ք.Ստեփանակերտ

«Իրավական ակտերի մասին» Լեռնային Ղարաբաղի Հանրապետության օրենքի 71-րդ հոդվածի համապատասխան՝

1. Լեռնային Ղարաբաղի Հանրապետության կրթության և գիտության նախարարի 2010 թվականի հոկտեմբերի 29-ի «Լեռնային Ղարաբաղի Հանրապետության «Պետական ուսումնական հաստատություն» պետական ոչ առևտրային կազմակերպության կոլեգիալ կառավարման մարմնի՝ խորհրդի ձևավորման կարգը հաստատելու մասին» N 139-Ն հրամանի վերնագրի և 1-ին կետի «Պետական ուսումնական հաստատություն» բառերը փոխարինել «Պետական հանրակրթական ուսումնական հաստատություն» բառերով:

2. Լեռնային Ղարաբաղի Հանրապետության կրթության և գիտության նախարարի 2010 թվականի հոկտեմբերի 29-ի «Լեռնային Ղարաբաղի Հանրապետության «Պետական ուսումնական հաստատություն» պետական ոչ առևտրային կազմակերպության կոլեգիալ կառավարման մարմնի՝ խորհրդի ձևավորման կարգը հաստատելու մասին» N 139-Ն հրամանով հաստատված հավելվածը շարադրել նոր խմբագրությամբ՝ համաձայն հավելվածի:

3. Լեռնային Ղարաբաղի Հանրապետության կրթության և գիտության նախարարության աշխատակազմի կրթության և գիտության վարչությանը՝ սույն հրամանը սահմանված կարգով ներկայացնել Լեռնային Ղարաբաղի Հանրապետության արդարադատության նախարարություն՝ պետական իրավական փորձաքննության և պետական գրանցման նպատակով:

4. Սույն հրամանն ուժի մեջ է մտնում պաշտոնական հրապարակման օրվան հաջորդող տասներորդ օրը:

Սույն կարգով կարգավորվում են Լեռնային Ղարաբաղի Հանրապետության «Պետական հանրակրթական ուսումնական հաստատություն» պետական ոչ առևտրային կազմակերպության կոլեգիալ կառավարման մարմնի` խորհրդի ձևավորման հետ կապված հարաբերությունները։

1. Լեռնային Ղարաբաղի Հանրապետության «Պետական հանրակրթական ուսումնական հաստատություն» պետական ոչ առևտրային կազմակերպություն (այսուհետ` հաստատություն) հիմնվելու դեպքում Լեռնային Ղարաբաղի Հանրապետության կրթության և գիտության նախարարը (այսուհետ՝ նախարար), շրջանի վարչակազմը և Ստեփանակերտի քաղաքապետարանը (այսուհետ՝ լիազորված մարմին) հաստատության հիմնադրման կամ հաստատության կոլեգիալ կառավարման մարմնի՝ խորհրդի ձևավորման կարգի փոփոխման դեպքերում երեսնօրյա ժամկետում, սույն կարգի համաձայն, ըստ ենթակայության` կազմակերպում և ապահովում են կոլեգիալ կառավարման մարմնի (այսուհետ` խորհուրդ) անդամների ընտրության գործընթացը:

2. Հաստատություններում խորհուրդը կազմվում է ութ անդամից:

3. Խորհրդի անդամներին առաջադրում են՝

1) նախարարը.

2) լիազորված մարմինը.

3) մանկավարժական խորհուրդը.

4) ծնողական խորհուրդը:

4. Լեռնային Ղարաբաղի Հանրապետության շրջանի վարչակազմերի և Ստեփանակերտի քաղաքապետարանի ենթակայության հաստատություններում նախարարը առաջադրում է խորհրդի մեկ անդամ:

5. Լեռնային Ղարաբաղի Հանրապետության կրթության և գիտության նախարարության (այսուհետ՝ նախարարություն) ենթակայության հաստատություններում նախարարը առաջադրում է խորհրդի երեք անդամ, Լեռնային Ղարաբաղի Հանրապետության շրջաններում և Ստեփանակերտ քաղաքում` լիազորված մարմինը մեկական անդամ:

6. Լեռնային Ղարաբաղի Հանրապետության շրջանի վարչակազմի ենթակայության հաստատություններում լիազորված մարմինը առաջադրում է խորհրդի երեք անդամ, որոնց մեկին ներկայացնում է տեղական ինքնակառավարման մարմնի ղեկավարը:

7. Ստեփանակերտի քաղաքապետարանի ենթակայության հաստատությունների խորհուրդներում լիազորված մարմինը առաջադրում է երեք անդամ:

8. Հաստատության մանկավարժական խորհուրդը իր կազմից փակ քվեարկությամբ տվյալ Հաստատությունում առնվազն երեք տարվա մանկավարժական գործունեության ստաժ ունեցող անդամներից ընտրում է խորհրդի երկու անդամ:

9. Սույն կարգի 8-րդ կետով սահմանված ստաժի պայմանը չի գործում երեք տարուց պակաս գործող հաստատության խորհրդի անդամ ընտրելիս:

10. Հաստատության ծնողական խորհուրդը իր կազմից փակ քվեարկությամբ ընտրում է հաստատության խորհրդի երկու անդամ:

11. Հաստատության խորհրդի կազմում չի կարող առաջադրվել այն ծնողը, ով միաժամանակ հանդիսանում է տվյալ հաստատության մանկավարժ:

12. Խորհրդի անդամի լիազորությունները, լիազորությունների դադարեցման հիմքերը, պարտավորությունները սահմանվում են Լեռնային Ղարաբաղի Հանրապետության օրենքներով և այլ իրավական ակտերով:

13. Հաստատության ենթակայության փոփոխության դեպքում լիազորված մարմնի կողմից առաջադրված խորհրդի անդամների ընդգրկվածության համամասնությունը համապատասխանեցվում է սույն կարգի 4-րդ, 5-րդ, 6-րդ կամ 7-րդ կետերի պահանջներին:

14. Օրենքով սահմանված դեպքերում` խորհրդի անդամի լիազորությունների դադարեցման դեպքում նրան առաջադրող մարմինը քսանօրյա ժամկետում առաջադրում է նոր թեկնածու` համաձայն սույն կարգի:

15. Հաստատության տնօրենը չի կարող լինել տվյալ հաստատության խորհրդի կազմում:

16. Լիազորված մարմինը հիմք ընդունելով հաստատության մանկավարժական և ծնողական խորհուրդների որոշումները, տասնօրյա ժամկետում, ըստ ենթակայության` հաստատում է խորհրդի անվանական կազմը կամ սույն կարգի պահանջների խախտման դեպքում` մերժում է խորհրդի անվանական կազմում առաջարկված անձի կամ անձանց թեկնածությունը:

17. Խորհրդի առաջին նիստը վարում է տարիքով ավագ խորհրդի անդամը:

18. Խորհուրդը փակ քվեարկությամբ ընտրում է խորհրդի նախագահ` խորհրդի անդամների ընդհանուր թվի ձայների մեծամասնությամբ:

Ընտրությունը չկայանալու դեպքում եռօրյա ժամկետում անցկացվում է կրկնակի քվեարկություն: Կրկնակի քվեարկությամբ ընտրությունը չկայանալու դեպքում` ընտրված է համարվում առավել ձայն ստացած թեկնածուն:

Այս պայմանի անհնարինության դեպքում վիճակահանությամբ որոշվում է խորհրդի նախագահը: Վիճակահանությանը մասնակցում են առավել ձայն ստացած թեկնածուները:

19. Խորհրդի նիստերը գումարվում են հաստատության կանոնադրությամբ նախատեսված ժամկետներում և դեպքերում` ըստ հաստատված ժամանակացույցի, ինչպես նաև խորհրդի նախագահի կողմից` սեփական նախաձեռնությամբ, լիազորված մարմնի, հաստատության տնօրենի կամ խորհրդի անդամների մեկ երրորդի նախաձեռնությամբ:»: