ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ПРАВИТЕЛЬСТВО НАГОРНО-КАРАБАХСКОЙ РЕСПУБЛИКИ

Ո Ր Ո Շ ՈՒ Մ

П О С Т А Н О В Л Е Н И Е

 ք. Ստեփանակերտ

г. Степанакерт

Լեռնային Ղարաբաղի Հանրապետության կառավարությունը ո ր ո շ ու մ  է`

Հաստատել Լեռնային Ղարաբաղի Հանրապետության գյուղատնտեսության և պարենամթերքների նախարարության կանոնադրությունը (կցվում է):

Կ Ա Ն Ո Ն Ա Դ Ր ՈՒ Թ Յ ՈՒ Ն

1. Ընդհանուր դրույթներ

Լեռնային Ղարաբաղի Հանրապետության գյուղատնտեսության և պարենամթերքների նախարարությունը (այսուհետև` նախարարություն) ստեղծված է «Լեռնային Ղարաբաղի Հանրապետության կառավարության մասին» ԼՂՀ օրենքով (ԼՂՀ Գերագույն խորհրդի նստաշրջանի 1992 թվականի հունվարի 18-ի թիվ 0021 ա որոշմամբ) և հանդիսանում է Լեռնային Ղարաբաղի Հանրապետությունում գյուղատնտեսությունը և իր համակարգի վերամշակող արդյունաբերությունը կառավարող հանրապետական գործադիր մարմին:

ԼՂՀ գյուղատնտեսության պարենամթերքների նախարարությունը`

1.1. Մշակում է հանրապետության գյուղատնտեսության և իր համակարգի վերամշակող արդյունաբերության զարգացման միասնական ծրագիրն ու հիմնական ուղղությունները սեփականության բոլոր ձևերի համար:

Մշակում է և իրականացնում է հանրապետությունում վարվող պետական ագրարային քաղաքականությունը:

1.2. Ելնելով ԼՂՀ ժողովրդական տնտեսության զարգացման հիմնադրույթներից, իրականացնում է գյուղատնտեսության և իր համակարգի վերամշակող արդյունաբերության ճյուղերի գործունեության երկարաժամկետ կանխատեսումը, ապահովում է այդ ճյուղերի սոցիալ-տնտեսական և գիտա-տեխնիկական առաջընթացի խնդիրների լուծումը:

1.3. Կոորդինացնում է գյուղատնտեսական արտադրությունը, իր համակարգի վերամշակող արդյունաբերությունը (անկախ սեփականության ձևերից) սպասարկող և մատակարարող ծառայությունների և համակարգի կառուցվածքային այլ ստորաբաժանումների գործունեությունը:

1.4. Համապատասխան մարմինների հետ միասին ապահովում է ագրարային ճյուղերի զարգացման հանրապետական ծրագրերի մշակումը, գյուղի սոցիալական զարգացումը և աշխատողների սոցիալական պաշտպանությունը:

1.5. Նախարարությունը ղեկավարվում է ԼՂՀ օրենքներով, ԼՂ Հանրապետության նախագահի հրամանագրերով, ԼՂ Հանրապետության Գերագույն խորհրդի և ԼՂՀ կառավարության որոշումներով, օրենսդրական, նորմատիվային այլ ակտերով, ինչպես նաև` սույն կանոնադրությամբ:

1.6. Իր գործունեությունն իրականացնում է համակարգի արտադրական, գիտաարտադրական, գիտական և այլ միավորումների ու ձեռնարկությունների գյուղատնտեսության վարչությունների, շրջանային և միջշրջանային գյուղատնտեսական և այլ կազմակերպությունների միջոցով:

1.7. Ընդհանրացնում է հանրապետությունում գործող օրենքների և օրենսդրական ակտերի կիրառման գործափորձը /պրակտիկան/, մշակում է առաջարկություններ նոր օրենսդրական ակտերի վերաբերյալ և սահմանված կարգով ներկայացնում ԼՂՀ կառավարություն:

1.8. Իր գործունեությունն իրականացնում է գյուղատնտեսական արտադրության վրա տնտեսական և օրենսդրական գործոնների ներազդմամբ:

1.9. Սերտորեն համագործակցում է ԼՂՀ շրջանների վարչակազմերի, ագրոարդյունաբերական համալիրի և այլ ճյուղային նախարարությունների, պետական վարչությունների ու գերատեսչությունների, ինչպես նաև` գյուղացիական կոլեկտիվ և անհատական տնտեսությունների հետ:

2. ՀԻՄՆԱԿԱՆ ԽՆԴԻՐՆԵՐԸ ԵՎ ԳՈՐԾԱՌՈՒՅԹՆԵՐԸ

2.1. Նախարարությունն ապահովում է գյուղատնտեսական մթերքների, հումքի և պարենային ապրանքների արտադրության ավելացումը, պարենային գծով պետական պատվերների ձևավորումը և կատարման վերահսկումը:

2.2. Նախարարությունն ապահովում է հողի, ջրի, արտադրության հիմնական միջոցների ու աշխատանքային ռեսուրսների արդյունավետ օգտագործումը: Իրականացնում է միասնական արտադրատնտեսական քաղաքականություն հողօգտագործման, հողաշինարարության, ջրօգտագործման, ջրաշինարարության, հողերի մելորացիայի և բարելավման, սերմնաբուծության ու սորտափորձարկման, բույսերի պաշտպանության, անասնաբուծության, տոհմային գործի, նյութատեխնիկական մատակարարման ու սպասարկման և այլ պետական գյուղատնտեսական ծառայությունների բնագավառներում: Մասնակցում է գյուղի աշխատանքային ռեսուրսների զբաղվածությունն ապահովող հատուկ ծրագրերի մշակմանն ու իրագործմանը:

2.3. Հողօգտագործման, ջրօգտագործման, անասնաբուժության, կարանտին ծառայության, գյուղատնտեսական տեխնիկայի պետական հսկողության, բույսերի պաշտպանության և սորտափորձարկման հարցերով նախարարությունը հանրապետությունում վարում է պետական տեսչական գործառույթ /ֆունկցիա/, և այդ հարցերին վերաբերող նրա որոշումները պարտադիր են հանրապետության բոլոր գերատեսչությունների, ձեռնարկությունների և բոլոր կարգի տնտեսությունների համար:

2.4. Մասնակցում է շուկայական և արտադրատնտեսական հարաբերությունների ձևավորման, հարկային, ֆինանսավարկային քաղաքականության մշակման և իրականացման աշխատանքներին:

2.5. Ապահովում է համակարգի և դրա կառուցվածքային ստորաբաժանումների տնտեսագիտական աշխատանքը, հաշվապահական հաշվառումը և ֆինանսական գործունեությունը, ստուգումների ու վերստուգումների ուղղությամբ անհրաժեշտ միջոցառումների անցկացումը, սահմանված կարգով կազմում է պետական ամփոփ հաշվետվություն:

2.6. Ուսումնասիրում է գյուղատնտեսական հումքի, արտադրանքի իրացման և արտադրամիջոցների ձեռքբերման շուկայական իրավիճակը, մշակում է համապատասխան երաշխավորություններ և այդ հիման վրա ճշգրտում է իրականացվող աշխատանքները, ձեռնարկում է գյուղատնտեսական հումք, մթերք արտադրողների շահերը կարգավորող միջոցներ:

2.7. Դիտարկում է ագրարային ոլորտի տնտեսավարող սուբյեկտների գործունեությունը, իր իրավասության սահմաններում կանխարգելում է սահմանված կարգի շեղումները և խախտումները, ապահովում է ամբողջ համակարգի փոխշահավետ գործունեությունը և շրջակա միջավայրի պահպանության պահանջների կատարումը:

2.8. Նախարարությունը ղեկավարում է իր ենթակայության տակ գտնվող պետական գյուղատնտեսական ձեռնարկությունների, ֆիրմաների, կոմբինատների, արտադրական միավորումների և տնտեսավարող այլ սուբյեկտների ընդհանուր գործունեությունը:

2.9. Որոշում և իրականացնում է գիտատեխնիկական առաջընթացի հիմնական ուղղությունները, դրա գիտական ապահովումը, հիմնարար և կիրառական գիտական հետազոտությունների պատվերների ձևավորումը, կազմակերպում է գյուղատնտեսության ճյուղերի վարման հայրենական և արտասահմանյան առաջավոր փորձի ուսումնասիրումը և տարածումը հանրապետությունում, կատարելագործում է գիտատեխնիկական լրատվության ձևերը և միջոցները:

2.10. Իրականացնում է մասնագիտական կադրերի վերապատրաստումը, որակավորման բարձրացումը, ագրարային բոլոր ճյուղերի համար ժամանակի պահանջների համապատասխան կադրերի պատրաստումը:

2.11. Իրականացնում է միջազգային տնտեսական և գիտատեխնիկական ուղղակի համագործակցություն:

2.12. Նախապատրաստում և իրականացնում է ագրարային ինվեստիցիոն քաղաքականություն, արտադրության զարգացման և տեղաբաշխման համալիր սխեմաներ և նախագծեր, սոցիալական և տնտեսական հատուկ ծրագրեր: Հանդիսանում է գյուղատնտեսական արտադրության կարևոր օբյեկտների կապիտալ շիանարարության գլխավոր պատվիրատու:

2.13. Սահմանում է գյուղատնտեսական տեխնիկայի, վառելիքի, էլեկտրական ու ջերմային էներգիայի, պարարտանյութերի, նյութատեխնիկական այլ ռեսուրսների նկատմամբ համակարգի պահանջները, կազմակեպում է դրանց մատակարարումը:

2.14. Մշակում և իրականացնում է արտադրական բոլոր ոլորտների աշխատանքի պաշտպանության, անվտանգության տեխնիկայի համալիր միջոցառումները:

2.15. Ապահովում է գյուղատնտեսության և իր համակարգի վերամշակող ճյուղերի համար անհրաժեշտ տեխնոլոգիական փաստաթղթերի, ստանդարտների, նորմաների և նորմատիվների մշակումն ու կատարելագործումը:

2.16. Իրականացնում է նախարարության համակարգի ձեռնարկությունների ու կազմակերպությունների իրավական սպասարկումը:

2.17. Նպատակամետ միջոցներ է ձեռնարկում բոլոր իրավիճակներում ագրարային ճյուղերի կայուն գործունեության ապահովման համար, իրականացնում է գիտահետազոտական և վարձարարական աշխատանքներ բույսերի ու կենդանիների պաշտպանության մեթոդների ու միջոցների ստեղծման, անասնաբուժական-կենսաբանական պատրաստուկների /պրեպարատների/ արտադրության գործը:

3. ՆԱԽԱՐԱՐՈՒԹՅԱՆ ՀԻՄՆԱԿԱՆ ԻՐԱՎՈՒՆՔՆԵՐԸ

3.1. ԼՂՀ վիճակագրության պետական վարչությունից և դրա համաձայնեցված կարգով մյուս նախարարություններից, պետական վարչություններից և գերատեսչություններից ստանալ վիճակագրական և հաշվետու տվյալներ:

3.2. Մասնակցել պարենի և գյուղատնտեսական հումքի մթերումների պետական պատվերների ձևավորման գործին:

3.3. Ամփոփել և ձևավորել նյութատեխնիկական միջոցների նկատմամբ գյուղատնտեսության համակարգի պահանջարկը և հայտերը:

3.4. Կազմակերպել մասնագետների ստեղծագործական ժամանակավոր կոլեկտիվներ` գյուղատնտեսության զարգացմանն առնչվող հանրապետական ծրագրեր մշակելու համար:

3.5. Իր տնօրինության տակ ունենալ ֆինանսական և նյութատեխնիկական միջոցներ` ագրարային համակարգի զարգացման, խոշոր ծրագրերի մշակման և իրականացման, ինչպես նաև գիտահետազոտական և փորձարարական-կոնստրուկտորական աշխատանքների ֆինանսավորման համար:

3.6. Օրենքներով և օրենսդրական ակտերով սահմանված կարգով նախարարությունը իրականացնում է`

- հողերի օգտագործման և պահպանության պետական վերահսկողությունը հողերի վիճակի համակարգված դիտարկումը, հողային կադաստրի վարումը, հողաշինարարության կազմակերպումը: Մասնակցում է հողային վեճերի լուծմանը և հողային օրենսդրության խախտումների վերացմանը.

- տնօրինում է հանրապետության ջրային ռեսուրսները, իրականացնում պետական վերահսկողություն մակերեսային և ստորգետնյա ջրերի օգտագործման և պահպանության նկատմամբ, կատարում է ջրային ռեսուրսների հաշվառումը, վարում է ջրային կաղաստրը, հանրապետության ջրօգտագործվող բոլոր սուբյեկտներին տալիս է ջրօգտագործման հատուկ թույլտվություն.

- պետական հսկողություն մշակաբույսերի պաշտպանության, վնասատուների և հիվանդությունների դեմ պայքարի աշխատանքների ապահովման, կարանտինային կազմակերպման, սորտերի շրջանցման, գենոֆոնդի պահպանման և կատարելագործման, սերմերի և տնկանյութի արտադրության տեխնոլոգիական պահանջների ուղղությամբ.

- անասնաբուժական ծառայության կազմակերպումը, պետական անասնաբուժական կանխարգելիչ միջոցառումների, անասնաբուժական կարանտինի, պետտեսչական հսկողության ապահովումը: Մշակում և իրականացնում է գյուղատնտեսական կենդանիների տոհմային գործի և բուծվող ցեղերի գենոֆոնդի պահպանության կատարելագործման համալիր միջոցառումներ.

- պետտեխհսկողություն նախարարության համակարգի ավտոտրանսպորտային միջոցների, տրակտորների, գյուղատնտեսական տեխնիկայի և անասնապահական ֆերմաների մեքենա-սարքավորումների, դրանց նորոգման և տեխնիկայի սպասարկման որակի, նավթամթերքների տեղափոխման, պահպանության և օգատգործման նկատմամբ:

3.7. Մշակում է և ԼՂՀ կառավարության հաստատմանն է ներկայացնում գյուղատնտեսական պետական տեսչությունների կանոնադրության նախագծերը:

3.8. Հաստատում է նախարարության համակարգում ընդգրկված ճյուղերի և ծառայությունների կանոնադրության նախագծերը:

3.9. Վերահսկում է մթերող կազմակերպությունների կողմից պետական և կոլեկտիվ գյուղատնտեսական ձեռնարկություններից ու կազմակերպություններից, ինչպես նաև անհատ արտադրողներից գնվող արտադրանքի ընդունման ճշտությունը, դրա քանակի ու որակի որոշումը, դրանց հաշվարկների հավաստիությունը և ժամանակին կատարումը, իր իրավասության սահմաններում լուծում է ծագող վեճերը:

3.10. Ստեղծում է կենտրոնացված, պահուստային և օրենսդրությամբ նախատեսված այլ ֆոնդեր, բաշխում է արտաբյուջետային հատկացումներն ու մյուս միջոցները:

Նախարարության կենտրոնական ապարատի պահպանումը կատարվում է բյուջետային միջոցների հաշվին:

3.11. Աշխատանքային օրենսդությանը համապատասխան` նշանակում, տեղաբաշխում, ազատում, ինչպես նաև կարգապահական պատասխանատվության է ենթարկում կենտրոնական ապարատի աշխատողներին, համակարգի ենթակա միավորումների, ձեռնարկությունների ու կազմակերպությունների պատասխանատու աշխատողներին:

4. ՆԱԽԱՐԱՐՈՒԹՅԱՆ ՂԵԿԱՎԱՐՈՒՄԸ

4.1. Նախարարությունը գլխավորում է նախարարը, որը նշանակվում է սահմանված կարգով:

Նախարարի տեղակալները նշանակվում են ԼՂՀ կառավարության կողմից: Տեղակալների միջև պարտականությունների բաշխումը կատարում է նախարարը. այն հաստատվում է կոլեգիայի կողմից:

4.2. Գյուղատնտեսության նախարարը անձնական պատասխանատվություն է կրում նախարարության վրա դրված պարտականությունները և գործառույթները կատարելու համար, իսկ նախարարի տեղակալները և կառուցվածքային ստորաբաժանումների ղեկավարները` համապատասխան բնագավառների, ինչպես նաև ենթակա օղակների, ձեռնարկությունների ու միավորումների գործունեության համար:

4.3. Նախարարությունն իր իրավասության սահմաններում ընդունում է հրահանգներ, որոնք պարտադիր են ենթակա կազմակերպությունների, ձեռնարկությունների, միավորումների համար:

Նախարարությունն անհրաժեշտության դեպքում արձակում է հրամաններ և ցուցումներ այլ նախարարությունների, պետական վարչությունների ու գերատեսչությունների հետ համատեղ:

4.4. Նախարարությունում կազմակերպվում է կոլեգիա, որի կազմի մեջ ի պաշտոնե մտնում են նախարարը (կոլեգիայի նախագահ), իր տեղակալները, ինչպես նաև նախարարության և համակարգի այլ աշխատողներ: Նախարարության կոլեգիայի անդամների քանակական և անվանական կազմը հաստատվում է ԼՂՀ կառավարության կողմից:

Նախարարության կոլեգիան նիստերում քննարկում է գյուղատնտեսական արտադրության զարգացման, նախարարության ապարատի աշխատանքի կազմակերպման, կադրերի ընտրության, տեղաբաշխման, ինչպես նաև նախարարության գործունեությանը վերաբերող այլ հիմնահարցեր:

Կոլեգիայի ընդունած որոշումները իրականացվում են նախարարի հրամանով:

4.5. Գիտության, տեխնիկայի նորագույն նվաճումները ներդնելու գիտատեխնիկական մշակումների և առաջարկությունների փորձաքննության ապահովման նպատակով նախարարությունում ստեղծվում է գիտատեխնիկական խորհուրդ` հանրապետության առաջատար գիտնականների և մասնագետների կազմով:

Խորհուրդը գլխավորում է նախարարը:

Գիտատեխնիկական խորհրդի անհատական կազմը և կանոնադրությունը հաստատում է նախարարը:

4.6. Նախարարությունն իր կազմում կարող է ունենալ իրավաբան /արբիտրաժ/` պետական ձեռնարկությունների, հիմնարկների, կազմակերպությունների միջև ծագած վեճերը սահմանված իրավասության սահմաններում լուծելու համար: Իրավաբանի /արբիտրաժի/ կանոնադրությունը հաստատվում է սահմանված կարգով:

4.7. Նախարարության կենտրոնական ապարատի հաստիքային թվաքանակը և աշխատանքի վարձատրության ֆոնդը հաստատվում է ԼՂՀ կառավարության կողմից: Նախարարն իրավունք ունի փոփոխելու կենտրոնական ապարատի կառուցվածքը, աշխատողների թվաքանակի ընդհանուր թվի և աշխատանքի վարձատրություն ֆոնդի սահմաններում:

4.8. ԼՂՀ գյուղատնտեսության և պարենամթերքների նախարարությունն ունի կնիք ԼՂՀ զինանշանի պատկերով և իր անվանումով: