ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ

Օ Ր Ե Ն Ք Ը

Ընդունված է 2008 թվականի

դեկտեմբերի 17-ին

ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԴԱՏԱԿԱՆ ՕՐԵՆՍԳԻՐՔՆ ՈՒԺԻ ՄԵՋ ՄՏՆԵԼՈՒ ՄԱՍԻՆ

Հոդված 1. Լեռնային Ղարաբաղի Հանրապետության դատական օրենսգիրքը (այսուհետ` Օրենսգիրք) ուժի մեջ է մտնում 2009 թվականի հունվարի 1-ից, բացառությամբ այն դրույթների, որոնց համար սույն օրենքով սահմանված են ուժի մեջ մտնելու այլ ժամկետներ կամ պայմաններ:

Հոդված 2. Օրենսգիրքն ուժի մեջ մտնելու պահից ուժը կորցրած ճանաչել`

1) «Դատավորի կարգավիճակի մասին» Լեռնային Ղարաբաղի Հանրապետության 1999 թվականի նոյեմբերի 29-ի ՀՕ-79 օրենքը.

2) «Դատարանակազմության մասին» Լեռնային Ղարաբաղի Հանրապետության 2008 թվականի ապրիլի 16-ի ՀՕ- 21 օրենքը:

Հոդված 3. Արդարադատության խորհուրդը կազմավորվում է Օրենսգիրքն ուժի մեջ մտնելու պահից մեկամսյա ժամկետում:

Արդարադատության խորհուրդը կազմավորվելու պահից ուժը կորցրած է ճանաչվում «Դատական մագիստրատուրայի խորհրդի մասին» Լեռնային Ղարաբաղի Հանրապետության 1999 թվականի նոյեմբերի 29-ի ՀՕ-81 օրենքը և դադարում է դատական մագիստրատուրայի խորհրդի գործունեությունը:

Հոդված 4. Օրենսգրքի 68-րդ հոդվածի 1-ին մասի առաջին պարբերությունն ուժի մեջ է մտնում 2013 թվականի հուլիսի 1-ից:

Հոդված 5. Դատավորների թեկնածուների ցուցակը պահպանում է իր ուժը մինչև Օրենսգրքով սահմանված կարգով նոր ցուցակի կազմումը: Դատավորների թեկնածուների ցուցակում ընդգրկված և դատավորի պաշտոնում չնշանակված անձինք նոր ցուցակում ընդգրկվում են Օրենսգրքի 88-րդ հոդվածով սահմանված կարգով:

Հոդված 6. Դատավորների ծառայողական առաջխաղացման ցուցակի կազմման մասին հայտարարությունը տրվում է արդարադատության խորհրդի կազմավորումից հետո եռամսյա ժամկետում:

Հոդված 7. Լեռնային Ղարաբաղի Հանրապետության Գերագույն դատարանի (այսուհետ` Գերագույն դատարան) պալատներին վերաբերող Օրենսգրքով նախատեսված դրույթներն ուժի մեջ են մտնում 2009 թվականի հունիսի 1-ից:

(2-րդ պարբերությունը հանվել է 27.05.2009 ՀՕ-20-Ն)

(7-րդ հոդվածը փոփ. 27.05.2009 ՀՕ-20-Ն)

Հոդված 8. (հոդվածն ուժը կորցրել է 27.05.2009 ՀՕ-20-Ն)

Հոդված 9. Օրենսգրքով նախատեսված դատական կարգադրիչների ծառայությունն ստեղծվում է 2010 թվականի հունվարի 1-ից:

Հոդված 10. Օրենսգրքի 115-րդ հոդվածի 1-ին մասի 1-ին կամ 5-րդ կետերով կամ 5-րդ մասի 2-րդ կետով նախատեսված հիմքերով պաշտոնից ազատված անձի` «Պետական կենսաթոշակների մասին» Լեռնային Ղարաբաղի Հանրապետության օրենքով նշանակված տարիքային կենսաթոշակի (այսուհետ` պետական կենսաթոշակ) նկատմամբ սահմանվում է ամենամսյա հավելավճար (այսուհետ` հավելավճար) նրա` վերջին մեկ տարվա ընթացքում որպես դատավոր զբաղեցրած պաշտոնի համար ստացած միջին աշխատավարձի՝

1) 75 տոկոսի և պետական կենսաթոշակի տարբերության չափով՝ դատավորի պաշտոնում 10 և ավելի տարի աշխատած լինելու դեպքում.

2) 65 տոկոսի և պետական կենաթոշակի տարբերության չափով՝ դատավորի պաշտոնում 10 տարուց պակաս, բայց առնվազն 5 տարի աշխատած լինելու դեպքում:

Միջին աշխատավարձը հաշվարկելու, հավելավճարը հաշվարկելու, նշանակելու և վճարելու, ինչպես նաև ստաժը հաշվարկելու կարգը սահմանում է Լեռնային Ղարաբաղի Հանրապետության կառավարությունը:

Պետական կենսաթոշակի և հավելավճարի հանրագումարի չափը չի կարող գերազանցել որպես դատավոր զբաղեցրած վերջին պաշտոնի համար Լեռնային Ղարաբաղի Հանրապետության դատական օրենսգրքի 45-րդ հոդվածով սահմանված պաշտոնային դրույքաչափի 100 տոկոսը:

Հավելավճարի չափը վերահաշվարկվում է`

1) պետական կենսաթոշակի չափը վերահաշվարկելու դեպքում.

2) որպես դատավոր զբաղեցրած վերջին պաշտոնի համար Լեռնային Ղարաբաղի Հանրապետության դատական օրենսգրքի 45-րդ հոդվածով սահմանված պաշտոնային դրույքաչափը բարձրացնելու դեպքում:

Սույն հոդվածի 4-րդ մասի 2-րդ կետով սահմանված դեպքում հավելավճարի չափը վերահաշվարկվում է դրույքաչափի բարձրացմանը համամասնորեն: Հավելավճարի չափը վերահաշվարկելու կարգը սահմանում է Լեռնային Ղարաբաղի Հանրապետության կառավարությունը:

(10-րդ հոդվածը խմբ. 13.04.2011 ՀՕ-14-Ն)

Հոդված 11. Սույն օրենքն ուժի մեջ է մտնում 2009 թվականի հունվարի 1-ից: