ք. Ստեփանակերտ

Ղեկավարվելով Արցախի Հանրապետության Նախագահի 2017 թվականի սեպտեմբերի 25-ի ՆՀ-108-Ն հրամանագրով սահմանված կարգի 3-րդ կետով՝ Արցախի Հանրապետության կառավարությունը ո ր ո շ ու մ է.

1. Հաստատել 2020 թվականի սեպտեմբերի 27-ին Արցախի Հանրապետության դեմ սանձազերծված պատերազմական գործողությունների հետևանքով զոհված (մահացած) և անհայտ բացակայող ճանաչված անձանց ընտանիքների, առաջին խմբի անժամկետ զինվորական հաշմանդամ ճանաչված և (կամ) անօթևան մնացած անձանց բնակարանային ապահովման ծրագիրը (այսուհետ` Ծրագիր)` համաձայն N1 հավելվածի:

(1-ին կետը փոփ. 17.12.21 N1387-Ն)

2. Հաստատել Ծրագրի միջոցառումների իրականացման ժամանակացույցը` համաձայն N2 հավելվածի:

3. Սույն որոշումն ուժի մեջ է մտնում պաշտոնական հրապարակման օրվան հաջորդող օրվանից:

1. 2020 թվականի սեպտեմբերի 27-ին Արցախի Հանրապետության դեմ սանձազերծված պատերազմական գործողությունների հետևանքով զոհված (մահացած) և անհայտ բացակայող ճանաչված անձանց ընտանիքների, առաջին խմբի անժամկետ զինվորական հաշմանդամ ճանաչված և (կամ) անօթևան մնացած անձանց բնակարանային ապահովման ծրագիրը (այսուհետ` Ծրագիր) նպատակ ունի երեք տարվա ընթացքում լուծել 2020 թվականի սեպտեմբերի 27-ին Արցախի Հանրապետության դեմ սանձազերծված պատերազմական գործողությունների հետևանքով զոհված (մահացած) և անհայտ բացակայող ճանաչված անձանց ընտանիքների, ինչպես նաև առաջին խմբի անժամկետ զինվորական հաշմանդամ ճանաչված և (կամ) անօթևան մնացած անձանց բնակարանային ապահովման խնդիրը` նպաստելով Արցախի Հանրապետությունում նրանց հետագա բնականոն կեցությանն ու գործունեությանը:

(1-ին կետը փոփ. 17.12.21 N1387-Ն)

2. Ծրագրի խնդիրներն են`

1) Ծրագրի շահառուների և նրանց հաշվառման սկզբունքների սահմանումը.

2) ծրագրային միջոցառումների իրականացման հիմնական սկզբունքների, ժամկետների և պատասխանատուների սահմանումը.

3) շահառուներին բնակարանների կամ բնակելի տների հատկացման սկզբունքների և պայմանների սահմանումը.

4) Ծրագրի ֆինանսավորման աղբյուրների սահմանումը:

3. Ծրագրում կիրառվող հասկացություններն են`

1) պատերազմական գործողություններ` 2020 թվականի սեպտեմբերի 27-ին Արցախի Հանրապետության դեմ սանձազերծված պատերազմական գործողություններ.

2) լիազոր մարմին՝ Արցախի Հանրապետության բնակարանային հարցերի կոմիտե.

3) շահառու` Ծրագրի 5-րդ կետով սահմանված անձ կամ ընտանիք.

4) ընտանիք` ամուսնության, ազգակցության կամ որդեգրման վրա հիմնված մարդկանց խումբ, որի անդամները հաշվառված են նույն բնակության հասցեում և (կամ) բնակվում են նույն հարկի տակ և վարում են ընդհանուր տնտեսություն.

5) բնակարան` բազմաբնակարան բնակելի շենքում բնակության համար նախատեսված և իրավունքների պետական գրանցումն իրականացնող լիազոր մարմնում առանձին ծածկագրով գրանցված կամ համարակալված տարածք.

6) բնակելի տուն՝ բնակավայրի տարածքում առանձին հողամասի վրա կառուցված, առանձին փոստային համար ունեցող, բնակելի, օժանդակ և կոմունալ հարմարություններով, իրավունքների պետական գրանցումն իրականացնող լիազոր մարմնում առանձին ծածկագրով գրանցված կառույց.

7) բնակտարածք` բնակարանը և (կամ) բնակելի տունը.

8) բնակարանային ապահովման կարիք ունեցող անձ կամ ընտանիք, որի՝

ա. սեփականության իրավունքով պատկանող բնակտարածքի ընդհանուր մակերեսով ապահովվածությունը մեկ անձի կամ երկու անձից կազմված ընտանիքի դեպքում պակաս է 28 քառակուսի մետրից, իսկ երկուսից ավելի անդամներից կազմված ընտանիքների դեպքում՝ յուրաքանչյուր անդամի հաշվով պակաս է 12 քառակուսի մետրից,

բ. ինը տարեկանից բարձր տարբեր սեռի անձինք, բացի ամուսիններից, բնակվում են մեկ սենյակում և բնակտարածքի ընդհանուր մակերեսով ապահովվածությունը պակաս է 48 քառակուսի մետրից,

գ. անդամը տառապում է Արցախի Հանրապետության առողջապահության նախարարի 2019 թվականի փետրվարի 18-ի «Անձին առանձին սենյակի կամ լրացուցիչ բնակելի մակերեսի իրավունք վերապահող հիվանդությունների ցանկը հաստատելու մասին» N 44-Ն հրամանով հաստատված հիվանդություններից որևէ մեկով, որի դեպքում նրա համար պահանջվում է առանձին սենյակ կամ լրացուցիչ բնակելի մակերես, և որը հաշվի առնելու դեպքում ընտանիքի մյուս անդամներից յուրաքանչյուրին կմնա 12 քառակուսի մետրից պակաս մակերես.

9) բնակարանային ֆոնդ` Ծրագրի շրջանակում կառուցված, լիազոր մարմնի և պետական մարմինների կողմից ձեռք բերված (առուվաճառքի, նվիրատվության, նվիրաբերության, փոխանակության պայմանագրերով, այդ թվում՝ «Հայաստան» համահայկական հիմնադրամից կամ բարեգործական այլ սուբյեկտներից որպես նվիրատվություն ստացված) բնակտարածք.

10) կառուցում՝ շինարարական աշխատանքների և միջոցառումների համալիր՝ ուղղված բնակտարածքի շինարարությանը.

11) բնակարանային հաշվառում` բնակարանային ապահովման նպատակով շահառուի ընդգրկում հերթացուցակում` հերթական համարի տակ.

12) հերթացուցակ` լիազոր մարմնի կողմից բնակարանային հաշվառման վերցված շահառուների վերաբերյալ տվյալներ պարունակող փաստաթուղթ.

12.1) բնակության համար ոչ պիտանի բնակտարածք` բնակտարածք, որն ունի վերանորոգման կամ վերակառուցման կարիք և (կամ) օժտված չէ կոմունալ հարմարություններով.

13) (ենթակետն ուժը կորցրել է 17.12.21 N1387-Ն)

(3-րդ կետը խմբ.,փոփ., լրաց. 17.12.21 N1387-Ն, փոփ. 31.08.22 N988-Ն)

4. Ծրագրային միջոցառումները կիրագործվեն Ծրագրի միջոցառումների իրականացման ժամանակացույցին համապատասխան` հաշվի առնելով սույն գլխի կետերով սահմանված սկզբունքներն ու պայմանները:

5. Ծրագրի շահառուներն են՝

1) պատերազմական գործողությունների ժամանակ Արցախի Հանրապետության պաշտպանության մարտական գործողություններին մասնակցելու կամ հակառակորդի հետ շփման գծում մարտական հերթապահություն կամ հատուկ առաջադրանք կատարելու ժամանակ կամ հակառակորդի նախահարձակ գործողությունների հետևանքով զոհված (մահացած) կամ անհայտ բացակայող ճանաչված զինծառայողի՝ բնակարանային ապահովման կարիք ունեցող ընտանիքը.

2) պատերազմական գործողությունների ժամանակ Արցախի Հանրապետության պաշտպանության մարտական գործողություններին մասնակցելու կամ հակառակորդի հետ շփման գծում մարտական հերթապահություն կամ հատուկ առաջադրանք կատարելու ժամանակ կամ հակառակորդի նախահարձակ գործողությունների հետևանքով առաջին խմբի անժամկետ զինվորական հաշմանդամ ճանաչված՝ բնակարանային ապահովման կարիք ունեցող անձը և նրա ընտանիքը.

3) պատերազմական գործողությունների հետևանքով Արցախի Հանրապետության բռնազավթված բնակավայրերում, Մարտունու շրջանի Թաղավարդ գյուղական համայնքի բռնազավթված հատվածում, Քաշաթաղի շրջանի Բերձոր, Քարեգահ, Ներքին Սուս, Աղավնո և Ասկերանի շրջանի Փառուխ համայնքներում 2020 թվականի սեպտեմբերի 27-ի դրությամբ՝

ա. առնվազն վերջին երեք տարիներին մշտապես կամ առավելապես բնակված՝ բնակարանային ապահովման կարիք ունեցող անձը և նրա ընտանիքը,

բ. հաշվառված և առնվազն վերջին մեկ տարին մշտապես կամ առավելապես բնակված՝ բնակարանային ապահովման կարիք ունեցող անձը և նրա ընտանիքը,

գ. սեփականության իրավունքով (պետական ծրագրերով նաև անհատույց օգտագործման իրավունքով տրամադրված) իրեն կամ ազգակցական կապ ունեցող (մայր, հայր, պապ, տատ) անձին պատկանող բնակտարածքում առնվազն վերջին մեկ տարին մշտապես կամ առավելապես բնակված՝ բնակարանային ապահովման կարիք ունեցող անձը և նրա ընտանիքը.

4) 2020 թվականի սեպտեմբերի 27-ի դրությամբ Արցախի Հանրապետությունում հաշվառված և առնվազն վերջին մեկ տարին մշտապես կամ առավելապես բնակված և պատերազմական գործողությունների հետևանքով մահացած կամ անհայտ բացակայող ճանաչված քաղաքացիական անձի՝ բնակարանային ապահովման կարիք ունեցող ընտանիքը.

5) 2020 թվականի սեպտեմբերի 27-ի դրությամբ Արցախի Հանրապետությունում հաշվառված և առնվազն վերջին մեկ տարին մշտապես կամ առավելապես բնակված և պատերազմական գործողությունների պատճառած ավերածությունների հետևանքով սեփականության իրավունքով բնակտարածք կորցրած՝ բնակարանային ապահովման կարիք ունեցող անձը և նրա ընտանիքը.

6) սույն կետով սահմանված անձը կամ ընտանիքը, որը Ծրագրի իմաստով չունի բնակարանային ապահովման կարիք, սակայն ունի բնակության համար ոչ պիտանի բնակտարածք:

(5-րդ կետը խմբ.17.12.21 N1387-Ն, խմբ., փոփ. 31.08.22 N988-Ն)

6. Շահառուի բնակության, ինչպես նաև բնակարանային ապահովման ժամանակ ընտանիքի կազմի հետ կապված առանձնահատկությունները սահմանվում են Արցախի Հանրապետության կառավարության կողմից սահմանված կարգով:

(6-րդ կետը խմբ.17.12.21 N1387-Ն, փոփ. 31.08.22 N988-Ն)

7. Շահառուների ցուցակագրումն իրականացվում է Արցախի Հանրապետության շրջանների վարչակազմերի (Ստեփանակերտում` քաղաքապետարանի) կողմից` Արցախի Հանրապետության կառավարության կողմից սահմանված կարգով:

8.Շահառուների հաշվառումն իրականացվում և ըստ բնակավայրերի ու հասանելիք մակերեսների հերթացուցակները կազմվում են լիազոր մարմնի կողմից` Արցախի Հանրապետության կառավարության կողմից սահմանված կարգով:

(8-րդ կետը փոփ.17.12.21 N1387-Ն)

9. (կետն ուժը կորցրել է 17.12.21 N1387-Ն)

10. (կետն ուժը կորցրել է 17.12.21 N1387-Ն)

11. Արցախի Հանրապետությունում կառուցապատվող նոր գյուղական բնակավայրերում բնակտարածքով ապահովման նպատակով հերթացուցակում հաշվառումն իրականացվում է վերաբնակեցվող համայնքների ընտանիքները հնարավոր մեկ համայնքում տեղավորելու սկզբունքով` հաշվի առնելով նաև շահառուների ցանկությունը:

12. Հաշվառված շահառուներին բնակտարածքով ապահովելու նպատակով ձևավորվում է բնակարանային ֆոնդ`

1) Ստեփանակերտ քաղաքում բազմաբնակարան շենքերի կառուցմամբ` ապահովելով շուրջ 1200 բնակարան.

2) Արցախի Հանրապետության գյուղական բնակավայրերում առնվազն 20 նոր բնակելի թաղամասի կառուցապատմամբ, որի շրջանակում կկառուցվի ավելի քան 2297 բնակելի տուն, որոնք կտրամադրվեն ավելի քան 36 համայնքի տեղահանված բնակիչներին: Այդ բնակելի տներից 1809-ի համար կկառուցվեն հիմքերը, իսկ թեթև կոնստրուկցիաներով դրանց կառուցումը կիրականացվի բարեգործական տարբեր ծրագրերով.

3) Ստեփանակերտ քաղաքի բնակարանների առաջնային շուկայից մոտ 1000 և երկրորդային շուկայից ավելի քան 500 բնակտարածքի գնմամբ, այլ քաղաքային համայնքների առաջնային շուկայից մոտ 70 բնակարանի գնմամբ, ինչպես նաև այլ քաղաքային և գյուղական համայնքների երկրորդային շուկաներից շուրջ 1000 միավոր բնակտարածքի գնմամբ և վերանորոգմամբ (վերակառուցմամբ): Բնակտարածքի 1 քառակուսի մետրի գնման, վերանորոգման և վերակառուցման առավելագույն գները սահմանվում են Արցախի Հանրապետության կառավարության կողմից հաստատված կարգով:

4) (ենթակետն ուժը կորցրել է 17.12.21 N1387-Ն)

(12-րդ կետը խմբ., փոփ.17.12.21 N1387-Ն)

13. Կառուցապատման նպատակով Արցախի Հանրապետության գյուղական համայնքների ընտրությունն իրականացվում է՝ հաշվի առնելով համայնքի՝

1) զարգացման հեռանկարային հնարավորությունները.

2) արտադրական և հաղորդակցման (կոմունիկացիոն) ենթակառուցվածքների առկայությունը կամ դրանց ապահովման հնարավորությունները.

3) սոցիալական (առողջապահական, կրթական, մարզական, մշակութային) ենթակառուցվածքների առկայությունը կամ տվյալ համայնքի բնակիչների համար դրանց հասանելիությունը:

14. Ծրագրի շրջանակում ապահովվում է նաև կառուցապատվող բնակավայրերի բարեկարգումը, ենթակառուցվածքների կառուցումը կամ վերանորոգումը (էներգամատակարարում, ջրամատակարարում, ավելի քան 65 կիլոմետր ավտոճանապարհ, ջրատաքացուցիչների տեղադրում և այլն) և բնակտարածքների կահավորումը:

15. Բնակտարածքի կահավորումն իրականացվում է՝ պայմանավորված ընտանիքի անդամների թվաքանակով և գույքի նկատմամբ կարիքով:

16. Բնակտարածքը շահառուին է տրամադրվում անհատույց օգտագործման իրավունքով՝ բնակտարածքի նկատմամբ իրավունքի պետական գրանցման ամսաթվից մինչև 2030 թվականի սեպտեմբերի 27-ն ընկած ժամկետով, բացառությամբ Ծրագրի 5-րդ կետի 1-ին և 2-րդ ենթակետերով սահմանված շահառուների, ում բնակտարածքը տրամադրվում է անհատույց օգտագործման իրավունքով ՝ մինչև 2025 թվականի սեպտեմբերի 27-ն ընկած ժամկետով, որից հետո նույն բնակտարածքը նրանց տրամադրվում է անհատույց սեփականության իրավունքով: Անհատույց օգտագործման պայմանագրի գործողության ժամկետը լրանալուց հետո բնակտարածքը նույն շահառուին է տրամադրվում անհատույց սեփականության իրավունքով:

(16-րդ կետը խմբ.17.12.21 N1387-Ն, փոփ. 31.08.22 N988-Ն)

17. Ծրագրի 5-րդ կետի 3-րդ ենթակետով սահմանված շահառուներին բնակտարածքը տրամադրվում է մինչև բռնազավթված տարածքների նրանց մշտական բնակության վայրեր վերադառնալը, իսկ դրա անհնարինության դեպքում գործում է 16-րդ կետի պայմանը:

18. Շահառուին տրամադրվում է ընտանիքի յուրաքանչյուր անդամի հաշվով նվազագույնը 16, առավելագույնը 20 քառակուսի մետր ընդհանուր մակերեսով վերանորոգված և կահավորված բնակարան կամ բնակելի տուն` տնամերձ հողամասով: Հատկացվող բնակտարածքի ընդհանուր մակերեսը և սենյակների թիվը, կախված շահառուի ընտանիքի անդամների թվաքանակից, որոշվում է Արցախի Հանրապետության կառավարության կողմից սահմանված կարգին համապատասխան` ելնելով բնակարանային ֆոնդի հնարավորություններից:

(18-րդ կետը փոփ. 17.12.21 N1387-Ն)

19. Շահառուին բնակտարածք տրամադրելու ժամանակ կարող է վերանայվել հերթացուցակում հաշվառման պահին նրան հասանելիք բնակտարածքի մակերեսի չափը` ընտանիքի կազմի և (կամ) կարիքների փոփոխման դեպքում:

20. Արցախի Հանրապետության վերահսկողության տակ գտնվող բնակավայրերում սեփականության իրավունքով բնակտարածք ունեցող, սակայն Ծրագրով նախատեսված ընտանիքի յուրաքանչյուր անդամի հաշվով ընդհանուր մակերեսը չբավարարող և հերթացուցակում հաշվառված Շահառուին բնակտարածք տրամադրվում է՝ նրան սեփականության իրավունքով պատկանող բնակտարածքը Արցախի Հանրապետությանը հանձնելու դեպքում` Արցախի Հանրապետության կառավարության կողմից սահմանված կարգով:

(20-րդ կետը լրաց. 17.12.21 N1387-Ն)

21. Համատեղ սեփականության իրավունքով, սակայն ընտանիքի յուրաքանչյուր անդամի հաշվով Ծրագրով նախատեսված բնակտարածքի մակերեսը չբավարարող բնակտարածք ունեցող և հերթացուցակում հաշվառված շահառուին բնակտարածքի տրամադրումը կատարվում է Արցախի Հանրապետության կառավարության կողմից սահմանված կարգով:

(21-րդ կետը փոփ. 17.12.21 N1387-Ն)

22. Շահառուին բնակտարածքի տրամադրումն իրականացվում է Արցախի Հանրապետության կառավարության կողմից սահմանված կարգով:

23. Ծրագրի բյուջեն կազմում է ավելի քան 132 մլրդ ՀՀ դրամ, որից ավելի քան 118 մլրդ ՀՀ դրամը նախատեսված է ավելի քան 6000 միավոր բնակտարածքով բնակարանային ֆոնդի ձևավորման և նոր թաղամասերի բարեկարգման ու ենթակառուցվածքների կառուցման համար, ավելի քան 2 մլրդ ՀՀ դրամը` էներգամատակարարման և ջրամատակարարման ապահովման, մոտ 6 մլրդ ՀՀ դրամը` ճանապարհաշինության, մոտ 6.5 մլրդ ՀՀ դրամը` արևային ջրատաքացուցիչների տեղադրման և բնակտարածքների կահավորման նպատակով գույքի ձեռքբերման համար:

24. Ծրագրի ֆինանսավորումն իրականացվում է «Հայաստան» համահայկական հիմնադրամի, Հայաստանի Հանրապետության պետական բյուջեի, Արցախի Հանրապետության պետական բյուջեի և օրենսդրությամբ չարգելված այլ միջոցների հաշվին:

(հավելված 1-ը փոփ., խմբ., լրաց. 17.12.21 N1387-Ն, փոփ., խմբ. 31.08.22 N988-Ն)

ԾՐԱԳՐԻ ՄԻՋՈՑԱՌՈՒՄՆԵՐԻ ԻՐԱԿԱՆԱՑՄԱՆ

(հավելված 2-ը փոփ. 17.12.21 N1387-Ն)