ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

ք.Ստեփանակերտ

Ղեկավարվելով «Իրավական ակտերի մասին» Լեռնային Ղարաբաղի Հանրապետության օրենքի 71-րդ հոդվածի 5-րդ մասով և «Պատմության և մշակույթի անշարժ հուշարձանների և պատմական միջավայրի պահպանության և օգտագործման մասին» Լեռնային Ղարաբաղի Հանրապետության օրենքի 26-րդ հոդվածով` Լեռնային Ղարաբաղի Հանրապետության կառավարությունը որոշում է.

1. Լեռնային Ղարաբաղի Հանրապետության կառավարության 1999 թվականի նոյեմբերի 16-ի «Լեռնային Ղարաբաղի Հանրապետությունում պատմության և մշակույթի անշարժ հուշարձանների հետախուզման և հնագիտական պեղումների կանոնակարգի և Լեռնային Ղարաբաղի Հանրապետության պատմության և մշակույթի անշարժ հուշարձանների և պատմական միջավայրի պահպանության և օգտագործման հնագիտական հանձնաժողովի կազմի հաստատման մասին» թիվ 118 որոշման մեջ կատարել հետևյալ փոփոխությունները.

1) որոշման վերնագրում և որոշմամբ հաստատված հավելվածի վերնագրում «Լեռնային Ղարաբաղի Հանրապետության պատմության և մշակույթի անշարժ հուշարձանների և պատմական միջավայրի պահպանության և օգտագործման հնագիտական հանձնաժողովի» բառերը փոխարինել «Լեռնային Ղարաբաղի Հանրապետության կառավարությանն առընթեր զբոսաշրջության վարչությանը կից գործող միջգերատեսչական հնագիտական հանձնաժողովի» բառերով:

2. Հաստատել Լեռնային Ղարաբաղի Հանրապետության կառավարությանն առընթեր զբոսաշրջության վարչությանը կից գործող միջգերատեսչական հնագիտական հանձնաժողովի կանոնադրությունը` համաձայն հավելվածի:

ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆՆ ԱՌԸՆԹԵՐ ԶԲՈՍԱՇՐՋՈՒԹՅԱՆ ՎԱՐՉՈՒԹՅԱՆԸ ԿԻՑ ԳՈՐԾՈՂ ՄԻՋԳԵՐԱՏԵՍՉԱԿԱՆ ՀՆԱԳԻՏԱԿԱՆ ՀԱՆՁՆԱԺՈՂՈՎԻ

1. ԸՆԴՀԱՆՈՒՐ ԴՐՈՒՅԹՆԵՐ

1. Լեռնային Ղարաբաղի Հանրապետության կառավարությանն առընթեր զբոսաշրջության վարչությանը (այսուհետև` վարչություն) կից գործող միջգերատեսչական հնագիտական հանձնաժողովը (այսուհետև` հանձնաժողով) ստեղծվել է «Պատմության և մշակույթի անշարժ հուշարձանների և պատմական միջավայրի պահպանության և օգտագործման մասին» Լեռնային Ղարաբաղի Հանրապետության օրենքի համաձայն և Լեռնային Ղարաբաղի Հանրապետության կառավարության 1999 թվականի նոյեմբերի 16-ի «Լեռնային Ղարաբաղի Հանրապետությունում պատմության և մշակույթի անշարժ հուշարձանների հետախուզման և հնագիտական պեղումների կանոնակարգի և Լեռնային Ղարաբաղի Հանրապետության կառավարությանն առընթեր զբոսաշրջության վարչությանը կից գործող միջգերատեսչական հնագիտական հանձնաժողովի կազմի հաստատման մասին» թիվ 118 որոշմամբ:

2. Հանձնաժողովը հուշարձանների հետախուզման և հնագիտական պեղումների թույլտվության, նպատակահարմարության, արդյունավետության խնդիրները քննարկող և գիտամեթոդական եզրակացություններ տվող խորհրդակցական մարմին է:

3. Հանձնաժողովն իր գործունեության ընթացքում ղեկավարվում է Լեռնային Ղարաբաղի Հանրապետության Սահմանադրությամբ, Լեռնային Ղարաբաղի Հանրապետության օրենսդրությամբ, ինչպես նաև սույն կանոնադրությամբ:

4. Հանձնաժողովի խնդիրներն ու գործառույթներն են`

1) հանրապետության տարածքում գտնվող հուշարձանների հետախուզման և հնագիտական պեղումների վերաբերյալ գիտական հաշվետվությունների, նյութերի, փաստաթղթերի և տեղեկությունների ստացումն ու քննարկումը.

2) հանրապետության տարածքում գտնվող հուշարձանների հետախուզման և հնագիտական պեղումների ու գիտահետազոտական ծրագրերի, նախագծերի և նպատակային աշխատանքների քննարկումն ու դրանց իրականացման անհրաժեշտության վերաբերյալ համապատասխան եզրակացություն տալը.

3) հանրապետության տարածքում գտնվող հուշարձանների հետախուզման և հնագիտական պեղումների կատարման թույլտվության վերաբերյալ եզրակացություն տալը.

4) հանրապետության տարածքում գտնվող հուշարձանների հետախուզման և հնագիտական պեղումների ծրագրերի ու աշխատանքների համակարգված իրականացման նպատակով Լեռնային Ղարաբաղի Հանրապետության և օտարերկրյա շահագրգիռ իրավաբանական և ֆիզիկական անձանց հետ համագործակցության ապահովումը:

5. Հանձնաժողովն անհրաժեշտության դեպքում վարչություն է ներկայացնում առաջարկություններ օտարերկրյա պետությունների տարածքներում գտնվող վտանգված հայկական հուշարձանների պահպանման միջոցառումների իրականացման, ինչպես նաև դրանց հետախուզման, հնագիտական պեղումների և ֆինանսավորման վերաբերյալ:

6. Հանձնաժողովի գործունեությունը ֆինանսավորվում է հնագիտական պեղումներ ձեռնարկողների տրամադրած միջոցներով, որոնք կուտակվում են հատուկ բացված բանկային հաշվեհամարում:

7. Հանձնաժողովի` պեղման հնավայր մեկնման տրանսպորտային ծախսերը սահմանվում է տվյալ պահին գործող շուկայական գնով:

8. Հանձնաժողովն իր աշխատանքը կազմակերպում է նիստերի ձևով, ազատ քննարկման և հրապարակայնության պայմաններում, իսկ անհրաժեշտության դեպքում` հուշարձանների տարածքում: Նիստերը հրավիրվում են Լեռնային Ղարաբաղի Հանրապետության կառավարությանն առընթեր զբոսաշրջության վարչության աշխատակազմի միջոցով` առնվազն եռամսյակը մեկ անգամ: Յուրաքանչյուր նիստի ժամանակ հանձնաժողովի անդամների ձայների պարզ մեծամասնությամբ ընտրվում է հանձնաժողովի նախագահ, հանձնաժողովի նախագահի տեղակալ և հանձնաժողովի քարտուղար:

9. Հանձնաժողովի աշխատանքը ղեկավարում է հանձնաժողովի նախագահը:

10. Հանձնաժողովի նախագահը`

1) հրավիրում է հանձնաժողովի նիստերը և վարում դրանք.

2) կազմակերպում է հանձնաժողովի աշխատանքները, պատասխանատվություն կրում հանձնաժողովի խնդիրների և գործառույթների իրականացման համար:

11. Հանձնաժողովի նախագահի բացակայության ժամանակ նրա պարտականությունները կատարում է հանձնաժողովի նախագահի տեղակալը:

12. Հանձնաժողովի քարտուղարը`

1) նախապատրաստում է հանձնաժողովի նիստի օրակարգը, կազմակերպում նիստերի անցկացումը.

2) իրականացնում է հանձնաժողովի ընթացիկ կազմակերպման և տեխնիկական աշխատանքները.

3) համակարգում և քննարկման է ներկայացնում հանձնաժողովի գործունեությանն առնչվող ընթացիկ հարցերը.

4) կազմում և հանձնաժողովի նախագահին է ներկայացնում հաշվետվություն ընթացիկ աշխատանքների վերաբերյալ:

13. Հանձնաժողովի անդամները հանձնաժողովի նիստից առնվազն երկու շաբաթ առաջ, հանձնաժողովի նիստի օրակարգում ընդգրկելու նպատակով, առաջադրում են հարցեր և հանձնաժողովի նիստից առնվազն մեկ շաբաթ առաջ կարծիք հայտնում դրա օրակարգի վերաբերյալ:

14. Հանձնաժողովի նիստերն իրավազոր են, եթե դրանց մասնակցում է հանձնաժողովի անդամների կեսից ավելին: Հանձնաժողովի որոշումներն ընդունվում են, եթե դրանց օգտին քվեարկել է նիստին մասնակցած անդամների կեսից ավելին: Հանձնաժողովի նախագահի ձայնը վճռորոշ է:

15. Վարչության և հանձնաժողովի միջև ծագած տարաձայնությունների դեպքում վարչությունը կենսագործում է իր ընդունած որոշումը` դրա մասին տեղյակ պահելով Լեռնային Ղարաբաղի Հանրապետության կառավարությանը:

16. Հանձնաժողովի նիստերի արձանագրությունները` դրանց անցկացման պահից, իսկ որոշումները` պետական լիազորված մարմնի կողմից հաստատվելու պահից մեկշաբաթյա ժամկետում ուղարկվում են հանձնաժողովի անդամներին և համապատասխան շահագրգիռ կազմակերպություններ:

17. Հանձնաժողովի գործունեությունը դադարում է Լեռնային Ղարաբաղի Հանրապետության օրենսդրությամբ սահմանված կարգով: