ք.Ստեփանակերտ

Լեռնային Ղարաբաղի Հանրապետության ընտրական օրենսգրքի 8-րդ հոդվածի 4-րդ մասին, 59-րդ հոդվածին և «Իրավական ակտերի մասին» Լեռնային Ղարաբաղի Հանրապետության օրենքի 73-րդ հոդվածին համապատասխան` Լեռնային Ղարաբաղի Հանրապետության կենտրոնական ընտրական հանձնաժողովը որոշում է.

1. Սահմանել Լեռնային Ղարաբաղի Հանրապետության դիվանագիտական ներկայացուցչություններում և հյուպատոսական հիմնարկներում ընտրությունների նախապատրաստման, կազմակերպման և անցկացման կարգը՝ համաձայն հավելվածի:

2. Ուժը կորցրած ճանաչել Լեռնային Ղարաբաղի Հանրապետության կենտրոնական ընտրական հանձնաժողովի 2006 թվականի սեպտեմբերի 27-ի «Լեռնային Ղարաբաղի Հանրապետության դիվանագիտական ներկայացուցչություններում և հյուպատոսական հիմնարկներում Լեռնային Ղարաբաղի Հանրապետության քաղաքացիների ընտրական և (կամ) հանրաքվեին մասնակցելու իրավունքի իրականացումն ապահովելու կարգի մասին» թիվ 19/50 որոշումը:

1. Այլ պետություններում բնակվող կամ գտնվող Լեռնային Ղարաբաղի Հանրապետության ընտրական իրավունք ունեցող քաղաքացիները (այսուհետ՝ ընտրողներ) Հանրապետության Նախագահի և Ազգային ժողովի համամասնական ընտրակարգով ընտրություններին (այսուհետ` ընտրություններ) մասնակցում են Լեռնային Ղարաբաղի Հանրապետության դիվանագիտական ներկայացուցչություններում կամ հյուպատոսական հիմնարկներում (այսուհետ՝ Հիմնարկ):

2. Ընտրությունների նախապատրաստման, կազմակերպման և անցկացման ընթացքում ընտրողների քվեարկությանը մասնակցելու իրավունքն ապահովում է Լեռնային Ղարաբաղի Հանրապետության դիվանագիտական ներկայացուցչության կամ հյուպատոսական հիմնարկի ղեկավարը (այսուհետ՝ Հիմնարկի ղեկավար)`Լեռնային Ղարաբաղի Հանրապետության ընտրական oրենսգրքով և կենտրոնական ընտրական հանձնաժողովի որոշումներով սահմանված կարգով:

3. Օտարերկրյա պետություններում քվեարկությունն անցկացվում է տեղամասային կենտրոններում, քվեարկության օրը` տեղական ժամանակով ժամը 8:00–ից մինչև ժամը 20:00-ն:

4. Ընտրողների ցուցակները կազմում, ստորագրում և կնքում է Հիմնարկի ղեկավարը` Լեռնային Ղարաբաղի Հանրապետության ընտրական օրենսգրքով սահմանված կարգով:

5. Քվեարկության նախորդ օրը կամ քվեարկության օրը ընտրություններին մասնակցելու հայտ ներկայացրած ընտրողներն ընդգրկվում են լրացուցիչ ցուցակում, որը կցվում է Հիմնարկի կողմից կազմված ցուցակին:

6. Հիմնարկի ղեկավարը ընտրողների ցուցակները քվեարկության օրվանից առնվազն 10 օր առաջ ուղարկում է կենտրոնական ընտրական հանձնաժողով՝ այդ ցուցակներում ընդգրկված ընտրողներին ըստ հաշվառման վայրի ընտրողների ցուցակներից հանելու համար:

7. Ընտրությունների անցկացումը նախապատրաստելու, կազմակերպելու և քվեարկության արդյունքներն ամփոփելու նպատակով Հիմնարկի ղեկավարը կազմավորում է ընտրական տեղամասեր և ձևավորում ընտրական հանձնաժողովներ` ընտրական իրավունք ունեցող Լեռնային Ղարաբաղի Հանրապետության քաղաքացիներից:

8. Օտարերկրյա պետություններում ընտրական տեղամասեր և տեղամասային կենտրոններ կազմավորվում են Հիմնարկներում՝ քվեարկությունից առնվազն 45 օր առաջ համարակալվում են համապատասխան Հիմնարկի ղեկավարի կողմից և երկօրյա ժամկետում ուղարկվում են կենտրոնական ընտրական հանձնաժողով:

9. Հիմնարկներում կազմավորված ընտրական տեղամասերը համարակալվում են m/n տեսքի, որտեղ m-ը համապատասխան Հիմնարկի գտնվելու վայրի (քաղաքի) անվանման առաջին տառն է, իսկ n-ը՝ այդ Հիմնարկում (քաղաքում) կազմավորված ընտրական տեղամասի հերթական համարը՝ յուրաքանչյուր քաղաքի համար սկսած 1-ից մինչև այդ քաղաքում կազմավորված հերթական վերջին տեղամասը:

10. Կենտրոնական ընտրական հանձնաժողովն էլեկտրոնային փոստով կամ Լեռնային Ղարաբաղի Հանրապետության արտաքին գործերի նախարարության միջոցով քվեարկությունից յոթ օր առաջ Հիմնարկներ է ուղարկում.

1) ընտրությունների մասին Լեռնային Ղարաբաղի Հանրապետության իրավական ակտերի օրինակները.

2) քվեաթերթիկների և ընտրական փաստաթղթերի նմուշները.

3) Հանրապետության Նախագահի` գրանցված թեկնածուների տվյալները, Լեռնային Ղարաբաղի Հանրապետության Ազգային ժողովի՝ համամասնական ընտրակարգով գրանցված կուսակցությունների (կուսակցությունների դաշինքների) ընտրական ցուցակները:

11. Հիմնարկի ղեկավարն ապահովում է քվեաթերթիկների տպագրումը` Լեռնային Ղարաբաղի Հանրապետության ընտրական օրենսգրքի պահանջներին և կենտրոնական ընտրական հանձնաժողովի կողմից հաստատված նմուշին համապատասխան:

12. Հիմնարկում կազմավորված ընտրական տեղամասում քվեարկության արդյունքների ամփոփման արձանագրությունը կնքվում է Հիմնարկի կնիքով:

13. Հիմնարկի ղեկավարն ընտրական տեղամասում քվեարկության արդյունքներն ամփոփում է քվեարկության ավարտից ոչ ուշ, քան 12 ժամ հետո և այդ տվյալներն էլեկտրոնային փոստով անհապաղ ուղարկում կենտրոնական ընտրական հանձնաժողով:

14. Քվեարկության արդյունքների վերաբերյալ արձանագրությունները, ընտրությունների մյուս փաստաթղթերը` սոսնձված և կնքված վիճակում, հատուկ փոuտով ուղարկվում են կենտրոնական ընտրական հանձնաժողով: