ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ПРАВИТЕЛЬСТВО НАГОРНО-КАРАБАХСКОЙ РЕСПУБЛИКИ

 

Ո Ր Ո Շ ՈՒ Մ

П О С Т А Н О В Л Е Н И Е

 

”20” ՀՈՒՆԻՍԻ 1995թ.

N 119

ք.Ստեփանակերտ

г.Степанакерт

 

ԼՂՀ առողջապահության նախարարության կանոնադրության և կառուցվածքի հաստատման մասին

 

ԼՂՀ կառավարությունը որոշում է`

1. Հաստատել ԼՂՀ առողջապահության նախարարության կանոնադրությունը և կառուցվածքը /կցվում են/:

2. ԼՂՀ առողջապահության նախարարության կենտրոնական աշխատակազմի հաստիքների թիվը սահմանել 12 միավոր:

3. Ուժը կորցրած ճանաչել ԼՂՀ ՊՊԿ-ի 1993 թվականի փետրվարի 8-ի «ԼՂՀ առողջապահության նախարարության կանոնադրության և կառուցվածքի հաստատման մասին» թիվ 151 որոշումը:

 

 

ԼՂՀ վարչապետ	Լ.ՊԵՏՐՈՍՅԱՆ
ԼՂՀ կառավարության գործերի կառավարիչ	Ս.ԳՐԻԳՈՐՅԱՆ

 

 

Հաստատված է` ԼՂՀ կառավարության 1995թ. «20» հունիսի թիվ 119 որոշմամբ

 

Լեռնային Ղարաբաղի Հանրապետության առողջապահության նախարարության կանոնադրությունը

 

Ընդհանուր դրույթներ

 

1.1. Լեռնային Ղարաբաղի Հանրապետության առողջապահության նախարարությունը գործադիր իշխանության հանրապետական մարմին է, որը, ԼՂՀ սահմանադրությանը համապատասխան, ստեղծվում է ԼՂՀ նախագահի հրամանագրով և իրականացնում է առողջապահության համակարգի կառավարումը` ենթարկվելով ԼՂՀ կառավարությանը:

1.2. ԼՂՀ առողջապահության նախարարությունը պատասխանատվություն է կրում առողջապահության համակարգի վիճակի և դրա հետագա զարգացման համար: Ապահովում է բնակչության բուժական կանխարգելիչ /ախտականխիչ/ օգնությունը սանիտարահամաճարակային անհրաժեշտ միջոցառումների կատարումը, ինչպես նաև` ստացիոնար և ամբուլատոր բուժման իրականացումը:

 

ԼՂՀ առողջապահության նախարարության խնդիրներն ու գործառույթները /ֆունկցիաները/

 

2. ԼՂՀ առողջապահության նախարարության հիմնական խնդիրներն են`

2.1. Բնակչության բուժական կանխարգելիչ օգնության կազմակերպման ղեկավարումը, բուժական գործի մշտական բարելավումը, բժշկական գիտության և տեխնիկայի նվաճումների կիրառմամբ ախտորոշման և հիվանդությունների բուժման առավել արդյունավետ մեթոդների օգտագործման ապահովումը, բուժհիմնարկների ցանցի զարգացման, ինչպես նաև դրանց ճիշտ տեղաբաշխման կազմակերպումը:

2.2. Հանրապետության բոլոր հիմնարկներում, կազմակերպություններում և ձեռնարկություններում առողջապահության ախտականխիչ միջոցառումների կոորդինացումը և վերահսկողությունը բնակչության առողջության պահպանման ու նրանց բուժսպասարկման աշխատանքների բարելավման գործում:

2.3. Սանիտարահամաճարակային անհրաժեշտ ախտականխիչ միջոցառումների կատարման ապահովումը, վարակիչ հիվանդությունների տարածման կանխարգելումը, համաճարակային վարակիչ հիվանդությունների աշխատանքների կազմակերպումն ու ղեկավարումը:

2.4. Դպրոցներում, մանկապարտեզներում, մանկամսուրներում և ճամբարներում, անկախ դրանց գերատեսչական ենթակայությունից, երեխաների բուժսպասարկման գործընթացի վերահսկողությունը:

2.5. Մայրության և մանկության պաշտպանության միջոցառումների մշակումը և իրավական աջակցության կազմակերպումը նրանց պաշտպանության գործում:

2.6. Ֆիզիկական կուլտուրայի և սպորտի զարգացմանը նպաստելը, մարզական հիմնարկներում բուժական վերահսկողության իրականացումը:

2.7. Բնակչության բուժական-առողջարանային օգնության կազմակերպմանը մասնակցելը:

2.8. Բնակչության սանիտարական լուսավորման աշխատանքների ղեկավարումը:

2.9. Բուժախտականխիչ /պրոֆիլատիկ/ հիմնարկություններին և բնակչությանը դեղամիջոցների բժշկական նշանակության ապրանքների մատակարարման գործի կազմակերպումը:

2.10. Համակարգի աշխատողների սոցիալական պաշտպանվածության ու աշխատանքի անվտանգ պայմանների ապահովումը:

2.11. Նախարարության համակարգում նոր կադրերի պատրաստման, որակավորման բարձրացման, վերաորակավորման և վերապատրաստման գործի կազմակերպումը:

2.12. Սահմանված կարգով նախարարության համակարգի աշխատողների ատեստավորման կազմակերպումը:

2.13. Պետական և հասարակական կազմակերպությունների հետ համագործակցումը բնակչության առողջության պահպանման գործում:

2.14. Նախարարության համակարգի նյութատեխնիկական բազայի ամրապնդումը:

2.15. Նախարարության համակարգում կատարվող կապիտալ շինարարության, կապիտալ ներդրումների արդյունավետ օգտագործման, ինչպես նաև նոր կառույցների տեղակայման գործի վերահսկողությունը:

2.16. Սահմանված կարգով Հայաստանի Հանրապետության, արտասահմանյան երկրների բժշկական կենտրոնների հետ կապերի հաստատումը:

2.17. Քաղաքացիների նամակների /դիմումների, բողոքների, գանգատների/ ժամանակին քննարկման, նամակներում հաղորդվող` նախարարության համակարգի բուժհիմնարկների ու կազմակերպությունների գործունեության մեջ տեղ գտած թերությունների վերացման գործի կազմակերպումն ու վերահսկողությունը:

 

ԼՂՀ առողջապահության նախարարության աշխատանքի կազմակերպումը

 

3. ԼՂՀ առողջապահության նախարարության համակարգն ընդգրկում է հանրապետական առողջապահության բոլոր հիմնարկները, կազմակերպությունները և ձեռնարկությունները:

4. Նախարարությունը համակարգին վերաբերող հարցերը լուծում է իրեն վերապահված իրավունքների սահմաններում` չխախտելով նախարարության համակարգի հիմնարկների և կազմակերպությունների` գործող օրենսդրությամբ նախատեսված ինքնուրույնությունը:

5. Նախարարությունն իրականացնում է իրեն հանձնարարված համակարգի պետական սեփականության տնօրինման, տիրապետման և օգտագործման գործառույթները /ֆունկցիաները/: Ապահովում է համակարգի հիմնարկներում և կազմակերպություններում պետական սեփականության պահպանման և դրանց նկատմամբ խնայողության վերաբերմունքի դրսևորումը:

6. ԼՂՀ առողջապահության նախարարությունը ղեկավարվում է ԼՂՀ նախագահի հրամանագրերով , ԼՂՀ օրենքներով, ԼՂՀ Գերագույն խորհրդի /խորհրդարանի/ որոշումներով, ԼՂՀ կառավարության որոշումներով և կարգադրություններով, ինչպես նաև` սույն կանոնադրությամբ, ու, դրանց հիման վրա և ի կատարումն դրանց, իր իրավասության սահմաններում հրապարակում է հրամաններ, հրահանգներ և տալիս ցուցումներ, որոնց կատարումը պարտադիր է նախարարության համակարգի բոլոր հիմնարկների, ձեռնարկությունների ու կազմակերպությունների համար, և ստուգում է դրանց կատարումը:

7. ԼՂՀ առողջապահության նախարարությունը հանրապետության մյուս նախարարությունների, պետական վարչությունների և գերատեսչությունների հետ անհրաժեշտության դեպքում հրապարակում են հրամաններ և հրահանգներ: Նախարարությունը ընդհանրացնում է օրենսդրական ակտերի կիրառման գործափորձը /պրակտիկան/ առողջապահության համակարգում, առաջարկություններ է մշակում օրենսդրության կատարելագործման վերաբերյալ և դրանք ներկայացնում ԼՂՀ կառավարություն:

8. Նախարարության համակարգի կառավարման բոլոր հարցերի քննարկումը և լուծումը կազմակերպվում է կոլեգիալության և միանձնյա ղեկավարման զուդորդման սկզբունքի հիման վրա` առաջադրանքների կատարման համար պաշտոնատար անձանց ճշտորոշ պատասխանատվության սահմանումով:

9. ԼՂՀ առողջապահության նախարարությունը գլխավորում է առողջապահության նախարարը, որը նշանակվում է ԼՂՀ նախագահի կողմից` ԼՂՀ կառավարության նախագահի ներկայացմամբ:

ԼՂՀ առողջապահության նախարարն ունի տեղակալ, որը նշանակվում է ԼՂՀ կառավարության կողմից` նախարարի ներկայացմամբ:

10. ԼՂՀ առողջապահության նախարարը`

10.1. Պատասխանատվություն է կրում նախարարության վրա դրված խնդիրների և գործառույթների /ֆունկցիաների/ կատարման համար:

10.2. Սահմանում է նախարարի տեղակալի, գլխավոր մասնագետների, բուժհիմնարկների և նախարարության կառուցվածքային մյուս ստորաբաժանումների ղեկավարների պատասխանատվության աստիճանը` նախարարության համակարգի բոլոր բուժհիմնարկների և կազմակերպությունների գործունեության համար:

10.3. Հաստատում է նախարարության կենտրոնական աշխատակազմի կառուցվածքը, հաստիքային ցուցակը:

10.4. Սահմանում է նախարարության կոլեգիայի թվակազմը և կառավարության հաստատմանն է ներկայացնում կոլեգիայի անհատական կազմը:

10.5. Հրավիրում և վարում է նախարարության կոլեգիայի նիստերը:

10.6. Իրականացնում է օրենսդրությամբ նախարարությանը տրված այլ իրավասություններ:

10.7. Նշանակում և աշխատանքից ազատում է նախարարության կառուցվածքի բուժհիմնարկների կազմակերպությունների ղեկավարներին և նրանց տեղակալներին` համաձայնեցնելով համապատասխան շրջանների, Ստեփանակերտ քաղաքի վարչակազմի հետ:

10.8. Նախարարի ժամանակավոր բացակայության դեպքերում նախարարի պարտականությունները կատարում է առողջապահության նախարարի տեղակալը:

11. ԼՂՀ առողջապահության նախարարության կոլեգիայի կազմի մեջ մտնում են նախարարը /նախագահ/, նախարարի տեղակալը, նախարարության համակարգի այլ ղեկավար պատասխանատու աշխատողներ: Կոլեգիայի նիստերը անցկացվում են յուրաքանչյուր երկու ամիսը մեկ անգամ:

12. ԼՂՀ առողջապահության նախարարության կոլեգիան իր պարբերաբար անցկացվող նիստերում քննության է առնում առողջապահության համակարգի զարգացման հիմնական հարցերը և նախարարության գործունեության այլ հարցեր, քննարկում է կազմակերպությունների և բուժհիմնարկների գործնական ղեկավարման, հանձնարարականների կատարման ստուգման, վերահսկողության, կադրերի ընտրության և տեղաբաշխման հարցերը, կարևորագույն հրամանների և հրահանգների նախագծերը, լսում է նախարարության բաժինների, նախարարության համակարգի կազմակերպությունների ու բուժհիմնարկների հաշվետվությունները:

13. Կոլեգիայի որոշումները կենսագործվում են, որպես կանոն, նախարարի հրամաններով: Նախարարի և կոլեգիայի տարաձայնությունների դեպքում նախարարը կենսագործում է իր որոշումը` ծագած տարաձայնությունների մասին զեկուցելով ԼՂՀ կառավարությանը: Կոլեգիայի անդամներն իրավունք ունեն տարաձայնության մասին իրենց կարծիքը հայտնել ԼՂՀ կառավարությանը:

14. Առողջապահության նախարարությունը, համապատասխան իրավասու մարմինների հետ համաձայնեցված, ստեղծում, վերակազմավորում և լուծարում է իր ենթակայության բուժհիմնարկներն կազմակերպությունները` ԼՂՀ օրենսդրությամբ սահմանված կարգով:

15. ԼՂՀ առողջապահության նախարարությունը հաստատում է նախարարության համակարգի բուժհիմնարկների ու կազմակերպությունների կանոնադրությունները:

16. ԼՂՀ առողջապահության նախարարության կենտրոնական աշխատակազմի տարեկան աշխատավարձի ֆոնդը հաստատվում է ԼՂՀ կառավարության կողմից:

17. ԼՂՀ առողջապահության նախարարությունն իրավաբանական անձ է, ունի ԼՂՀ զինանշանի պատկերով և իր անվամբ կնիք, բանկերում` համապատասխան հաշիվներ:

 

 

Հաստատված է ԼՂՀ կառավարության 1995թ. «20» հունիսի թիվ 119 որոշմամբ

 

ԼՂՀ առողջապահության նախարարության կառուցվածքը

 

Նախարարության աշխատակազմը

 

Գլխավոր մասնագետներ

Կենտրոնացված հաշվապահություն

Ընդհանուր բաժին

 

Միավորումները և հանրապետական կազմակերպությունները

 

«Արցախդեղագործություն» պետական միավորում

Սանիտարահամաճարաբանական կայան

Բուժախտականխիչ հիմնարկներ`

- Հանրապետական հիվանդանոց

- Հանրապետական մանկական հիվանդանոց

- Հանրապետական ախտորոշման կենտրոն

- Ծննդատուն

- Պոլիկլինիկա

- Ատամնաբուժական /ստոմոտոլոգիական/ պոլիկլինիկա

- Ուռուցքաբանական դիսպանսեր

- Հոգենյարդաբանական դիսպանսեր

- Մաշկավեներոլոգիական դիսպանսեր

- Հակապալարախտային դիսպանսեր

- Նարկալոգիական /թմրաբանական/ դիսպանսեր

- Արյան փոխներարկման կայան

- Դատաբժշկական փորձաքննական գրասենյակ

- Գրադարան

- Բժշկական ուսումնարան

 

Շրջանային և քաղաքային կազմակերպություններ

 

- Ստեփանակերտի քաղաքային առողջապահության բաժին

- Մարտակերտի կենտրոնական շրջանային հիվանդանոց

- Մարտունու կենտրոնական շրջանային հիվանդանոց

- Հադրութի կենտրոնական շրջանային հիվանդանոց

- Շուշիի կենտրոնական շրջանային հիվանդանոց

- Ասկերանի կենտրոնական շրջանային պոլիկլինիկա

- Քաշաթաղի շրջանային հիվանդանոց