ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

ք.Ստեփանակերտ

«Լեռնային Ղարաբաղի Հանրապետության դատական օրենսգիրքն ուժի մեջ մտնելու մասին» Լեռնային Ղարաբաղի Հանրապետության օրենքի 10-րդ հոդվածին համապատասխան` Լեռնային Ղարաբաղի Հանրապետության կառավարությունը որոշում է.

1. Սահմանել դատավորի կենսաթոշակի նկատմամբ սահմանվող ամենամսյա հավելավճարը հաշվարկելու (վերահաշվարկելու), նշանակելու և վճարելու, ինչպես նաև հավելավճարը նշանակելիս միջին աշխատավարձը և ստաժը հաշվարկելու կարգը` համաձայն հավելվածի:

2. Ուժը կորցրած ճանաչել Լեռնային Ղարաբաղի Հանրապետության կառավարության 2005 թվականի հունվարի 26-ի «Դատավորի կենսաթոշակի նկատմամբ սահմանվող հավելավճարի հաշվարկման, նշանակման և վճարման կարգը սահմանելու մասին» N 28 որոշումը:

3. Սույն որոշումն ուժի մեջ է մտնում պաշտոնական հրապարակմանը հաջորդող օրվանից և դրա գործողությունը տարածվում է 2011 թվականի հունվարի 1-ից հետո ծագած հարաբերությունների վրա:

1. Սույն կարգով սահմանվում է դատավորի պաշտոնում աշխատած անձին «Պետական կենսաթոշակների մասին» Լեռնային Ղարաբաղի Հանրապետության օրենքով (այսուհետ` օրենք) նշանակված տարիքային կենսաթոշակի նկատմամբ սահմանվող ամենամսյա հավելավճարը (այսուհետ՝ հավելավճար) հաշվարկելու (վերահաշվարկելու), նշանակելու և վճարելու, ինչպես նաև հավելավճարը նշանակելիս միջին աշխատավարձը և ստաժը հաշվարկելու կարգը:

2. Հավելավճարը սահմանվում է այն դատավորի տարիքային կենսաթոշակի նկատմամբ, ով ունի դատավորի պաշտոնում աշխատելու առնվազն 5 տարվա ստաժ և այդ պաշտոնից ազատվել է հետևյալ պատճառներից որևէ մեկով՝

1) լրացել է նրա 65 տարին (պաշտոնավարման տարիքը).

2) ժամանակավոր անաշխատունակության հետևանքով ավելի քան 4 ամիս անընդմեջ կամ օրացուցային տարվա ընթացքում ավելի քան 6 ամիս ի վիճակի չի եղել կատարել իր պաշտոնեական պարտականությունները.

3) պաշտոնի նշանակվելուց հետո ձեռք է բերել դատավորի պաշտոնում աշխատելուն (նշանակմանը) խոչընդոտող ֆիզիկական արատ կամ հիվանդություն:

3. Սույն կարգի 2-րդ և 5-րդ կետերում նշված ստաժում հաշվարկվում է դատավորի պաշտոնում նշանակվելուց մինչև պաշտոնից ազատվելու օրն ընկած յուրաքանչյուր ժամանակաշրջանի տարին, ամիսը, օրը, այնուհետև գումարվում իրար, ընդ որում, յուրաքանչյուր 30 օրը հաշվարկվում է որպես մեկ լրիվ ամիս, իսկ յուրաքանչյուր 12 ամիսը` մեկ լրիվ տարի:

4. Հավելավճարը նշանակելիս միջին աշխատավարձը հաշվարկվում է դատավորի վերջին պաշտոնից ազատվելու ամսվան նախորդող մեկ տարվա (12 ամսվա) ընթացքում լրիվ աշխատած ամիսների (այն ամիսների, որոնց բոլոր աշխատանքային օրերի համար աշխատավարձ է հաշվարկվել) համար հաշվարկված աշխատավարձի (պաշտոնային դրույքաչափ և դրա նկատմամբ սահմանված հավելավճարների գումար) ընդհանուր գումարն այդ ամիսների թվի վրա բաժանելու միջոցով:

Եթե դատավորի վերջին պաշտոնից ազատվելու ամսվան նախորդող մեկ տարվա (12 ամսվա) ընթացքում լրիվ աշխատած ամիսներ չեն ձևավորվում, ապա միջին ամսական աշխատավարձը հաշվարկվում է դատավորի միջին օրական աշխատավարձը 21-ով բազմապատկելու միջոցով:

Միջին օրական աշխատավարձը հաշվարկվում է դատավորի վերջին պաշտոնից ազատվելու ամսվան նախորդող մեկ տարվա (12 ամսվա) ընթացքում դատավորի համար փաստացի հաշվարկված աշխատավարձն այն աշխատանքային օրերի թվի վրա բաժանելու միջոցով, որոնց համար հաշվարկվել է աշխատավարձը:

Եթե դատավորի վերջին պաշտոնից ազատվելու ամսվան նախորդող մեկ տարվա (12 ամսվա) ընթացքում դատավորի համար աշխատավարձ չի հաշվարկվել, ապա որպես միջին աշխատավարձ հիմք է ընդունվում նրա պաշտոնային դրույքաչափը:

5. Հավելավճարը նշանակելիս այն հաշվարկվում է միջին աշխատավարձի՝

1) 75 տոկոսի և օրենքով նշանակված տարիքային կենսաթոշակի տարբերության չափով՝ դատավորի պաշտոնում 10 և ավելի տարի աշխատած լինելու դեպքում,

2) 65 տոկոսի և օրենքով նշանակված տարիքային կենսաթոշակի տարբերության չափով՝ դատավորի պաշտոնում 10 տարուց պակաս, սակայն առնվազն 5 տարի աշխատած լինելու դեպքում:

Տարիքային կենսաթոշակի և հավելավճարի հանրագումարի չափը չի կարող գերազանցել անձի` որպես դատավոր զբաղեցրած վերջին պաշտոնի՝ սույն կարգի 8-րդ կետում նշված պաշտոնային դրույքաչափը:

6. Դատավորի պաշտոնում աշխատած անձը հավելավճարը նշանակելու համար գրավոր դիմումի հետ ներկայացնում է աշխատանքային գրքույկը, իսկ սույն կարգի 2-րդ կետով սահմանված հիմքերով աշխատանքից ազատվելու մասին աշխատանքային գրքույկում անհրաժեշտ գրառում չլինելու դեպքում` դրա մասին Լեռնային Ղարաբաղի Հանրապետության դատական դեպարտամենտի տված տեղեկանքը, ինչպես նաև աշխատանքից ազատվելու ամսվան նախորդող 12 ամսվա աշխատավարձի չափը՝ ըստ ամիսների:

7. Հավելավճարի չափը, առանց կենսաթոշակառուի գրավոր դիմումի, վերահաշվարկվում է օրենքով նշանակված տարիքային կենսաթոշակի չափը կամ դատավորի՝ սույն կարգի 8-րդ կետում նշված պաշտոնային դրույքաչափը բարձրանալու դեպքում՝

1) սույն կարգի 5-րդ կետի 1-ին ենթակետի համաձայն նշանակված հավելավճարը՝ Հ = Դ₁ / Դ₂ x Ա x 75 % - Կ բանաձևով,

2) սույն կարգի 5-րդ կետի 2-րդ ենթակետի համաձայն նշանակված հավելավճարը՝ Հ = Դ₁ / Դ₂ x Ա x 65 % - Կ բանաձևով:

Սույն կետի առաջին մասում նշած բանաձևերում՝

Հ-ն՝ հավելավճարի ամսական չափն է,

Դ₁-ը՝ հավելավճարը վերահաշվարկելու օրվա դրությամբ սահմանված, վերահաշվարկելու համար հիմք ընդունվող՝ սույն կարգի 8-րդ կետում նշված պաշտոնային դրույքաչափը,

Դ₂-ը՝ հավելավճարը նշանակելու օրվա դրությամբ սահմանված պաշտոնային դրույքաչափը, իսկ եթե հավելավճարը վերահաշվարկվել է, ապա՝ վերջին վերահաշվարկի համար հիմք ընդունված պաշտոնային դրույքաչափը,

Ա-ն՝ աշխատավարձի չափը, որից հաշվարկվել է հավելավճարը՝ հավելավճարը նշանակելիս (վերահաշվարկելիս),

Կ-ն՝ կենսաթոշակի ամսական չափը:

8. Հավելավճարը վերահաշվարկելիս հիմք են ընդունվում հետևյալ պաշտոնային դրույքաչափերը`

1) ընդհանուր իրավասության առաջին ատյանի դատարանի դատավորի, ինչպես նաև նախկին ժողովրդական դատավորի և առաջին ատյանի դատարանի դատավորի համար՝ 280000 դրամ.

2) վերաքննիչ դատարանի դատավորի համար՝ 322000 դրամ.

3) Գերագույն դատարանի դատավորի և նախկին գերագույն դատարանի դատավորի համար՝ 364000 դրամ:

9. Հավելավճարը յուրաքանչյուր ամիս վճարվում է կենսաթոշակի հետ` ընդհանուր գումարով: Հավելավճար վճարելը դադարեցվում, կասեցվում և վերսկսվում է կենսաթոշակ վճարելը դադարեցնելու, կասեցնելու և վերսկսելու՝ օրենքով սահմանված կարգով:

10. Մինչև 2011 թվականի հունվարի 1-ը նշանակված հավելավճարի չափը վերահաշվարկվում և վճարվում է 2011 թվականի հունվարի 1-ից` սույն կարգի 5-րդ կետի պահանջներին համապատասխան՝ որպես միջին աշխատավարձ հիմք ընդունելով սույն կարգի 8-րդ կետում նշված դրույքաչափերը:

11. Հավելավճարը սույն որոշմամբ սահմանված կարգով հաշվարկում (վերահաշվարկում), նշանակում և վճարում է Լեռնային Ղարաբաղի Հանրապետության սոցիալական ապահովության նախարարության «Սոցիալական ապահովության ծառայություն» գործակալության կենսաթոշակ նշանակող այն ստորաբաժանումը, որտեղ գտնվում է կենսաթոշակառուի կենսաթոշակի գործը:

12. Հավելավճարը նշանակվում է դրա իրավունքը ծագելու ամսվան հաջորդող ամսվա 1-ից, եթե դիմումը տրվել է վեց ամսվա ընթացքում, իսկ այդ ժամկետից հետո դիմելու դեպքում՝ դիմելու ամսվան հաջորդող ամսվա 1-ից: