ք.Ստեփանակերտ

г.Степанакерт

Լեռնային Ղարաբաղի Հանրապետության կառավարությունը որոշում է.

1. Հաստատել ԼՂՀ կրթության և գիտության նախարարության կանոնադրությունը, կառուցվածքը և կոլեգիայի կազմը (կցվում են` հավելվածներ թ. 1,2,3):

2. Ուժը կորցրած ճանաչել ԼՂՀ կառավարության 1996թ. հուլիսի 23-ի «ԼՂՀ կրթության, գիտության և մշակույթի նախարարության կանոնադրությունը, կառուցվածքը և կոլեգիայի կազմը հաստատելու մասին» թիվ 173 որոշումը:

1. Ընդհանուր դրույթներ

1. ԼՂՀ կրթության և գիտության նախարարությունը /այսուհետ` նախարարություն/ գործադիր իշխանության հանրապետական մարմին է, որն իրականացնում է կրթության և գիտության համակարգի կառավարումը` ենթարկվելով Լեռնային Ղարաբաղի Հանրապետության կառավարությանը:

Լեռնային Ղարաբաղի Հանրապետության կրթական և գիտական համակարգերը ներառում են ԼՂՀ կրթադաստիարակչական և գիտական հաստատությունները, ձեռնարկությունները, հիմնարկներն ու կազմակերպությունները` անկախ սեփականության ձևից և գերատեսչական ենթակայությունից:

2. Նախարարությունը պատասխանատվություն է կրում կրթության և գիտության բնագավառներում տիրող վիճակի, դրանց հեռանկարային զարգացման, գիտատեխնիկական և կառուցվածքային քաղաքականության, այդ ոլորտներում սեփականության տարբեր ձևերի ներդաշնակ գործունեության ապահովման համար:

3. Նախարարությունն իրավաբանական անձ է, ունի ԼՂՀ պետական զինանշանի պատկերով և իր անվամբ կնիք ու դրոշմակնիք:

2. Նախարարության հիմնական խնդիրները և գործառույթները

4. Նախարարության հիմնական խնդիրներն են.

ա/ կրթության և գիտության համակարգում ԼՂՀ միասնական պետական քաղաքականության իրականացումը և դրա կենսագործման նկատմամբ վերահսկողությունը.

բ/ կրթության և գիտության բովանդակային ու կառուցվածքային բարեփոխումը, նրանց առաջանցիկ զարգացման ապահովումը.

գ/ կրթության և գիտության զարգացման հեռանկարային ու նպատակային, ինչպես նաև միջպետական համագործակցության շրջանակներում գիտատեխնիկական ծրագրերի մշակումն ու դրանց իրագործման ապահովումը.

դ/ մատաղ սերնդի ֆիզիկական ու հոգևոր, ինչպես նաև մասնագիտական ու մտավոր զարգացման համար բարենպաստ պայմանների ու հնարավորությունների ապահովումը.

ե/ կրթության և գիտության ոլորտներում արդյունավետ հարաբերությունների ձևավորումը.

զ/ կրթական և գիտական ոլորտների վերաբերյալ Լեռնային Ղարաբաղի Հանրապետության օրենսդրական ակտերի նախագծերի մշակմանն ու նշված ուղղություններով ԼՂՀ պետական քաղաքականության ձևավորմանը մասնակցելը.

է/ կրթական ու գիտական համակարգերի տեղեկատվական ապահովումը, ուսումնական և մեթոդական միջոցների, նորմատիվ փաստաթղթերի ստեղծումը.

ը/ հասարակության համաչափ զարգացման պահանջներին և միջազգային չափանիշներին համապատասխան որակյալ մասնագետների պատրաստումը, նախարարության հաստատությունների դասախոսական, մանկավարժական կադրերով ապահովումը.

թ/ անկախ սեփականության ձևից, կրթական հաստատությունների գործունեության ներդաշնակումը և դրանց արդյունավետ աշխատանքի կազմակերպման նախադրյալների ստեղծումը.

ժ/ կրթության միջազգային փորձի ուսումնասիրումը, այդ նպատակով գիտամանկավարժական աշխատողների, ուսուցիչների, ուսանողների և աշակերտների արտասահման գործուղումների կազմակերպումը.

ժա/ կրթության և դաստիարակության հիմնախնդիրների վերլուծությունն ու ընդհանրացումը, կրթության զարգացման կենտրոնների ստեղծումը.

ժբ/ հատկացված բյուջետային միջոցների նպատակային ծախսման ապահովումը, կրթադաստիարակչական աշխատանքի իրականացման համար անհրաժեշտ պայմանների ապահովման նկատմամբ վերահսկողությունը.

ժգ/ կրթական և գիտական ոլորտների զարգացման հարցերով Լեռնային Ղարաբաղի Հանրապետության պետական կառավարման մարմինների ու կազմակերպությունների, Հայ առաքելական եկեղեցու, ինչպես նաև օտարերկրյա պետությունների համապատասխան մարմինների և միջազգային կազմակերպությունների հետ համագործակցումը:

5. Իր հիմնական խնդիրներին համապատասխան նախարարությունը`

ա/ ապահովում է երեխաների պարտադիր տարրական և հիմնական կրթությունը, պայմաններ է ստեղծում միջնակարգ և միջնակարգ մասնագիտական տեխնիկական կրթության իրականացման համար և միջոցներ ձեռնարկում կրթության բազմաձևության ընդլայնման համար.

բ/ վերահսկում է պետական կրթական չափորոշիչների պահպանումը պետական և ոչ պետական կրթական հաստատություններում.

գ/ ապահովում է հանրապետությունում գիտական հետազոտությունների և մշակումների վերլուծությունը, ընդհանրացումը, համակարգումը և կատարման վերահսկողությունը.

դ/ կրթության և գիտության աչքի ընկած աշխատողների նկատմամբ կիրառում է բարոյական, նյութական և այլ խրախուսման միջոցներ.

ե/ մշակում է համակարգի տնտեսական և սոցիալական զարգացման ծրագրերը.

զ/ մասնակցում է կրթության և գիտության պետական պատվերների նախագծերի մշակմանը.

է/ ապահովում է կրթության և գիտության ինտեգրացումը.

ը/ հաստատում է օրինակելի ուսումնական պլաններ ու ծրագրեր, մշակում ու հրատարակում ուսուցման ու դաստիարակության վերաբերյալ մեթոդական հանձնարարականներ.

թ/ սահմանում է պետական հանրակրթական հաստատության տարեկան ուսումնական օրացուցային ժամանակացանկը, սովորողների գիտելիքների գնահատման համակարգը, առաջադիմության ու հաճախման գրանցման, դասարանից դասարան, կուրսից կուրս փոխադրման, ինչպես նաև ավարտական, պետական քննությունների, դիպլոմային նախագծումների աշխատանքների պատրաստման և անցկացման կարգն ու պայմանները.

ժ/ իրականացնում է կրթության և գիտության համակարգերի ուսումնագիտական և տեղեկատվական ապահովումը.

ժա/ ոլորտում կազմակերպում է գիտական հետազոտությունների անցկացումը, ձևավորում է հիմնարար և կիրառական հետազոտությունների, փորձարարական կոնստրուկտորական մշակումների, փորձնական արտադրությունների պետական պատվերների նախագծերը.

ժբ/ սահմանում է ԼՂՀ պետական կրթական հաստատություններում սովորողների և ուսանողների ընդունելության կարգն ու պայմանները, սովորողների արձակուրդների ժամկետները.

ժգ/ սահմանում է պետական կրթական համակարգի դասախոսական, մանկավարժական և ղեկավար աշխատողների վերապատրաստման, ինչպես նաև ատեստավորման կարգն ու պայմանները, կազմակերպում նրանց վերապատրաստման ու ատեստավորման աշխատանքը.

ժդ/ մասնակցում է կրթական հաստատությունների դասախոսների, մանկավարժների և մյուս աշխատողների, ուսանողների ու սաների սոցիալական պաշտպանվածության հանրապետական ծրագրերի մշակմանը.

ժե/ մշակում է կրթության և գիտության օրենսդրության կատարելագործման վերաբերյալ առաջարկություններ և ներկայացնում ԼՂՀ կառավարության քննարկմանը.

ժզ/ սահմանում է համակարգի կրթական հաստատությունների տեսչավորման կարգը, օրենսդրությամբ սահմանված կարգով անցկացնում հաստատությունների տեսչական ստուգումները.

ժէ/ օրենսդրությամբ սահմանված կարգով իրականացնում է ԼՂՀ պետական և ոչ պետական կրթական հաստատությունների հավատարմագրումը, ոչ պետական կրթադաստիարակչական հաստատությունների լիցենզավորումը, ինչպես նաև սահմանված կարգով բարձրագույն կրթություն ստացած շրջանավարտների հավատարմագրումը.

ժը/ հաստատում է իր ենթակայության տակ գտնվող ուսումնական հաստատությունների, ինչպես նաև ձեռնարկությունների, հիմնարկների ու կազմակերպությունների մանկավարժադասախոսական և ղեկավար կադրերի ընտրության, նշանակման և տեղաբաշխման կարգը.

ժթ/ միջազգային կապեր է հաստատում օտարերկրյա պետությունների կրթագիտական կառուցվածքների հետ.

ի/ օրենսդրությամբ սահմանված կարգով իրականացնում է նախարարության համակարգի ուսումնական հաստատությունների բյուջետային հատկացումների բաշխումը և վերահսկում նրանց ֆինանսական գործունեությունը.

իա/ կրթության հարցերով համագործակցում է շրջանային, քաղաքային վարչակազմերի հետ.

իբ/ աջակցում է կրթության հիմնադրամի, կրթասիրաց միության և մանկավարժական ընկերությունների ստեղծմանը.

իգ/ սահմանում է ոչ մասնագիտական կրթությամբ անձանց կրթական հաստատություններում մանկավարժական աշխատանքի անցնելու կարգն ու պայմանները.

իդ/ Լեռնային Ղարաբաղի Հանրապետության նախարարությունների, պետական վարչությունների, գերատեսչությունների, գործադիր իշխանության տեղական մարմինների հետ համատեղ կազմակերպում է ուսումնադաստիարակչական բնույթի միջոցառումներ, կրթության և գիտության հարցերով համաժողովներ, խորհրդակցություններ և այլ միջոցառումներ.

իե/ ԼՂՀ օրենսդրությամբ սահմանված կարգով հրատարակում է ամսագրեր, մանկավարժական, մանկապատանեկան թերթեր, հանդեսներ, տեղեկագրեր ու պարբերականներ:

3. Նախարարության աշխատանքի կազմակերպումը

1. Նախարարության համակարգը ընդգրկում է իր ենթակայության տակ գտնվող բարձրագույն, միջնակարգ մասնագիտական, հանրակրթական, մասնագիտական տեխնիկական, նախադպրոցական և մանկապատանեկան արտադպրոցական պետական կրթական հաստատությունների, Արցախի պետական համալսարանի, ԼՂՀ կադրերի վերապատրաստման ու ատեստավորման հանրապետական ինստիտուտի, ձեռնարկությունների, հիմնարկների և կազմակերպությունների ամբողջությունը:

2. Նախարարությունն իր գործունեությունն իրականացնում է աշխատանքային ծրագրերին ու պլանին համապատասխան:Նախարարության աշխատանքային պլանն ու ծրագրերը կազմվում են հունվար-դեկտեմբեր ամիսների ընդգրկմամբ:

3. Նախարարությունը կրթությանը և գիտությանը վերաբերող բոլոր հարցերը լուծում է իրեն վերապահված իրավունքների սահմաններում` չխախտելով ենթակա հաստատությունների, ձեռնարկությունների, հիմնարկների ու կազմակերպությունների ԼՂՀ գործող օրենսդրությամբ նախատեսված ինքնուրույնությունը:

Նախարարությունը ԼՂՀ մյուս նախարարությունների ու գերատեսչությունների հետ իրականացնում է գործարար կապեր ու համագործակցություն` միջճյուղային հարցերի մշակման ու լուծման համար:

4. Նախարարությունը Լեռնային Ղարաբաղի Հանրապետության կառավարության հանձնարարությամբ իրականացնում է կրթության և գիտության ոլորտի պետական գույքի տիրապետման և օգտագործման գործառույթները:

Նախարարությունը համակարգի կրթական հաստատություններում, ձեռնարկություններում, հիմնարկներում և կազմակերպություններում ապահովում է պետական սեփականության պահպանությունը:

5. Նախարարությունը`

ա/ ղեկավարվում է Լեռնային Ղարաբաղի Հանրապետության գործող օրենսդրությամբ և սույն կանոնադրությամբ ու դրանց հիման վրա և ի կատարումն դրանց` իր իրավասության սահմաններում արձակում է հրամաններ, հրահանգներ և տալիս ցուցումներ, որոնց կատարումը պարտադիր է նախարարությանը ենթակա մարմինների, կրթական հաստատությունների, հիմնարկների ու կազմակերպությունների, ինչպես նաև քաղաքացիների համար.

բ/ մյուս նախարարությունների հետ համատեղ անհրաժեշտության դեպքում արձակում է հրամաններ և հրահանգներ.

գ/ Լեռնային Ղարաբաղի Հանրապետության օրենսդրությամբ սահմանված կարգով վերահսկում է համակարգի տնօրինությանը հանձնված պետական գույքի օգտագործումը, ինչպես նաև համաձայնություն է տալիս այդ գույքի օտարման կամ վարձակալության հանձնման համար.

դ/ իրականացնում է համակարգի ձեռնարկությունների, հիմնարկների, կազմակերպությունների գործունեության օրինականության վերահսկողությունը` ներառյալ հիմնադիր փաստաթղթերի ու նրանց կողմից կնքված պայմանագրերի օրինականության վերահսկումը.

ե/ կասեցնում կամ ուժը կորցրած է ճանաչում համակարգի հաստատությունների, ձեռնարկությունների, հիմնարկների, կազմակերպությունների կողմից տրված հրամաններն ու հրահանգները:

6. Նախարարությունը ոլորտի կառավարման բոլոր հարցերի քննարկումն ու լուծումը կազմակերպում է կոլեգիալության և միանձնյա ղեկավարման զուգակցման հիման վրա` աշխատանքի հանձնարարված տեղամասում գործերի վիճակի ու որոշակի առաջադրանքների կատարման համար պաշտոնատար անձանց պատասխանատվության ճշտորոշ սահմանումով:

7. Կրթության բնագավառի ընդհանուր կարգավորման և համակարգման վերաբերյալ հրամաններն ու մեթոդական ցուցումները պարտադիր են բոլոր ուսումնական հաստատությունների համար` անկախ գերատեսչական ենթակայությունից:

8. Նախարարության համակարգի հանրակրթական և մշակութային հաստատությունների ղեկավարումն ու վերահսկողությունը իրականացվում է շրջանային /քաղաքային/ վարչակազմերի կրթության բաժինների միջոցով, որոնց համար պարտադիր է նախարարության հրամանների ցուցումների և գիտամեթոդական հրահանգների կատարումը:

9. Նախարարությունը գլխավորում է նախարարը, որին պաշտոնի է նշանակում և պաշտոնից ազատում Լեռնային Ղարաբաղի Հանրապետության նախագահը` ԼՂՀ վարչապետի առաջարկությամբ:

Նախարարն ունի տեղակալ, որին պաշտոնի է նշանակում և պաշտոնից ազատում է Լեռնային Ղարաբաղի Հանրապետության կառավարությունը` նախարարի համաձայնությամբ:

15. Նախարարը`

ա/ պատասխանատվություն է կրում նախարարության առջև դրված խնդիրների ու գործառույթների համար.

բ/ սահմանում է նախարարի տեղակալի, վարչությունների ու բաժինների պետերի և նախարարության մյուս կառուցվածքային ստորաբաժանումների ղեկավարների պատասխանատվության աստիճանը` նախարարությանը ենթակա պետական կառավարման այլ հանրապետական մարմինների, կրթական հաստատությունների, ձեռնարկությունների, հիմնարկների ու կազմակերպությունների գործունեության համար.

գ/ կատարում է պարտականությունների բաշխում.

դ/ Լեռնային Ղարաբաղի Հանրապետության կառավարության հաստատմանն է ներկայացնում նախարարության կանոնադրությունը, կառուցվածքը և հաստիքացուցակը.

ե/ հաստատում է նախարարության, նրա կոլեգիայի աշխատանքային ծրագրերն ու աշխատակարգը, կառուցվածքային ստորաբաժանումների, համակարգի կրթական ու գիտական հաստատությունների և հիմնարկների, կազմակերպությունների կանոնադրությունները.

զ/ առաջարկում է նախարարության կոլեգիայի անդամների թիվը և Լեռնային Ղարաբաղի Հանրապետության կառավարության հաստատմանն է ներկայացնում կոլեգիայի կազմը.

է/ կազմակերպում և ղեկավարում է նախարարության կոլեգիայի նիստերը.

ը/ օրենսդրությամբ սահմանված կարգով աշխատանքային պայմանագրեր է կնքում նախարարության համակարգի ձեռնարկությունների, հիմնարկների և կազմակերպությունների հետ.

թ/ սահմանված կարգով առաջարկություն է ներկայացնում շրջանային, քաղաքային վարչակազմերին` կրթության շրջ /քաղ/ բաժնի ղեկավարի պաշտոնին անհամապատասխանության վերաբերյալ.

ժ/ իրականացնում է օրենսդրությամբ սահմանված այլ լիազորություններ:

11. Նախարարի բացակայության դեպքում, նրա հանձնարարությամբ, նախարարի պարտականությունները կատարում է նախարարի տեղակալը:

12. Նախարարությունն ունի կոլեգիա, որի անհատական կազմը հաստատում է Լեռնային Ղարաբաղի Հանրապետության կառավարությունը:Կոլեգիայի կազմում ընդգրկվում են նախարարը /նախագահ/, նրա տեղակալը` ի պաշտոնե, նախարարության այլ ղեկավար աշխատողներ, ինչպես նաև կրթական հաստատությունների ու գիտամանկավարժական հիմնարկների ղեկավար աշխատողներ:

13. Նախարարության կոլեգիան իր պարբերաբար անցկացվող նիստերում քննության է առնում ոլորտի զարգացման հիմնական հարցերը և նախարարության գործունեության այլ հարցեր, քննարկում իրեն ենթակա պետական կառավարման մարմինների, կրթական հաստատությունների ու կազմակերպությունների գործնական ղեկավարման, կատարման ստուգման, ղեկավար կադրերի ընտրության և օգտագործման հարցերը, կարևորագույն հրամանների և հրահանգների նախագծերը, լսում նախարարության վարչությունների և բաժինների, նախարարությանը ենթակա պետական կառավարման այլ հանրապետական մարմինների, կրթական հաստատությունների, ձեռնարկությունների, կազմակերպությունների ղեկավարների հաշվետվությունները:

Կոլեգիայի որոշումները կենսագործվում են, որպես կանոն, նախարարի հրամաններով: Նախարարի և կոլեգիայի անդամների միջև ծագած տարաձայնությունների դեպքում նախարարը կենսագործում է իր որոշումը` դրանց մասին զեկուցելով Լեռնային Ղարաբաղի Հանրապետության կառավարությանը կամ վարչապետին, իսկ կոլեգիայի անդամները, իրենց հերթին, կարող են իրենց կարծիքը հայտնել ԼՂՀ կառավարությանը կամ վարչապետին:

14. Նախարարությունը կազմակերպում է քաղաքացիների նամակների ժամանակին քննարկումը` հասնելով այդ նամակներում բարձրացված հարցերի ճիշտ լուծմանը, ինչպես նաև միջոցներ է ձեռնարկում նամակներում հաղորդվող` նախարարության համակարգի հաստատությունների գործունեության մեջ տեղ գտած թերությունների վերացման համար:

15. Նախարարության ֆինանսավորումն իրականացվում է պետական բյուջեի միջոցների հաշվին:

1. Ղեկավարություն (նախարար, նախարարի տեղակալ),

2. Բարձրագույն և միջնակարգ մասնագիտական կրթության ու գիտության վարչություն,

3. Ընդհանուր միջնակարգ կրթության վարչություն,

4. Ֆինանսատնտեսական ծառայություն,

5. Ընդհանուր բաժին:

(թիվ 3 հավելվածը լրաց., փոփ. 24.08.1999 N 62, փոփ. 03.10.2000 N 204)