ԱՐՑԱԽԻ ՀԱՆՐԱՊԵՏՈՒԹՅԱՆ ԿՐԹՈՒԹՅԱՆ, ԳԻՏՈՒԹՅԱՆ,

ՄՇԱԿՈՒՅԹԻ ԵՎ ՍՊՈՐՏԻ ՆԱԽԱՐԱՐ

Հ Ր Ա Մ Ա Ն

ք.Ստեփանակերտ

ԱՐՑԱԽԻ ՀԱՆՐԱՊԵՏՈՒԹՅԱՆ ԿՐԹՈՒԹՅԱՆ, ԳԻՏՈՒԹՅԱՆ, ՄՇԱԿՈՒՅԹԻ ԵՎ

ՍՊՈՐՏԻ ՆԱԽԱՐԱՐԻ 2021 ԹՎԱԿԱՆԻ ՆՈՅԵՄԲԵՐԻ 15-Ի N 640-Ն ՀՐԱՄԱՆՈՒՄ

ՓՈՓՈԽՈՒԹՅՈՒՆ ԿԱՏԱՐԵԼՈՒ ՄԱՍԻՆ

Հիմք ընդունելով «Նորմատիվ իրավական ակտերի մասին» օրենքի 37-րդ հոդվածը՝

ՀՐԱՄԱՅՈՒՄ ԵՄ՝

1. Արցախի Հանրապետության կրթության, գիտության, մշակույթի և սպորտի նախարարի 2021 թվականի նոյեմբերի 15-ի «Հանրակրթական ծրագրեր իրականացնող ուսումնական հաստատություններում երկարօրյա ուսուցման կազմակերպման կարգը սահմանելու մասին» N 640-Ն հրամանով սահմանված հավելվածը շարադրել նոր խմբագրությամբ՝ համաձայն հավելվածի:

2. Սույն հրամանն ուժի մեջ է մտնում պաշտոնական հրապարակմանը հաջորդող օրվանից:

ԿԱՐԳ

ՀԱՆՐԱԿՐԹԱԿԱՆ ԾՐԱԳՐԵՐ ԻՐԱԿԱՆԱՑՆՈՂ ՈՒՍՈՒՄՆԱԿԱՆ

ՀԱՍՏԱՏՈՒԹՅՈՒՆՆԵՐՈՒՄ ԵՐԿԱՐՕՐՅԱ ՈՒՍՈՒՑՄԱՆ ԿԱԶՄԱԿԵՐՊՄԱՆ

1. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով կարգավորվում են հանրակրթական ծրագրեր իրականացնող ուսումնական հաստատություններում (այսուհետ՝ Հաստատություն) երկարօրյա ուսուցման կազմակերպման հետ կապված հարաբերությունները:

2. Հաստատությունում երկարօրյա ուսուցման կազմակերպումը ծառայում է «Հանրակրթության մասին» օրենքից բխող համակողմանիորեն զարգացած անձի ձևավորման կրթադաստիարակչական նպատակին: Հաստատության երկարօրյա ուսուցումն իրականացվում է սովորողների ուսումնադաստիարակչական աշխատանքներում ընտանիքին համակողմանի օգնություն ցուցաբերելու, դասապատրաստումներին աջակցելու, ինքնուրույն սովորելու կարողություններ և ստեղծագործական ունակություններ զարգացնելու, կրթական հավասար հնարավորություններ ապահովելու և մանկավարժական համապարփակ մոտեցման միջոցով սովորողների ու նրանց ընտանիքի զբաղվածության և այլ կարիքներին արդյունավետ արձագանքելու նպատակով:

3. Երկարօրյա ուսուցումը կազմակերպվում է աշակերտների երկարօրյա ուսուցման խմբերում (այսուհետ՝ Երկարօրյա խմբեր) անհրաժեշտ աշխատակազմի ներգրավմամբ և համակարգվում է տվյալ Հաստատության փոխտնօրենի կողմից կամ տնօրենի նշանակած այլ պատասխանատու աշխատակցի կողմից:

4. Հաստատությունում Երկարօրյա խմբերի կազմակերպման հիմնական խնդիրներն են՝

1) Հաստատության ուսումնանյութական բազայի հիման վրա երեխայի կրթական աջակցության և նրա անհատական ու սոցիալական նախադրյալներին համապատասխան ուսուցման և ժամանցի գործընթացի կազմակերպումը.

2) տարբեր առարկաներ դասավանդող ուսուցիչների և երկարօրյա ուսուցման պատասխանատու մանկավարժների միջև հետադարձ կապի միջոցով կրթության արդյունավետության բարձրացումը.

3) տվյալ համայնքում բնակվող տարբեր մասնագետներին և մանկավարժներին, կամավորական հիմունքներով, դպրոցում գիտելիքի և հմտությունների փոխանցման գործընթացին ներգրավումը.

4) արտադասարանական աշխատանքներին սովորողների ակտիվ մասնակցության ապահովման միջոցով երեխայի ստեղծագործական ընդունակությունների զարգացումը.

5) արտադպրոցական գործընկերների հետ համագործակցությամբ արտադպրոցական ուսուցման հնարավորությունների բացահայտումը և օգտագործումը.

6) ուսումնական գործընթացի և մասնագիտական կողմնորոշման միջև փոխադարձ կապերի ստեղծումը.

7) երկարօրյա ուսուցման և դպրոցական առօրյայի ձևավորման գործում սովորողների մասնակցության և անձնական պատասխանատվության խթանումը.

8) երկարօրյա ուսուցման ձևավորմանը սովորողի ծնողի (օրինական ներկայացուցչի) ներգրավումը:

2. ԵՐԿԱՐՕՐՅԱ ՈՒՍՈՒՑՄԱՆ ԾՐԱԳՐԻ ՄԱՆԿԱՎԱՐԺԱԿԱՆ ՀԱՅԵՑԱԿԱՐԳԸ

5. Յուրաքանչյուր Հաստատություն ձևակերպում է երկարօրյա ուսուցման սեփական մանկավարժական հայեցակարգ, որը քննարկվում և հավանության է արժանանում տվյալ Հաստատության մանկավարժական խորհրդում: Հայեցակարգի մշակման փուլում հաշվի են առնվում համայնքում առկա ուսուցման ու ժամանցային հնարավորությունները և ներգրավվում են Հաստատության մանկավարժական խորհուրդը, ծնողական ու աշակերտական խորհուրդները, ինչպես նաև այլ խորհրդակցական մարմիններ, տեղական ինքնակառավարման մարմնի, կրթամշակութային կազմակերպությունների, արտադասարանական խմբակների ներկայացուցիչներ և Հաստատության արտադպրոցական գործընկերներ: Մանկավարժական հայեցակարգում ներառվում են հետևյալ հարցերը.

1) ուսուցման գործընթացի և սովորել սովորելու մշակույթի զարգացումը.

2) սովորողի անհատական կարիքներին արձագանքումը.

3) դպրոցում ուսումնափորձարարական հնարավորությունների ընդլայնումը.

4) սովորողների և ծնողների մասնակցությունը.

5) ժամանցի հնարավորությունների ստեղծումը.

6) հաստատության համագործակցությունը արտադպրոցական գործընկերների հետ.

7) համընդհանուր ներառման գործընթացի իրականացում:

6. Երկարօրյա ուսուցումը ձևավորվում է բազմազան տարրերից, որոնք բխում են տվյալ Հաստատության մանկավարժական հայեցակարգից: Երկարօրյա ուսուցումն ու երկարօրյա խմբերի աշխատանքների կարգացուցակը (այսուհետ՝ կարգացուցակ) պետք է ներդաշնակ լինեն Հաստատության ամբողջական դասացուցակին և ռեժիմին:

3. ՀԱՍՏԱՏՈՒԹՅԱՆ ԵՐԿԱՐՕՐՅԱ ԽՄԲԵՐԻ ԿԱԶՄԱԿԵՐՊՈՒՄԸ

7. Երկարօրյա ուսուցումը նախատեսված է երկարօրյա ուսուցում կազմակերպող Հաստատության 1-ին աստիճանի տարրական (այսուհետ՝ տարրական) և 2-րդ աստիճանի միջին (այսուհետ՝ միջին) դպրոցների բոլոր աշակերտների համար: 500-ից ավելի աշակերտ ունեցող Հաստատություններում երկարօրյա ուսուցումը կարող է կազմակերպվել տարբերակված եղանակով: Ավագ Հաստատության աշակերտները կարող են մասնակցել երկարօրյա ուսուցման առանձին նախագծերին, մասնագիտական կողմնորոշմանն ուղղված ուսումնական ծրագրերին և ներգրավվել երկարօրյա աշխատանքներում: Երկարօրյա ուսուցումը իրականացվում է հնգօրյա տևողությամբ՝ անկախ դպրոցի հնգօրյա կամ վեցօրյա լինելուց, և տևում է ըստ կրթական աստիճանների, ուսումնական պլանով նախատեսված դասերի ավարտից I-IV դասարանցիների համար առնվազն մինչև ժամը 16:45-ը, V-IX դասարանցիների համար առնվազն մինչև ժամը 17:30-ը: Եղանակային կամ այլ անհաղթահարելի պայմանների առկայության դեպքում հնարավոր են բացառություններ:

8. Երկարօրյա խմբերում աշակերտների ընդունելությունը ձևակերպվում է համաձայն «Հանրակրթության մասին» օրենքի 16-րդ հոդվածի 1-ին մասի:

9. Երկարօրյա խմբերը ձևավորվում են ըստ կրթական աստիճանի (տարրական և (կամ) միջին դպրոց, ինչպես նաև հնարավոր է ավագ դպրոց) կամ ըստ զուգահեռ դասարանների: Անհրաժեշտության դեպքում կարող են ձևավորվել տարատարիք խմբեր:

10. Երկարօրյա խմբերի կազմը, դրանց հետ աշխատող մանկավարժական աշխատողների անվանական կազմը, աշխատանքի տարեկան պլանը և ուսումնադաստիարակչական աշխատանքների կարգացուցակը ձևավորվում են երկարօրյա ուսուցումը համակարգող փոխտնօրենի կամ տնօրենի նշանակած այլ պատասխանատու աշխատակցի կողմից՝ սույն կարգի 5-րդ կետում նշված մանկավարժական հայեցակարգին համապատասխան և հաստատվում են Հաստատության տնօրենի հրամանով:

11. Երկարօրյա ուսուցման կազմակերպման համար հաշվի են առնվում Հաստատությունում ուսումնական պլաններին համապատասխան գործող դասացուցակը, սովորողների տարիքային և անհատական առանձնահատկությունները, սանիտարահիգիենիկ կանոնների նորմատիվների պահանջները: Կարգացուցակում նշվում են սովորողների դասապատրաստման, սննդի, հանգստի, ըստ անհրաժեշտության անհատական աշխատանքների, զբոսանքի, էքսկուրսիաների և խմբակներում ընդգրկված սովորողների անվանական կազմը, խմբակի աշխատանքի ժամերը, աշխատանքների իրականացման համար պատասխանատու մանկավարժական աշխատողների անունները:

12. Կարգացուցակում փոփոխություններ կարող են կատարվել Հաստատության տնօրենի հրամանով:

13. Կարգացուցակով իրականացված աշխատանքները, ինչպես նաև խմբում ընդգրկված սովորողների հաճախումները գրանցվում են մատյանում:

14. Հաստատության Երկարօրյա խմբերը ձևավորվում են մինչև ընթացիկ ուսումնական տարվա սեպտեմբերի 10-ը և համալրվում են տարվա ընթացքում:

15. Երկարօրյա խմբերի ռեժիմը (պարապմունքներ, միջոցառումներ, հանգիստ, սննդի կազմակերպում) չի կարող գերազանցել 24 ակադեմիական ժամ տարրական, 20 ակադեմիական ժամ՝ միջին դպրոցների սովորողների համար:

16. Երկարօրյա բոլոր խմբերում դասապատրաստմանը օրական հատկացվում է 2 ակադեմիական դասաժամ:

17. Հաստատության Երկարօրյա խմբերում մանկավարժական աշխատողի մեկ դրույքի լրիվ ծանրաբեռնվածությունը (աշխատանքի ծավալը) չի կարող գերազանցել շաբաթական 22 ակադեմիական ժամը:

18. Երկարօրյա խմբերը ըստ դասարանների կամ կրթական աստիճանի կազմավորելիս մանկավարժական աշխատողի համար սահմանվում է վճար տվյալ խմբի համար կարգացուցակով սահմանված աշխատանքների դասաժամերի չափով: Երկարօրյա խմբերի հետ աշխատող մանկավարժական աշխատողի վճարի չափը ձևավորվում է սովորողների հետ աշխատակարգով սահմանված փաստացի աշխատաժամանակից (մինչև 22 ակադեմիական ժամ):

19. Երկարօրյա խմբերի սովորողները օգտվում են Հաստատության գրադարանից, ընթերցասրահից, լաբորատորիաներից և ուսումնական այլ ռեսուրսներից:

20. Հաստատության Երկարօրյա խմբերում աշխատողների և սովորողների իրավունքներն ու պարտականությունները սահմանվում են Հաստատության կանոնադրությամբ, ներքին կարգապահական կանոններով և սույն կարգով:

21. Հաստատության Երկարօրյա խմբի ղեկավարի պարտականությունների մեջ են մտնում սովորողների արտադասարանական և արտադպրոցական, կրթադաստիարակչական ու առողջարարական միջոցառումների կազմակերպումը, ինչպես նաև սովորողների ինքնուրույն աշխատանքի համար պայմանների ապահովումը, անհրաժեշտության դեպքում սովորողներին անհատական օգնության ցուցաբերումը: Երկարօրյա խմբի ղեկավարը պատասխանատվություն է կրում երեխաների կյանքի և առողջության պահպանման, երկարօրյա ժամանակահատվածում կրթադաստիարակչական աշխատանքի որակի և դպրոցի ներքին կանոնակարգի աշխատանքային ռեժիմի պահպանման համար:

22. Հաստատության Երկարօրյա խմբերի աշխատանքների կազմակերպման, սովորողների կյանքի և առողջության պահպանման, հանգստի ապահովման համար պատասխանատու են Երկարօրյա խմբերի ղեկավարները: Երկարօրյա խմբերի աշխատանքների կանոնակարգման համար պատասխանատու է Հաստատության փոխտնօրենի կողմից կամ տնօրենի նշանակած այլ պատասխանատու աշխատակիցը:

23. Երկարօրյա ուսուցման վերահսկողության համար պատասխանատու է Հաստատության տնօրենը:

24. Երկարօրյա խմբերի ուսումնադաստիարակչական աշխատանքների իրականացման, սովորողների հաճախումների ապահովման համար պատասխանատու են մանկավարժական աշխատողներն ու սովորողների ծնողները:

4. ԵՐԿԱՐՕՐՅԱ ԾՐԱԳՐԻ ՄԱՆԿԱՎԱՐԺԱԿԱՆ ԱՇԽԱՏԱԿԱԶՄԸ

25. Երկարօրյա խմբում ընդգրկված սովորողների թիվը մինչև 30 է, իսկ առավելագույն խտությունը չի կարող գերազանցել 35-ը: Երկարօրյա ուսուցման իրականացման նպատակով յուրաքանչյուր Հաստատության համար նախատեսվում է մանկավարժական աշխատողների դրույքների համալրում ըստ 1-ից 9-րդ դասարաններում սովորողների թվաքանակի՝

1) մինչև 35 սովորողի դեպքում՝ մեկ դրույք (նվազագույն դրույք).

 2) հաջորդող 1-35 սովորողի ավելանալու դեպքում՝ ևս մեկ դրույք:

26. Երկարօրյա ուսուցման մանկավարժական աշխատողների դրույքը համապատասխանում է դասավանդողի համար նախատեսված դրույքին, որը համադրելի է Լեռնային Ղարաբաղի Հանրապետության կառավարության 2010 թվականի փետրվարի 23-ի N 80-Ն որոշման հավելվածի 12-րդ կետով սահմանված հանրակրթական ուսումնական հաստատության դասավանդողների աշխատաժամանակի (կողմնորոշիչ աղյուսակով) շաբաթական ծանրաբեռնվածությանը:

27. Երկարօրյա ուսուցման մանկավարժական աշխատողների նվազագույն դրույք ունեցող Հաստատությունում այդ հաստիքները կարող են բաժանվել տարրական դպրոցներում նվազագույնը 0,5 հաստիքի, իսկ միջին դպրոցներում այդ ժամերը կարող են բաժանվել ըստ առարկաների: Հնարավորության դեպքում ցանկալի են ամբողջական կամ առնվազն 0,5 դրույքներ:

28. Երկարօրյա ուսուցման մանկավարժական աշխատողների ընտրությունը կատարվում է Արցախի Հանրապետության կրթության, գիտության, մշակույթի և սպորտի նախարարության կողմից, համաձայն՝ «Հանրակրթության մասին» օրենքի 26-րդ հոդվածի 1-ին մասի և Հաստատության ուսուցչի (դաստիարակի) թափուր տեղի համար մրցույթի օրինակելի կարգի: Նախապատվությունը տրվում է տվյալ Հաստատությունում դեռևս չաշխատող մանկավարժական աշխատողներին: Տվյալ Հաստատության աշխատողներ չհանդիսացող մանկավարժական աշխատողների ներգրավման անհնարինության դեպքում կարող են ներգրավվել Հաստատությունում աշխատող ուսուցիչներ:

29. Հաստատության Երկարօրյա խմբերի աշխատանքների կազմակերպման համար պաշտոնային դրույքաչափի 15%-ի չափով հավելավճար ստանում են Հաստատության տնօրենը, տնօրենի նշանակած պատասխանատու աշխատողը (Տնօրենի մասնագիտացված կրթական աջակցությունների գծով տեղակալը, դաստիարակչական աշխատանքների կազմակերպիչը կամ մանկավարժական այլ աշխատող), դպրոցի տնտեսական աշխատանքների գծով տեղակալը (տնտեսվարը):

 Այն դպրոցներում, որտեղ միաժամանակ գործում են և՛ երկարօրյա, և՛ նախադպրոցական խմբեր, դպրոցի տնօրենի և տնտեսական աշխատանքների գծով տեղակալի (տնտեսվարի) համար սահմանվում է հավելավճար պաշտոնային դրույքաչափի 20%-ի չափով:

5. ԵՐԿԱՐՕՐՅԱ ԽՄԲԵՐՈՒՄ ՍՆՆԴԻ ԿԱԶՄԱԿԵՐՊՄԱՆ ԱՊԱՀՈՎՈՒՄԸ

30. Երկարօրյա խմբերում երեխաների համար կազմակերպվում են երկանգամյա սնունդ (ճաշ և ետճաշիկ): Ճաշի համար նախատեսվում է առնվազն 30 րոպե: Ճաշի և ետճաշիկի միջև ընկած ժամանակահատվածը չպետք է գերազանցի երեքից-չորս ժամը՝ ելնելով տարիքային առանձնահատկություններից:

 31. Երկարօրյա իրականացման նպատակով յուրաքանչյուր հաստատության համար նախատեսվում է խոհանոցային աշխատողների հաստիքներ, հաշվի առնելով երկարօրյա ուսուցման խմբերում ընդգրկված 1-ից 9-րդ դասարաններում սովորողների թվաքանակի՝

1) մինչև 35 սովորողի դեպքում՝ մեկ դրույք

2) 36-ից 70 սովորողի դեպքում՝ երկու դրույք

3) 71-ից 100 սովորողի դեպքում՝ երեք դրույք

4) 101-ից 200 սովորողի դեպքում՝ չորս դրույք

5) 201-ից 300 սովորողի դեպքում՝ հինգ դրույք

6) 301-ից 500 սովորողի դեպքում՝ վեց դրույք

7) 501-ից 1000 սովորողի դեպքում՝ յոթ դրույք

8) 1001-ից ավելի սովորողի դեպքում ութ դրույք:

32. Խոհանոցային բոլոր աշխատողները նախապես պարտավոր են մասնակցել Արցախի Հանրապետության կրթության, գիտության, մշակույթի և սպորտի նախարարության կողմից իրականացվող «Դպրոցական սննդի պատրաստում» գործնական դասընթացին և ստանալ համապատասխան վկայական, ինչպես նաև սահմանված կարգով անցնել առողջական վիճակի պարտադիր նախնական և պարբերական բժշկական (սանիտարահիգիենիկ) զննություն: «Դպրոցական սննդի պատրաստում» դասընթացը թույլ է տալիս խոհանոցային աշխատողներին դպրոցական սննդի կազմակերպման ժամանակ փոխադարձաբար փոխարինել միմյանց:

33. Հաստատության տնօրենի հրամանով խոհանոցային աշխատողների կազմից նշանակվում է խոհանոցի պատասխանատու՝ հիմք ընդունելով մասնագիտական կրթությունը և փորձը:

34. Խոհանոցային աշխատողների աշխատաժամանակը սահմանվում է ըստ Աշխատանքային օրենսգրքի:

35. Խոհանոցային աշխատողների դրույքը համապատասխանում է նվազագույն աշխատավարձի համար նախատեսված դրույքին:

36. Խոհանոցային աշխատողների սանիտարական վիճակի վերահսկողության և սովորողների բուժսպասարկման աշխատանքները իրականացվում են համապատասխան բժշկական ծառայությունների միջոցով:»:

Պաշտոնական հրապարակման օրը՝ 17 հոկտեմբերի 2022 թվական