ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ՊԱՇՏՊԱՆՈՒԹՅԱՆ

ՊԵՏԱԿԱՆ ԿՈՄԻՏԵ

ՈՐՈՇՈՒՄ

ԼՂՀ ԱՌՈՂՋԱՊԱՀՈՒԹՅԱՆ ՆԱԽԱՐԱՐՈՒԹՅԱՆ ԿԱՆՈՆԱԴՐՈՒԹՅԱՆ 

և ԿԱՌՈՒՑՎԱԾՔԻ ՀԱՍՏԱՏՄԱՆ ՄԱՍԻՆ

Լեռնային Ղարաբաղի Հանրապետության պաշտպանության պետական կոմիտեն որոշում է.

1. Հաստատել ԼՂՀ Առողջապահության նախարարության կանոնադրությունը (կցվում է):

2. Հաստատել ԼՂՀ Առողջապահության նախարարության կառուցվածքը (կցվում է):

3. Ֆինանսների նախարարությանը` պետբյուջեում կատարել համապատասխան փոփոխություններ:

ԸՆԴՀԱՆՈՒՐ ԴՐՈՒՅԹՆԵՐ

1. Լեռնային Ղարաբաղի Հանրապետության Առողջապահության նախարարությունը գործադիր իշխանության հանրապետական մարմին է, որը ԼՂՀ Սահմանադրությանը համապատասխան ստեղծվում է հանրապետության Գերագույն խորհրդի կողմից և իրականացնում է առողջապահության համակարգի կառավարումը, ենթարկվելով ԼՂՀ կառավարությանը: ԼՂՀ Առողջապահության նախարարությունը պատասխանատվություն է կրում առողջապահության համակարգի վիճակի և նրա հետագա զարգացման համար:

ԼՂՀ ԱՌՈՂՋԱՊԱՀՈՒԹՅԱՆ ՆԱԽԱՐԱՐՈՒԹՅԱՆ ԽՆԴԻՐՆԵՐՆ ՈՒ ՖՈՒՆԿՑԻԱՆԵՐԸ

2. ԼՂՀ Առողջապահության նախարարության հիմնական խնդիրներն են.

2.1. Բնակչության բուժական կանխարգելիչ օգնության կազմակերպման ղեկավարումը, բուժական գործի մշտական բարելավումը, բժշկական գիտության և տեխնիկայի նվաճումների կիրառումով ախտորոշման և հիվանդությունների բուժման ավելի արդյունավետ մեթոդների կիրառման ապահովումը, բուժհիմնարկների ցանցի զարգացման, ինչպես նաև նրանց ճիշտ տեղաբաշխման կազմակերպումը:

2.2. Հանրապետության բոլոր հիմնարկություններում, կազմակերպություններում և ձեռնարկություններում առողջապահության կանխարգելիչ միջոցառումների կոորդինացումը և վերահսկողությունը աշխատավորների առողջության պահպանման ու նրանց բուժսպասարկման աշխատանքների բարելավման գործում:

2.3. Սանիտարա-հակահամաճարակային անհրաժեշտ կանխարգելիչ միջոցառումների կատարման ապահովումը, վարակիչ հիվանդությունների տարածման կանխարգելումը: Համաճարակային վարակիչ հիվանդությունների երևան գալու կամ տարածման սպառնալիքի դեպքում դրանց վերացման աշխատանքների կազմակերպումն ու ղեկավարումը:

2.4. Դպրոցներում, մանկապարտեզներում, մանկամսուրներում, և ճամբարներում, անկախ նրանց գերատեսչական ենթակայությունից, երեխաների բուժսպասարկման գործընթացի վերահսկողությունը:

2.5. Կանանց, մայրերի առողջության պահպանության, նրանց աշխատանքային, կենցաղային և հանգստի պայմանների բարելավման ուղղությամբ միջոցների ձեռնարկումը:

2.6. Ֆիզիկական կուլտուրայի և սպորտի զարգացմանը ընդառաջելը, մարզական հիմնարկներում բուժական վերահսկողության իրականացումը:

2.7. Բնակչության առողջարար-կուրորտային օգնության կազմակերպմանը մասնակցելը:

2.8. Բնակչության սանիտարական լուսավորման աշխատանքների ղեկավարումը:

2.9. Բուժպրոֆհիմնարկություններին և բնակչությանը դեղամիջոցներով և բժշկական նշանակության ապրանքներով մատակարարման գործի կազմակերպումը:

2.10. Համակարգի աշխատողների սոցիալական պաշտպանվածության ու աշխատանքի անվտանգ պայմանների ապահովումը:

2.11. Նախարարության համակարգում նոր կադրերի պատրաստման, որակավորման բարձրացման, վերավորակավորման և վերապատրաստման գործի կազմակերպումը:

2.12. Սահմանված կարգով նախարարության համակարգի աշխատողների ատեստավորման կազմակերպումը:

2.13. Հանրապետական «Կարմիր խաչի» ընկերությանը օգնություն ցույց տալը:

2.14. Նախարարության համակարգի նյութա-տեխնիկական բազայի ամրապնդումը:

2.15. Նախարարության համակարգում կատարվող կապիտալ շինարարության, կապիտալ ներդրումների արդյունավետ օգտագործման, ինչպես նաև նոր կառույցների տեղակայման գործի վերահսկողությունը:

2.16. Սահմանված կարգով Հայաստանի Հանրապետության, արտասահմանյան երկրների բժշկական կենտրոնների հետ կապերի հաստատումը:

2.17. Քաղաքացիների նամակների /դիմումների, բողոքների, գանգատների/ ժամանակին քննարկման, նամակներում հաղորդվող` նախարարության համակարգի բուժհիմնարկների ու կազմակերպությունների գործունեւթյան մեջ տեղ գտած թերությունների վերացման գործի կազմակերպումն ու հսկողությունը:

ԼՂՀ ԱՌՈՂՋԱՊԱՀՈՒԹՅԱՆ ՆԱԽԱՐԱՐՈՒԹՅԱՆ ԱՇԽԱՏԱՆՔԻ ԿԱԶՄԱԿԵՐՊՈՒՄԸ

3. ԼՂՀ Առողջապահության նախարարության համակարգը ընդգրկում է հանրապետական առողջապահության բոլոր հիմնարկները, կազմակերպությունները և ձեռնարկությունները:

4. Նախարարությունը համակարգին վերաբերող հարցերը լուծում է իրեն վերապահված իրավունքների սահմաններում, չխախտելով նախարարության համակարգի հիմնարկների և կազմակերպությունների գործող օրենսդրությամբ նախատեսված ինքնուրույնությունը:

5. Նախարարությունը իրականացնում է իրեն հանձնարարված համակարգի պետական սեփականության տնօրինման, տիրապետման և օգտագործման ֆունկցիաները: Ապահովում է համակարգի հիմնարկներում և կազմակերպություններում պետական սեփականության պահպանման և դրանց նկատմամբ խնայողական վերաբերմունքը:

6. ԼՂՀ Առողջապահության նախարարությունը ղեկավարվում է ԼՂՀ Սահմանադրությամբ և օրենքներով, ԼՂՀ Գերագույն խորհրդի որոշումներով, ԼՂՀ կառավարության որոշումներով և կարգադրություններով, ինչպես նաև սույն կանոնադրությամբ ու դրանց հիման վրա և ի կատարումն դրանց իր իրավասության սահմաններում հրապարակում է հրամաններ, հրահանգներ և տալիս ցուցումներ, որոնց կատարումը պարտադիր է նախարարության համակարգի բոլոր հիմնարկների, ձեռնարկությունների ու կազմակերպությունների համար և ստուգում է դրանց կատարումը:

7. ԼՂՀ Առողջապահության նախարարությունը Հանրապետության մյուս նախարարությունների հետ անհրաժեշտության դեպքում հրապարակում են համատեղ հրամաններ ու հրահանգներ: Նախարարությունը ընդհանրացնում է օրենսդրական ակտերի կիրառման պրակտիկան առողջապահության համակարգում, առաջարկություններ է մշակում օրենդրության կատարելագործման վերաբերյալ և դրանք ներկայացնում է ԼՂՀ կառավարությանը:

8. Նախարարության համակարգի կառավարման բոլոր հարցերի քննարկումը և լուծումը կազմակերպվում է կոլեգիալության և միանձնյա ղեկավարման զուգորդման սկզբունքի հիման վրա, առաջադրանքների կատարման համար պաշտոնական անձանց ճշտորոշ պատասխանատվության սահմանումով:

9. ԼՂՀ Առողջապահության նախարարությունը գլխավորում է առողջապահության նախարարը, որը հաստատվում է ԼՂՀ Գերագույն խորհրդի նստաշրջանում` ԼՂՀ կառավարության նախագահի ներկայացմամբ:

ԼՂՀ Առողջապահության նախարարն ունի տեղակալ, որը նշանակվում է ԼՂՀ կառավարության կողմից:

10. ԼՂՀ առողջապահության նախարարը`

10.1. Պատասխանատվություն է կրում նախարարության վրա դրված խնդիրների և ֆունկցիաների կատարման համար:

10.2. Սահմանում է նախարարի տեղակալի, վարչությունների և բաժինների պետերի ու նախարարության կառուցվածքային մյուս սորաբաժանումների ղեկավարների պատասխանատվության աստիճանը` նախարարության համակարգի բոլոր բուժհիմնարկների և կազմակերպությունների գործունեության համար:

10.3. Կատարում է ապարատի ղեկավար աշխատողների պարտականությունների բաշխում:

10.4. Հաստատում է նախարարության կենտրոնական ապարատի կառուցվածքը, հաստիքային ցուցակը:

10.5. Հաստատում է նախարարության վարչությունների, բաժինների կանոնադրությունները:

10.6. Սահմանում է նախարարության կոլեգիայի թվակազմը և կառավարության հաստատմանն է ներկայացնում կոլեգիայի անհատական կազմը:

10.7. Հրավիրում և վարում է նախարարության կոլեգիայի նիստերը:

10.8. Իրականացնում է օրենսդրությամբ նախարարությանը տրված այլ իրավասություններ:

10.9. Նախարարի ժամանակավոր բացակայության դեպքերում նախարարի պարտականությունները կատարում է առողջապահության նախարարի տեղակալը:

11. ԼՂՀ Առողջապահության նախարարության կոլեգիայի կազմի մեջ մտնում են նախարարը /նախագահ/, նախարարի տեղակալը, նախարարության այլ ղեկավար, պատասխանատու աշխատողներ:

12. ԼՂՀ Առողջապահության նախարարության կոլեգիան իր պարբերաբար անցկացվող նիստերում քննության է առնում առողջապահության համակարգի զարգացման հիմնական հարցերը և նախարարության գործունեության այլ հարցեր, քննարկում է կազմակերպությունների և բուժհիմնարկների գործնական ղեկավարման, կատարման ստուգման, վերահսկողության, կադրերի ընտրության և տեղաբաշխման հարցերը, կարևորագույն հրամանների և հրահանգների նախագծերը, լսում է նախարարության վարչությունների ու բաժինների, նախարարության համակարգի կազմակերպությունների և բուժհիմնարկների հաշվետվությունները:

13. Կոլեգիայի որոշումները կենսագործվում են որպես կանոն, նախարարի հրամաններով: Նախարարի և կոլեգիայի միջև տարաձայնությունների դեպքում նախարարը կենսագործում է իր որոշումը, ծագած տարաձայնությունների մասին զեկուցելով ԼՂՀ կառավարությանը: Կոլեգիայի անդամներն իրավունք ունեն տարաձայնության մասին իրենց կարծիքը հայտնել ԼՂՀ կառավարությանը:

14. Առողջապահության նախարարությունը համապատասխան իրավասու մարմինների հետ համաձայնեցված կարգով ստեղծում, վերակազմում և լուծարում է իր ենթակայության բուժհիմնարկներն ու կազմակերպությունները ԼՂՀ օրենսդրությամբ սահմանված կարգով:

15. Առողջապահության նախարարությունը հաստատում է նախարարության համակարգի բուժհիմնարկների ու կազմակերպությունների կանոնադրությունները:

16. Առողջապահության նախարարության կենտրոնական ապարատի տարեկան աշխատավարձի ֆոնդը հաստատվում է ԼՂՀ կառավարության կողմից:

17. Առողջապահության նախարարությունը իրավաբանական անձ է, ունի ԼՂՀ զինանշանի պատկերով և իր անվամբ կնիք և բանկերում համապատասխան հաշիվներ:

ԼՂՀ ԱՌՈՂՋԱՊԱՀՈՒԹՅԱՆ ՆԱԽԱՐԱՐՈՒԹՅԱՆ ԿԱՌՈՒՑՎԱԾՔԸ

ՆԱԽԱՐԱՐՈՒԹՅԱՆ ԱՇԽԱՏԱԿԱԶՄԸ