Լեռնային Ղարաբաղի Հանրապետության ընտրական օրենսգրքի 28-րդ հոդվածի 4-րդ մասին և «Իրավական ակտերի մասին» Լեռնային Ղարաբաղի Հանրապետության օրենքի 73-րդ հոդվածին համապատասխան` Լեռնային Ղարաբաղի Հանրապետության կենտրոնական ընտրական հանձնաժողովը որոշում է.

1. Սահմանել վերահսկիչ-վերստուգիչ ծառայության գործունեության կարգը` համաձայն հավելվածի:

2. Ուժը կորցրած ճանաչել Լեռնային Ղարաբաղի Հանրապետության կենտրոնական ընտրական հանձնաժողովի 2007 թվականի մայիսի 30-ի «Լեռնային Ղարաբաղի Հանրապետության կենտրոնական ընտրական հանձնաժողովին առընթեր վերահսկիչ-վերստուգիչ ծառայություն ստեղծելու, վերահսկիչ-վերստուգիչ ծառայության կազմավորման և գործունեության կարգը սահմանելու մասին» թիվ 35/132 որոշումը:

Կ Ա Ր Գ

1. Վերահսկիչ-վերստուգիչ ծառայությունը (այսուհետ՝ ծառայություն) վերահսկողություն է իրականացնում ընտրական հանձնաժողովներին տրամադրված միջոցների օգտագործման, նախընտրական հիմնադրամներ կատարվող մուծումների, դրանց հաշվարկման և ծախսերի նկատմամբ:

2. Ծառայությունն իր գործունեության ընթացքում ղեկավարվում է Լեռնային Ղարաբաղի Հանրապետության ընտրական օրենսգրքով, իրավական այլ ակտերով և սույն կարգով:

3. Ծառայությունը ստեղծվում է համապետական ընտրությունները նշանակվելու օրվան հաջորդող օրվանից և գործում է մինչև ընտրությունների արդյունքների հրապարակումից հետո` 31-րդ օրը:

4. Ծառայությունը կարող է ունենալ ձևաթղթեր և անհատականացման այլ միջոցներ:

5. Ծառայության աշխատանքները ղեկավարում է ծառայության ղեկավարը, որը ներկայացնում է ծառայությունը, իսկ կենտրոնական ընտրական հանձնաժողովի նախագահի լիազորագրի դեպքում` նաև կենտրոնական ընտրական հանձնաժողովը:

6. Ծառայության ղեկավարը պաշտոնի է նշանակվում և պաշտոնից ազատվում կենտրոնական ընտրական հանձնաժողովի որոշմամբ:

7. Ծառայությունը

1) վերահսկողություն է իրականացնում ընտրական հանձնաժողովներին տրամադրված միջոցների օգտագործման նկատմամբ.

2) վերահսկողություն է իրականացնում թեկնածուների, կուսակցությունների, կուսակցությունների դաշինքների նախընտրական հիմնադրամներ կատարվող մուծումների, դրանց հաշվարկման և ծախսերի նկատմամբ.

3) ստուգում է թեկնածուների, կուսակցությունների, կուսակցությունների դաշինքների նախընտրական հիմնադրամներ կատարված մուծումների և դրանց օգտագործման վերաբերյալ հայտարարագրերը, դրանք ստանալուց հետո` երկու օրվա ընթացքում, ստուգման արդյունքներով կազմում է տեղեկանք և ներկայացնում կենտրոնական ընտրական հանձնաժողովի քննարկմանը.

4) ուսումնասիրում և եզրակացություն է ներկայացնում ընտրական հանձնաժողովներին տրամադրված միջոցների օգտագործման, թեկնածուների, կուսակցությունների, կուսակցությունների դաշինքների նախընտրական հիմնադրամներ կատարվող մուծումների, դրանց հաշվարկման և ծախսերի վերաբերյալ ստացված դիմում-բողոքների մասին:

8. Ծառայությունն իրավունք ունի`

1) ուսումնասիրել ընտրական հանձնաժողովներում առկա ֆինանսական փաստաթղթերը.

2) անհրաժեշտության դեպքում նախընտրական հիմնադրամներ ձևավորելու համար ժամանակավոր հատուկ հաշվեհամարներ բացած բանկերից ստանալ համապատասխան տեղեկություններ, տեղեկանքներ, փաստաթղթերի պատճեններ՝ թեկնածուների, կուսակցությունների, կուսակցությունների դաշինքների նախընտրական հիմնադրամների ֆինանսական մուտքերի և ելքերի վերաբերյալ.

3) իր գործունեությանն առնչվող հարցերի վերաբերյալ նախապատրաստել որոշումների նախագծեր և դրանք ներկայացնել կենտրոնական ընտրական հանձնաժողովի քննարկմանը.

4) մասնակցել կենտրոնական ընտրական հանձնաժողովի կողմից ընտրությունների անցկացման ֆինանսական ապահովման նպատակով ընդունվող իրավական ակտերի նախագծերի նախապատրաստման աշխատանքներին:

9. Ծառայության գործունեության ֆինանսական և նյութատեխնիկական ապահովումը կատարվում է Լեռնային Ղարաբաղի Հանրապետության պետական բյուջեով նախատեսված միջոցների հաշվին