ԱՐՑԱԽԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ք. Ստեփանակերտ

ԱՐՑԱԽԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2023 ԹՎԱԿԱՆԻ

ՓԵՏՐՎԱՐԻ 13-Ի N 70-Ն ՈՐՈՇՄԱՆ ՄԵՋ ԼՐԱՑՈՒՄՆԵՐ

ԿԱՏԱՐԵԼՈՒ ՄԱՍԻՆ

Հիմք ընդունելով «Նորմատիվ իրավական ակտերի մասին» օրենքի 37-րդ հոդվածը՝ Արցախի Հանրապետության կառավարությունը որոշում է.

1. Արցախի Հանրապետության կառավարության 2023 թվականի փետրվարի 13-ի «Ապրանքների շրջանառության, այդ թվում՝ իրացման գների ձևավորման և պետական մարմինների կողմից վերահսկման հատուկ կարգ սահմանելու մասին» N 70-Ն որոշմամբ սահմանված հատուկ կարգը լրացնել հետևյալ բովանդակությամբ նոր՝ 24-րդ, 25-րդ, 26-րդ և 27-րդ կետերով.

«24. Շրջայց իրականացնող անձը, խախտման կրկնությունը բացառելու համար սույն կարգի խախտում թույլ տված տնտեսավարող սուբյեկտից հարկադրաբար վերցնում է իրացվող ապրանքը:

25. Հարկադրաբար վերցված ապրանքի դիմաց տնտեսավարող սուբյեկտին տրվում է տվյալ ապրանքի համար սահմանված գնի չափով հատուցում:

26. Ապրանքը հարկադրաբար վերցնելու մասին կազմվում է արձանագրություն, որում նշում է կատարվում տնտեսավարող սուբյեկտի, հարկադրաբար վերցված ապրանքի բնութագրիչ տվյալների /քանակ, կշիռ, անվանում, տեսակ և այլն/, վերցված ապրանքի դիմաց փոխհատուցման չափի ու եղանակի վերաբերյալ, որը ստորագրում է շրջայց իրականացնողը և տնտեսավարող սուբյեկտի ներկայացուցիչը: Վերջինիս կողմից արձանագրությունը ստորագրելուց հրաժարվելու դեպքում այդ մասին նշում է կատարվում արձանագրության մեջ:

27. Հարկադրաբար վերցված ապրանքը անհապաղ հանձնվում է «Պրոդ Սերվիս» սահմանափակ պատասխանատվությամբ ընկերությանը՝ սահմանված գնով բնակչությանը իրացնելու համար:»:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Պաշտոնական հրապարակման օրը՝ 26 հուլիսի 2023 թվական: