ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

 ք.Ստեփանակերտ

ՀԱՐԿԱԴԻՐ ԿԱՏԱՐՄԱՆ ԸՆԹԱՑՔՈՒՄ ԱՆՇԱՐԺ ԳՈՒՅՔԻ ԳՆԱՀԱՏՈՒՄՆ ԻՐԱԿԱՆԱՑՆՈՂ ԼԻՑԵՆԶԱՎՈՐՎԱԾ ԱՆՁԱՆՑ ԸՆՏՐՈՒԹՅԱՆ ԿԱՐԳՆ ՈՒ ՊԱՅՄԱՆՆԵՐԸ ՀԱՍՏԱՏԵԼՈՒ

ՄԱՍԻՆ

«Հրապարակային սակարկությունների մասին» Լեռնային Ղարաբաղի Հանրապետության օրենքի 30-րդ հոդվածի 1-ին մասին համապատասխան` Լեռնային Ղարաբաղի Հանրապետության կառավարությունը որոշում է.

1. Հաստատել հարկադիր կատարման ընթացքում անշարժ գույքի գնահատումն իրականացնող լիցենզավորված անձանց ընտրության կարգն ու պայմանները` համաձայն հավելվածի:

2. Սահմանել, որ ելնելով Լեռնային Ղարաբաղի Հանրապետության ամբողջ տարածքում ծառայությունների մատուցումն ապահովելու անհրաժեշտությունից, կարող են կազմակերպվել առանձին մրցույթներ:

3. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Կ Ա Ր Գ  Ե Վ  Պ Ա Յ Մ Ա Ն Ն Ե Ր

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով և պայմաններով սահմանվում են հարկադիր կատարման ընթացքում անշարժ գույքի գնահատումն իրականացնող լիցենզավորված անձանց ընտրության կարգն ու պայմանները:

2. Հարկադիր կատարման ընթացքում անշարժ գույքի գնահատումն իրականացնող լիցենզավորված անձանց ընտրությունն իրականացվում է մրցույթի միջոցով:

3. Մրցույթն անցկացնում է մրցութային հանձնաժողովը (այսուհետ` հանձաժողով):

4. Լեռնային Ղարաբաղի Հանրապետության արդարադատության նախարարն ստեղծում է առնվազն 4 անձից բաղկացած հանձնաժողով:

5. Հանձնաժողովը գործում է Լեռնային Ղարաբաղի Հանրապետության օրենսդրությանը և սույն կարգին և պայմաններին համապատասխան:

6. Հանձնաժողովը`

ա) հաստատում է մրցույթի մասին հրապարակային ծանուցման տեքստը,

բ) բացում և գնահատում է մրցույթի հայտերը,

գ) որոշում է մրցույթի հաղթողին,

դ) իրականացնում է սույն կարգով և պայմաններով սահմանված այլ գործառույթներ:

7. Հանձնաժողովի գործունեությունն իրականացվում է նիստերի միջոցով: Նիստն իրավազոր է, եթե նիստին ներկա է հանձնաժողովի անդամների առնվազն 3/4-ը: Հանձնաժողովի որոշումը համարվում է ընդունված, եթե դրա օգտին քվեարկել է հանձնաժողովի նիստին ներկա անդամների կեսից ավելին:

8. Հանձնաժողովի յուրաքանչյուր անդամ ունի մեկ ձայնի իրավունք և քվեարկում է կողմ կամ դեմ: Ձայների հավասարության դեպքում հանձնաժողովի նախագահի ձայնը վճռորոշ է:

9. Հանձնաժողովի նիստերը հրավիրվում են հանձնաժողովի նախագահի կողմից:

III. ՄՐՑՈՒՅԹԻ ԱՆՑԿԱՑՄԱՆ ՄԱՍԻՆ ՀՐԱՊԱՐԱԿԱՅԻՆ ԾԱՆՈՒՑՈՒՄԸ

10. Մրցույթի հայտեր ներգրավելու նպատակով Լեռնային Ղարաբաղի Հանրապետության արդարադատության նախարարության դատական ակտերի հարկադիր կատարման ծառայությունը (այսուհետ` կազմակերպիչ) առնվազն 500 օրինակ տպաքանակ ունեցող զանգվածային լրատվության միջոցով` մրցույթն սկսվելուց առնվազն 30 օր առաջ հրապարակում է ծանուցում մրցույթի անցկացման և պայմանների մասին` նշելով օրենքով նախատեսված տեղեկությունները:

IV. ՄՐՑՈՒՅԹԻ ԸՆԹԱՑԱԿԱՐԳԸ

11. Մրցույթի մասնակից է համարվում այն անձը, ով մրցույթի անցկացման մասին հայտարարության մեջ նշված ժամկետում` սահմանված կարգով հանձնաժողովին ներկայացրել է մրցույթի հայտը, որը ներառում է դիմումը, անձի պետական գրանցման վկայականի պատճենը, օրենքով սահմանված կարգով տրված` անշարժ գույքի գնահատում կատարելու լիցենզիայի պատճենը, իր կողմից նախկինում կատարված գնահատման աշխատանքների և գնահատման աշխատանքների օպերատիվ կազմակերպման հնարավորության մասին հակիրճ տեղեկանքը, ինչպես նաև մատուցվող ծառայությունների գնի վերաբերյալ առաջարկությունը: Մրցույթի հայտը ներկայացվում է անձի կողմից` սոսնձված, կնքված և (կամ) ստորագրված փակ ծրարով, որի վրա պետք է կատարվի «Չբացել մինչև մրցույթի հայտերի բացման նիստը» գրառումը:

12. Ծրարում ներառված փաստաթղթերը պետք է կազմված լինեն բնօրինակից և մրցույթի մասին հրապարակային ծանուցման մեջ նշված թվով կրկնօրինակներից, որոնց վրա համապատասխանաբար գրվում են «Բնօրինակ» և «Կրկնօրինակ» բառերը:

13. Մրցույթի հայտերը գրանցվում են առանձին գրանցամատյանում` ըստ ստացման հերթականության` ծրարի վրա նշելով գրանցման համարը, տարեթիվը, ամիսը, ամսաթիվը և ժամը:

14. Մրցույթին մասնակցելու իրավունք ունի օրենքով սահմանված կարգով անշարժ գույքի գնահատում իրականացնելու լիցենզիա ունեցող անձը:

15. Մրցույթի հայտերը բացելու նիստի օրը նշանակվում է մրցույթի հայտերի ընդունման վերջին օրվանից առնվազը 3 օր հետո` մրցույթի մասին հրապարակային ծանուցմամբ նախատեսված օրը և ժամին:

16. Մրցույթի մասնակիցների հայտերը քննարկվում են` ըստ դրանց գրանցման հերթականության:

17. Մրցույթի մասնակիցները և նրանց ներկայացուցիչները կարող են ներկա գտնվել մրցույթի հայտերի բացման, ինչպես նաև մրցույթի հայտերի ամփոփման նիստերին:

18. Հանձնաժողովի քարտուղարը բացում է մրցույթի հայտերը և դրանք ներկայացնում հանձնաժողովին:

19. Հանձնաժողովը ծանոթանում է մրցույթի մասնակիցների հայտերին և բաց քվեարկությամբ կատարում լավագույն առաջարկը ներկայացրած մրցույթի մասնակցի ընտրություն:

20. Ընտրությունը կատարվում է` հաշվի առնելով`

ա) անշարժ գույքի գնահատում իրականացնող լիցենզավորված անձի փորձը` տվյալ գործունեությամբ զբաղվելու ժամանակահատվածը, վերջին մեկ տարվա ընթացքում իրականացրած գնահատման ծրագրերի թիվը, գնահատողի գործունեության ընթացքում շահույթի առկայությունը.

բ) աշխատանքն օպերատիվ կազմակերպելու հնարավորությունները` գնահատողի աշխատանքային ժամերը, այդ թվում` ոչ աշխատանքային օրերին աշխատելու հնարավորությունը,

գնահատման պատվերի կատարման ամենակարճ ժամկետը,

գնահատողի գնահատող աշխատողների թիվը,

գնահատումն իրականացնելիս օգտագործվող տեխնիկական միջոցների առկայությունը.

գ) լիցենզիայի գործողության ժամկետը

դ) մատուցվող ծառայության գինը:

V. ՄՐՑՈՒՅԹՈՒՄ ՀԱՂԹՈՂ ՃԱՆԱՉԵԼԸ

21. Հանձնաժողովն իր նիստում ընդունում է որոշում սույն կարգի և պայմանների 20-րդ կետի համաձայն ընտրված լավագույն մասնակցին մրցույթում հաղթող ճանաչելու մասին և կազմում մրցույթի արդյունքների մասին արձանագրություն, որտեղ նշվում են օրենքով սահմանված տեղեկությունները:

22. Մրցույթի արդյունքներն ամփոփելու և մրցույթում հաղթողին ճանաչելու օրը կազմակերպիչն ու մրցույթի հաղթող ճանաչված մասնակիցն ստորագրում են մրցույթի արդյունքների մասին արձանագրությունը:

23. Արձանագրության ստորագրման օրվանից մեկ ամսվա ընթացքում մրցույթի հաղթողը կազմակերպչի հետ կնքում է ծառայությունների մատուցման մասին պայմանագիր` մեկ տարի ժամկետով:

24. Հանձնաժողովի որոշումը կարող է բողոքարկվել դատական կարգով:

VI. ՉԿԱՅԱՑԱԾ ԵՎ ԱՆՎԱՎԵՐ ՄՐՑՈՒՅԹՆԵՐԸ

25. Հանձնաժողովը մրցույթը հայտարարում է չկայացած, եթե`

ա) սահմանված ժամկետում ոչ մի հայտ չի ներկայացվել,

բ) ներկայացված հայտերից ոչ մեկը չի համապատասխանում մրցույթի մասին հրապարակային ծանուցման մեջ նշված պահանջներին, ինչպես նաև` եթե հայտեր ներկայացնելը չի համապատասխանել սույն կարգի և պայմանների ու մրցույթի մասին հրապարակային ծանուցման պահանջներին,

գ) արտակարգ իրավիճակների պատճառով անհնար է դառնում մրցույթով նախատեսված ծառայությունների մատուցումը:

26. Սույն կարգի և պայմանների պահանջների խախտմամբ կազմակերպված ու անցկացված մրցույթը դատական կարգով կարող է ճանաչել անվավեր:

27. Մրցույթն անվավեր ճանաչելը հանգեցնում է մրցույթի արդյունքների հիման վրա կնքած պայմանագրի անվավերությանը: