ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ

 

Օ Ր Ե Ն Ք Ը

 

ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԺՈՂՈՎՐԴԱԿԱՆ ՊԱՏԳԱՄԱՎՈՐԻ ՀԵՏԿԱՆՉՄԱՆ ԿԱՐԳԻ ՄԱՍԻՆ

 

ԼՂՀ ժողովրդական պատգամավորի հետկանչման իրավունքը ժողովրդի լիիշխանության արտահայտությունն է և երաշխավորում է վերահսկողություն պատգամավորների նկատմամբ ու նրա պատասխանատվությունը ընտրողների առաջ:

 

Հոդված 1.

ԼՂՀ ԺՈՂՈՎՐԴԱԿԱՆ ՊԱՏԳԱՄԱՎՈՐԻ ՀԵՏԿԱՆՉՄԱՆ ՀԻՄՔԵՐԸ

 

Լեռնային Ղարաբաղի Հանրապետության ժողովրդական պատգամավորը սույն օրենքով սահմանված կարգով, համապատասխան ընտրատարածքի ընտրողների որոշմամբ, ցանկացած ժամանակ կարող է հետ կանչվել իր պարտականությունները չկատարելու, ժողովրդական պատգամավորի կարգավիճակի մասին օրենքին հակասող, պատգամավորի կոչմանն անվայել գործողություններ կատարելու դեպքում:

 

Հոդված 2.

ԼՂՀ ԺՈՂՈՎՐԴԱԿԱՆ ՊԱՏԳԱՄԱՎՈՐԻ ՀԵՏԿԱՆՉՄԱՆ ԱՌԱՋԱՐԿՈՒԹՅՈՒՆԸ

 

Լեռնային Ղարաբաղի Հանրապետության ժողովրդական պատգամավորի հետկանչման առաջարկություն կարող է մտցնել աշխատավորական կոլեկտիվների ժողովների (կոն‎ֆերանսների), համապատասխան հասարակական կազմակերպությունների, միջնակարգ մասնագիտական և բարձրագույն ուսումնական հաստատությունների կոլեկտիվների, ըստ բնակության վայրի ընտրողների և տվյալ ընտրատարածքի մեջ մտնող զորամասերի զինծառայողների ժողովների կողմից, ինչպես նաև տվյալ տարածքի ընտրողների առնվազն 20 տոկոսի ստորագրությունները հավաքելու կարգով: Ստորագրությունները ներկայացվում են հատուկ բլանկի վրա:

Հետկանչման հարց կարող է հարուցել նաև ԼՂՀ Գերագույն խորհուրդը:

ԼՂՀ ժողովրդական պատգամավորի հետկանչման առաջարկությունը ներկայացվում է ԼՂՀ Գերագույն խորհրդի նախագահություն, որը ներկայացված նյութերը հանձնում է ԼՂՀ Գխ մանդատային և պարկեշտության հարցերի մշտական հանձնաժողովին` եզրակացություն նախապատրաստելու և ԼՂՀ ԳԽ նստաշրջանին ներկայացնելու համար:

ԼՂՀ Գերագույն խորհուրդը ժողովրդական պատգամավորի հետկանչման կապակցությամբ որոշում է ընդունում և հետկանչման առաջարկության հիմնավորվածության դեպքում ԼՂՀ ժողովրդական պատգամավորների ընտրությունների կենտրոնական հանձնաժողովին հանձնարարում է կազմակերպել հետկանչման ընթացքը:

 

Հոդված 3.

ԼՂՀ ԺՈՂՈՎՐԴԱԿԱՆ ՊԱՏԳԱՄԱՎՈՐԻ ԻՐԱՎՈՒՆՔՆԵՐԻ ԵՐԱՇԽԻՔՆԵՐԸ ՀԵՏԿԱՆՉՄԱՆ ԱՌԱՋԱՐԿՈՒԹՅԱՆ ՔՆՆԱՐԿՄԱՆ ԺԱՄԱՆԱԿ

 

ԼՂՀ Գերագույն խորհրդի մանդատային և պարկեշտության հարցերի մշտական հանձնաժողովը երեք օրվա ընթացքում ԼՂՀ ժողովրդական պատգամավորին տեղեկացնում է հետկանչման վերաբերյալ ստացված առաջարկության, ինչպես նաև նրա քննարկման կարգի մասին:

ԼՂՀ ժողովրդական պատգամավորն իրավունք ունի հանդես գալու ընտրողների ժողովներում /կոն‎ֆերանսներում/, մամուլում, հեռուստատեսությամբ և ռադիոյով հետկանչում պահանջելու համար հիմք ծառայող հանգամանքների շուրջը:

Եթե ԼՂՀ ժողովրդական պատգամավորի հետկանչման պահանջի համար հիմք ծառայած հանգամանքները դառնում են դատական քննության առարկա, ապա մինչև դրանց առթիվ դատարանի կողմից վերջնական որոշում կայացնելը, ԼՂՀ ԳԽ մանդատային և պարկեշտության հարցերի մշտական հանձնաժողովը կասեցնում է հետկանչման վերաբերյալ առաջարկության քննարկումը:

ԼՂՀ ժողովրդական պատգամավորի հետկանչման հարցի դրման կապակցությամբ կեղծ տեղեկություններ ներկայացնող քաղաքացիները պատասխանատվություն են կրում գործող օրենսդրությանը համապատասխան:

 

Հոդված 4.

ԼՂՀ ԺՈՂՈՎՐԴԱԿԱՆ ՊԱՏԳԱՄԱՎՈՐԻ ՀԵՏԿԱՆՉՄԱՆ ՀԱՐՑԻ ԱՌԹԻՎ ՔՎԵԱՐԿՈՒԹՅԱՆ ՆՇԱՆԱԿՈՒՄԸ

 

ԼՂՀ ժողովրդական պատգամավորի հետկանչման հարց հարուցելու վերաբերյալ որոշումն ուղարկվում է ԼՂՀ ժողովրդական պատգամավորին, ինչպես նաև ԼՂՀ ժողովրդական պատգամավորների ընտրությունների կենտրոնական ընտրական հանձնաժողովին, որը քվեարկություն է նշանակում հետկանչման հարցի վերաբերյալ:

ԼՂՀ ժողովրդական պատգամավորի հետկանչման հարցի քվեարկության ամսաթիվը նշանակվում է 60 օրից ոչ շուտ և 65 օրից ոչ ուշ` հաշված հետ կանչման հարցի հարուցման պահից:

 

Հոդված 5.

ԼՂՀ ԺՈՂՈՎՐԴԱԿԱՆ ՊԱՏԳԱՄԱՎՈՐԻ ՀԵՏԿԱՆՉՄԱՆ ՕԳՏԻՆ ԿԱՄ ԴԵՄ ՏԱՐՎՈՂ ԱԳԻՏԱՑԻԱՆ

 

ԼՂՀ կենտրոնական ընտրական հանձնաժողովը ժողովրդական պատգամավորի հետկանչման քվեարկության անցկացում նշանակելուց հետո ընտրողներին երաշխավորում է ԼՂՀ ժողովրդական պատգամավորների հետկանչման հետ կապված հարցերի ազատ և բազմակողմանի քննարկման հնարավորություն, ինչպես նաև իրավունք ընձեռում ժողովրդական պատգամավորի հետկանչման օգտին կամ դեմ անարգել ագիտացիա անելու ընտրողների ժողովներում, մամուլում, հեռուստատեսությամբ, ռադիոյով:

Հետկանչման հարց հարուցած պատգամավորին, ինչպես նաև նրա վստահված անձանց ընտրողների ժողովներում (կոն‎ֆերանսներում), ըստ բնակության վայրի ընձեռվում է ազատ ագիտացիայի իրավունք, այդ թվում` զանգվածային տեղեկատվության միջոցների օգտագործում:

Պատգամավորի հետկանչման քվեարկության օրը ագիտացիա տանել չի թույլատրվում:

 

Հոդված 6.

ՔՎԵԱՐԿՈՒԹՅԱՆ ԱՆՑԿԱՑՄԱՆ ՀԱՆՁՆԱԺՈՂՈՎՆԵՐՆ ՈՒ ՏԵՂԱՄԱՍԵՐԸ, ՔՎԵԱՐԿՈՂՆԵՐԻ ՑՈՒՑԱԿՆԵՐԸ

 

ԼՂՀ ժողովրդական պատգամավորի հետկանչման հարցի քվեարկության կազմակերպման համար, ոչ ուշ, քան քվեարկությունից 35 օր առաջ ճշտվում են քվեարկության տեղամասերը և ոչ ուշ, քան 30 օր առաջ` տեղամասային հանձնաժողովները:

Հետկանչման քվեարկության անցկացման նպատակով հանձնաժողովների կազմումն ու գործունեությունը, քվեարկության տեղամասերի ստեղծումը, քվեարկողների ցուցակների կազմումն իրականացվում են «ԼՂՀ ժողովրդական պատգամավորների ընտրությունների մասին» ԼՂՀ օրենքով սահմանված կարգով:

 

Հոդված 7.

ՔՎԵԱԹԵՐԹԻԿԸ

 

Հետկանչման հարցի քվեարկության համար քվեաթերթիկում նշվում են ԼՂՀ ժողովրդական պատգամավորի ազգանունը, անունը, հայրանունը, նրա պաշտոնը (զբաղմունքը), աշխատանքի և բնակության վայրը:

 

Հոդված 8.

ՔՎԵԱՐԿՈՒԹՅՈՒՆԸ, ՆՐԱ ԱՐԴՅՈՒՆՔՆԵՐԻ ՈՐՈՇՈՒՄԸ

 

ԼՂՀ ժողովրդական պատգամավորի հետկանչման հարցի քվեարկությունը կատարվում է գաղտնի: Նրա կազմակերպումը անց է կացվում «ԼՂՀ ժողովրդական պատգամավորների ընտրությունների մասին» ԼՂՀ օրենքին համապատասխան:

Քվեարկելիս ժողովրդական պատգամավորի լիազորությունները պահպանվելու օգտին ձայն տալու դեպքում քվեաթերթիկում նշված «հետկանչմանը համաձայն եք» հարցին ընտրողը ջնջում է «ոչ» բառը, իսկ պատգամավորի հետկանչման օգտին ձայն տալու դեպքում` «այո» բառը:

ԼՂՀ ժողովրդական պատգամավորը համարվում է հետ կանչված, եթե նրա հետկանչման օգտին ձայն է տվել քվեարկությանը մասնակցած ընտրողների կեսից ավելին:

Հետկանչումը համարվում է մերժված, եթե հետկանչման օգտին ձայն է տվել քվեարկությանը մասնակցած ընտրողների կեսից պակաս մասը, ինչպես նաև, եթե քվեարկությանը մասնակցել է ընտրողների կեսից պակաս մասը:

Հետկանչմանը «կողմ» կամ «դեմ» տրված ձայների հավասարության դեպքում ԼՂՀ ժողովրդական պատգամավորը պահպանում է իր լիազորությունները:

Ընտրատարածքային հանձնաժողովը կարող է քվեարկության արդյունքներն անվավեր ճանաչել օրենքի խախտումների թույլ տրման պատճառով:

Քվեարկության արդյունքները որոշվում են ընտրատարածքային հանձնաժողովի նիստում, մտցվում արձանագրության մեջ և ուղարկվում ԼՂՀ ժողովրդական պատգամավորների ընտրությունների կենտրոնական ընտրական հանձնաժողովին:

Կենտրոնական ընտրական հանձնաժողովը ընտրատարածքային հանձնաժողովի արձանագրության հիման վրա գրանցում է քվեարկության արդյունքները, իսկ օրենքի խախտում հայտնաբերելու դեպքում նշանակում է կրկնակի քվեարկություն, որն անց է կացվում ոչ ուշ, քան երկշաբթյա ժամկետում, սույն օրենքի պահանջների պահպանմամբ:

 

Հոդված 9.

ՔՎԵԱՐԿՈՒԹՅԱՆ ԱՆՑԿԱՑՄԱՆ ՀԵՏ ԿԱՊՎԱԾ ԾԱԽՍԵՐԸ

 

ԼՂՀ ժողովրդական պատգամավորի հետկանչման հարցի քվեարկության նախապատրաստման և անցկացման հետ կապված ծախսերը կատարվում են պետության հաշվին:

Ձեռնարկությունները, հիմնարկներն ու կազմակերպությունները, պետական և հասարակական մարմինները համապատասխան հանձնաժողովներին տրամադրում են քվեարկության նախապատրաստման և անցկացման համար անհրաժեշտ շենքեր և սարքավորումներ: ԼՂՀ ժողովրդական պատգամավորը, որի նկատմամբ հարուցվել է հետկանչման հարց, ինչպես նաև նրանց վստահված անձինք ընտրողների հետ հանդիպումներ անցկացնելիս ըստ իրենց դիմումների ազատվում են աշխատանքից` պետության կողմից ծախսերի հատուցմամբ:

 

Հոդված 10.

ԼՂՀ ԺՈՂՈՎՐԴԱԿԱՆ ՊԱՏԳԱՄԱՎՈՐԻ ՀԵՏԿԱՆՉՄԱՆ ԿԱՐԳԻ ՄԱՍԻՆ ՕՐԵՆՔԻ ԽԱԽՏՈՒՄՆԵՐԻ ԳԱՆԳԱՏԱՐԿՈՒՄԸ

 

Սույն օրենքի խախտումների մասին դիմումներն ու գանգատները քննության է առնում ԼՂՀ ժողովրդական պատգամավորների ընտրությունների Կենտրոնական ընտրական հանձնաժողովը և կայացնում է համապատասխան որոշումներ դրանց վերաբերյալ:

 

16 հոկտեմբերի 1993 թվականի, քաղ. Ստեփանակերտ