ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

 ք.Ստեփանակերտ

ԼՂՀ պաշտպանության ժամանակ զոհված (մահացած) զինծառայողների ընտանիքների սոցիալական ապահովության լրացուցիչ միջոցառումների մասին

ԼՂՀ պաշտպանության կամ զինվորական ծառայության ժամանակ ծառայողական պարտականությունները կատարելիս զոհված (մահացած) զինծառայողների (նրանց հավասարեցված անձանց) ընտանիքներին (այսուհետ՝ զոհվածի ընտանիք) արտոնությունների համար մինչև 2004թ. հուլիսի 1-ը տրվող փոխհատուցման չափերը չնվազեցնելու նպատակով, և հաշվի առնելով այն, որ զոհվածի ընտանիքի բոլոր անդամներին ԼՂՀ կառավարության 2004թ. հուլիսի 30-ի թիվ 281 որոշման համաձայն 2004թ. հուլիսի 1-ից նշանակվում և վճարվում է մեկ ընդհանուր դրամական փոխհատուցում (օգնություն)՝ ԼՂՀ կառավարությունը որոշում է.

1. Սահմանել, որ ԼՂՀ կառավարության 2004թ. հուլիսի 30-ի թիվ 281 որոշմամբ սահմանված դրամական փոխհատուցման (օգնության) գումարը զոհվածի ընտանիքի անդամի (անդամների) պահանջով համապատասխանաբար առանձնացվում է:

2. Սահմանել, որ եթե ԼՂՀ կառավարության 2004թ. հուլիսի 30-ի թիվ 281 որոշմամբ սահմանված դրամական փոխհատուցման (օգնության) 2004թ. հուլիսի 1-ի դրությամբ առանձնացված բաժինը ցածր է մինչև այդ նշանակված փոխհատուցման չափից, ապա տվյալ ընտանիքներին յուրաքանչյուր ամիս վճարվում է նաև նշված փոխհատուցումների (օգնության) տարբերությունը:

3. Փոխհատուցումների (օգնության) տարբերությունը նշանակում և վճարում են ԼՂՀ պաշտպանության նախարարության, ԼՂՀ կառավարությանն առընթեր ԼՂՀ ոստիկանության կենսաթոշակներ նշանակող ստորաբաժանումները:

(3-րդ կետը փոփ. 23.12.2008 N 923)

4. Հաստատել փոխհատուցումների (օգնության) տարբերությունը նշանակելու և վճարելու կարգը՝ համաձայն հավելվածի:

5. Լեռնային Ղարաբաղի Հանրապետության պաշտպանության նախարարության Լեռնային Ղարաբաղի Հանրապետության զինվորական կոմիսարիատին և Լեռնային Ղարաբաղի Հանրապետության կառավարությանն առընթեր Լեռնային Ղարաբաղի Հանրապետության ոստիկանությանը՝ մինչև յուրաքանչյուր կիսամյակին հաջորդող երկրորդ ամսվա 25-ը Լեռնային Ղարաբաղի Հանրապետության ֆինանսների նախարարություն և Լեռնային Ղարաբաղի Հանրապետության սոցիալական ապահովության նախարարություն ներկայացնել դրամական փոխհատուցումների (օգնության) տարբերության չափերի և շահառուների մասին տեղեկություններ՝ կիսամյակի վերջին ամսվա դրությամբ:

(5-րդ կետը խմբ. 23.12.2008 N 923)

6. Սույն որոշման գործողությունը տարածվում է 2004թ. հուլիսի 1-ից:

Կ Ա Ր Գ

փոխհատուցումների (օգնության) տարբերությունը նշանակելու և վճարելու

1. Սույն կարգով սահմանվում են ԼՂՀ պաշտպանության կամ զինվորական ծառայության ժամանակ ծառայողական պարտականությունները կատարելիս զոհված (մահացած) զինծառայողների (նրանց հավասարեցված անձանց) ընտանիքներին (այսուհետ՝ զոհվածի ընտանիք) մինչև 2004թ. հուլիսի 1-ը նշանակված փոխհատուցման չափի և ԼՂՀ կառավարության 2004թ. սեպտեմբերի 17-ի թիվ 316 որոշմամբ (այսուհետ՝ որոշում) 2004թ. հուլիսի 1-ից տրվող դրամական փոխհատուցման (օգնության) առանձնացված բաժնի միջև տարբերությունը նշանակելու և վճարելու առանձնահատկությունները:

2. Փոխհատուցումների (օգնության) տարբերությունը նշանակվում է միայն 2004թ. հուլիսի 1-ից, եթե առկա է որոշման 2-րդ կետով սահմանված պայմանը:

3. Փոխհատուցումների (օգնության) տարբերություն չի վճարվում, եթե՝

ա) 2004թ. հուլիսի 1-ի դրությամբ դրամական փոխհատուցման (օգնության) առանձնացված բաժինը ցածր չէ մինչև 2004թ. հուլիսի 1-ը նշանակված փոխհատուցման չափից,

բ) զոհվածի ընտանիքին դրամական փոխհատուցում (օգնություն) է նշանակվել 2004թ. հուլիսի 1-ից հետո,

գ) դրամական փոխհատուցման (օգնության) գումարը առանձնացվել է 2004թ. հուլիսի 1-ից հետո:

4. ԼՂՀ օրենսդրության փոփոխությունների, զոհվածի ընտանիքի անդամների թվի կամ մշտական բնակության վայրի փոփոխման հետևանքով դրամական փոխհատուցման (օգնության) առանձնացված բաժնի մեծացման դեպքում՝

ա) փոխհատուցումների (օգնության) տարբերությունը համապատասխանաբար նվազեցվում է, եթե դրամական փոխհատուցման (օգնության) առանձնացված բաժինը չի գերազանցում մինչև 2004թ. հուլիսի 1-ը նշանակված փոխհատուցման չափից,

բ) փոխհատուցումների (օգնության) տարբերության վճարումը դադարեցվում է, եթե դրամական փոխհատուցման (օգնության) առանձնացված բաժինը հավասարվում կամ գերազանցում է մինչև 2004թ. հուլիսի 1-ը նշանակված փոխհատուցման չափին:

Զոհվածի ընտանիքի անդամների թվի կամ մշտական բնակության վայրի փոփոխման դեպքերում փոխհատուցումների (օգնության) տարբերությունը նվազեցվում կամ վճարումը դադարեցվում է այդ հանգամանքների առաջացման ամսվան հաջորդող ամսի 1-ից:

5. Զոհվածի ընտանիքի անդամների թվի կամ մշտական բնակության վայրի փոփոխման հետևանքով դրամական փոխհատուցումների (օգնության) առանձնացված բաժնի փոքրացման դեպքում փոխհատուցումների (օգնության) տարբերությունը փոփոխության չի ենթարկվում:

6. Զոհվածի ընտանիքի միակ անդամի մահվան կամ պետության լրիվ խնամքի տակ անցնելու դեպքերում փոխհատուցումների (օգնության) տարբերության վճարումը դադարեցվում է՝ այդ հանգամանքների առաջացման ամսվան հաջորդող ամսի 1-ից:

7. Փոխհատուցումների (օգնության) տարբերության չստացված գումարները վճարվում են միանվագ, սակայն մեկ տարուց ոչ ավելի ժամանակաշրջանի համար: Վճարումներ իրականացնող մարմնի մեղքով փոխհատուցումների (օգնության) տարբերության չվճարված գումարները վճարվում են առանց ժամկետի սահմանափակման:

8. Փոխհատուցումների (օգնության) տարբերությունը կարող է վճարվել լիազորագրով՝ երեք ամսից ոչ ավելի: Փոխհատուցումների (օգնության) տարբերության չստացված գումարները լիազորագրով չեն վճարվում:

9. Քաղաքացու մահվան դեպքում չստացված գումարները վճարվում են ԼՂՀ օրենսդրությամբ սահմանված կարգով:

10. Կեղծ կամ սխալ տեղեկություններով փաստաթղթեր ներկայացնելու, ինչպես նաև փոխհատուցումների (օգնության) տարբերության վճարումը դադարեցնելու կամ դրա չափը նվազեցնելու հիմքերը թաքցնելու հետևանքով ավելի վճարված գումարները հետ են գանձվում ԼՂՀ օրենսդրությամբ սահմանված կարգով:

11. Վճարումների կապակցությամբ առաջացած վեճերը լուծվում են վերադասության կամ դատական կարգով: