ք. Ստեփանակերտ

Ղեկավարվելով «Ավիացիայի մասին» Լեռնային Ղարաբաղի Հանրապետության օրենքի 57-րդ հոդվածի 4-րդ մասով` Լեռնային Ղարաբաղի Հանրապետության կառավարությունը ո ր ո շ ու մ է.

1. Հաստատել օդային փոխադրումներին առնչվող ընթացակարգերի պարզեցման ազգային կոմիտեի կանոնադրությունը` համաձայն հավելվածի:

2. Սույն որոշումն ուժի մեջ է մտնում պաշտոնական հրապարակման օրվան հաջորդող օրվանից:

ԿԱՆՈՆԱԴՐՈՒԹՅՈՒՆ

I. ԸՆԴՀԱՆՈՒՐ ԴՐՈՒՅԹՆԵՐ

1. Օդային փոխադրումներին առնչվող ընթացակարգերի պարզեցման ազգային կոմիտեն (այսուհետ` Ազգային կոմիտե) օդային փոխադրումներին առնչվող ընթացակարգերի ուսումնասիրման և դրանց պարզեցման վերաբերյալ Լեռնային Ղարաբաղի Հանրապետության կառավարությանը, Լեռնային Ղարաբաղի Հանրապետության հանրապետական գործադիր մարմիններին առաջարկություններ ներկայացնող մարմին է:

2. Ազգային կոմիտեն իր գործունեության ընթացքում ղեկավարվում է Լեռնային Ղարաբաղի Հանրապետության Սահմանադրությամբ, «Ավիացիայի մասին» Լեռնային Ղարաբաղի Հանրապետության օրենքով, Քաղաքացիական ավիացիայի միջազգային կազմակերպության (ԻԿԱO) փաստաթղթերով, սույն կանոնադրությամբ և այլ իրավական ակտերով:

3. Ազգային կոմիտեի կանոնադրությունը մշակվել է «Միջազգային քաղաքացիական ավիացիայի մասին» կոնվենցիայի «Ընթացակարգերի պարզեցում» N 9 հավելվածի դրույթներին համապատասխան:

II. ԱԶԳԱՅԻՆ ԿՈՄԻՏԵԻ ԽՆԴԻՐՆԵՐՆ ՈՒ ԳՈՐԾԱՌՈՒՅԹՆԵՐԸ

4. Ազգային կոմիտեի հիմնական խնդիրներն ու գործառույթներն են`

1) օդային փոխադրումներին առնչվող ընթացակարգերի պարզեցման ազգային ծրագրի մշակումը, դրա մեջ փոփոխությունների ու լրացումների կատարման նախապատրաստումը և Լեռնային Ղարաբաղի Հանրապետության կառավարության հաստատմանը ներկայացնելը.

2) օդային փոխադրումներին առնչվող մաքսային և այլ ընթացակարգերի հետ կապված քաղաքականությանը վերաբերող հարցերի ուսումնասիրությունը.

3) սահմանված կարգով Լեռնային Ղարաբաղի Հանրապետության կառավարություն, Լեռնային Ղարաբաղի Հանրապետության վարչապետին և Լեռնային Ղարաբաղի Հանրապետության համապատասխան հանրապետական գործադիր մարմիններ օդային փոխադրումներին առնչվող ընթացակարգերի պարզեցմանն ուղղված առաջարկություններ ներկայացնելը.

4) սահմանված կարգով Լեռնային Ղարաբաղի Հանրապետության կառավարությանը, Լեռնային Ղարաբաղի Հանրապետության համապատասխան հանրապետական գործադիր մարմիններին և այլ կազմակերպություններին օդային փոխադրումների մասին տեղեկատվության պարբերաբար տրամադրումը.

5) Լեռնային Ղարաբաղի Հանրապետության քաղաքացիական ավիացիայի օդանավակայաններում օդային փոխադրումների ընթացակարգերի ուսումնասիրությունների իրականացումը:

5. Ազգային կոմիտեի կազմը հաստատում և փոփոխում է Լեռնային Ղարաբաղի Հանրապետության կառավարությունը: Ազգային կոմիտեն բաղկացած է նախագահից և անդամներից:

6. Ազգային կոմիտեն գլխավորում է նախագահը, որը միաժամանակ Լեռնային Ղարաբաղի Հանրապետության կառավարությանն առընթեր քաղաքացիական ավիացիայի վարչության պետն է:

7. Ազգային կոմիտեի նախագահը`

1) ղեկավարում է Ազգային կոմիտեի գործունեությունը.

2) նշանակում է Ազգային կոմիտեի նիստի անցկացման վայրը, օրը և հաստատում օրակարգը.

3) հրավիրում և վարում է Ազգային կոմիտեի նիստերը.

4) ներկայացնում է Ազգային կոմիտեն այլ մարմինների և կազմակերպությունների հետ հարաբերություններում:

8. Ազգային կոմիտեն իր գործունեությունն իրականացնում է նիստերի միջոցով:

9. Ազգային կոմիտեի նիստերը գումարվում են Ազգային կոմիտեի նախագահի կամ անդամների 1/3-ի նախաձեռնությամբ` ըստ անհրաժեշտության, բայց առնվազն յուրաքանչյուր տարին մեկ անգամ: Ազգային կոմիտեի նիստն իրավազոր է, եթե դրան մասնակցում է Ազգային կոմիտեի անդամների առնվազն 2/3-ը:

10. Ազգային կոմիտեի նիստերը վարում է Ազգային կոմիտեի նախագահը կամ, նրա հանձնարարությամբ, կարող է վարել Ազգային կոմիտեի անդամներից մեկը:

11. Ազգային կոմիտեի նիստի օրակարգը կազմում է Ազգային կոմիտեի քարտուղարը` Ազգային կոմիտեի անդամների ներկայացրած հարցերի հիման վրա:

12. Ազգային կոմիտեի նիստի օրակարգի նախագիծը և դրան վերաբերող մյուս անհրաժեշտ նյութերը հանձնվում են Ազգային կոմիտեի անդամներին` ոչ ուշ, քան նիստից 3 աշխատանքային օր առաջ:

13. Ազգային կոմիտեի անդամները նիստից 2 օր առաջ կարող են ներկայացնել առաջարկություններ կամ նոր հարցեր` նիստի օրակարգում ընդգրկելու համար:

14. Ազգային կոմիտեի որոշումներն ընդունվում են բաց քվեարկությամբ: Որոշումը համարվում է ընդունված, եթե կողմ է քվեարկել նիստին ներկա անդամների 2/3-ը: Ազգային կոմիտեի որոշումներն ստորագրում է Ազգային կոմիտեի նախագահը: Եթե Ազգային կոմիտեի որևէ անդամ ընդունված որոշման վերաբերյալ ունի այլ կարծիք, ապա, նրա ցանկությամբ, այն գրավոր կցվում է Ազգային կոմիտեի որոշմանը:

15. Ազգային կոմիտեի նախագահի հրավերով` Ազգային կոմիտեի նիստին կարող են մասնակցել այլ անձինք` խորհրդակցական ձայնի իրավունքով:

16. Ազգային կոմիտեի նիստերն արձանագրվում են. Ազգային կոմիտեի նիստերի արձանագրություններն ստորագրում են տվյալ նիստը վարողը և քարտուղարը: Ազգային կոմիտեի նիստերի արձանագրություններում նշվում են`

1) նիստի անցկացման վայրը և տարեթիվը.

2) նիստի մասնակիցների մասին տեղեկությունները.

3) նիստի օրակարգը.

4) նիստում կատարված քննարկումների մասին տեղեկությունները.

5) նիստում ընդունված որոշումների և առաջարկությունների մասին տեղեկությունները:

17. Ազգային կոմիտեի քարտուղարը նշանակվում է Ազգային կոմիտեի նախագահի կողմից` Լեռնային Ղարաբաղի Հանրապետության կառավարությանն առընթեր քաղաքացիական ավիացիայի վարչության աշխատակազմի աշխատողների թվից: Ազգային կոմիտեի քարտուղարը կազմում է նիստերի արձանագրությունները և Ազգային կոմիտեի անդամների միջև համակարգում տեղեկատվության փոխանակումը:

18. Ազգային կոմիտեի անդամն իրավունք ունի`

1) նախապես ծանոթանալու Ազգային կոմիտեի քննարկմանը ներկայացվող հարցերին և փաստաթղթերին.

2) ծանոթանալու Ազգային կոմիտեի նիստերի արձանագրություններին.

3) ելույթ ունենալու Ազգային կոմիտեի նիստում.

4) Ազգային կոմիտեի նիստում ներկայացնելու առաջարկություններ.

5) կազմակերպելու Ազգային կոմիտեի քննարկմանն իր կողմից ներկայացվող հարցերի նախապատրաստումը:

19. Ազգային կոմիտեի անդամը պարտավոր է`

1) մասնակցել Ազգային կոմիտեի աշխատանքներին.

2) իր իրավասության սահմաններում ապահովել Ազգային կոմիտեի և Ազգային կոմիտեի նախագահի կողմից իրեն արված առաջարկությունների կատարումը` իր կողմից ներկայացված բնագավառի գործառույթների շրջանակում.

3) ապահովել աշխատանքային գործունեության ընթացքում իրեն հայտնի դարձած առևտրային, պետական և ծառայողական կամ այլ գաղտնիքի պահպանությունը:

20. Ազգային կոմիտեի աշխատանքների կազմակերպական, տեխնիկական, տեղեկատվական և վերլուծական ապահովումն իրականացնում է Լեռնային Ղարաբաղի Հանրապետության կառավարությանն առընթեր քաղաքացիական ավիացիայի վարչությունը:

21. Ազգային կոմիտեն ապահովում է իր աշխատանքների լուսաբանումը և հրապարակայնությունը:

22. Ազգային կոմիտեի անդամներն Ազգային կոմիտեի աշխատանքներին մասնակցելու համար չեն վարձատրվում: