ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
ք.Ստեփանակերտ
«Ժողովրդական» պատվավոր կոչման արժանացած անձանց ամենամսյա պատվովճարի նշանակման և վճարման կարգն ու չափը սահմանելու մասին
Մշակույթի և արվեստի բնագավառների զարգացման գործում ակնառու գործունեության և բացառիկ վաստակի համար «Ժողովրդական» պատվավոր կոչման արժանացած անձանց ամենամսյա պատվովճարի նշանակման համար՝ Լեռնային Ղարաբաղի Հանրապետության կառավարությունը ո ր ո շ ու մ է.
1. Սահմանել «ժողովրդական» պատվավոր կոչման արժանացած անձանց ամենամսյա պատվովճարի նշանակման և վճարման կարգն ու չափը՝ համաձայն հավելվածի:
2. Լեռնային Ղարաբաղի Հանրապետության սոցիալական ապահովագրության պետական հիմնադրամին՝ մեկ ամսվա ընթացքում ԼՂՀ ֆինանսների և էկոնոմիկայի նախարարության հետ միասին առաջարկություն ներկայացնել լրացուցիչ ֆինանսների մասին:
3. Սահմանել, որ սույն որոշումն ուժի մեջ մտնելու օրվանից հետո՝ 3 ամսվա ընթացքում դիմելու դեպքում «ժողովրդական» պատվավոր կոչումների արժանացած անձանց ամենամսյա պատվովճարները հաշվարկվում են 2005 թվականի հուլիսի 1-ից և վճարվում են միանվագ:
| |
Հավելված
ԼՂՀ կառավարության
«24» մայիսի 2005թ.
թիվ 267 որոշման |
«ԺՈՂՈՎՐԴԱԿԱՆ» ՊԱՏՎԱՎՈՐ ԿՈՉՄԱՆ ԱՐԺԱՆԱՑԱԾ ԱՆՁԱՆՑ ԱՄԵՆԱՄՍՅԱ ՊԱՏՎՈՎՃԱՐԻ ՆՇԱՆԱԿՄԱՆ ԵՎ ՎՃԱՐՄԱՆ ԿԱՐԳՆ ՈՒ ՉԱՓԸ
1. Սույնով սահմանվում են «ժողովրդական» պատվավոր կոչման համար տրվող ամենամսյա պատվովճարի նշանակման և վճարման կարգն ու չափը:
2. Պատվովճարը նշանակվում է հետևյալ չափով՝
Խորհրդային Սոցիալիստական Հանրապետությունների Միության ժողովրդական արտիստին, Խորհրդային Սոցիալիստական Հանրապետությունների Միության ժողովրդական նկարչին, Լեռնային Ղարաբաղի Հանրապետության ժողովրդական արտիստին, Լեռնային Ղարաբաղի Հանրապետության ժողովրդական նկարչին ամսական պատվովճար է նշանակվում նվազագույն աշխատավարձի /1000 դրամ/ 25-ապատիկի չափով:
3. Լեռնային Ղարաբաղի Հանրապետության ժողովրդական արտիստին և Լեռնային Ղարաբաղի Հանրապետության ժողովրդական նկարչին տրվող պատվովճարը սահմանվում է ցմահ:
4. Լեռնային Ղարաբաղի Հանրապետության ժողովրդական արտիստին և Լեռնային Ղարաբաղի Հանրապետության ժողովրդական նկարչին տրվող պատվովճարն իր տարածքային կենտրոնների միջոցով նշանակում և վճարում է Լեռնային Ղարաբաղի Հանրապետության սոցիալական ապահովագրության պետական հիմնադրամը՝ Լեռնային Ղարաբաղի Հանրապետության ժողովրդական արտիստի կամ Լեռնային Ղարաբաղի Հանրապետության ժողովրդական նկարչի կողմից անհրաժեշտ փաստաթղթերը ներկայացվելու դեպքում:
5. Ժողովրդական արտիստը կամ ժողովրդական նկարիչն իրեն պատվովճար նշանակելու և վճարելու համար մշտական բնակության հաշվառման վայրի Լեռնային Ղարաբաղի Հանրապետության սոցիալական ապահովագրության պետական հիմնադրամի տարածքային կենտրոն է ներկայացնում դիմում, անձնագիրը և դրա պատճենը, ժողովրդական արտիստի կամ ժողովրդական նկարչի պատվավոր կոչումը հաստատող վկայականը և դրա պատճենը:
6. Ամենամսյա պատվովճարը նշանակվում և վճարվում է դիմումը և սույն կարգի 5-րդ կետով սահմանված անհրաժեշտ փաստաթղթերը ներկայացվելու ամսվան հաջորդող ամսվա 1-ից:
7. Ժողովրդական արտիստին կամ ժողովրդական նկարչին պատվովճարը վճարվում է նրա փաստացի բնակության վայրում:
8. Նշանակված, բայց չստացված ամենամսյա պատվովճարի գումարներն անցած ժամանակահատվածի համար վճարվում են մինչև երեք տարի ժամկետում:
9. Ժողովրդական արտիստի կամ ժողովրդական նկարչի մահվան դեպքում ամենամսյա պատվովճարի վճարումը դադարեցվում է հաջորդ ամսվա 1-ից:
|
ԼՂՀ կառավարության
աշխատակազմի ղեկավար-նախարար՝ |
Ս.Գրիգորյան |