ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ

Օ Ր Ե Ն Ք Ը

ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ՕՐԵՆՔՆԵՐԻ, ԱՅԼ ՆՈՐՄԱՏԻՎ ԻՐԱՎԱԿԱՆ ԱԿՏԵՐԻ ՀՐԱՊԱՐԱԿՄԱՆ ԵՎ ՈՒԺԻ ՄԵՋ ՄՏՆԵԼՈՒ ԿԱՐԳԻ ՄԱՍԻՆ

Հոդված 1. Սույն օրենքը սահմանում է Լեռնային Ղարաբաղի Հանրապետության օրենքների, մարդու իրավունքներին, ազատություններին և պարտականություններին վերաբերող Լեռնային Ղարաբաղի Հանրապետության միջազգային պայմանագրերի, Հանրապետության Նախագահի նորմատիվ հրամանագրերի և կարգադրությունների, Ազգային ժողովի նորմատիվ որոշումների, կառավարության և վարչապետի նորմատիվ որոշումների, գերատեսչական նորմատիվ ակտերի կոդավորման, հրապարակման և ուժի մեջ մտնելու կարգը:

Հոդված 2. Նորմատիվ իրավական է այն ակտը, որը սահմանում, վերացնում կամ փոփոխում է ֆիզիկական անձանց կամ նրանց մի մասի, իրավաբանական անձանց կամ նրանց մի մասի համար պարտադիր կատարման ենթակա վարքագծի կանոններ:

Հոդված 3. Օրենքների և սույն օրենքի 1 հոդվածում նշված այլ իրավական ակտերի հրատարակումը «Լեռնային Ղարաբաղի Հանրապետության պաշտոնական տեղեկագրում» պարտադիր է և համարվում է պաշտոնական հրապարակում:

Հրապարակման ենթակա չեն միայն իրավական նորմատիվ այն ակտերը կամ դրանց առանձին մասերը, որոնք պարունակում են պետական կամ օրենքով պահպանվող այլ գաղտնիք:

«Լեռնային Ղարաբաղի Հանրապետության պաշտոնական տեղեկագիր» պարբերականի հրատարակումն իրականացնում է Լեռնային Ղարաբաղի Հանրապետության արդարադատության նախարարությունը` Լեռնային Ղարաբաղի Հանրապետության պետական բյուջեի միջոցների հաշվին:

(3-րդ հոդվածը լրաց. 08.12.2004 ՀՕ-171)

Հոդված 4. «Լեռնային Ղարաբաղի Հանրապետության պաշտոնական տեղեկագիրը» հրատարակվում է ամիսը առնվազն մեկ անգամ:

«Լեռնային Ղարաբաղի Հանրապետության պաշտոնական տեղեկագրի» բաժանորդագրությունն ազատ է:

«Լեռնային Ղարաբաղի Հանրապետության պաշտոնական տեղեկագրում» ըստ բաժինների հրապարակվում են`

1) Լեռնային Ղարաբաղի Հանրապետության օրենքները.

2) մարդու իրավունքներին, ազատություններին և պարտականություններին վերաբերող Լեռնային Ղարաբաղի Հանրապետության միջազգային պայմանագրերը.

3) Հանրապետության Նախագահի նորմատիվ հրամանագրերը և կարգադրությունները.

4) Ազգային ժողովի նորմատիվ որոշումները.

5) կառավարության և վարչապետի նորմատիվ որոշումները.

6) գերատեսչական նորմատիվ ակտերը:

Լեռնային Ղարաբաղի Հանրապետության օրենսդրությամբ կամ Լեռնային Ղարաբաղի Հանրապետության արդարադատության նախարարի որոշումներով «Լեռնային Ղարաբաղի Հանրապետության պաշտոնական տեղեկագրում» կարող են նախատեսվել նաև այլ բաժիններ:

(4-րդ հոդվածը խմբ. 08.12.2004 ՀՕ-171)

Հոդված 5. Օրենքները և սույն օրենքի 1 հոդվածում նշված այլ նորմատիվ իրավական ակտերը ուժի մեջ են մտնում պաշտոնական հրապարակումից 10 օր հետո, եթե տվյալ օրենքով կամ նորմատիվ իրավական ակտով այլ ժամկետ նախատեսված չէ:

Հոդված 6. Օրենքները և սույն օրենքի 1-ին հոդվածում նշված այլ նորմատիվ իրավական ակտերը /բացառությամբ գերատեսչական նորմատիվ ակտերի/` դրանք ընդունվելու/ ստորագրվելու կամ վավերացվելու/ օրվան հաջորդող երեք օրվա ընթացքում հրապարակման համար ուղարկվում են Լեռնային Ղարաբաղի Հանրապետության արդարադատության նախարարություն: Նորմատիվ իրավական ակտի տեքստը պետք է ներկայացվի նաև էլեկտրոնային կրիչի վրա կամ էլեկտրոնային փոստով:

(6-րդ հոդվածը խմբ. 08.12.2004 ՀՕ-171)

Հոդված 7. Օրենքները և սույն օրենքի 1 հոդվածում նշված այլ նորմատիվ իրավական ակտերը հրապարակելիս նշվում է դրանց կոդը, անվանումը, ընդունման, վավերացման կամ ստորագրման վայրը, տարին, ամիսը, ամսաթիվը, այն ստորագրող անձի պաշտոնը, անվան սկզբնատառն ու ազգանունը, գրանցման համարը:

Իրավական ակտի կոդը պարունակում է՝

ա) իրավական ակտի տեսակը բնորոշող կոդը.

բ) իրավական ակտի գրանցման համարը.

գ) իրավական ակտի գրանցման ամսաթիվը, ամիսը և տարին.

դ) այն իրավական ակտերի տեսակը բնորոշող կոդերը և գրանցման համարները, որոնց մեջ փոփոխություն է կատարում տվյալ իրավական ակտը.

ե) այն իրավական ակտերի տեսակը բնորոշող կոդերը և գրանցման համարները, որոնց ուժը կորցրած է ճանաչում տվյալ իրավական ակտը:

Իրավական ակտերի կոդավորման համակարգը հաստատում է կառավարությունը:

Օրենքները և սույն օրենքի 1 հոդվածում նշված այլ նորմատիվ իրավական ակտերը հրապարակվում են «Լեռնային Ղարաբաղի Հանրապետության պաշտոնական տեղեկագրում» ըստ հրապարակման ուղարկվելու հերթականության:

Հոդված 8. Նախարարությունների և այլ գերատեսչությունների նորմատիվ իրավական ակտերի հրապարակման և ուժի մեջ մտնելու կարգը սահմանում է կառավարությունը:

(8-րդ հոդվածը փոփ. 08.12.2004 ՀՕ-171)

Հոդված 9. Օրենքների և այլ նորմատիվ իրավական ակտերի պաշտոնական վերահրատարակումը իրականացվում է կառավարության կողմից սահմանված կարգով:

Հոդված 10. Սույն օրենքն ուժի մեջ է մտնում հրապարակման պահից: