայն վճարովի, իրավունք ունեն հավասար հիմունքներով օգտվել Հանրային հեռուստառադիոընկերության ռադիոեթերաժամից:

13. Համամասնական ընտրակարգով գրանցված կուսակցությունները (կուսակցությունների դաշինքները) իրավունք ունեն հանրային հեռուստառադիոընկերության ռադիոեթերաժամից անվճար օգտվել ոչ ավելի, քան 60 րոպե:

14. Համամասնական ընտրակարգով գրանցված կուսակցությունները (կուսակցությունների դաշինքները) իրավունք ունեն իրենց նախընտրական հիմնադրամի հաշվին վճարովի հիմունքներով օգտվել հանրային հեռուստառադիոընկերության ռադիոեթերաժամից՝ ոչ ավելի, քան 90 րոպե՝ պայմանագրային կարգով:

Մեծամասնական ընտրակարգով գրանցված թեկնածուները իրավունք ունեն իրենց նախընտրական հիմնադրամի հաշվին վճարովի հիմունքներով օգտվել Հանրային հեռուստառադիոընկերության ռադիոեթերաժամից՝ ոչ ավելի, քան 10 րոպե՝ պայմանագրային կարգով:

15. Հանրային հեռուստառադիոընկերության անվճար և վճարովի ռադիոեթերաժամից համամասնական ընտրակարգով գրանցված կուսակցությունների (կուսակցությունների դաշինքների) և մեծամասնական ընտրակարգով գրանցված թեկնածուների կողմից նախընտրական քարոզչություն իրականացնելու հաջորդականությունը որոշվում է վիճակահանության արդյունքով կենտրոնական ընտրական հանձնաժողովի կողմից հաստատված ժամկետացանկով:

16. Համամասնական ընտրակարգով գրանցված կուսակցությունները (կուսակցությունների դաշինքները) և մեծամասնական ընտրակարգով գրանցված թեկնածուները իրենց տեսագրությունները հեռարձակելու համար տեսաերիզները հանրային հեռուստառադիոընկերություն պետք է ներկայացնեն հեռարձակման օրը մինչև ժամը 15⁰⁰-ն, իսկ ձայներիզները՝ հանրային հեռուստառադիոընկերություն, եթերից 2 ժամ առաջ:

17. Համամասնական ընտրակարգով գրանցված կուսակցություններին (կուսակցությունների դաշինքներին) հանրային հեռուստառադիոընկերության տրված անվճար և վճարովի եթերաժամը այլ կուսակցությունների (կուսակցությունների դաշինքների) կողմից չի կարող օգտագործվել:

Մեծամասնական ընտրակարգով գրանցված թեկնածուներին հանրային հեռուստառադիոընկերության կողմից տրամադրված վճարովի եթերաժամը այլ թեկնածուների կողմից չի կարող օգտագործվել:

18. Համամասնական ընտրակարգով գրանցված կուսակցությունները (կուսակցությունների դաշինքները) և մեծամասնական ընտրակարգով գրանցված պատգամավորության թեկնածուները նախընտրական քարոզչություն իրականացնելու կամ քաղաքական գովազդ հեռարձակելու համար իրավունք չունեն օգտագործել Լեռնային Ղարաբաղի Հանրապետությունում առկա հեռուստառադիոհեռարձակման և վերահեռարձակման գործունեություն իրականցնող սուբյեկտների տնօրինման տակ գտնվող տեխնիկական հնարավորությունները:

19. Հանրային հեռուստառադիոընկերության վճարովի եթերաժամերից օգտվելու համար համամասնական ընտրակարգով գրանցված կուսակցությունները (կուսակցությունների դաշինքները), մեծամասնական ընտրակարգով գրանցված պատգամավորության թեկնածուները հայտերը (դիմումները) հեռուստառադիոընկերությանն են ներկայացնում եթերի օրվանից ոչ ուշ, քան 3 օր առաջ, կից ներկայացնելով անկանխիկ վճարման (փոխանցման) հանձնարարականը: Մեկ օր առաջ եթերաժամ տրամադրելու նպատակով ներկայացված հայտերի (դիմումների) համար վճարումը կատարվում է կանխիկ:

20. Հանրային հեռուստառադիոընկերության հատկացված եթերաժամը համամասնական ընտրակարգով գրանցված կուսակցությունների (կուսակցությունների դաշինքների) և մեծամասնական ընտրակարգով գրանցված պատգամավորության թեկնածուների կողմից չօգտագործելու դեպքում դրա փոխարեն լրացուցիչ եթերաժամ չի տրամադրվում:

21. Նախընտրական քարոզչությունը սկսվելու օրվանից, եռօրյա պարբերականությամբ՝ հանրային հեռուստառադիոընկերությունը կենտրոնական ընտրական հանձնաժողով է ներկայացնում տեղեկատվություն համամասնական ընտրակարգով գրանցված կուսակցությունների (կուսակցությունների դաշինքների) կողմից եթերաժամերից (վճարովի և անվճար) օգտվելու վերաբերյալ:

22. Նախընտրական քարոզչության վերաբերյալ հաղորդումները հեռուստատեսությամբ հեռարձակելիս էկրանի վրա պարտադիր անընդմեջ լուսագրով նշվում է «քաղաքական գովազդ» կամ «նախընտրական քարոզչական հաղորդում» բառերը, իսկ ռադիոհաղորդումների դեպքում՝ յուրաքանչյուր հաղորդման ընթացքում, ոչ պակաս, քան երեք անգամ հիշեցվում է այդ մասին:

23. Արգելվում է նախընտրական քարոզչությանը վերաբերող հեռուստահաղորդումները և ռադիոհաղորդումներն ընդմիջել ապրանքների կամ ծառայությունների գովազդով:

Արգելվում է հեռուստառադիոհեռարձակման և վերահեռարձակման գործունեություն իրականացնող սուբյեկտներին՝ իրենց տնօրինության տակ գտնվող տեխնիկական միջոցները օգտագործել նախընտրական քարոզչություն իրականացնելու նպատակով:

24. Պետական և տեղական ինքնակառավարման մարմինների հիմնադրած պարբերական մամուլի ղեկավարությունը քարոզչական նյութեր հրապարակելիս պարտավոր է հավասար պայմաններ ապահովել համամասնական ընտրակարգով գրանցված կուսակցությունների (կուսակցությունների դաշինքների) համար:

Պետական և տեղական ինքնակառավարման մարմինների հիմնադրած պարբերական մամուլի ղեկավարությունը, քարոզչական նյութեր հրապարակելիս պարտավոր է հավասար պայմաններ (ծավալ, սակագին) ապահովել մեծամասնական ընտրակարգով գրանցված պատգամավորության թեկնածուների համար:

25. «Ազատ Արցախ» և շրջանային թերթերում՝ նախընտրական քարոզչության համար սահմանված ժամանակահատվածում, անվճար հրապարակվող քարոզչական նյութերի համար յուրաքանչյուր համամասնական ընտրակարգով գրանցված կուսակցության (կուսակցությունների դաշինքի) հատկացվում է 0.25 մամուլ ծավալ:

26. Համամասնական ընտրակարգով գրանցված կուսակցությունները (կուսակցությունների դաշինքները) «Ազատ Արցախ» և շրջանային թերթերում անվճար հրապարակվող նախընտրական նյութերը խմբագրություն են ներկայացնում հրապարակման օրվանից ոչ ուշ, քան 3 օր առաջ:

27. Համամասնական ընտրակարգով գրանցված կուսակցությունները (կուսակցությունների դաշինքները) և մեծամասնական ընտրակարգով գրանցված պատգամավորության թեկնածուները իրավունք ունեն իրենց նախընտրական հիմնադրամի հաշվին, վճարովի հիմունքներով, նախընտրական քարոզչական նյութեր հրապարակել մասնավոր տպագիր լրատվամիջոցներում:

Համապատասխան հրատարակության ղեկավարը՝ բացի կուսակցական մամուլից, պարտավոր է միևնույն սակագնով ծավալ տրամադրել կուսակցություններին (կուսակցության դաշինքներին), մեծամասնական ընտրակարգով գրանցված պատգամավորության թեկնածուներին:

Վճարովի ծավալը տրամադրվում է պայմանագրային կարգով:

28. Նախընտրական քարոզչության ընթացքում արգելվում է սահմանադրական կարգը բռնի տապալելու, ռասայական, ազգային, կրոնական գերակայության քարոզումը, ռասայական, ազգային կամ կրոնական թշնամանք առաջացնող նյութերի հրապարակումը, ինչպես նաև պատգամավորության թեկնածուների վերաբերյալ կեղծ, զրպարտչական լուրեր տարածելը:

29. Համամասնական ընտրակարգով գրանցված կուսակցությունների (կուսակցությունների դաշինքների) և մեծամասնական ընտրակարգով պատգամավորության թեկնածուների նախընտրական քարոզչությանը վերաբերող հեռուստահաղորդումները և ռադիոհաղորդումները եթեր հեռարձակելիս տեսագրվում և ձայնագրվում են:

Հեռուստառադիոընկերությունները ընտրությունների ավարտից հետո նախընտրական քարոզչությանը վերաբերող հեռուստահաղորդումների և ռադիոհաղորդումների տեսագրություններն ու ձայնագրությունները պահպանում են առնվազն վեց ամիս: