ք.Ստեփանակերտ

Լեռնային Ղարաբաղի Հանրապետության կառավարության 2008 թվականի մայիսի 20-ի «Հաշմանդամներին ձեռքի կառավարման ավտոմեքենաներ տրամադրելու մասին» N 394 որոշման 16-րդ կետի համաձայն՝

ՀՐԱՄԱՅՈՒՄ ԵՄ՝

1. Հաստատել հաշմանդամ քաղաքացիներին ձեռքի կառավարման ավտոմեքենաներ տրամադրելու՝ Լեռնային Ղարաբաղի Հանրապետության սոցիալական ապահովության նախարարության ներքին ընթացակարգը՝ համաձայն հավելվածի:

2. Լեռնային Ղարաբաղի Հանրապետության սոցիալական ապահովության նախարարության աշխատակազմի ղեկավարի պաշտոնակատար Ա.Ծատրյանին՝ սույն հրամանը սահմանված կարգով ներկայացնել Լեռնային Ղարաբաղի Հանրապետության արդարադատության նախարարություն՝ պետական գրանցման համար:

3. Լեռնային Ղարաբաղի Հանրապետության սոցիալական ապահովության նախարարի տեղակալ Լ.Ղուլյանին՝ ստանձնել սույն հրամանի կատարման վերահսկողությունը:

1. Սույնով, Լեռնային Ղարաբաղի Հանրապետության կառավարության 2008 թվականի մայիսի 20-ի թիվ 394 որոշմանը (այսուհետ` որոշում) համապատասխան՝ սահմանվում է հաշմանդամ քաղաքացիներին ձեռքի կառավարման ավտոմեքենաներ տրամադրելու հետ կապված` Լեռնային Ղարաբաղի Հանրապետության սոցիալական ապահովության նախարարության (այսուհետ` նախարարություն) ներքին ընթացակարգը:

2. Լեռնային Ղարաբաղի Հանրապետության պաշտպանության ժամանակ ստացած վնասվածքի կամ խեղման պատճառական կապով 1-ին խմբի անժամկետ հաշմանդամ ճանաչված անձի դիմելու և նրա մոտ ձեռքի կառավարման ավտոմեքենա ստանալու իրավունք տվող բժշկական ցուցումներ հայտնաբերելու դեպքում նախարարության բժշկասոցիալական փորձաքննության կենտրոնի (այսուհետ՝ ԲՍՓԿ) գրավոր հարցմամբ հաշմանդամն ուղեգրվում է «Հանրապետական հիվանդանոց» փակ բաժնետիրական ընկերություն (այսուհետ՝ Հանրապետական հիվանդանոց)՝ բժշկական քննության ենթարկվելու և ձեռքի կառավարման ավտոմեքենա ստանալու իրավունք տվող ցուցումների առկայությունն որոշելու համար:

3. Հանրապետական հիվանդանոցի կողմից տրված ուղեգրի հիման վրա ԲՍՓԿ բժշկասոցիալական փորձաքննական հանձնաժողովն (այսուհետ՝ հանձնաժողով) իրականացնում է հաշմանդամի բժշկական փորձաքննություն՝ Լեռնային Ղարաբաղի Հանրապետության կառավարության 2006 թվականի սեպտեմբերի 29-ի թիվ 488 որոշմամբ սահմանված կարգով և ժամկետներում:

Փորձաքննական որոշման մասին տեղեկանքը տրվում է հաշմանդամին, իսկ փորձաքննական որոշման քաղվածքը ԲՍՓԿ-ի կողմից ներկայացվում է նախարարություն:

4. ԲՍՓԿ-ի կողմից ներկայացված քաղվածքի հիման վրա նախարարությունը գրավոր ծանուցում է Լեռնային Ղարաբաղի Հանրապետության կառավարությանն առընթեր Լեռնային Ղարաբաղի Հանրապետության ոստիկանության ճանապարհային ոստիականության վարչությանը (այսուհետ՝ ճանապարհային ոստիկանություն)՝ վարորդական իրավունքի վկայական տալու որակավորման քննությունների անցկացման և վարորդական իրավունքի վկայական տալու համար սահմանված պետական տուրքից հաշմանդամին ազատելու և հետագայում` ճանապարհային ոստիկանության հայտի հիման վրա, այդ վճարները փոխհատուցելու՝ նախարարության պարտավորության մասին:

Ծանուցման մեջ նշվում են հաշմանդամի անունը, ազգանունը, հայրանունը, անձնագրի սերիան և համարը, ինչպես նաև հաշմանդամի հաշվառման վայրը:

5. Ձեռքի կառավարման ավտոմեքենա վարելու իրավունքի վկայական ստացած անձը ձեռքի կառավարման ավտոմեքենա ստանալու համար նախարարություն է ներկայացնում դիմում (ձևը կցվում է` N 1), անձնագիրը և դրա 2-րդ, 3-րդ և 5-րդ էջերի լուսապատճենները (անձը հաստատող այլ փաստաթղթի դեպքում՝ նաև հաշվառման վայրի մասին լրացուցիչ փաստաթուղթ), սոցիալական ապահովության քարտը և դրա լուսապատճենը, հաշմանդամության և ձեռքի կառավարման ավտոմեքենա ստանալու իրավունք տվող բժշկական ցուցումների առկայության մասին հանձնաժողովի տված տեղեկանքներն ու դրանց լուսապատճենները, ձեռքի կառավարման ավտոմեքենա վարելու իրավունքի վկայականը և դրա լուսապատճենը, ինչպես նաև 3 x 4 սմ չափսի երկու լուսանկար:

6. Նախարարության աշխատակազմի սոցիալական աջակցության բաժնի (այսուհետ՝ բաժին) պետն ներկայացված փաստաթղթերի լուսապատճենների հավաստիությունը ստուգելուց հետո դրանց վրա կատարում է «Իսկականի հետ ճիշտ է» նշագրումը և ստորագրում: Փաստաթղթերի բնօրինակները վերադարձվում են հաշմանդամին, իսկ լուսապատճենները կնքվում են նախարարության աշխատակազմի կնիքով:

7. Ներկայացված դիմումը բաժնի կողմից հաշվառվում է դիմումների հաշվառման մատյանում (ձևը կցվում է` N 2):

8. Անհրաժեշտ ոչ բոլոր փաստաթղթերով դիմելու դեպքում հաշմանդամը գրավոր ծանուցվում է լրացուցիչ փաստաթղթեր ներկայացնելու անհրաժեշտության մասին:

9. Հաշմանդամի համար կազմվում է անձնական գործ, որում առկա փաստաթղթերը համարակալվում, կարվում և կնքվում են նախարարության աշխատակազմի կնիքով:

10. Հաշմանդամին ձեռքի կառավարման ավտոմեքենա տրամադրելու` Լեռնային Ղարաբաղի Հանրապետության սոցիալական ապահովության նախարարի հրամանի հիման վրա հաշմանդամի հետ կնքվում է (3 օրինակից) գույքի անհատույց օգտագործման պայմանագիր:

11. Սույն ընթացակարգի 4-րդ կետով սահմանված կարգով նախարարությունը ծանուցում է ճանապարհային ոստիկանությանը՝ հաշմանդամին տրամադրված ձեռքի կառավարման ավտոմեքենայի տեխնիկական անձնագիր ու պետական համարանիշ տալու, ինչպես նաև ավտոմեքենան գրանցելու համար սահմանված պետական տուրքի վճարումից ազատելու նպատակով:

12. Պոլիկլինիկական բժշկական հաստատությունից պարտադիր բժշկական հավատարմագրման տեղեկանք ստանալու համար սահմանված վճար և ձեռքի կառավարման ավտոմեքենայի գծով գույքահարկ վճարելու ծախսերի դիմաց փոխհատուցում ստանալու համար հաշմանդամը դիմում է նախարարություն` դիմումին կցելով անձնագրի լուսապատճենը և համապատասխան վճարների անդորրագրերը:

ԴԻՄՈՒՄ

Հայտնում եմ, որ ես հանդիսանում եմ ԼՂՀ պաշտպանության ժամանակ ստացած վնասվածքի (խեղման) պատճառով 1-ին խմբի անժամկետ հաշմանդամ:

Խնդրում եմ ինձ տրամադրել ձեռքի կառավարման ավտոմեքենա:

Դիմումին կցվում են.

1.______________________________________________ ,

2.______________________________________________ ,

3.______________________________________________ ,

4.______________________________________________ ,

5.______________________________________________ ,

6.______________________________________________ ,

7.______________________________________________ ,

8.______________________________________________ :

Դիմող՝ ____________________       __________________

                ստորագրությունը                         ազգանունը

_________________

   ամիս, ամսաթիվ