ք.Ստեփանակերտ

«Իրավական ակտերի մասին» Լեռնային Ղարաբաղի Հանրապետության օրենքի 13-րդ հոդվածին համապատասխան` Լեռնային Ղարաբաղի Հանրապետության կառավարությունը ո ր ո շ ու մ է.

1. Հաստատել Լեռնային Ղարաբաղի Հանրապետության բարձրագույն ուսումնական հաստատությունների բակալավրիատի առկա ուսուցման վճարովի համակարգում սովորող` պաշտպանության բանակում զինվորական ծառայության մեջ և պահեստազորում գտնվող սպաների զավակ ուսանողների ուսման վարձավճարի փոխհատուցման կարգը` համաձայն հավելվածի:

2. Սահմանել, որ`

1) Լեռնային Ղարաբաղի Հանրապետության բարձրագույն ուսումնական հաստատությունների բակալավրիատի առկա ուսուցման վճարովի համակարգում սովորող` պաշտպանության բանակում զինվորական ծառայության մեջ և պահեստազորում գտնվող սպաների զավակ ուսանողների ուսման վարձավճարը փոխհատուցվում է Լեռնային Ղարաբաղի Հանրապետության պետական բյուջեով նախատեսված գումարներից.

2) սույն կետի 1-ին ենթակետում նշված ուսանողների ուսման վարձավճարի փոխհատուցումն իրականացնում է Լեռնային Ղարաբաղի Հանրապետության կրթության, գիտության և սպորտի նախարարությունը` ուսումնական հաստատությունների կողմից ներկայացված ցուցակների համաձայն` ուսման վարձավճարների գումարի նշումով և պաշտպանության բանակում զինվորական ծառայության մեջ կամ պահեստազորում գտնվող սպաներին համապատասխանաբար պաշտպանության բանակի կամ զինվորական կոմիսարիատների կողմից տրված տեղեկանքների հիման վրա:

3. Լեռնային Ղարաբաղի Հանրապետության ֆինանսների նախարարությանը` սույն որոշմամբ սահմանված` Լեռնային Ղարաբաղի Հանրապետության բարձրագույն ուսումնական հաստատությունների բակալավրիատի առկա ուսուցման վճարովի համակարգում սովորող` պաշտպանության բանակում զինվորական ծառայության մեջ և պահեստազորում գտնվող սպաների զավակ ուսանողների ուսման վարձավճարների փոխհատուցման ֆինանսավորումն իրականացնել ըստ ուսումնական հաստատությունների` Լեռնային Ղարաբաղի Հանրապետության կրթության, գիտության և սպորտի նախարարության կողմից ներկայացվող հայտերի համաձայն:

4. Սույն որոշման կատարման վերահսկողությունը հանձնարարել Լեռնային Ղարաբաղի Հանրապետության կրթության, գիտության և սպորտի նախարարությանը:

5. Սույն որոշումն ուժի մեջ է մտնում 2016 թվականի հունվարի 1-ից:

Կ Ա Ր Գ

1. Սույն կարգով սահմանվում է Լեռնային Ղարաբաղի Հանրապետության բարձրագույն ուսումնական հաստատությունների բակալավրիատի առկա ուսուցման վճարովի համակարգում սովորող պաշտպանության բանակում զինվորական ծառայության մեջ և պահեստազորում գտնվող սպաների զավակ ուսանողների ուսման վարձավճարի փոխհատուցումը (այսուհետ` փոխհատուցում):

2. Փոխհատուցման գումարի չափը որոշվում է տվյալ ուսումնական հաստատության կողմից սահմանված ուսման վարձավճարի չափով:

3. Փոխհատուցման գումարը հատկացվում է յուրաքանչյուր ուսումնական տարվա համար` յուրաքանչյուր կիսամյակի համար ուսումնական հաստատությունների կողմից ներկայացվող ցուցակների համաձայն, ուսման վարձավճարի գումարի նշումով և պաշտպանության բանակում զինվորական ծառայության մեջ կամ պահեստազորում գտնվող սպաներին համապատասխանաբար պաշտպանության բանակի և զինվորական կոմիսարիատների կողմից տրված տեղեկանքների հիման վրա:

4. Փոխհատուցումը տվյալ ուսանողի նկատմամբ դադարեցվում է`

1) փոխատեղման արդյունքում վճարովի ուսուցումից անվճար ուսուցման տեղափոխվելու.

2) ուսումնական հաստատությունից հեռացվելու.

3) համապատասխան տեղեկանքը չներկայացնելու.

4) ուսանողի ուսման վարձավճարը այլ կազմակերպության կամ անհատ անձի կողմից վճարվելու դեպքերում:

5. Փոխհատուցում հատկացնելու ցուցակները ճշգրտվում են ուսումնական հաստատությունների կողմից յուրաքանչյուր ուսումնական տարվա 1-ին և 2-րդ կիսամյակների առաջին տասնօրյակում և ներկայացվում Լեռնային Ղարաբաղի Հանրապետության կրթության, գիտության և սպորտի նախարարություն:

6. Փոխհատուցման հատկացման հետ կապված փաստաթղթերը պահվում են Լեռնային Ղարաբաղի Հանրապետության կրթության, գիտության և սպորտի նախարարությունում և ուսումնական հաստատություններում:

7. Ուսումնական հաստատությունները փոխհատուցման գումարների վերաբերյալ մեկամսյա ժամկետում հաշվետվություն են ներկայացնում Լեռնային Ղարաբաղի Հանրապետության կրթության, գիտության և սպորտի նախարարություն: