ք.Ստեփանակերտ

Լեռնային Ղարաբաղի Հանրապետության կառավարության 2008 թվականի մայիսի 20-ի «Հաշմանդամներին ձեռքի կառավարման ավտոմեքենաներ տրամադրելու մասին» N 394 որոշման 16-րդ կետի համաձայն՝

ՀՐԱՄԱՅՈՒՄ ԵՄ՝

1. Հաստատել հաշմանդամ քաղաքացիներին ձեռքի կառավարման ավտոմեքենաներ տրամադրելու՝ Արցախի Հանրապետության աշխատանքի, սոցիալական հարցերի և վերաբնակեցման նախարարության ներքին ընթացակարգը՝ համաձայն հավելվածի:

(1-ին կետը փոփ. 11.12.18 N 4-Ն)

2. Լեռնային Ղարաբաղի Հանրապետության սոցիալական ապահովության նախարարության աշխատակազմի ղեկավարի պաշտոնակատար Ա.Ծատրյանին՝ սույն հրամանը սահմանված կարգով ներկայացնել Լեռնային Ղարաբաղի Հանրապետության արդարադատության նախարարություն՝ պետական գրանցման համար:

3. Արցախի Հանրապետության աշխատանքի, սոցիալական հարցերի և վերաբնակեցման նախարարի առաջին տեղակալին՝ ստանձնել սույն հրամանի կատարման վերահսկողությունը:

(3-րդ կետը փոփ. 11.12.18 N 4-Ն)

1. Սույնով, Լեռնային Ղարաբաղի Հանրապետության կառավարության 2008 թվականի մայիսի 20-ի թիվ 394 որոշմանը համապատասխան՝ սահմանվում է հաշմանդամ քաղաքացիներին ձեռքի կառավարման ավտոմեքենաներ տրամադրելու հետ կապված` Արցախի Հանրապետության աշխատանքի, սոցիալական հարցերի և վերաբնակեցման նախարարության (այսուհետ` նախարարություն) ներքին ընթացակարգը:

(1-ին կետը փոփ. 11.12.18 N 4-Ն)

2. Արցախի Հանրապետության պաշտպանության ժամանակ ստացած վնասվածքի կամ խեղման պատճառական կապով 1-ին խմբի անժամկետ հաշմանդամ ճանաչված անձի դիմելու և նրա մոտ ձեռքի կառավարման ավտոմեքենա ստանալու իրավունք տվող բժշկական ցուցումներ հայտնաբերելու դեպքում նախարարության բժշկասոցիալական փորձաքննության կենտրոնի (այսուհետ՝ ԲՍՓԿ) գրավոր հարցմամբ հաշմանդամն ուղեգրվում է «Հանրապետական հիվանդանոց» փակ բաժնետիրական ընկերություն (այսուհետ՝ Հանրապետական հիվանդանոց)՝ բժշկական քննության ենթարկվելու և ձեռքի կառավարման ավտոմեքենա ստանալու իրավունք տվող ցուցումների առկայությունն որոշելու համար:

(2-րդ կետը փոփ. 11.12.18 N 4-Ն)

3. Հանրապետական հիվանդանոցի կողմից տրված ուղեգրի հիման վրա ԲՍՓԿ բժշկասոցիալական փորձաքննական հանձնաժողովն (այսուհետ՝ հանձնաժողով) իրականացնում է հաշմանդամի բժշկական փորձաքննություն՝ Լեռնային Ղարաբաղի Հանրապետության կառավարության 2006 թվականի սեպտեմբերի 29-ի թիվ 488 որոշմամբ սահմանված կարգով և ժամկետներում:

Փորձաքննական որոշման մասին տեղեկանքը տրվում է հաշմանդամին, իսկ փորձաքննական որոշման քաղվածքը ԲՍՓԿ-ի կողմից ներկայացվում է նախարարություն:

4. ԲՍՓԿ-ի կողմից ներկայացված քաղվածքի հիման վրա նախարարությունը գրավոր ծանուցում է Արցախի Հանրապետության ոստիկանության ճանապարհային ոստիկանությանը (այսուհետ՝ ճանապարհային ոստիկանություն)՝ վարորդական իրավունքի վկայական տալու որակավորման քննությունների անցկացման և վարորդական իրավունքի վկայական տալու համար սահմանված պետական տուրքից հաշմանդամին ազատելու և հետագայում` ճանապարհային ոստիկանության հայտի հիման վրա, այդ վճարները փոխհատուցելու՝ նախարարության պարտավորության մասին:

Ծանուցման մեջ նշվում են հաշմանդամի անունը, ազգանունը, հայրանունը, անձնագրի սերիան և համարը, ինչպես նաև հաշմանդամի հաշվառման վայրը:

(4-րդ կետը փոփ. 11.12.18 N 4-Ն)

5. Ձեռքի կառավարման ավտոմեքենա ստանալու համար հաշմանդամը գրավոր դիմում է (N 1 ձևը կցվում է) նախարարություն՝ ներկայացնելով Լեռնային Ղարաբաղի Հանրապետության կառավարության 2008 թվականի մայիսի 20-ի N 394 որոշմամբ հաստատված թիվ 1 հավելվածի 7-րդ կետով նախատեսված փաստաթղթերը:

(5-րդ կետը խմբ. 11.12.18 N 4-Ն)

6. Նախարարության աշխատակազմի ընտանիքների կարիքավորության գնահատման և սոցիալական աջակցության վարչության (այսուհետ՝ վարչություն) պետն ներկայացված փաստաթղթերի պատճենների հավաստիությունը ստուգելուց հետո դրանց վրա կատարում է «Իսկականի հետ ճիշտ է» նշագրումը և ստորագրում: Փաստաթղթերի բնօրինակները վերադարձվում են հաշմանդամին, իսկ պատճենները կնքվում են նախարարության աշխատակազմի կնիքով:

(6-րդ կետը փոփ. 11.12.18 N 4-Ն)

7. Ներկայացված դիմումը վարչության կողմից հաշվառվում է դիմումների հաշվառման մատյանում (ձևը կցվում է` N 2):

(7-րդ կետը փոփ. 11.12.18 N 4-Ն)

8. Անհրաժեշտ ոչ բոլոր փաստաթղթերով դիմելու դեպքում հաշմանդամը գրավոր ծանուցվում է լրացուցիչ փաստաթղթեր ներկայացնելու անհրաժեշտության մասին:

9. Հաշմանդամի համար կազմվում է անձնական գործ, որում առկա փաստաթղթերը համարակալվում, կարվում և կնքվում են նախարարության աշխատակազմի կնիքով:

10. Հաշմանդամին ձեռքի կառավարման ավտոմեքենա տրամադրելու մասին նախարարության կողմից որոշում կայացվելուց հետո՝ մեկ տարվա ընթացքում, սեփականության իրավունքով հաշմանդամին տրամադրվում է ձեռքի կառավարման ավտոմեքենա՝ նրա հետ կնքելով գույքի նվիրատվության պայմանագիր:

(10-րդ կետը խմբ. 11.12.18 N 4-Ն)

11. Սույն ընթացակարգի 4-րդ կետով սահմանված կարգով նախարարությունը ծանուցում է ճանապարհային ոստիկանությանը՝ հաշմանդամին տրամադրված ձեռքի կառավարման ավտոմեքենայի տեխնիկական անձնագիր ու պետական համարանիշ տալու, ինչպես նաև ավտոմեքենան գրանցելու համար սահմանված պետական տուրքի վճարումից ազատելու նպատակով:

12. Պոլիկլինիկական բժշկական հաստատությունից պարտադիր բժշկական հավատարմագրման տեղեկանք ստանալու համար սահմանված վճար և ձեռքի կառավարման ավտոմեքենայի գծով գույքահարկ վճարելու ծախսերի դիմաց փոխհատուցում ստանալու համար հաշմանդամը դիմում է նախարարություն` դիմումին կցելով անձնագրի պատճենը և համապատասխան վճարների անդորրագրերը:

(12-րդ կետը փոփ. 11.12.18 N 4-Ն)

(Հավելվածը փոփ., խմբ. 11.12.18 N 4-Ն)

ԴԻՄՈՒՄ

Հայտնում եմ, որ ես հանդիսանում եմ Արցախի Հանրապետության պաշտպանության ժամանակ ստացած վնասվածքի (խեղման) պատճառով 1-ին խմբի անժամկետ հաշմանդամ:

Խնդրում եմ ինձ տրամադրել ձեռքի կառավարման ավտոմեքենա:

Դիմումին կցվում են.

1.______________________________________________ ,

2.______________________________________________ ,

3.______________________________________________ ,

4.______________________________________________ ,

5.______________________________________________ ,

6.______________________________________________ ,

7.______________________________________________ ,

8.______________________________________________ :

Դիմող՝ ____________________       __________________

                ստորագրությունը                         ազգանունը

_________________

   ամիս, ամսաթիվ

(Ձև N1-ը փոփ. 11.12.18 N 4-Ն)

(Ձև N 2-ը փոփ. 11.12.18 N 4-Ն)