ԱՐՑԱԽԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ք. Ստեփանակերտ

ԱՊՐԱՆՔՆԵՐԻ ՇՐՋԱՆԱՌՈՒԹՅԱՆ, ԱՅԴ ԹՎՈՒՄ՝ ԻՐԱՑՄԱՆ ԳՆԵՐԻ

ՁԵՎԱՎՈՐՄԱՆ ԵՎ ՎԵՐԱՀՍԿՄԱՆ ՀԱՏՈՒԿ ԿԱՐԳ ՍԱՀՄԱՆԵԼՈՒ ՄԱՍԻՆ

Հիմք ընդունելով «Ռազմական դրության իրավական ռեժիմի մասին» օրենքի 11-րդ հոդվածի 1-ին մասի 3-րդ կետը` Արցախի Հանրապետության կառավարությունը որոշում է.

1. Սահմանել ապրանքների շրջանառության, այդ թվում՝ իրացման գների ձևավորման և վերահսկման հատուկ կարգ (այսուհետ՝ Կարգ)՝ համաձայն հավելվածի:

2. Կարգի 11-րդ կետում նշված մարմիններին՝ տնտեսավարող սուբյեկտներին իրազեկել Կարգի դրույթների վերաբերյալ:

3. Արցախի Հանրապետության ներքին գործերի նախարարությանը՝ համակողմանի աջակցություն ցուցաբերել Կարգով սահմանված մարմինների գործառույթների իրականացմանը:

4. Սույն որոշումն ուժի մեջ է մտնում հրապարակվելուց հետո՝ անմիջապես:

ՀԱՏՈՒԿ ԿԱՐԳ

ԱՊՐԱՆՔՆԵՐԻ ՇՐՋԱՆԱՌՈՒԹՅԱՆ, ԱՅԴ ԹՎՈՒՄ՝ ԻՐԱՑՄԱՆ

ԳՆԵՐԻ ՁԵՎԱՎՈՐՄԱՆ ԵՎ ՎԵՐԱՀՍԿՄԱՆ

1. Ապրանքների շրջանառության, այդ թվում՝ իրացման գների ձևավորման և վերահսկման հատուկ կարգով (այսուհետ՝ Կարգ) սահմանվում են Արցախի Հանրապետությունում ապրանքների շրջանառության, այդ թվում՝ իրացման գների ձևավորման և վերահսկման կանոնակարգման հետ կապված հարաբերությունները:

2. Արցախի Հանրապետության Նախագահի 2022 թվականի դեկտեմբերի 13-ի ՆՀ-1792-Ն հրամանագրով ստեղծված Օպերատիվ շտաբի կողմից որոշված ապրանքները մատակարարող սուբյեկտների ընտրության գործընթացն ապահովվում է Արցախի Հանրապետության կառավարության համապատասխան որոշմամբ սահմանված կարգով:

3. Արցախի Հանրապետության գյուղի և գյուղատնտեսության աջակցման հիմնադրամը (այսուհետ՝ Հիմնադրամ) ստուգում է մատակարարված ապրանքների համապատասխանությունն Արցախի Հանրապետության կառավարության համապատասխան որոշմամբ սահմանված կարգով անցկացված մրցույթի պայմաններին և ապահովում դրանց պահեստավորումը:

4. Հիմնադրամն իր մոտ առկա և մատակարարման ենթակա ապրանքների մասին տեղեկություններ է ներկայացնում Արցախի Հանրապետության պետական տեսչությունների կառավարման կոմիտե (այսուհետ՝ Կոմիտե):

5. Կոմիտեն Հիմնադրամի կողմից ներկայացվող տեղեկությունների հիման վրա կազմում է Արցախի Հանրապետության տարածքում գործող առևտրական գործունեություն իրականացնող տնտեսավարող սուբյեկտների (այսուհետ՝ տնտեսավարող սուբյեկտներ) ցանկը (գործունեության իրականացման վայրի նշումով) և Օպերատիվ շտաբի քննարկմանն է ներկայացնում առաջարկություն ապրանքների՝ նրանց մատակարարման ծավալների, ժամկետների և 1 սպառողի իրացման չափաքանակի վերաբերյալ:

 6. Տնտեսավարող սուբյեկտներին ապրանքների մատակարարումը կազմակերպելուց առաջ Հիմնադրամն Օպերատիվ շտաբից ստացված տեղեկատվության հիման վրա Արցախի Հանրապետության հանրային ծառայությունները և տնտեսական մրցակցությունը կարգավորող պետական հանձնաժողովին (այսուհետ՝ Հանձնաժողով), Արցախի Հանրապետության պետական եկամուտների կոմիտեին (այսուհետ՝ Հարկային մարմին), Կոմիտեին և Արցախի Հանրապետության շրջանների վարչակազմերին (այսուհետ՝ Շրջվարչակազմեր) ներկայացնում է տվյալ ապրանքները մատակարարող և տնտեսավարող սուբյեկտների, մատակարարման ծավալների, ժամկետների, ինչպես նաև ապրանքների առավելագույն գների և 1 սպառողի իրացման չափաքանակի վերաբերյալ տվյալներ: Շրջվարչակազմերը համապատասխան տվյալները փոխանցում է համայնքներին:

7. Տնտեսավարող սուբյեկտների կողմից իրացվող ապրանքների (բացառությամբ տեղական արտադրության), առավելագույն գների և 1 սպառողի իրացման չափաքանակի վերաբերյալ տեղեկատվությունը Հանձնաժողովը համապատասխան էլեկտրոնային հավելվածի միջոցով տրամադրում է տնտեսավարող սուբյեկտներին: Արցախի Հանրապետությունում իրացվող ծխախոտի գինը չպետք է գերազանցի տուփի վրա մակնշված գինը:

8. Տեղական արտադրողների վարքագծի և տեղական արտադրության ապրանքների իրացման գների նկատմամբ վերահսկողությունն իրականացնում է Հանձնաժողովը:

9. Տնտեսավարող սուբյեկտներն իրենց գործունեությունը պետք է կազմակերպեն Կարգի 7-րդ կետով նախատեսված տեղեկատվությանը համապատասխան:

10. Կարգի 7-րդ կետում չնշված ապրանքների իրացման դեպքում տնտեսավարող սուբյեկտներն իրացման գները նախապես համաձայնեցնում են Հանձնաժողովի հետ` էլեկտրոնային փոստի (info@kargavorum.am) կամ համապատասխան էլեկտրոնային հավելվածի միջոցով: Սույն կետին համապատասխան տրված համաձայնության դեպքում Հանձնաժողովը նշված տեղեկությունները փոխանցում է Հարկային մարմնին, Կոմիտեին և Շրջվարչակազմերին: Շրջվարչակազմերը համապատասխան տվյալները փոխանցում են համայնքներին:

11. Կարգի դրույթների կատարումը վերահսկելու նպատակով աշխատանքային օրերին՝ ամենօրյա պարբերականությամբ, իսկ հանգստյան և ոչ աշխատանքային օրերին՝ ըստ անհրաժեշտության, առևտրային օբյեկտներում իրականացնում են դիտանցումներ.

1) Հանձնաժողովը, Հարկային մարմինը և Կոմիտեն՝ համատեղ հրամանով հաստատված առևտրային օբյեկտների ցանկերին համապատասխան՝ Ստեփանակերտ քաղաքում.

2) Հարկային մարմինը՝ շրջկենտրոններում.

3) Շրջվարչակազմերը՝ ներգրավելով համայնքների ղեկավարներին՝ շրջանների համայնքներում, բացառությամբ շրջկենտրոնների:

12. Դիտանցում իրականացնող անձի գործառույթներից բխող իրավաչափ պահանջներն ենթակա են կատարման տնտեսավարող սուբյեկտների կողմից:

13. Կարգի 9-րդ կամ 10-րդ կետի ենթադրյալ խախտման դեպքում կազմվում է դիտանցման արդյունքների վերաբերյալ արձանագրություն՝ համաձայն Ձևի, որը հետագա ընթացքավորման նպատակով ուղարկվում է Կոմիտե: Եթե ենթադրյալ խախտումը տեղի է ունեցել շրջանում, ապա արձանագրությունը կազմվում է Հարկային մարմնի կողմից՝ նաև այդ մասին Շրջվարչակազմից ստացված տեղեկատվության հիման վրա:

14. Եթե ենթադրյալ խախտումը կատարվել է Հարկային մարմնում չհաշվառված ֆիզիկական անձանց կողմից, ապա առկա տեղեկություններն ուղարկվում են Հարկային մարմին՝ Արցախի Հանրապետության օրենսդրությամբ սահմանված կարգով ընթացքավորելու համար:

15. Կարգի խախտումն առաջացնում է պատասխանատվություն Արցախի Հանրապետության օրենսդրությամբ սահմանված կարգով:

ԱՐՁԱՆԱԳՐՈՒԹՅՈՒՆ N ____

ԴԻՏԱՆՑՄԱՆ ԱՐԴՅՈՒՆՔՆԵՐԻ ՎԵՐԱԲԵՐՅԱԼ