ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

ք.Ստեփանակերտ

Ընդառաջելով ԼՂՀ կրթության, մշակույթի և սպորտի նախարարության առաջարկությանը` Արցախի պետական համալսարանի գերազանց սովորող ուսանողներին, մագիստրոսներին և ասպիրանտներին ուսուցման գործընթացում ցուցաբերած գիտելիքների ու կարողությունների խթանման և նրանց սոցիալական վիճակի բարելավման նպատակով Լեռնային Ղարաբաղի Հանրապետության կառավարությունը ո ր ո շ ու մ է՝

1. 2005թ. մարտի 1-ից Արցախի պետական համալսարանի պետպատվերի տեղերում սովորող ներքոբերյալ կարգի ուսանողներին, մագիստրոսներին և ասպիրանտներին տրվող կրթաթոշակների և փոխհատուցումների նկատմամբ սահմանել ամսական հետևյալ լրավճարները.

Գերազանց սովորող ուսանողներ և մագիստրոսներ՝ 3.0 հազ. դրամ,

Մագիստրոսներ /սովորական/՝ 1.0 հազ. դրամ,

Ասպիրանտներ՝ 3.5 հազ. դրամ:

2. Վերոնշյալ կարգի ուսանողների լրավճարների գումարների նկատմամբ չեն տարածվում ԼՂՀ կառավարության 1999թ. հունվարի 26-ի «Արցախի պետական համալսարանի՝ ԼՂՀ շրջանավարտներից պետական պատվերով սովորող ուսանողներին և ՀՀ բուհերի՝ պետական պատվերով ԼՂՀ-ին հատկացված տեղերում սովորող ուսանողներին դրամական փոխհատուցումներ տալու մասին» թիվ 3 որոշման 1-ին կետի սահմանափակումները:

3. Թույլատրել Արցախի պետական համալսարանին սահմանելու սույն որոշման առաջին կետով նախատեսված լրավճարները վճարովի ուսուցման տեղերի գերազանց սովորող ուսանողների և մագիստրոսների կրթաթոշակների նկատմամբ:

4. Սույն որոշման 1-ին կետով սահմանված լրավճարների վճարումը կատարել ԱրՊՀ 2005թ. պետական բյուջեով նախատեսված կրթաթոշակների և փոխհատուցման գումարների շրջանակում: