ք.Ստեփանակերտ

«Իրավական ակտերի մասին» Լեռնային Ղարաբաղի Հանրապետության օրենքի 73-րդ հոդվածին, «Կրթության մասին» Լեռնային Ղարաբաղի Հանրապետության օրենքի 49-րդ հոդվածի 6-րդ մասին և «Բարձրագույն և հետբուհական մասնագիտական կրթության մասին» Լեռնային Ղարաբաղի Հանրապետության օրենքի 21-րդ հոդվածի 1-ին մասի 12-րդ կետին համապատասխան՝ Լեռնային Ղարաբաղի Հանրապետության կառավարությունը որոշում է.

1. Լեռնային Ղարաբաղի Հանրապետության պետական բարձրագույն ուսումնական հաստատությունների (Արցախի պետական համալսարան, Հայաստանի պետական ագրարային համալսարանի Ստեփանակերտի մասնաճյուղ) պետության կողմից ուսանողական նպաստների ձևով ուսման վարձի լրիվ փոխհատուցմամբ (անվճար) տեղերում սովորող ուսանողների համար սահմանել կրթաթոշակի հետևյալ չափերը.

1) սովորական կրթաթոշակ` 5000 դրամ, ավարտական կուրսի կրթաթոշակ` 5200 դրամ,

2) քննաշրջանի արդյունքներով միայն «գերազանց» գնահատականներ ունեցող ուսանողների կրթաթոշակ` 8000 դրամ,

3) մագիստրոսների սովորական կրթաթոշակ` 6500 դրամ,

4) քննաշրջանի արդյունքներով միայն «գերազանց» գնահատականներ ունեցող մագիստրոսների կրթաթոշակ` 8500 դրամ:

2. Ուժը կորցրած ճանաչել Լեռնային Ղարաբաղի Հանրապետության կառավարության 2005 թվականի մարտի 29-ի «Արցախի պետական համալսարանի գերազանց սովորող ուսանողների, մագիստրոսների և ասպիրանտների կրթաթոշակներին լրավճար սահմանելու մասին» N 154 որոշումը:

3. Սույն որոշումն ուժի մեջ է մտնում պաշտոնական հրապարակմանը հաջորդող օրվանից և դրա գործողությունը տարածվում է 2011 թվականի փետրվարի 1-ից հետո ծագած հարաբերությունների վրա: