ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ПРАВИТЕЛЬСТВО НАГОРНО-КАРАБАХСКОЙ РЕСПУБЛИКИ

Ո Ր Ո Շ ՈՒ Մ

П О С Т А Н О В Л Е Н И Е

 ք. Ստեփանակերտ

г. Степанакерт

Լեռնային Ղարաբաղի Հանրապետության կառավարությունը որոշում է`

Հաստատել ԼՂՀ ‹‹Արցախկենցաղսպասարկում›› հանրապետական արտադրական միավորման կանոնադրությունը (կցվում է):

Կ Ա Ն Ո Ն Ա Դ Ր ՈՒ Թ Յ ՈՒ Ն

‹‹Արցախկենցաղսպասարկում›› հանրապետական արտադրական միավորման

1. Ընդհանուր դրույթներ

1.1. ‹‹Արցախկենցաղսպասարկում›› հանրապետական արտադրական միավորումը (այսուհետև` միավորում) վերանվանվել է ԼՂՀ Պաշտպանության պետական կոմիտեի 1994 թվականի ապրիլի 28-ի հ. 430 որոշմամբ և հանդիսանում է Լեռնային Ղարաբաղի Հանրապետության բնակչության կենցաղային սպասարկման հանրապետական արտադրական միավորման իրավահաջորդը:

Միավորումը ենթարկվում է Լեռնային Ղարաբաղի Հանրապետության կառավարությանը:

1.2. Միավորումը կենցաղային ծառայությունների մատուցման, բնակչության պատվերներով ժողովրդական սպառման ապրանքների արտադրության և իրացման տնտեսական համակարգ է:

1.3. Միավորումը տնտեսական շահագրգռվածության հիման վրա միավորում է կենցաղային սպասարկման արտադրական, քաղաքային և շրջանային ձեռնարկությունները, շինարարական, նորոգման ձեռնարկությունները, ինչպես նաև` ուսումնաարտադրական հաստատությունները, որոնք համարվում են միավորմանը ենթակա ստորաբաժանումներ:

Միավորման մեջ կարող են մտնել բոլոր տեսակի կոոպերատիվները, անհատական աշխատանքային գործունեությամբ զբաղված անձինք, ինչպես նաև` կոլեկտիվ սեփականատիրական ձեռնարկությունները:

1.4. Միավորման կազմի մեջ մտնող ձեռնարկությունները համատեղ աշխատանքի ընթացքում իրենց փոխհարաբերությունները կառուցում են պայմանագրային հիմունքներով` պահպանելով գործող տնտեսական կապերը:

Միավորումն իր կազմի մեջ մտնող հիմնարկ-ձեռնարկությունների շահերը ներկայացնում է նախարարությունների, պետական վարչությունների, գերատեսչությունների, այլ կազմակերպությունների, հիմնարկությունների ու հաստատությունների հետ փոխհարաբերություններում

1.5. Միավորման ստորաբաժանումները պահպանում են իրենց տնտեսական ինքնուրույնությունը, ինչպես նաև` ձևավորված տնտեսական կապերն ու հարաբերությունները:

1.6. Միավորումը և իր ստորաբաժանումներն իրենց գործունեության մեջ ղեկավարվում են Լեռնային Ղարաբաղի Հանրապետության սահմանադրությամբ և օրենքներով, ԼՂՀ նախագահի հրամանագրերով և կարգադրություններով, ԼՂՀ Գերագույն խորհրդի (խորհրդարանի) որոշումներով, ԼՂՀ կառավարության որոշումներով և կարգադրություններով, սույն կանոնադրությամբ:

1.7. Միավորումը գործում է որպես ինքնուրույն արտադրատնտեսական համակարգ և իր գործունեությունն իրականացնում է լրիվ տնտհաշվարկի, ինքնաֆինանսավորման և ինքնակառավարման սկզբունքներով:

1.8. Միավորումն իրավաբանական անձ է, ունի ինքնուրույն հաշվեկշիռ, հաշվարկային այլ հաշիվներ բանկերում, ամբողջ համակարգի համար կազմում է ֆինանսատնտեսական գործունեության հաշվեկշիռ, համապատասխան մարմիններին ներկայացնում է հաշվապահական և վիճակագրական հաշվետվություն:

1.9. Միավորումն ունի Լեռնային Ղարաբաղի Հանրապետության զինանշանը պատկերող և իր անվանմամբ կնիք:

1.10. Միավորման և դրա ստորաբաժանումների արտադրական, գիտատեխնիկական, սոցիալական զարգացման ընդհանուր խնդիրների լուծումը կատարվում է սեփական միջոցների հաշվին:

1.11. Միավորման ունեցվածքը կազմվում է միավորման հիմնական ֆոնդերից և սեփական շրջանառու միջոցներից, շահութաբաժիններից, ծառայությունների մատուցումից, աշխատանքների, արտադրանքի իրացումից ստացված մյուս եկամուտներից, ինչպես նաև` դրամական և նյութական այլ միջոցներից:

1.12. Միավորումը պատասխանատու չէ ինքնուրույն հաշվեկշիռ ունեցող իր ստորաբաժանումների ֆինանսական պարտավորությունների համար, վերջիններս էլ իրենց հերթին պատասխանատու չեն միավորման պարտավորությունների համար:

2. Խնդիրներն ու գործառույթները (ֆունկցիաները)

2.1. Միավորման հիմնական խնդիրներն ու գործառույթներն են`

- լայն տեսականիով և որակյալ կենցաղային ծառայություններով բնակչության պահանջմունքների բավարարումը.

- համակարգի տեխնիկական վերազինման, նոր տեխնիկայի և առաջավոր տեխնոլոգիայի ներդրման միջոցառումների ապահովումը.

- ծառայությունների և աշխատանքների արդյունավետ մասնագիտացումը և կոոպերացումը, փոխշահավետ ուղղակի տնտեսական կապերի հաստատումը և սահմանված կարգով ստեղծված համատեղ ձեռնարկությունների զարգացումը.

- կենցաղային սպասարկման գործող ձեռնարկությունների ու կազմակերպությունների վերակառուցումը, ընդլայնումը, տեխնիկական վերազինումը և դրանց արտադրական բազայի զարգացումը.

- համակարգի աշխատավորական կոլեկտիվների համար սոցիալական առավել նպաստավոր պայմանների ստեղծումը.

- արտասահմանյան երկրների ձեռնարկությունների հետ փոխշահավետ համագործակցության հաստատումն ու զարգացումը.

- միավորման ստորաբաժանումներին հաշվապահական հաշվառման և հաշվետվության կազմակերպման գործում մեթոդական օգնության ցուցաբերումը.

- ղեկավար կադրերի և մասնագետների պատրաստումը, ուսուցումը և որակավորման բարձրացման կազմակերպումը.

- պետական գույքի սեփականաշնորհման գործընթացի և շուկայական հարաբերությունների զարգացման ապահովման համար անհրաժեշտ միջոցների ձեռնարկումը.

- Լեռնային Ղարաբաղի Հանրապետության օրենսդրությամբ սահմանված կարգով ենթակա ձեռնարկությունների արտաքին տնտեսական գործունեության և ձեռնարկատիրական գործունեության կարգավորումը.

- ստորաբաժանումների գործունեության ներդաշնակումը` անկախ սեփականության ձևից, և դրանց արդյունավետ աշխատանքի անհրաժեշտ նախադրյալների ստեղծման ապահովումը:

3. Միավորման իրավունքները

3.1. Միավորումն իրավունք ունի`

- ձևավորել իր արտադրատնտեսական կազմակերպական կառավարման կառուցվածքը, այդ թվում` սահմանված կարգով ստեղծել, վերակազմավորել և լուծարել ձեռնարկություններ ու կազմակերպություններ.

- սահմանված կարգով ստեղծել բաժնետիրական ընկերություններ, իրացնել նպատակային փոխառություններ.

- իրականացնել ուղղակի արտահանման և ներմուծման գործառնություններ, այդ նպատակով ստեղծել միավորման արտաքին տնտեսական կապերի ֆիրմա.

- երկարաժամկետ վարձակալության հանձնել ձեռնարկություններ ու կազմակերպություններ.

- համակարգի ձեռնարկությունների տրամադրության տակ թողնված շահույթներից մասհանումների հաշվին իրականացնել կենտրոնական աշխատակազմի (ապարատի) պահպանման ծախսերը:

4. Միավորման ղեկավարումը

4.1. Միավորման ղեկավարումն իրականացվում է տնտեսագիտական մեթոդներով` ինքնակառավարման սկզբունքներով, ղեկավարման ժողովրդավարական (կոլեգիական) և միանձնյա ձևերի զուգակցման հիման վրա:

4.2. Միավորման ղեկավար գլխավոր մարմինը տնօրենների խորհուրդն է, որի կազմի մեջ մտնում են միավորման գլխավոր տնօրենը (ի պաշտոնե` տնօրենների խորհրդի նախագահ), իր տեղակալները, ինչպես նաև` այլ ղեկավար անձինք:

Տնօրենների խորհրդի նիստը հրավիրվում է խորհրդի որոշմամբ` ըստ անհրաժեշտության, տարեկան ոչ պակաս քան մեկ անգամ

Տնօրենների խորհրդի որոշումները, որպես կանոն, կենսագործվում են գլխավոր տնօրենի հրամաններով:

4.3. Տնօրենների խորհուրդը`

- հաստատում է միավորման կազմը.

- լուծում է միավորման կազմում նոր ձեռնարկություններ ու կազմակերպություններ ընդգրկելու և կազմից հանելու հարցերը.

- հաստատում է համակարգի տնտեսական և սոցիալական զարգացման տարեկան և հեռանկարային ծրագրերը.

- որոշում է կապիտալ ներդրումների կառուցվածքային հարցերը.

- Ստեփանակերտ քաղաքի և շրջանների վարչակազմերի հետ համաձայնեցմամբ նշանակում է պաշտոնի և պաշտոնից ազատում տնտհաշվարկային ձեռնարկությունների ղեկավարներին.

- հաստատում է միավորման հաշվեկշիռը.

- հաստատում է միավորման աշխատակազմի (ապարատի), դրա պահպանման ծախսերի նախահաշիվները:

Տնօրենների խորհրդի որոշումներն ընդունվում են նրա անդամների ձայների պարզ մեծամասնությամբ:

(4.3-րդ կետը խմբ. 25.07.1995 N 145)

4.4. Միավորման գլխավոր տնօրենը`

- ղեկավարում է միավորման և դրա ենթակա ստորաբաժանումների գործունեությունը.

- անձնական պատասխանատվություն է կրում միավորման վրա դրված խնդիրների ու պարտականությունների կատարման համար.

- կազմակերպում է պետական իշխանության և կառավարման մարմինների կայացրած որոշումների կենսագործումը.

- բաշխում է պարտականություններն իր և տեղակալների միջև.

- իր իրավասության սահմաններում արձակում է հրամաններ ու կարգադրություններ, տալիս ցուցումներ.

- հաստատում է ենթակա ստորաբաժանումների կանոնադրությունները.

- գործող օրենսդրության համաձայն` աշխատանքի է ընդունում և աշխատանքից ազատում միավորման աշխատողներին.

- միավորման անունից տալիս է լիազորագրեր, բանկերում բացում հաշիվներ, տնօրինում միավորման գույքն ու միջոցները.

- միավորման գլխավոր տնօրենն ու իր տեղակալները գործում են միավորման անունից, ներկայացնում դրա շահերը բոլոր հիմնարկություններում ու կազմակերպություններում, դատական և արբիտրաժային (իրավարանային) մարմիններում, կնքում պայմանագրեր, միավորման աշխատողներին տալիս են համապատասխան լիազորություններ:

5. Միավորման կազմավորումը, վերակազմավորումը և լուծարումը

Միավորումը ստեղծվում է, վերակազմավորվում է և դադարեցնում է իր գործունեությունը Լեռնային Ղարաբաղի Հանրապետության կառավարության որոշմամբ: