Ղեկավարվելով «Հանրակրթության մասին» Լեռնային Ղարաբաղի Հանրապետության օրենքի 30-րդ հոդվածի 1-ին մասի 6-րդ կետով`

ՀՐԱՄԱՅՈՒՄ ԵՄ

1. Հաստատել Լեռնային Ղարաբաղի Հանրապետության «Պետական ուսումնական հաստատություն» պետական ոչ առևտրային կազմակերպության կոլեգիալ կառավարման մարմնի` խորհրդի ձևավորման կարգը` համաձայն հավելվածի:

2. Լեռնային Ղարաբաղի Հանրապետության կրթության և գիտության նախարարության աշխատակազմի կրթության և գիտության վարչության պետ Ռ. Մուսայելյանին և իրավաբան Ա. Ապրեսյանին` սույն հրամանը սահմանված կարգով ներկայացնել Լեռնային Ղարաբաղի Հանրապետության արդարադատության նախարարություն` պետական գրանցման:

3. Սույն հրամանի կատարման վերահսկողությունը հանձնարարել նախարարի տեղակալ Ս. Ասրյանին:

Սույն կարգով կարգավորվում են Լեռնային Ղարաբաղի Հանրապետության «Պետական ուսումնական հաստատություն» պետական ոչ առևտրային կազմակերպության կոլեգիալ կառավարման մարմնի` խորհրդի ձևավորման հետ կապված հարաբերությունները:

1. Լեռնային Ղարաբաղի Հանրապետության «Պետական ուսումնական հաստատություն» պետական ոչ առևտրային կազմակերպություն (այսուհետ` Հաստատություն) հիմնվելու դեպքում Լեռնային Ղարաբաղի Հանրապետության կրթության և գիտության նախարարությունը, շրջանի վարչակազմի ղեկավարը և Ստեփանակերտի քաղաքապետը (այսուհետ` լիազորված մարմին) հաստատության հիմնադրման կամ խորհրդի ձևավորման կարգի փոփոխման դեպքերում 30-օրյա ժամկետում, սույն կարգի համաձայն, ըստ ենթակայության, կազմակերպում և ապահովում են ուսումնական հաստատություն կոլեգիալ կառավարման մարմնի (այսուհետ` Խորհուրդ) անդամների ընտրության գործընթացը:

2. Հաստատություններում` բացառությամբ Լեռնային Ղարաբաղի Հանրապետության կրթության և գիտության նախարարության (այսուհետ` Նախարարություն) ենթակայության հաստատությունների Խորհուրդը կազմվում է 8 անդամից:

3. Նախարարության ենթակայության հաստատությունների Խորհրդի կազմը բաղկացած է 7 անդամից:

4. Խորհրդի անդամներին առաջադրում են.

1) Լեռնային Ղարաբաղի Հանրապետության կրթության և գիտության նախարարը,

2) լիազորված մարմինը,

3) մանկավարժական խորհուրդը,

4) ծնողական խորհուրդը:

5. Շրջանային և Ստեփանակերտի քաղաքապետարանի ենթակայությամբ Հաստատություններում Լեռնային Ղարաբաղի Հանրապետության կրթության և գիտության նախարարը առաջադրում է Խորհրդի մեկ անդամ:

6. Նախարարության ենթակայության հաստատություններում Լեռնային Ղարաբաղի Հանրապետության կրթության և գիտության նախարարը առաջադրում է Խորհրդի 3 անդամ:

7. Լեռնային Ղարաբաղի Հանրապետության շրջանային ենթակայությամբ Հաստատություններում վարչակազմի ղեկավարը առաջադրում է Խորհրդի 3 անդամ, որից մեկին ներկայացնում է տեղական ինքնակառավարման մարմնի ղեկավարը:

8.Ստեփանակերտի քաղաքապետարանի ենթակայությամբ Հաստատությունների Խորհուրդներում Ստեփանակերտի քաղաքապետը առաջադրում է 3 անդամ:

9. Հաստատության մանկավարժական խորհուրդն իր կազմից փակ քվեարկությամբ տվյալ Հաստատությունում առնվազն 3 տարվա մանկավարժական գործունեության ստաժ ունեցող անդամներից ընտրում է Խորհրդի 2 անդամ:

10. Սույն կարգի 9-րդ կետով սահմանված ստաժի պայմանը չի գործում 3 տարուց պակաս գործող Հաստատության Խորհրդի անդամ ընտրելիս:

11. Հաստատության ծնողական խորհուրդն իր կազմից, փակ քվեարկությամբ ընտրում է Հաստատության Խորհրդի 2 անդամ:

12. Մասնագիտացված և հատուկ հանրակրթական հաստատությունների Խորհրդի կազմը ձևավորվում է համաձայն տվյալ տեսակի հաստատության կանոնադրության` Խորհրդում ընդգրկելով լիազորված մարմնի ներկայացուցիչներին:

13. Խորհրդի անդամի լիազորությունները, լիազորությունների դադարեցման հիմքերը, պարտավորությունները սահմանվում են Լեռնային Ղարաբաղի Հանրապետության օրենքներով և այլ իրավական ակտերով:

14. Հաստատության ենթակայության փոփոխության դեպքում լիազորված մարմնի կողմից առաջադրված Խորհրդի անդամների ընդգրկվածության համամասնությունը համապատասխանեցվում է սույն կարգի 5 րդ, 6-րդ, 7-րդ կամ 8-րդ կետերի պահանջներին:

15. Օրենքով սահմանված դեպքերում` Խորհրդի անդամի լիազորությունների դադարեցման դեպքում, նրան առաջադրող մարմինը 20-օրյա ժամկետում առաջադրում է նոր թեկնածու` համաձայն սույն կարգի:

16. Հաստատության տնօրենը չի կարող լինել տվյալ Հաստատության Խորհրդի կազմում:

17. Լիազորված մարմինը, հիմք ընդունելով Հաստատության մանկավարժական, ծնողական խորհուրդների որոշումները, 10-օրյա ժամկետում, ըստ ենթակայության` հաստատում է Խորհրդի անվանական կազմը կամ սույն կարգի պահանջների խախտման դեպքում` մերժում է Խորհրդի անվանական կազմում առաջարկված անձի կամ անձանց թեկնածությունը:

18. Խորհրդի առաջին նիստը վարում է Խորհրդի տարիքով ավագ անդամը:

19. Խորհուրդը փակ քվեարկությամբ ընտրում է Խորհրդի նախագահ` Խորհրդի անդամների ընդհանուր թվի ձայների մեծամասնությամբ.

1) ընտրությունը չկայանալու դեպքում եռօրյա ժամկետում անցկացվում է կրկնակի քվեարկություն,

2) կրկնակի քվեարկությամբ ընտրությունը չկայանալու դեպքում` ընտրված է համարվում առավել ձայն ստացած թեկնածուն: Այս պայմանի անհնարինության դեպքում վիճակահանությամբ որոշվում է Խորհրդի նախագահը: Վիճակահանությանը մասնակցում են առավել ձայն ստացած թեկնածուները:

20. Խորհրդի նիստերը գումարվում են Հաստատության կանոնադրությամբ նախատեսված ժամկետներում և դեպքերում` ըստ հաստատված ժամանակացույցի, խորհրդի նախագահի կողմից` սեփական նախաձեռնությամբ, ինչպես նաև լիազորված մարմնի, Հաստատության տնօրենի, կամ Խորհրդի անդամների 1/3-ի նախաձեռնությամբ: