ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

ք.Ստեփանակերտ

Լեռնային Ղարաբաղի Հանրապետության պաշտպանության մարտերին մասնակցած անձանց մարտական գործողությունների մասնակցի կարգավիճակ տալու կարգի մասին

Ի կատարումն «Զինծառայողների և նրանց ընտանիքների անդամների սոցիալական ապահովության մասին» ԼՂՀ օրենքի 3-րդ հոդվածի 3-րդ մասի և 7-րդ հոդվածի 2-րդ մասի դրույթների` ԼՂՀ կառավարությունը որոշում է.

1. Մինչև ԼՂՀ պաշտպանության բանակի իրավաբանական կազմավորումը` 1992թ. սեպտեմբերի 1-ը, Լեռնային Ղարաբաղի Հանրապետության (նախկին Լեռնային Ղարաբաղի Ինքնավար Մարզի) պաշտպանության մարտերին մասնակցած անձանց ցուցակը ճշտելու և պատրաստելու նպատակով ստեղծել հանրապետական հանձնաժողով (կազմը կցվում է):

2. Հաստատել հանրապետական հանձնաժողովի աշխատանքների կազմակերպման կանոնակարգը (կցվում է):

3. ԼՂՀ պաշտպանության մարտերին մասնակցած անձանց մարտական գործողությունների մասնակցի կարգավիճակ տալ`

ա) մինչև ԼՂՀ պաշտպանության բանակի իրավաբանական կազմավորումը` 1992թ. սեպտեմբերի 1-ը, հիմք ընդունելով.

- ԼՂ Հանրապետական (տարածքային) զինկոմիսարիատի կողմից տրված տեղեկանքը, ժամկետների նշմամբ, հաստատված սույն որոշման առաջին կետով ստեղծված հանրապետական հանձնաժողովի կողմից.

- պաշտպանության մարտերին մասնակցած նախկին ինքնապաշտպանական ջոկատների ու խմբերի հրամանատարական կազմի կամ առնվազն 5 (հինգ) աչքի ընկած (այդ թվում` պետական պարգևատրումների ներկայացված) ազատամարտիկների կողմից տրված գրավոր վկայությունները` ժամկետների նշմամբ, հաստատված սույն որոշման առաջին կետով ստեղծված հանրապետական հանձնաժողովի կողմից.

բ) ԼՂՀ պաշտպանության բանակի իրավաբանական կազմավորումից` 1992թ. սեպտեմբերի 1-ից հետո:

- ԼՂՀ պաշտպանության մարտերին մասնակցած այն զինծառայողներին, որոնց պաշտպանության բանակի կողմից տրված է տեղեկանք, որը համապատասխանաբար հաստատված է ՊԲ-ի և վավերացված նշված հանձնաժողովի կողմից.

գ) ԼՂՀ ՆԳՆ աշխատակիցներին.

- ԼՂՀ պաշտպանության մարտերին մասնակցած այն աշխատակիցներին, որոնց ԼՂՀ ՆԳ նախարարի հրամանով ստեղծված հանձնաժողովի կողմից տրված է տեղեկանք (ժամկետների նշմամբ), որը համապատասխանաբար հաստատված է ԼՂՀ ՆԳ նախարարի և վավերացված հանրապետական հանձնաժողովի կողմից:

դ) ԼՂՀ ԱԱՊՎ համակարգի աշխատակիցներին.

- ԼՂՀ պաշտպանության մարտերին մասնակցած այն աշխատակիցներին, որոնց ԼՂՀ ԱԱՊ վարչության պետի հրամանով ստեղծված հանձնաժողովի կողմից տրված է տեղեկանք (ժամկետների նշմամբ), որը, համապատասխանաբար, հաստատված է ԼՂՀ ԱԱՊՎ պետի կողմից և վավերացված հանրապետական հանձնաժողովի կողմից:

4. Սահմանել, որ մարտական գործողությունների մասնակցի կարգավիճակ ստացած քաղաքացիների արտոնությունների տրամադրումը իրականացվում է կարգավիճակ ստանալու տարուն հաջորդող տարվա հունվարի 1-ից:

5. ԼՂՀ ֆինանսների նախարարությանը` սույն որոշման 4-րդ կետով նախատեսված արտոնությունների տրամադրման համար համապատասխան գումարներ նախատեսել համապատասխան տարվա պետական բյուջեի նախագծում:

6. Ուժը կորցրած ճանաչել ԼՂՀ կառավարության 1999թ. մարտի 16-ի թիվ 45 և 1999թ. սեպտեմբերի 14-ի թիվ 72 որոշումները:

1. Հանրապետական հանձնաժողովը (այսուհետև` հանձնաժողով) իր գործունեության ժամանակ առաջնորդվում է ԼՂՀ-ում գործող օրենսդրությամբ և սույն Կանոնակարգով:

2. Սույն Կանոնակարգը սահմանում է հանձնաժողովի գործունեության շրջանակները, խնդիրները և գործառույթները:

3. Հանձնաժողովն իրականացնում է ԼՂՀ պաշտպանության մարտերում զոհված, ինչպես նաև մասնակցած անձանց ցուցակների ճշգրտումը և վերջնական հաստատումը:

4. Հանձնաժողովի խնդիրներն ու գործառույթներն են`

ա) ԼՂՀ պաշտպանության մարտերին մասնակցած անձանց վերաբերյալ համապատասխան տեղեկությունների հավաքումը և ճշգրտումը.

բ) ԼՂՀ պաշտպանության մարտերին յուրաքանչյուր անձի մասնակցության կոնկրետ ժամկետների որոշումը.

գ) ԼՂՀ պաշտպանության մարտերին մասնակցած ազատամարտիկների (զոհված) ճշտված ցուցակների տրամադրումը ԼՂՀ պաշտպանության նախարարության սոցիալական բաժնին` ԼՂՀ գործող օրենսդրությամբ սահմանված արտոնությունները նրանց ընտանիքների վրա տարածելու նպատակով:

դ) ԼՂՀ պաշտպանության մարտերին մասնակցած անձանց մարտական գործողությունների մասնակցի կարգավիճակ տալու վերաբերյալ համապատասխան որոշում ընդունելը և սահմանված կարգով տեղեկանք տալը:

5. Հանձնաժողովն իր իրավասության շրջանակներում կարող է ընթացիկ աշխատանքներում ներգրավել ԼՂՀ պաշտպանության մարտերին մասնակցած նախկին ինքնապաշտպանական ջոկատների և խմբերի հրամանատարներին, ինչպես նաև աչքի ընկած մարտիկներին:

6. Կարգավիճակ տալու յուրաքանչյուր դեպքում հանձնաժողովը հարցերը քննարկում է կոլեգիալ (ժողովով) հիմունքներով, անհատական մոտեցման սկզբունքով:

Ընդ որում, մարտական գործողությունների ժամանակ վիրավորվելու հետևանքով հաշմանդամ դարձած անձանց կարգավիճակ է տրվում անկախ մարտական գործողություններին մասնակցելու ժամկետից:

7. Հանձնաժողովն անձի անունը, հայրանունը և ազգանունը ԼՂՀ պաշտպանության մարտերին մասնակցած անձանց ցուցակ է մտցնում (ցուցակները կազմվում են ըստ ՏԶԿ-րի) և մասնակցության կոնկրետ ժամկետների մասին որոշում է կայացնում` հիմք ընդունելով հանձնաժողովի առնվազն մեկ անդամի և ինքնապաշտպանական ջոկատների ու խմբերի հրամանատարական կազմի կամ առնվազն 5 (հինգ) աչքի ընկած (պետական պարգևատրումներին ներկայացված) ազատամարտիկների գրավոր վկայությունների դեպքում:

8. Հանձնաժողովը ԼՂՀ պաշտպանության մարտերին մասնակցած անձանց (զոհվածների համար` զոհվածի ընտանիքի անդամին) հատկացնում է համապատասխան տեղեկանք` նշելով նրանց մասնակցության (զոհվելու) կոնկրետ ժամկետները:

9. Հանձնաժողվն իր գործունեության արդյունքում պատրաստած` ԼՂՀ պաշտպանության մարտերին մասնակցած անձանց և այդ մարտերի ընթացքում զոհվածների վերջնական ցուցակները, համապատասխան գրավոր վկայությունները, հանձնաժողովի նիստերի արձանագրությունները վավերացված հանձնաժողովի անդամների ստորագրություններով, տրամադրվում է ԼՂՀ պաշտպանության նախարարության սոցիալական պաշտպանության բաժին:

10. Հիմնվելով նշված փաստաթղթերի վրա, ԼՂՀ պաշտպանության նախարարության սոցիալական պաշտպանության բաժինը տալիս է մարտական գործողությունների մասնակցի վկայականներ, որոնք էլ, իրենց հերթին, հիմք են հանդիսանում, սահմանված կարգով, համապատասխան արտոնություններից օգտվելու համար:

11. ԼՂՀ սահմաններից դուրս մարտական գործողություններին մասնակցած (կամ դրանցում զոհված) անձանց կարգավիճակը կարող է տրվել ԼՂՀ օրենսդրության և սույն կանոնակարգի համաձայն:

12. Հանձնաժողովի աշխատանքային մարմինն է հանդիսանում ԼՂՀ պաշտպանության նախարարության սոցիալական պաշտպանության բաժինը: