ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ

Օ Ր Ե Ն Ք Ը

ԼՂՀ ԿԱՌԱՎԱՐՈՒԹՅԱՆ ՄԱՍԻՆ

Հոդված 1. Լեռնային Ղարաբաղի Հանրապետության Կառավարությունն ապահովում է գործադիր իշխանության իրականացումը Լեռնային Ղարաբաղի Հանրապետության տարածքում:

Իր լիազորություններն իրականացնելիս Կառավարությունն ընդունում է որոշումներ:

Կառավարությունը պատասխանատու է Հանրապետության նախագահի և Գերագույն խորհրդի առջև:

Հոդված 2. Կառավարության գործունեությունը ղեկավարում է վարչապետը: Վարչապետն իր նախաձեռնությամբ կամ Հանրապետության նախագահի առաջարկությամբ հրավիրում է կառավարության նիստեր և նախագահում կառավարության նիստերը:

Վարչապետը հրավիրում է Կառավարության նիստ նաև Կառավարության անդամների կեսից ավելիի պահանջով և նախագահում Կառավարության նիստերը:

Վարչապետն ապահովում է օրենքների, Հանրապետության նախագահի հրամանագրերի և կարգադրությունների, Կառավարության որոշումների կատարումը:

Հոդված 3. Վարչապետն արձակում է կարգադրություններ: Կառավարության գործունեության կարգով սահմանված դեպքերում վարչապետի կարգադրությունները ստորագրում են նաև դրանք իրագործող վարչապետի տեղակալները:

Հոդված 4. Կառավարության անդամը չի կարող լինել որևէ ներկայացուցչական մարմնի անդամ, զբաղեցնել այլ պետական պաշտոն կամ կատարել այլ վճարովի աշխատանք:

Հոդված 5. Կառավարությունը Գերագույն խորհրդին ներկայացնում է պետական բյուջեի նախագիծը և բյուջեի կատարման տարեկան հաշվետվությունը:

Հոդված 6. Վարչապետը Կառավարության որոշմամբ կարող է պետական բյուջեի կամ այլ օրենքի նախագծի ընդունման առնչությամբ Գերագույն խորհրդի առջև հարուցել Կառավարության վստահության հարցը: Կառավարության վստահության հարցը կարող է քվեարկության դրվել այն հարուցելուց հետո ոչ շուտ, քան 24 ժամվա և ոչ ուշ, քան 48 ժամվա ընթացքում: Եթե այդ ժամկետում Գերագույն խորհուրդը Կառավարությանն անվստահություն չի հայտնում, ապա Կառավարության պաշտպանած բյուջեի կամ այլ օրենքի նախագիծը համարվում է Գերագույն խորհրդի կողմից ընդունված:

Վարչապետը Կառավարության վստահության հարցը կարող է հարուցել ոչ ավելի, քան տարին երեք անգամ:

Հոդված 7. Բյուջեի ընդունման՝ օրենքով նախատեսված ժամկետները խախտելու դեպքում, մինչև բյուջեի ընդունումը, ծախսերը կատարվում են նախորդ տարվա բյուջեի համամասնություններով:

Հոդված 8. Կառավարության պահանջով մինչև 30 օր ժամկետով հետաձգվում է բյուջեում չնախատեսված ծախսերի կամ եկամուտների նվազեցման հանգեցնող օրենքի նախագծի քննարկումը: Այդ ժամկետում Կառավարությունը Գերագույն խորհրդին ներկայացնում է իր առաջարկությունները օրենքի նախագծի վերաբերյալ:

Հոդված 9. Կառավարության առաջարկությամբ Գերագույն խորհուրդը կարող է օրենք ընդունել իր լիազորությունների շրջանակներում գտնվող առանձին հարցեր ժամանակավորապես Կառավարության որոշումներով կարգավորելու մասին:

Հոդված 10. Գերագույն խորհրդի կողմից Կառավարությանը անվստահություն հայտնելու դեպքում վարչապետը Հանրապետության նախագահին հայտարարություն է ներկայացնում Կառավարության հրաժարականի մասին: