ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

 ք.Ստեփանակերտ

«Կրթության մասին» Լեռնային Ղարաբաղի Հանրապետության օրենքի 41, 42 և 43 հոդվածներին համապատասխան` Լեռնային Ղարաբաղի Հանրապետության կառավարությունը որոշում է.

1. Հաստատել

ա/ Լեռնային Ղարաբաղի Հանրապետությունում կրթական գործունեության լիցենզավորման կարգը (կցվում է),

բ/ Լեռնային Ղարաբաղի Հանրապետությունում միջին և բարձրագույն մասնագիտական ուսումնական հաստատությունների և դրանց մասնագիտությունների պետական հավատարմագրման կարգը (կցվում է),

գ/ ԼՂՀ կրթության և գիտության նախարարության «Լիցենզավորման և հավատարմագրման ծառայության» կանոնադրությունը (կցվում է):

2. ԼՂՀ կրթության և գիտության նախարարությանը` համաձայն «Լեռնային Ղարաբաղի Հանրապետությունում կրթական գործունեության լիցենզավորման կարգի»` մինչև ս.թ. մայիսի 30-ը վերանայել ԼՂՀ տարածքում գործող ոչ պետական ուսումնական հաստատությունների գործունեության լիցենզիաները: Նշված ժամկետում վերալիցենզավորումն իրականացնել առանց պետական տուրքի գանձման:

1. Սույն կարգով սահմանվում է Լեռնային Ղարաբաղի Հանրապետությունում իրավաբանական անձանց կողմից կրթական գործունեության լիցենզավորումը:

2. Ոչ պետական ուսումնական հաստատությունները կրթական գործունեություն իրականացնելու իրավունք են ձեռք բերում լիցենզիա ստանալու, իսկ պետական ուսումնական հաստատությունները` հիմնադրման պահից:

3. Անկախ կազմակերպական-իրավական ձևից լիցենզավորման ենթակա է ոչ պետական հիմնական և լրացուցիչ կրթական ծրագրեր իրականացնող ուսումնական հաստատությունների (կազմակերպությունների) կրթական գործունեությունը, այդ թվում`

4. Ուսումնական հաստատության մասնաճյուղերի, այդ թվում` օտարերկրյա ուսումնական հաստատությունների մասնաճյուղերի կրթական գործունեությունը լիցենզավորվում է սույն կարգի համաձայն` մասնաճյուղ ունեցող ուսումնական հաստատության դիմումի հիման վրա: Մասնաճյուղի համար լիցենզիան տրվում է մասնաճյուղն ունեցող ուսումնական հաստատությանը:

5. Տարբեր ծրագրեր իրականացնող կրթական գործունեության (այսուհետև` կրթական գործունեություն) յուրաքանչյուր տեսակի համար տրվում է առանձին լիցենզիա:

6. Լիցենզիան չի կարող օտարվել:

7. Լիցենզիա տալու համար կամ կրթական գործունեության նոր տեսակներ ավելացնելու դեպքում գանձվում է պետական տուրք` «Պետական տուրքի մասին» ԼՂՀ օրենքով սահմանված կարգով և չափերով:

8. Լիցենզիան տրվում է անժամկետ:

9. Առանց լիցենզիայի կրթական գործունեություն իրականացնող իրավաբանական անձը պատասխանատվություն է կրում ԼՂՀ օրենսդրությամբ սահմանված կարգով:

10. Կրթական գործունեության լիցենզիան տալիս է ԼՂՀ կրթության և գիտության նախարարությունը (այսուհետև` Նախարարություն)` փորձաքննության արդյունքների հիման վրա: Իրավաբանական անձի կրթական գործունեության լիցենզավորման համար եզրակացությունը տալիս է Նախարարության լիցենզավորման և հավատարմագրման ծառայությունը (այսուհետև` ծառայություն): Անհրաժեշտության դեպքում ծառայությունը փորձաքննությունն իրականացնում է Հայաստանի Հանրապետության կրթության և գիտության նախարարության լիցենզավորման և հավատարմագրման ծառայության միջոցով:

11. Կրթական գործունեության լիցենզիա ստանալու նպատակով իրավաբանական անձը Ծառայություն է ներկայացնում`

ա/ դիմում, որում նշվում են իրավաբանական անձի`

- լրիվ անվանումը,

- կազմակերպական-իրավական ձևը,

- գտնվելու վայրը, հեռախոսը, ֆաքսը, էլեկտրոնային փոստը, (e-mail),

- կրթական գործունեության տեսակները և կրթության ձևը (առկա, հեռակա, դրսեկություն) ըստ կրթական աստիճանների,

- մասնագիտությունների, լրացուցիչ կրթական ծրագրերի և դասընթացների ցանկը,

բ/ կանոնադրության պատճենը,

գ/ պետական գրանցման վկայականի պատճենը,

դ/ փաստաթղթեր`

- հիմնական մանկավարժական և պրոֆեսորադասախոսական կազմի,

- լաբորատոր բազայի և ուսումնական տարածքի,

- ուսումնամեթոդական ապահովման, գրադարանային-տեղեկատվական բազայի,

- ուսումնաարտադրական պրակտիկայի բազայի վերաբերյալ:

12. Ծառայությունը սույն կարգի 11-րդ կետում նշված փաստաթղթերն ստանալուց հետո ստուգում է դրանք, գրանցում դիմումը և այդ մասին ծանուցում իրավաբանական անձին:

13. Ծառայությունը լիցենզավորման մասին եզրակացություն տալու նպատակով մեկամսյա ժամկետում իրականացնում է փորձաքննություն` ստուգելով`

ա/ տարածքներ զբաղեցնելու վերաբերյալ տվյալները` սահմանված սանիտարական նորմերին համապատասխան (աղյուսակ 1)

բ/ ուսումնամեթոդական փաստաթղթերի համապատասխանությունը պետական կրթական չափորոշիչների պահանջներին`

- մասնագիտության ուսումնական պլանը, ուսումնական պլանով նախատեսված դասընթացների առարկայական ծրագրերը (հանրակրթական, միջին և բարձրագույն մասնագիտական ուսումնական հաստատությունների համար),

- սովորողների ընդունելության, ավարտական եզրափակիչ քննությունների հանձնման և դիպլոմային նախագծերի պաշտպանության, տեղափոխման և փոխադրման կարգերը (հանրակրթական, միջին և բարձրագույն մասնագիտական ուսումնական հաստատությունների համար),

գ/ ուսումնական հաստատության (կազմակերպության) մանկավարժական և պրոֆեսորադասախոսական կազմը (աղյուսակ 2)

N 2 աղյուսակի 6-րդ և 7-րդ սյունակները լրացնելիս համարիչում տրվում են տվյալներ նոր ստեղծվող, իսկ հայտարարում` այլ ուսումնական հաստատությունում (կազմակերպությունում) նույն անձի զբաղեցրած պաշտոնի և հաստիքի վերաբերյալ:

Բարձրագույն մասնագիտական ուսումնական հաստատության պրոֆեսորադասախոսական կազմը պետք է բավարարի հետևյալ պահանջները`

- առնվազն 50 տոկոսը պետք է լինի տվյալ ուսումնական հաստատության (կազմակերպության) հիմնական հաստիքային աշխատող,

- առնվազն 50 տոկոսը պետք է ունենա գիտական աստիճան կամ պետական լիազորված մարմնի կողմից ճանաչված գիտական կոչում, այդ թվում` յուրաքանչյուր մասնագիտության գծով 3-ը` մասնագիտական առարկաներից,

դ) ուսումնական և տեղեկատվական գրականությամբ ապահովվածությունը` Նախարարության կողմից սահմանված չափաքանակներին համապատասխան (հանրակրթական, միջին և բարձրագույն մասնագիտական ուսումնական հաստատությունների, դասընթացների համար):

Ուսումնական հաստատությունում (կազմակերպությունում) գրադարանի բացակայության դեպքում ներկայացվում է այլ գրադարանից օգտվելու նպատակով կնքված պայմանագրի պատճենը:

ե) ուսումնալաբորատոր և մարզական բազաներով ապահովվածությունը`

- ուսումնալաբորատոր բազա` հագեցված Նախարարության կողմից սահմանված անհրաժեշտ նյութերով, չափիչ-ստուգիչ սարքերով, սարքավորումներով, համակարգչային դասարան, իսկ բժշկական ուսումնական հաստատությունների համար` նաև կենդանանոց (վիվարիում),

- մարզադահլիճ առնվազն 25 սովորողի միաժամանակյա պարապմունքի անցկացման (ուսումնական հաստատությունների համար):

Սեփական ուսումնալաբորատոր և մարզական բազաների բացակայության դեպքում ներկայացվում է համապատասխան այլ բազաներից օգտվելու նպատակով կնքված պայմանագրի պատճենը,

զ) ուսումնական, կլինիկական, մանկավարժական և արտադրական պրակտիկաների բազաների ապահովումը (միջին և բարձրագույն մասնագիտական ուսումնական հաստատությունների համար):

Ուսումնական հաստատությունը ներկայացնում է իր բնագավառի բազային հաստատությունների, հիվանդանոցների և կազմակերպությունների ցանկը, ինչպես նաև դրանց հետ կնքված պայմանագրերի պատճենները, որոնցում նշվում են`

- պրակտիկանտների թիվը և անհրաժեշտ աշխատողները,

- պրակտիկայի աշխատանքային ծրագիրը և ժամկետը:

14. Ծառայության եզրակացությունը ներկայացվում է Նախարարին, որի հրամանով 15 օրվա ընթացքում կարող է անցկացվել կրկնակի փորձաքննություն:

Ծառայությունը լիցենզիա տալու կամ լիցենզիա տալը մերժելու մասին Նախարարի հրամանի վերաբերյալ 5-օրյա ժամկետում իրազեկում է իրավաբանական անձին:

15. Լիցենզիա տալը մերժելու հիմքերն են`

ա) փաստաթղթերում ներկայացված տվյալների անհամապատասխանությունը սույն կարգի 13-րդ կետի պահանջներին,

բ) դիմումում և փաստաթղթերում պարունակած տեղեկությունների ոչ հավաստի կամ կեղծ լինելը:

16. Աննպատակահարմարության շարժառիթներով լիցենզիա տալն արգելվում է:

17. Լիցենզիայի վկայականի ձևը սահմանում է Նախարարությունը:

18. Ծառայությունը լիցենզիան տալու վերաբերյալ տեղեկությունը հրապարակում է մամուլում կամ զանգվածային լրատվության մյուս միջոցներով:

19. Լիցենզիայի ձևաթղթերը համարվում են խիստ հաշվառման փաստաթղթեր:

20. Իրավաբանական անձն իրավունք ունի դատական կարգով բողոքարկելու լիցենզիա տալը մերժելու մասին նախարարի հրամանը` ԼՂՀ օրենսդրությամբ սահմանված կարգով:

21. Ծառայությունն իրավասու է լիցենզիայի պայմանները պահպանելու նպատակով ուսումնական տարվա ընթացքում ոչ ավելի, քան մեկ անգամ ուսումնական հաստատությունում կատարելու ուսումնասիրություն:

22. Եթե իրավաբանական անձը խախտել է սույն կարգով սահմանված լիցենզիայի պայմաններից որևէ մեկը, ապա նախազգուշացվում է Ծառայության կողմից:

Նախազգուշացման հիմք կարող են լինել նաև`

ա/ լիցենզիայի գործողության ընթացքում Ծառայությանը ներկայացված փաստաթղթերում իրականությանը չհամապատասխանող տեղեկությունների հայտնաբերումը,

բ/ կրթական գործունեության մեջ լիցենզավորման պահանջների խախտումների հայտնաբերումը, որոնք կարող են վերացվել:

23. Իրավաբանական անձը պարտավոր է 6-ամսյա ժամկետում վերացնել սույն կարգի 22-րդ կետում նշված խախտումները և դրանց վերացման մասին հայտնել Նախարարություն` ներկայացնելով հիմնավորող փաստաթղթեր:

24. Սահմանված ժամկետում խախտումը (խախտումները) չվերացնելու դեպքում կասեցվում է համապատասխան մասնագիտության (մասնագիտությունների) գծով ընդունելությունը` մինչև խախտման (խախտումների) վերացումը:

25. Նախարարությունը Ծառայության ներկայացմամբ լիցենզիան ուժը կորցրած է ճանաչում, եթե.

ա/ ԼՂՀ օրեսդրությամբ սահմանված կարգով դադարեցվել է հաստատության (կազմակերպության) գործունեությունը,

բ/ իրավաբանական անձը դիմել է լիցենզիան հանձնելու խնդրանքով,

գ/ իրավաբանական անձի կողմից ներկայացված փաստաթղթերում առկա են ակնհայտ կեղծ տեղեկություններ:

26. Իրավաբանական անձը լիցենզիան ուժը կորցրած ճանաչելու մասին նախարարի հրամանի արձակման պահից զրկվում է կրթական գործունեություն իրականացնելու իրավունքից: Ուժը կորցրած ճանաչված լիցենզիան 10-օրյա ժամկետում ենթակա է վերադարձման Ծառայությանը:

27. Ծառայությունը 5-օրյա ժամկետում լիցենզիան ուժը կորցրած ճանաչելու մասին իրազեկում է իրավաբանական անձին և համապատասխան տեղեկություն հրապարակում մամուլում կամ զանգվածային լրատվության մյուս միջոցներով:

28. Լիցենզիան ուժը կորցրած ճանաչելու մասին նախարարի հրամանը կարող է բողոքարկվել դատական կարգով` ԼՂՀ օրենսդրությամբ սահմանված կարգով:

29. Իրավաբանական անձը լիցենզիայի վկայականը կորցնելու դեպքում դիմում է Նախարարություն, որը 15-օրյա ժամկետում տալիս է «Կրկնօրինակ» նշագրմամբ լիցենզիայի նոր վկայական, որի համար գանձվում է պետական տուրք` «Պետական տուրքի մասին» ԼՂՀ օրենքով սահմանված կարգով և չափերով:

1. Սույն կարգով սահմանվում է Լեռնային Ղարաբաղի Հանրապետությունում միջին և բարձրագույն մասնագիտական պետական և ոչ պետական ուսումնական հաստատությունների (այսուհետև` ուսումնական հաստատություն) և դրանց մասնագիտությունների պետական հավատարմագրումը:

2. Ուսումնական հաստատությունների և դրանց մասնագիտությունների պետական հավատարմագրումն ուսումնական հաստատության մասնագետների պատրաստման որակի` պետական կրթական չափորոշիչներին համապատասխանության ճանաչումն է պետության կողմից:

3. Պետական հավատարմագրման վկայականի տրման, ինչպես նաև այդ վկայականում փոփոխություն կատարելու դեպքերում գանձվում է պետական տուրք «Պետական տուրքի մասին» ԼՂՀ օրենքով սահմանված կարգով և չափերով:

4. Ուսումնական հաստատության մասնաճյուղերը, այդ թվում օտարերկրյա ուսումնական հաստատության մասնաճյուղերը հավատարմագրվում են ընդհանուր հիմունքներով` մասնաճյուղ ունեցող ուսումնական հաստատության հայտի հիման վրա: Մասնաճյուղի համար պետական հավատարմագիր տրվում է մասնաճյուղ ունեցող ուսումնական հաստատությանը:

5. Պետական հավատարմագրումն իրականացնում է ԼՂՀ կրթության և գիտության նախարարությունը (այսուհետև` Նախարարություն)` անկախ ուսումնական հաստատության կազմակերպական-իրավական ձևից և գերատեսչական ենթակայությունից: Ուսումնական հաստատություններում ուսուցման որակի պետական վերահսկողությունն իրականացնում և մասնագիտությունների հավատարմագրման համար եզրակացությունը տալիս է լիցենզավորման և հավատարմագրման ծառայությունը (այսուհետև` Ծառայություն):

6. Պետական հավատարմագրման նպատակով ուսումնական հաստատությունն իրականացնում է իր գործունեության վերլուծություն` ըստ Նախարարության հաստատած միասնական ձևի, որն ընդգրկում է`

ա) պետական կրթական չափորոշիչներին մասնագետների պատրաստման որակի համապատասխանության հիմնավորումը,

բ) ուսումնական հաստատության ուսումնագիտական ստորաբաժանումների գործունեության արդյունավետության գնահատումը,

գ) ուսումնական հաստատության զարգացման ծրագրի հիմնական ուղղությունները,

դ) լիցենզավորման պահանջների կատարման գնահատումը:

Ուսումնական հաստատությունը նշված վերլուծության հիման վրա պայմանագրային հիմունքներով դիմում է համապատասխան որակավորում ունեցող և Ծառայության կողմից երաշխավորված իրավաբանական անձին, հիմնարկին կամ անհատ ձեռնարկատիրոջը, որը Նախարարության սահմանած կարգով իրականացնում է ուսումնական հաստատության ուսումնական գործունեության փորձաքննություն: Ուսումնական հաստատությունը փորձաքննության ավարտից հետո մեկամսյա ժամկետում Ծառայություն է ներկայացնում Նախարարության սահմանած ձևի փորձագիտական եզրակացությունը և վերլուծության մեկ օրինակը:

7. Փորձաքննության դրական եզրակացության դեպքում Նախարարության սահմանած կարգով իրականացվում է 2 տարվա շրջանավարտների ամփոփիչ ստուգում (ատեստավորում):

8. Փորձագիտական եզրակացության և անընդմեջ 2 տարվա շրջանավարտների առնվազն 60 տոկոսի ատեստավորման դրական արդյունքների հիման վրա Ծառայությունը մեկամսյա ժամկետում պետական հավատարմագրման մասին եզրակացություն է ներկայացնում Նախարարին: Ծառայությունը պետական հավատարմագիր տալու կամ պետական հավատարմագիր տալը մերժելու մասին Նախարարի հրամանը 5-օրյա ժամկետում հաղորդում է ուսումնական հաստատությանը:

9. Պետական հավատարմագիր տալը մերժելու հիմքերն են`

ա) Ծառայության բացասական եզրակացությունը,

բ) մեկ տարվա շրջանավարտների 60 տոկոսից ցածր դրական արդյունքները:

10. Պետական հավատարմագրման մերժման մասին Նախարարի հրամանը կարող է բողոքարկվել դատական կարգով` ԼՂՀ օրենսդրությամբ սահմանված կարգով:

11. Ուսումնական հաստատություններն իրենց շրջանավարտներին պետական նմուշի ավարտական փաստաթուղթ (վկայական, դիպլոմ) տալու իրավունք են ձեռք բերում իրենց պետական հավատարմագրման պահից: Հավատարմագրման մասին նախարարի հրամանի արձակումից հետո 5-օրյա ժամկետում ուսումնական հաստատությանը տրվում է պետական հավատարմագրման վկայական: Վկայականի ձևը հաստատում է Նախարարությունը:

12. Պետական հավատարմագրման վկայականի ձևաթղթերը համարվում են խիստ հաշվառման փաստաթղթեր:

13. Պետական հավատարմագրման վկայականը չի թույլատրվում օտարել:

14. Ծառայությունը պետական հավատարմագրման մասին տեղեկությունը հրապարակում է մամուլում կամ զանգվածային լրատվության մյուս միջոցներով:

15. Պետական հավատարմագրման պայմանները պահպանելու նպատակով Ծառայությունն իրավասու է ուսումնական տարվա ընթացքում ոչ ավելի, քան մեկ անգամ ատեստավորելու ուսումնական հաստատությունը` ԼՂՀ կառավարության սահմանված կարգով:

16. Պետական հավատարմագրման համար նախատեսված փորձաքննության, պետական քննությունների, գործուղման, տեղեկատվություն տալու և այլ ծախսերը, անկախ ատեստավորման գործընթացի արդյունքից, պայմանագրային կարգով հատուցում է ուսումնական հաստատությունը:

17. Եթե ուսումնական հաստատությունը խախտել է սույն կարգով սահմանված պայմաններից որևէ մեկը, ապա Ծառայության կողմից այն նախազգուշացվում է:

Նախազգուշացման հիմք կարող են հանդիսանալ նաև`

ա/ Ծառայություն ներկայացված փաստաթղթերում իրականությանը չհամապատասխանող տեղեկությունների հայտնաբերումը,

բ/ հավատարմագրման պահանջների խախտումների հայտնաբերումը:

18. Ուսումնական հաստատությունը պարտավոր է մեկամսյա ժամկետում վերացնել սույն կարգի 17-րդ կետում նշված խախտումները և դրանց վերացման մասին հայտնել Նախարարությանը` ներկայացնելով հիմնավորող փաստաթղթեր:

19. Նախարարությունը Ծառայության ներկայացմամբ կարող է ուժը կորցրած ճանաչել պետական հավատարմագրումը, եթե`

ա/ ԼՂՀ օրենսդրությամբ սահմանված կարգով դադարեցվել է ուսումնական հաստատության գործունեությունը,

բ/ հավատարմագրված մասնագիտությունների գծով անընդմեջ 2 տարի սովորողների 50 տոկոսը կրկնակի բացասական են ատեստավորվել,

գ/ նախազգուշացման համար հիմք հանդիսացող խախտումները սահմանված ժամկետում չեն վերացվել.

դ/ լիցենզիան ուժը կորցրած է ճանաչվել,

ե/ ուսումնական հաստատության կողմից ներկայացված փաստաթղթերում առկա են ակնհայտ կեղծ տեղեկություններ:

20. Ծառայությունը պետական հավատարմագրումն ուժը կորցրած ճանաչելու մասին Նախարարի հրամանը հրապարակում է մամուլում կամ զանգվածային լրատվության միջոցներով:

21. Ուսումնական հաստատությունը պետական հավատարմագրումն ուժը կորցրած ճանաչելու մասին Նախարարի հրամանը ստանալուց հետո 10-օրյա ժամկետում պարտավոր է իր ստացած պետական հավատարմագրման վկայականը վերադարձնել Ծառայություն:

22. Պետական հավատարմագրումն ուժը կորցրած ճանաչելու մասին Նախարարի հրամանը կարող է բողոքարկվել դատական կարգով` ԼՂՀ օրենսդրությամբ սահմանված կարգով:

23. Ուսումնական հաստատությունը պետական հավատարմագրման վկայականը կորցնելու դեպքում դիմում է Նախարարություն, որը 15-օրյա ժամկետում տալիս է «Կրկնօրինակ» նշագրմամբ պետական հավատարմագրման նոր վկյական, որի համար գանձվում է պետական տուրք` «Պետական տուրքի մասին» ԼՂՀ օրենքով սահմանված կարգով և չափերով:

1. Լեռնային Ղարաբաղի Հանրապետության կրթության և գիտության նախարարության (այսուհետև` Նախարարություն) «Լիցենզավորման և հավատարմագրման ծառայությունը» (այսուհետև` Ծառայություն) Նախարարության մշտական գործող մարմին է, որը ստեղծվել է «Կրթության մասին» ԼՂՀ օրենքի համաձայն:

2. Ծառայության գործունեությունը իրականացվում է ԼՂՀ օրենսդրությանը և սույն կանոնադրությանը համապատասխան:

3. Միջպետական կապերի շրջանակներում ծառայությանը հնարավորություն է ընձեռվում միասնական կրթական չափանիշների ապահովմանն ուղղված օժանդակություն ստանալու ՀՀ և ԱՊՀ երկրների համապատասխան գիտակրթական հաստատություններից և կառույցներից:

4. Ծառայության գործունեության հիմնական նպատակը կրթական գործունեության լիցենզավորման, ուսումնական հաստատություններում ուսուցման որակի գնահատման և դրանց հավատարմագրման համար եզրակացություն տալն է:

5. Ծառայության հիմնական խնդիրներն են`

ա/ ոչ պետական կրթական հաստատության կրթական գործունեության լիցենզավորման մասին, փորձաքննության արդյունքի հիման վրա, Նախարարին եզրակացություն ներկայացնելը,

բ/ պետական և ոչ պետական միջին մասնագիտական ու բարձրագույն ուսումնական հաստատությունների և դրանց մասնագիտությունների պետական հավատարմագրման մասին, փորձաքննության արդյունքի հիման վրա, Նախարարին եզրակացություն ներկայացնելը,

գ/ ուսումնական հաստատությունների կողմից լիցենզավորման պայմանները, ուսուցման որակը կամ կրթական չափորոշիչների պահանջները չապահովելու մասին, պարբերական ատեստավորումների արդյունքների հիման վրա, Նախարարին եզրակացություն ներկայացնելը:

6. Իր հիմնական խնդիրներն իրականացնելու համար Ծառայությունը սահմանված կարգով`

ա/ իրականացնում է իրավաբանական անձի ներկայացրած փաստաթղթերում առկա տվյալների լիցենզավորման պայմաններին համապատասխանության փորձաքննություն,

բ/ եզրակացություն է ներկայացնում Նախարարին կրթական գործունեության լիցենզիա տալու մասին,

գ/ կազմակերպում է ուսումնական հաստատություններում ուսուցման որակի փորձաքննություն (թեստավորում, ստուգողական աշխատանքներ, դասալսումներ և այլն),

դ/ փորձաքննության արդյունքների հիման վրա եզրակացություն է ներկայացնում Նախարարին ուսումնական հաստատությանը պետական հավատարմագիր տալու մասին,

ե/ ուսումնական տարվա ընթացքում մեկ անգամ ատեստավորում է հավատարմագրված ուսումնական հաստատությունը,

զ/ եզրակացություն է ներկայացնում Նախարարին լիցենզիան կամ հավատարմագիրն ուժը կորցրած ճանաչելու մասին,

է/ մամուլում կամ զանգվածային լրատվության մյուս միջոցներով հրապարակում է տեղեկություններ լիցենզիա կամ պետական հավատարմագիր տալու և լիցենզիան կամ հավատարմագիրն ուժը կորցրած ճանաչելու մասին:

7. Ծառայության իրավունակությունը ծագում է նրա կանոնադրության հաստատման պահից:

8. Ծառայության իրավունքներն ու պարտականությունները սահմանվում են Լեռնային Ղարաբաղի Հանրապետության օրենսդրությամբ և սույն կանոնադրությամբ:

9. Ծառայությունը սույն կանոնադրության նպատակներին համապատասխան, Նախարարության անունից կարող է ունենալ քաղաքացիական իրավունքներ և կրել այդ գործունեության հետ կապված քաղաքացիական պարտականություններ:

Ծառայությունն իր քաղաքացիական իրավունքները, ներառյալ դրա պաշտպանության իրավունքը, իրականացնում է Նախարարության հայեցողությամբ` նրա անունից:

10. Ծառայության պարտավորությունների համար, օրենքով սահմանված կարգով, պատասխանատվություն է կրում Նախարարությունը:

11. Ծառայությունը պարտավոր է`

ա/ սահմանված կարգով կազմել և ներկայացնել հաշվետվություններ,

բ/ ապահովել կազմակերպության փաստաթղթերի (կազմակերպության կանոնադրություն, գույքի նկատմամբ գույքային իրավունքները հաստատող փաստաթղթեր, կազմակերպության ներքին փաստաթղթեր, տարեկան հաշվետվություններ, նիստերի արձանագրություններ, օրենքով և այլ իրավական ակտերով նախատեսված այլ փաստաթղթեր) պահպանումը:

12. Ծառայության կառուցվածքը և կազմը որոշում է Նախարարությունը:

13. Ծառայության կանոնադրությունը հաստատում է Լեռնային Ղարաբաղի Հանրապետության կառավարությունը:

14. Ծառայության բարձրագույն ղեկավար պաշտոնատար անձը ծառայության պետն է:

15. Ծառայության պետը գործում է սույն կանոնադրության համաձայն:

16. Ծառայության պետը`

ա/ կազմում և հաստատման է ներկայացնում Ծառայության աշխատանքային պլանները և ժամանակացույցը,

բ/ պատասխանատու է Ծառայության աշխատանքի կազմակերպման համար,

գ/ իր իրավասության շրջանակներում տալիս է առաջադրանքներ և ցուցումներ, կատարում է աշխատանքի բաժանում մասնագետների միջև,

դ/ իրականացնում է Նախարարի Հանձնարարականներով և սույն կանոնադրությամբ նախատեսված այլ լիազորություններ:

17. Ծառայության պետը ի պաշտոնե նախարարության պաշտոնատար անձ է, Նախարարության կոլեգիայի անդամ:

18. Ծառայության պետի բացակայության դեպքում նրա պարտականությունները իր վրա է վերցնում տեղակալը:

19. Ծառայության գործունեությունը կարող է դադարել Լեռնային Ղարաբաղի Հանրապետության օրենսդրությամբ սահմանված կարգով: