ք.Ստեփանակերտ

 Ղեկավարվելով Լեռնային Ղարաբաղի Հանրապետության ընտրական օրենսգրքի 46-րդ հոդվածով, 61-րդ հոդվածի 3-րդ կետով և 62-րդ հոդվածի 8-րդ կետով՝ Լեռնային Ղարաբաղի Հանրապետության կենտրոնական ընտրական հանձնաժողովը ո ր ո շ ո ւ մ է.

1. Հաստատել «Քվեարկությունից հետո տեղամասային ընտրական հանձնաժողովներում ընտրական փաստաթղթերը փաթեթավորելու և դրանք ընտրատարածքային ընտրական հանձնաժողով ներկայացնելու կարգը»՝ համաձայն հավելված 1-ի և ընտրատարածքային ընտրական հանձնաժողովների կողմից տեղամասային ընտրական հանձնաժողովների ընտրական փաստաթղթերն ընդունելու վերաբերյալ ստացականի ձևը՝ համաձայն հավելված 2-ի:

2. Դիմել Լեռնային Ղարաբաղի Հանրապետության ոստիկանությանը՝ քվեարկությունից հետո տեղամասային և ընտրատարածքային ընտրական հանձնաժողովների նախագահների կողմից ընտրական փաստաթղթերի տեղափոխման անվտանգությունն ապահովելու նպատակով հատկացնել ավտոմեքենա և ոստիկանության երկու զինված աշխատակից:

3. Սույն որոշումն ուժի մեջ մտնելու պահից ուժը կորցրած ճանաչել ԼՂՀ ԿԸՀ-ի 06 հուլիսի 2001թ. թիվ 30/117՝ «Քվեարկությունից հետո ընտրական տեղամասերից ընտրական փաստաթղթերը շրջանային (քաղաքային) ընտրական հանձնաժողովներ ներկայացնելու կարգի մասին» որոշումը:

Քվեարկության ավարտից հետո քվեարկության արդյունքների ամփոփման նիստում տեղամասային ընտրական հանձնաժողովն առանձին-առանձին փաթեթավորում, սոսնձում և կնքում է՝

1. չօգտագործված և ընտրողի կողմից ոչ ճիշտ լրացված և հետ վերադարձված քվեաթերթիկները՝ ԼՂՀ ԿԸՀ-ի 25.02. 2005թ. թիվ 3/16 որոշմամբ սահմանված կարգով.

2. ընտրողների ցուցակները (որտեղ նշված են նրանց անձնագրային տվյալները և ստորագրությունները).

3. քվեատուփում առկա՝ հաշվարկված և տեսակավորված՝

ա) յուրաքանչյուր կուսակցության կամ թեկնածուի օգտին տրված վավեր քվեաթերթիկները,

բ) բոլորին դեմ քվեաթերթիկները,

գ) անվավեր քվեաթերթիկները,

դ) չսահմանված նմուշի քվեաթերթիկները:

Տեղամասում քվեարկության արդյունքների ամփոփիչ և անճշտությունների չափի վերաբերյալ արձանագրությունները կազմելուց հետո, դրանց մեկ օրինակը փաթեթավորվում է հիմք համարվող փաստաթղթերի հետ:

Տեղամասային ընտրական հանձնաժողովի նախագահը տեղամասում քվեարկության արդյունքների ամփոփիչ և անճշտությունների չափի վերաբերյալ արձանագրությունների մեկ օրինակը, գործավարության մատյանը, կնիքը, փաթեթավորված, սոսնձված և կնքված քվեաթերթիկների փաթեթները ընտրությունների ավարտից ոչ ուշ, քան 14 ժամ հետո ներկայացնում է ընտրատարածքային ընտրական հանձնաժողով:

Փաթեթավորված, սոսնձված և կնքված փաստաթղթերի յուրաքանչյուր փաթեթ կարող է ստորագրվել հանձնաժողովի նիստին ներկա ցանկացող անդամների կողմից:

Տեղամասային և ընտրատարածքային ընտրական հանձնաժողովների նախագահներին տեղափոխող ավտոմեքենաները կարող են ուղեկցել վստահված անձինք, միջազգային և տեղական դիտորդներն ու զանգվածային լրատվության միջոցների ներկայացուցիչները:

Քվեարկությունից հետո զինծառայողների ցուցակներն ուղարկվում են ԿԸՀ և պահվում առնվազն երկու ամիս:

Ընտրատարածքում ընտրությունների արդյունքներն ամփոփելուց հետո, ընտրատարածքային ընտրական հանձնաժողովի նախագահն ընտրական բոլոր փաստաթղթերը՝ բացառությամբ տեղական ինքնակառավարման մարմիններին վերաբերող փաստաթղթերի, սահմանված կարգով ներկայացնում է կենտրոնական ընտրական հանձնաժողով:

Ս Տ Ա Ց Ա Կ Ա Ն

 Ընտրատարածքային ընտրական հանձնաժողովների կողմից տեղամասային ընտրական հանձնաժողովների ընտրական փաստաթղթերն ընդունելու վերաբերյալ

200 __թ. ______________________- ին, ժամը _____-ին թիվ______ ընտրատարածքի

                         ^{ամիս, ամսաթիվ}

___________________________ տեղամասային ընտրական հանձնաժողովի նախագահ

_______________________________________ -ից ընտրատարածքային ընտրական

                         ^{անուն, ազգանուն}

հանձնաժողովն ստացավ.

ա) ընտրական փաստաթղթերի սոսնձված (զմռսված) և կնքված փաթեթը _________

բ) գործավարության մատյանը

գ) ամփոփիչ և անճշտությունների վերաբերյալ արձանագրությունների մեկ օրինակը

դ) թիվ ________ կնիքը:

Հանձնեց _____________________              Ստացավ ________________________

                           ^{ՏԸՀ նախագահ                                           ԸԸՀ պատասխանատու անդամ}