ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

  ք.Ստեփանակերտ

Լեռնային Ղարաբաղի Հանրապետության կառավարությունը որոշում է.

1. Սահմանել, որ մինչև 2009 թվականի հունվարի 1-ը Լեռնային Ղարաբաղի Հանրապետության Քաշաթաղի շրջանում վերաբնակություն հաստատած ընտանիքներին հատկացված բնակելի տները և տնամերձ հողամասերը նվիրատվության պայմանագրով փոխանցվում են այդ բնակելի տներում հաշվառված ընտանիքներին՝ որպես սեփականություն:

(1-ին կետը փոփ. 03.05.2013 N 250-Ն)

2. Հաստատել Լեռնային Ղարաբաղի Հանրապետության Քաշաթաղի շրջանում վերաբնակություն հաստատած ընտանիքներին հատկացված բնակելի տների և տնամերձ հողամասերի սեփականաշնորհման կարգը` համաձայն հավելվածի:

3. Լեռնային Ղարաբաղի Հանրապետության կառավարության աշխատակազմի ղեկավարին, Լեռնային Ղարաբաղի Հանրապետության արդարադատության նախարարին, Լեռնային Ղարաբաղի Հանրապետության կառավարությանն առընթեր անշարժ գույքի կադաստրի պետական կոմիտեի նախագահին և Լեռնային Ղարաբաղի Հանրապետության Քաշաթաղի շրջանի վարչակազմի ղեկավարին՝ համակողմանիորեն աջակցել Լեռնային Ղարաբաղի Հանրապետության Քաշաթաղի շրջանի համայնքների ղեկավարներին՝ սույն որոշմամբ սահմանված՝ սեփականաշնորհման գործընթացը պատշաճ կերպով իրականացնելու համար:

(3-րդ կետը փոփ. 03.05.2013 N 250-Ն)

4. Լեռնային Ղարաբաղի Հանրապետության Քաշաթաղի շրջանի վարչակազմի ղեկավարին՝ մինչև յուրաքանչյուր եռամսյակին հաջորդող ամսվա 25-ը Լեռնային Ղարաբաղի Հանրապետության կառավարություն ներկայացնել տեղեկություններ՝ սույն որոշմամբ սահմանված՝ սեփականաշնորհման գործընթացի վերաբերյալ:

5. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Կ Ա Ր Գ

1. Սույն կարգով սահմանվում են մինչև 2009 թվականի հունվարի 1-ը Լեռնային Ղարաբաղի Հանրապետության Քաշաթաղի շրջանում վերաբնակություն հաստատած ընտանիքներին վերաբնակեցման ծրագրերի շրջանակներում հատկացված բնակելի տների և տնամերձ հողամասերի (այսուհետ` բնակելի տուն) սեփականաշնորհման հետ կապված հարաբերությունները:

(1-ին կետը փոփ. 03.05.2013 N 250-Ն)

2. Սույն կարգի իմաստով` սեփականաշնորհում է համարվում նվիրատվության պայմանագրով համայնքի սեփականության ներքո գտնվող բնակելի տան նկատմամբ սեփականության իրավունքի փոխանցումը վերաբնակ ընտանիքին:

3. Սեփականաշնորհման ենթակա են միայն Լեռնային Ղարաբաղի Հանրապետության վարչապետի որոշմամբ ստեղծված միջգերատեսչական հանձնաժողովի (այսուհետ՝ հանձնաժողով) հաստատած ցուցակներում (այսուհետ՝ սեփականաշնորհման ցուցակ) ընդգրկված վերաբնակ ընտանիքներին հատկացված բնակելի տները:

4. Վերաբնակ ընտանիքը սեփականաշնորհման ցուցակում ընդգրկվում է, եթե վերաբնակվելու պահից անցել է առնվազն 10 տարի:

5. Սեփականաշնորհման գործընթացը սկսվում է վերաբնակ ընտանիքի չափահաս անդամներից մեկի՝ համայնքի ղեկավարին ուղղված գրավոր դիմումի հիման վրա:

6. Համայնքի ղեկավարը պատրաստում է սույն կարգի 4-րդ կետում նշված հանգամանքը հաստատող փաստաթղթերը և դրանք ներկայացնում հանձնաժողովին:

Հանձնաժողովի կողմից հաստատված սեփականաշնորհման ցուցակում ընդգրկվելու դեպքում վերաբնակ ընտանիքի և համայնքի միջև կնքվում է նվիրատվության պայմանագիր՝ համայնքի ավագանու որոշման հիման վրա:

Համայնքի անունից պայմանագիրը ստորագրում է համայնքի ղեկավարը, իսկ վերաբնակ ընտանիքի անունից՝ ընտանիքի չափահաս անդամներից մեկը:

7. Բնակելի տունը սեփականության իրավունքով փոխանցվում է վերաբնակ ընտանիքի՝ տվյալ բնակելի տանը մշտական հաշվառում ունեցող, ինչպես նաև փաստացի բնակվող անչափահաս բոլոր անդամներին՝ որպես ընդհանուր համատեղ սեփականություն:

8. Վերաբնակ ընտանիքն ազատվում է նվիրատվության պայմանագրի նոտարական վավերացման և բնակելի տան նկատմամբ սեփականության իրավունքի պետական գրանցման համար պետական տուրքի վճարումից՝ «Պետական տուրքի մասին» Լեռնային Ղարաբաղի Հանրապետության օրենքի 30-րդ հոդվածի առաջին մասի «բ» ենթակետով սահմանված կարգով:

Սույն կետում նշված վճարումները կատարվում են Լեռնային Ղարաբաղի Հանրապետության Քաշաթաղի շրջանի վարչակազմի պահպանման ծախսերով նախատեսված միջոցների հաշվին: