ք. Ստեփանակերտ

Լեռնային Ղարաբաղի Հանրապետության քաղաքացիական օրենսգրքի 62-րդ հոդվածին համապատասխան` Լեռնային Ղարաբաղի Հանրապետության կառավարությունը ո ր ո շ ու մ է.

1. Ստեղծել «Արցախի Հանրապետության աշխատանքի, սոցիալական հարցերի և վերաբնակեցման նախարարության տնային պայմաններում միայնակ տարեցների և հաշմանդամների սոցիալական սպասարկման կենտրոն» ոչ կառավարչական հիմնարկ:

(1-ին կետը  փոփ. 16.10.2018 N 844-Ն)

2. Հաստատել «Արցախի Հանրապետության աշխատանքի, սոցիալական հարցերի և վերաբնակեցման նախարարության տնային պայմաններում միայնակ տարեցների և հաշմանդամների սոցիալական սպասարկման կենտրոն» ոչ կառավարչական հիմնարկի կանոնադրությունը՝ համաձայն հավելվածի:

(2-րդ կետը  փոփ. 16.10.2018 N 844-Ն)

3. Սույն որոշումն ուժի մեջ է մտնում 2014 թվականի հուլիսի 1-ից, իսկ Լեռնային Ղարաբաղի Հանրապետության շրջանների սոցիալական ծառայություններ տրամադրող տարածքային պետական մարմինների կողմից Լեռնային Ղարաբաղի Հանրապետության շրջաններում որոշման հավելվածի 8-րդ կետով նախատեսված գործառույթների իրականացումը 2015 թվականի հունվարի 1-ից վերապահել «Լեռնային Ղարաբաղի Հանրապետության աշխատանքի և սոցիալական հարցերի նախարարության տնային պայմաններում միայնակ տարեցների և հաշմանդամների սոցիալական սպասարկման կենտրոն» ոչ կառավարչական հիմնարկին:

ԿԱՆՈՆԱԴՐՈՒԹՅՈՒՆ

I. ԸՆԴՀԱՆՈՒՐ ԴՐՈՒՅԹՆԵՐ

1. Արցախի Հանրապետության աշխատանքի, սոցիալական հարցերի և վերաբնակեցման նախարարության (այսուհետ՝ նախարարություն) տնային պայմաններում միայնակ տարեցների և հաշմանդամների սոցիալական սպասարկման կենտրոնը (այսուհետ՝ կենտրոն) նախարարության կազմում գործող ոչ կառավարչական հիմնարկ է, որն օրենքով, իսկ առանձին դեպքերում՝ նաև Արցախի Հանրապետության օրենսդրությամբ նախատեսված դեպքերում մատուցում է ծառայություններ սոցիալական սպասարկման բնագավառում՝ հանդես գալով Արցախի Հանրապետության անունից:

(1-ին կետը խմբ. 16.10.2018 N 844-Ն)

2. Կենտրոնը ստեղծվում, վերակազմակերպվում և նրա գործունեությունը դադարում է Արցախի Հանրապետության կառավարության որոշմամբ: Կենտրոնը գործում է իր կանոնադրության համաձայն, որը հաստատում է Արցախի Հանրապետության կառավարությունը՝ Արցախի Հանրապետության աշխատանքի, սոցիալական հարցերի և վերաբնակեցման նախարարի (այսուհետ՝ նախարար) ներկայացմամբ:

(2-րդ կետը փոփ. 16.10.2018 N 844-Ն)

3. Կենտրոնի լիազորությունները սահմանվում են օրենքներով, Արցախի Հանրապետության Նախագահի հրամանագրերով, կարգադրություններով, Արցախի Հանրապետության կառավարության որոշումներով, սույն կանոնադրությամբ և այլ իրավական ակտերով:

(3-րդ կետը փոփ. 16.10.2018 N 844-Ն)

4. Կենտրոնն իր գործունեությունն իրականացնում է Արցախի Հանրապետության օրենսդրությանը և այլ իրավական ակտերին համապատասխան:

(4-րդ կետը փոփ. 16.10.2018 N 844-Ն)

5. Կենտրոնն օրենքով կամ այլ իրավական ակտերով նախատեսված դեպքերում իրավունք ունի Արցախի Հանրապետության անունից ձեռք բերելու և իրականացնելու գույքային և անձնական ոչ գույքային իրավունքներ, կրելու պարտականություններ, դատարանում հանդես գալու որպես հայցվոր կամ պատասխանող:

(5-րդ կետը փոփ. 16.10.2018 N 844-Ն)

6. Կենտրոնն ունի Արցախի Հանրապետության զինանշանի պատկերով և իր՝ հայերեն անվամբ կլոր կնիք, ձևաթղթեր, խորհրդանիշ ու այլ անհատականացման միջոցներ:

(6-րդ կետը փոփ. 16.10.2018 N 844-Ն)

II. ԿԵՆՏՐՈՆԻ ՆՊԱՏԱԿՆԵՐԸ

7. Կենտրոնի գործունեության հիմնական նպատակներն են՝

1) խնամքի կարիք ունեցող միայնակ տարեց և հաշմանդամ անձանց տնային պայմաններում սոցիալական սպասարկման ապահովումը.

2) տնային պայմաններում միայնակ տարեց և հաշմանդամ անձանց սոցիալ-հոգեբանական, բժշկական օգնության և կենցաղային սպասարկման կազմակերպումը, խնամքի իրականացումը, նրանց իրավունքների և օրինական շահերի պաշտպանությանն աջակցումը:

III. ԿԵՆՏՐՈՆԻ ԳՈՐԾԱՌՈՒՅԹՆԵՐԸ

8. Կենտրոնն իրականացնում է հետևյալ գործառույթները.

1) միայնակ տարեցների և հաշմանդամների տնային պայմաններում սոցիալական սպասարկման իրականացումը.

2) հանրապետությունում տնային պայմաններում սոցիալական սպասարկման կարիք ունեցող տարեց և հաշմանդամ քաղաքացիների հայտնաբերումը և նրանց սպասարկման կազմակերպումը.

3) տնային պայմաններում սոցիալական սպասարկման հարցերով զբաղվող պետական և հասարակական կազմակերպությունների հետ համագործակցությունը.

4) տնային պայմաններում սոցիալական սպասարկման կարիք ունեցող բոլոր միայնակ տարեցների և հաշմանդամների համար սպասարկման պատշաճ մակարդակի ապահովումը.

5) միայնակ տարեց և հաշմանդամ քաղաքացիների համար տնային պայմաններում կենցաղային սպասարկման, իրավաբանական և սոցիալ-հոգեբանական խորհրդատվության, բժշկական օգնության կազմակերպումը.

6) սոցիալական սպասարկման և ծառայությունների բոլոր տեսակների մատչելիության ապահովումը.

7) սոցիալական ոլորտում հասարակական կազմակերպությունների և պետական մարմինների համագործակցության արդյունքների ուսումնասիրում և վերլուծություն:

Սույն կետով նախատեսված գործառույթները իրականացնում են Ստեփանակերտ քաղաքում կենտրոնը, իսկ Արցախի Հանրապետության շրջաններում՝ նախարարության աշխատակազմի սոցիալական ծառայության տարածքային գործակալությունները:

(8-րդ կետը փոփ. 16.10.2018 N 844-Ն)

IV. ԿԵՆՏՐՈՆԻ ԿԱՌԱՎԱՐՈՒՄԸ

9. Կենտրոնը կառավարում և նրա գործունեության նկատմամբ վերահսկողություն իրականացնում է նախարարը:

10. Կենտրոնի անմիջական ղեկավարումն իրականացնում է կենտրոնի տնօրենը, որին պաշտոնի նշանակում և պաշտոնից ազատում է նախարարը: Կենտրոնի տնօրենը անմիջականորեն ենթակա և հաշվետու է նախարարին:

11. Կենտրոնի տնօրենն իր գործունեության ընթացքում առաջնորդվում է Արցախի Հանրապետության Սահմանադրությամբ, Արցախի Հանրապետության օրենքներով, նախարարության և սույն կանոնադրություններով, ինչպես նաև այլ իրավական ակտերով ու Արցախի Հանրապետության միջազգային պայմանագրերով:

Նախարարը օրենքով և նախարարության կանոնադրությամբ նախատեսված իր լիազորությունների սահմաններում կասեցնում կամ ուժը կորցրած է ճանաչում կենտրոնի տնօրենի` Արցախի Հանրապետության օրենսդրության պահանջներին հակասող հանձնարարականները, կարգադրություններն ու ցուցումները:

(11-րդ կետը փոփ. 16.10.2018 N 844-Ն)

12. Կենտրոնի տնօրենը պատասխանատու է սոցիալական սպասարկման բնագավառում մատուցվող ծառայությունների որակի, ինչպես նաև դրանց օրենքների և այլ իրավական ակտերի համապատասխանության համար:

13. Կենտրոնի տնօրենը ՝

1) ղեկավարում է կենտրոնի ընթացիկ գործունեությունը, պատասխանատու է կենտրոնի առջև դրված նպատակների և գործառույթների իրականացման համար.

2) առաջարկություններ է ներկայացնում նախարարին օրենքով, այլ իրավական ակտերով և սույն կանոնադրությամբ նախատեսված գործունեության բնագավառի նպատակների վերաբերյալ.

3) իր իրավասության սահմաններում տալիս է ցուցումներ և հանձնարարականներ.

4) իր իրավասության սահմաններում ներկայացնում է առաջարկություններ կենտրոնի աշխատողների նկատմամբ խրախուսանքի կամ կարգապահական տույժի միջոցների կիրառման վերաբերյալ.

5) նախարարին պարբերաբար ներկայացնում է տեղեկատվություն կենտրոնի կողմից իրականացվող աշխատանքների ընթացքի մասին.

6) ապահովում է նախարարի հրամանների, ցուցումների, հանձնարարականների ու առաջադրանքների կատարումը և արդյունքների մասին տեղեկացնում նախարարին.

7) նախարարին ներկայացնում է առաջարկություններ կենտրոնի աշխատողների թվի մասին.

8) իր լիազորությունների սահմաններում համագործակցում է պետական կառավարման, տեղական ինքնակառավարման և այլ մարմինների հետ.

9) իրականացնում է օրենքով, այլ իրավական ակտերով և սույն կանոնադրությամբ նախատեսված այլ լիազորություններ:

14. Կենտրոնի տնօրենի բացակայության կամ պաշտոնեական պարտականությունների կատարման անհնարինության դեպքում, նրան փոխարինելու հարցը կարգավորվում է նախարարի հրամանով:

V. ԿԵՆՏՐՈՆԻ ԱՇԽԱՏԱՆՔՆԵՐԻ ԿԱԶՄԱԿԵՐՊՈՒՄԸ

15. Օրենքով, այլ իրավական ակտերով, նախարարության և սույն կանոնադրություններով կենտրոնին վերապահված լիազորությունների լիարժեք ու արդյունավետ իրականացումն, ինչպես նաև քաղաքացիական իրավահարաբերություններին նրա մասնակցությունն ապահովում է նախարարության աշխատակազմը:

16. Կենտրոնի վերակազմակերպման և նրա գործունեության դադարման կարգն ու պայմանները սահմանվում են օրենքով և այլ իրավական ակտերով: