ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

ք.Ստեփանակերտ

Ղեկավարվելով Լեռնային Ղարաբաղի Հանրապետության ընդերքի մասին օրենսգրքի 5-րդ ու «Ընդերքն ուսումնասիրության և օգտակար հանածոների արդյունահանման նպատակով տրամադրելու (կոնցեսիայի) մասին» Լեռնային Ղարաբաղի Հանրապետության օրենքի 4-րդ հոդվածներով՝ Լեռնային Ղարաբաղի Հանրապետության կառավարությունը ո ր ո շ ու մ է.

1. Լեռնային Ղարաբաղի Հանրապետության ընդերքի մասին օրենսգրքով (այսուհետ՝ օրենսգիրք) նախատեսված լիազորված մարմին ճանաչել Լեռնային Ղարաբաղի Հանրապետության շրջակա միջավայրի և բնական ռեսուրսների վարչությունը՝ բացառությամբ օգտակար հանածոների արդյունահանման նպատակով ընդերքի տրամադրման լիազորության, որն իրականացնում է Լեռնային Ղարաբաղի Հանրապետության արտադրական ենթակառուցվածքների զարգացման և քաղաքաշինության նախարարությունը:

2. «Ընդերքն ուսումնասիրության և օգտակար հանածոների արդյունահանման նպատակով տրամադրելու (կոնցեսիայի) մասին» Լեռնային Ղարաբաղի Հանրապետության օրենքով (այսուհետ՝ կոնցեսիայի օրենք) նախատեսված լիազորված մարմին ճանաչել Լեռնային Ղարաբաղի Հանրապետության արտադրական ենթակառուցվածքների զարգացման և քաղաքաշինության նախարարությունը՝ բացառությամբ սույն որոշման 3-րդ կետով սահմանված լիազորությունների:

3. Լեռնային Ղարաբաղի Հանրապետության շրջակա միջավայրի և բնական ռեսուրսների վարչությանը վերապահել կոնցեսիայի օրենքով սահմանված ուսումնասիրության և ուսումնասիրության հատուկ լիցենզիաներով հավաստվող հանքային իրավունքների տրամադրման, ընդերքի օգտագործման և պահպանության բնագավառում սահմանված նորմերի և կանոնների պահանջների կատարման նկատմամբ երկրաբանական ու բնապահպանական պետական վերահսկողության իրականացման, ինչպես նաև կոնցեսիայի մասին օրենքի «Շրջակա միջավայրի պահպանությունը» VII բաժնով սահմանված լիազորությունները:

4. Սահմանել, որ Լեռնային Ղարաբաղի Հանրապետության արտադրական ենթակառուցվածքների զարգացման և քաղաքաշինության նախարարությունը հանքարդյունահանման լիցենզառուի և հանքարդյունահանման հատուկ լիցենզառուի հետ օրենսգրքի 11-րդ հոդվածի 2-րդ մասով և կոնցեսիայի օրենքի 10-րդ հոդվածի 6-րդ մասով նախատեսված ընդերքօգտագործման պայմանագիրը կնքում է ԼՂՀ շրջակա միջավայրի և բնական ռեսուրսների վարչության հետ համատեղ:

5. Սույն որոշման 1-ին և 2-րդ կետերով սահմանված լիազոր մարմիններն ընդերքի օգտագործման և պահպանության բնագավառում ապահովում են հետևյալ գործառույթների իրականացումը՝

ա) Լեռնային Ղարաբաղի Հանրապետության արտադրական ենթակառուցվածքների զարգացման և քաղաքաշինության նախարարությունը՝

- հանքարդյունաբերության զարգացման քաղաքականության (ռազմավարություն, հեռանկարային ծրագրեր, իրավական ակտեր և այլն) մշակում.

- կայունացման և կոնցեսիոն պայմանագրերի կնքում.

- լեռնահատկացման ակտի և պայթեցման աշխատանքների կատարման թույլտվությունների տրամադրում.

- օգտակար հանածոների արդյունահանման և դրանց արդյունահանման հետ չկապված ստորերկրյա կառույցների շինարարության նախագծերի տեխնիկական ու տեխնոլոգիական փորձաքննություն.

- լեռնային աշխատանքների կատարման, անվտանգության կանոնների պահպանման, օգտակար հանածոների կորստի և աղքատացման, լեռնային փորվածքների, հորատանցքերի ու պոչամբարների լուծման և սառեցման (կոնսերվացման) աշխատանքների կատարման նկատմամբ վերահսկողություն.

-իր իրավասության սահմաններում հանքարդյունաբերության զարգացման բնագավառում միջազգային համագործակցություն:

բ) ԼՂՀ շրջակա միջավայրի և բնական ռեսուրսների վարչությունը՝

- ընդերքի պահպանության և օգտագործման քաղաքականության (հանքահումքային հենքի զարգացման ռազմավարություն, հեռանկարային ծրագրեր, իրավական ակտեր և այլն) մշակում.

- երկրաբանական ուսումնասիրությունների, օգտակար հանածոների արդյունահանման հետ չկապված ընդերքօգտագործման, ինչպես նաև պահուստային հանքավայրերի մակերեսների կառուցապատման իրավունքի՝ թույլտվությունների (լիցենզիաների, համաձայնությունների) տրամադրում, այդ թվում՝ երկրաբանական հատկացումների տրամադրում, պետական գրանցում և պայմանագրերի կնքում.

- ընդհանուր տարածում ու ռազմավարական նշանակություն ունեցող օգտակար հանածոների ցանկերի և երկրաբանական ուսումնասիրությունների հատուկ ցանկերի մշակում.

- օգտակար հանածոների հանքավայրերի երկրաբանատնտեսագիտական գնահատում, օգտակար հանածոների պաշարների հաստատում.

- ընդերքի մասին երկրաբանական և այլ տեղեկատվության պետական փորձաքննություն.

- ընդերքօգտագործման պետական ֆոնդերի, օգտակար հանածոների պաշարների պետական հաշվեկշռի, հանքավայրերի ու երևակումների պետական կադաստրի վարում.

- ստորերկրյա ջրերի հանքավայրերի շահագործման (ջրօգտագործման) թույլտվությունների տրամադրում և ստորերկրյա ջրերի հանքավայրերի սանիտարական պահպանման գոտիների համաձայնեցում.

- ընդերքօգտագործման նախագծերի՝ շրջակա միջավայրի վրա ազդեցության գնահատման պետական փորձաքննություն.

- իր իրավասության սահմաններում ընդերքի օգտագործման և պահպանության բնագավառում միջազգային համագործակցություն:

6. Լեռնային Ղարաբաղի Հանրապետության արտադրական ենթակառուցվածքների զարգացման և քաղաքաշինության նախարարին՝ սահմանված կարգով Լեռնային Ղարաբաղի Հանրապետության կառավարության քննարկմանը ներկայացնել՝

ա) կոնցեսիայի օրենքի 7-րդ հոդվածով նախատեսված՝ ընդերքօգտագործման խորհրդատվական հանձնաժողովի անհատական կազմը հաստատելու մասին Լեռնային Ղարաբաղի Հանրապետության Նախագահի հրամանագրի նախագիծը.

բ) օրենսգրքից, կոնցեսիայի օրենքից և սույն որոշումից բխող անհրաժեշտ իրավական ակտերի նախագծերը, կառուցվածքային փոփոխությունների վերաբերյալ առաջարկությունները, ինչպես նաև կոնցեսիայի օրենքի V բաժնի 1-ին գլխից բխող իրավական ակտերի նախագծերը:

7. ԼՂՀ շրջակա միջավայրի և բնական ռեսուրսների վարչությանը՝ մեկամսյա ժամկետում՝ սահմանված կարգով Լեռնային Ղարաբաղի Հանրապետության կառավարության քննարկմանը ներկայացնել կոնցեսիայի օրենքի 65-րդ հոդվածով սահմանված՝ շրջակա միջավայրի պահպանության դրամագլխի օգտագործման և հատկացումների չափերի որոշման կարգը:

8. Լեռնային Ղարաբաղի Հանրապետության արտադրական ենթակառուցվածքների զարգացման և քաղաքաշինության նախարարին ու Լեռնային Ղարաբաղի Հանրապետության շրջակա միջավայրի և բնական ռեսուրսների վարչության պետին՝ համատեղ մշակել և հաստատել սույն որոշումով վերապահված լիազորությունների իրականացման ընթացքում ծագող փոխհարաբերությունների կանոնակարգումն ապահովող համապատասխան գերատեսչական ակտեր:

9. Ուժը կորցրած ճանաչել ԼՂՀ կառավարության 2002 թվականի մայիսի 6-ի «Ընդերքի երկրաբանական ուսումնասիրության, օգտագործման և պահպանության բնագավառներում պետական կառավարման մարմիններ լիազորելու և դրանց իրավասությունները սահմանելու մասին» թիվ 95 որոշումը: