ք. Ստեփանակերտ

Հիմք ընդունելով «Իրավական ակտերի մասին» Լեռնային Ղարաբաղի Հանրապետության օրենքի 13-րդ, 73-րդ հոդվածները և Արցախի Հանրապետության Նախագահի 2017 թվականի սեպտեմբերի 25-ի ՆՀ-103-Ն հրամանագիրը՝ Արցախի Հանրապետության կառավարությունը ո ր ո շ ու մ է.

1. Սահմանել Արցախի Հանրապետության ոստիկանության խորհրդանիշը:

2. Հաստատել`

1) Արցախի Հանրապետության ոստիկանության խորհրդանիշի կանոնադրությունը` համաձայն N 1 հավելվածի.

2) Արցախի Հանրապետության ոստիկանության խորհրդանիշի նկարագրությունը` համաձայն N 2 հավելվածի.

3) Արցախի Հանրապետության ոստիկանության խորհրդանիշի պատկերը` համաձայն N 3 հավելվածի:

3. Ուժը կորցրած ճանաչել Լեռնային Ղարաբաղի Հանրապետության կառավարության 2004 թվականի ապրիլի 27-ի «Լեռնային Ղարաբաղի Հանրապետության կառավարությանն առընթեր Լեռնային Ղարաբաղի Հանրապետության ոստիկանության խորհրդանիշի մասին» N 184 որոշումը:

4. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

1. Արցախի Հանրապետության ոստիկանության խորհրդանիշը (այսուհետ` խորհրդանիշ) այն նշանն է, որը ցույց է տալիս ծառայողների և զինծառայողների, ինչպես նաև սպառազինության, տեխնիկայի և այլ գույքի պատկանելությունը Արցախի Հանրապետության ոստիկանությանը (այսուհետ՝ ոստիկանություն):

2. Խորհրդանիշը դրվում է Արցախի Հանրապետության ոստիկանության պետի (այսուհետ՝ ոստիկանության պետ) աշխատասենյակում, ինչպես նաև պատկերվում է ոստիկանության դրոշի վրա:

3. Խորհրդանիշի պատկերը զետեղվում է ոստիկանության կենտրոնական ապարատի վարչությունների և ինքնուրույն բաժինների, կենտրոնական ապարատի անմիջական ենթակայության ստորաբաժանումների, ոստիկանության Ստեփանակերտի քաղաքային վարչության և շրջանային բաժինների, ինչպես նաև ոստիկանության զորքերի կենտրոնական ապարատի և ենթակա ստորաբաժանումների ու զորամասերի անկյունադրոշմակների կամ անկյունադրոշմակով դրոշմաթղթերի վրա:

Խորհրդանիշի պատկերը սահմանված կարգով դրվում է նաև ոստիկանության ծառայողների և ոստիկանության զորքերի զինծառայողների համազգեստների տարբերանշանների ու առանձնանշանների, ինչպես նաև անվանական զենքի վրա:

4. Խորհրդանիշի պատկերի կիրառումը թույլատրվում է տպագրական, գովազդային-տեղեկատվական և հուշանվերային արտադրանքի (ծրագրեր, օրացույցներ, կրծքանշաններ, ժամացույցներ, թղթապանակներ և այլն), տեսաժապավենների վրա` համաձայնեցնելով ոստիկանության հետ:

5. Խորհրդանիշի պատկերի կիրառման այլ դեպքերը սահմանվում են ոստիկանության պետի կողմից:

6. Խորհրդանիշը պահպանվում է օրենքով սահմանված կարգով:

Արցախի Հանրապետության ոստիկանության խորհրդանիշը սուրը և վահանն է (սուրը խորհրդանշում է պատժամիջոց, պատիժ, արդարության` արդարադատության` դատաստանի սուր, իսկ վահանը` պաշտպանող հանգամանք` միջոց, պաշտպանություն, պատիվ և հաղթանակ): Խորհրդանիշի լայնության և երկարության հարաբերությունն է 1:2:

Արույրից (լատուն) պատրաստված վահանի կենտրոնում Արցախի Հանրապետության զինանշանն է: Վահանի եզրին կից շրջանակն ունի խորություն, որը լցված է մուգ կարմիր արծնով (էմալ): Վահանի միջով անցնող սուրը, որը խորհրդանիշի վրա երևում է իր ծայրով և բռնակով, նույնպես պատրաստված է արույրից: Բռնակն ունի 10 ուռուցիկ փաթույթ և վահանի մոտ սահմանափակվում է երկկողմանի երիզով: Վահանի վրա մակագրված են «ԱՀ ՈՍՏԻԿԱՆՈՒԹՅՈՒՆ» բառերը:

Արույրից պատրաստված խորհրդանիշը տեղադրվում է բարձր որակի մուգ շագանակագույն փայտե պատվանդանի վրա: