Ղեկավարվելով Լեռնային Ղարաբաղի Հանրապետության ընտրական օրենսգրքի 47-րդ հոդվածով՝ Լեռնային Ղարաբաղի Հանրապետության կենտրոնական ընտրական հանձնաժողովը ո ր ո շ ո ւ մ է.

Սահմանել համապետական ընտրություների ժամանակ, ստացիոնար բուժում իրականացնող բժշկական հաստատությունում ստացիոնար բուժման մեջ գտնվող, ինչպես նաև տուն-ինտերնատում մշտապես բնակվող՝ քվեարկության օրը տեղամասային կենտրոն ինքնուրույն ներկայանալու հնարավորություն չունեցող քաղաքացիների քվեարկության կարգը՝ համաձայն հավելվածի:

1. Ստացիոնար բուժում իրականացնող բժշկական հաստատությունում ստացիոնար բուժման մեջ գտնվող, ինչպես նաև տուն-ինտերնատում մշտապես բնակվող՝ քվեարկության օրը տեղամասային կենտրոն ինքնուրույն ներկայանալու հնարավորություն չունեցող քաղաքացիների համար քվեարկությունը կարող է կազմակերպվել ստացիոնար բժշկական հաստատությունում և տուն-ինտերնատում` քվեարկության օրը մինչև ժամը 18.00-ն:

2. Ստացիոնար բուժում իրականացնող բժշկական հաստատության և տուն-ինտերնատի ղեկավարները քվեարկության օրվանից առնվազն 4 օր առաջ՝ մինչև 14.00-ն, լիազոր մարմնի կամ նրա համապատասխան տարածքային ստորաբաժանման ղեկավարին է ներկայացնում ստացիոնար բուժման մեջ գտնվող, ինչպես նաև տուն-ինտերնատում մշտապես բնակվող՝ քվեարկությանը մասնակցել ցանկացող ընտրական իրավունք ունեցող քաղաքացիների ցուցակը, նրանում նշելով քաղաքացու ազգանունը, անունը, հայրանունը (հայրանունը՝ եթե անձնագրում առկա է), ծննդյան օրը, ամիսը, տարեթիվը և հաշվառման վայրի հասցեն:

(2-րդ կետը փոփ.16.03.2011 N 7/19-Ն)

3. Լիազոր մարմնի կամ նրա համապատասխան տարածքային ստորաբաժանման ղեկավարը՝ ըստ ներկայացված ցուցակների, ստացիոնար բուժման մեջ գտնվող և տուն-ինտերնատում մշտապես բնակվող քաղաքացիներին հանում է իրենց հաշվառման վայրի ընտրողների ցուցակից, ԼՂՀ ընտրական օրենսգրքի 11-րդ հոդվածով ընտրողների ցուցակներին ներկայացվող պահանջներին համապատասխան կազմում է ստացիոնար բուժում իրականացնող բժշկական հաստատությունում և տուն-ինտերնատում քվեարկությանը մասնակցող ընտրողների լրացուցիչ ցուցակ՝ ստորագրելով և կնքելով այդ ցուցակի յուրաքանչյուր էջը և քվեարկության օրվանից 2 օր առաջ՝ ընտրողների վերջնական ցուցակի հետ միասին տրամադրում է համապատասխան տեղամասային ընտրական հանձնաժողովի նախագահին:

4. Տեղամասային ընտրական հանձնաժողովի նախագահը քվեարկության օրը մինչև ժամը 8.00-ն հանձնաժողովի անդամների և հանձնաժողովի նիստին ներկա գտնվելու իրավունք ունեցող անձանց ներկայությամբ ստուգում է շրջիկ արկղի դատարկ լինելը և փակում ու կնքում է արկղը: Տեղամասային ընտրական հանձնաժողովի նախագահը վիճակահանության արդյունքով որոշված՝ շրջիկ արկղի միջոցով քվեարկություն անցկացնող հանձնաժողովի անդամին (այսուհետ` հանձնաժողովի անդամ) տրամադրում է շրջիկ արկղը, ստացիոնար բուժում իրականացնող բժշկական հաստատությունում և տուն-ինտերնատում քվեարկությանը մասնակցող ընտրողների լրացուցիչ ցուցակը, այդ ցուցակում ընդգրկված ընտրողների թվից մինչև 3 տոկոս ավելի քանակով կնքված քվեաթերթիկներ` այդ մասին համապատասխան գրառում կատարելով գործավարության մատյանում:

Հանձնաժողովի անդամին անհրաժեշտության դեպքում կարող է ուղեկցել ոստիկանության աշխատակիցը:

5. Ստացիոնար բուժում իրականացնող բժշկական հաստատություններում և տուն–ինտերնատներում քվեարկողների քվեարկության կազմակերպմանը կարող են ներկա գտնվել նաև վստահված անձինք, դիտորդ-ներ և լրագրողներ:

6. Հանձնաժողովի անդամը ստուգում է ստացիոնար բուժում իրականացնող բժշկական հաստատությունում ստացիոնար բուժման մեջ գտնվող կամ տուն-ինտերնատում մշտապես բնակվող քաղաքացու անձը հաստատող փաստաթուղթը, ընտրողների լրացուցիչ ցուցակում գտնում նրա անունը, հայրանունը, ազգանունը և հերթական համարը, լրացնում անձը հաստատող փաստաթղթի տվյալները և ընտրողը ստորագրում է այդ տվյալների դիմաց: Հանձնաժողովի անդամը քվեաթերթիկը հանձնում է ընտրողին:

7. Ընտրողը քվեաթերթիկը լրացնում է գաղտնի: Հանձնաժողովի անդամը հնարավորություն է ստեղծում ապահովելու ընտրողի քվեարկության գաղտնիությունը:

8. Քվեաթերթիկում քվեարկության մասին նշում կատարելուց հետո ընտրողը քվեաթերթիկը ծալում է: Հանձնաժողովի անդամը բացում է շրջիկ արկղի ճեղքը և ընտրողին հնարավորություն ընձեռում քվեաթերթիկը արկղի մեջ գցելու համար:

9. Ստացիոնար բուժում իրականացնող բժշկական հաստատությունում և տուն-ինտերնատում քվեարկության ավարտից հետո հանձնաժողովի անդամը փակում` հատուկ կապիչով կապում է շրջիկ արկղը և անհապաղ վերադառնում տեղամասային ընտրական հանձնաժողով:

10. Հանձնաժողովի անդամը տեղամասային ընտրական հանձնաժողովի նախագահին է հանձնում շրջիկ արկղը, չօգտագործված, ընտրողի կողմից ոչ ճիշտ լրացված և հետ վերադարձված քվեաթերթիկները, ստացիոնար բուժում իրականացնող բժշկական հաստատությունում և տուն-ինտերնատում քվեարկությանը մասնակցող ընտրողների լրացուցիչ ցուցակը, ինչի մասին համապատասխան գրառում է կատարվում գործավարության մատյանում:

Շրջիկ արկղը տեղադրվում է տեղամասային կենտրոնում, բոլորի համար տեսանելի տեղում:

11. Տեղամասային ընտրական հանձնաժողովի նախագահը ժամը 20.00-ին տեղամասային կենտրոնում ներկա գտնվելու իրավունք ունեցող անձանց ներկայությամբ բացում է շրջիկ արկղը և նրանում գտնվող քվեաթերթիկները ծալված վիճակում մեկ-մեկ գցում քվեատուփի մեջ՝ դրանում գտնվող քվեաթերթիկների հետ հաշվարկելու համար:

(կարգը փոփ.16.03.2011 N 7/19-Ն)