ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

ք.Ստեփանակերտ

Լեռնային Ղարաբաղի Հանրապետության կառավարությունը որոշում է.

1. Հաստատել Լեռնային Ղարաբաղի Հանրապետության տարծքում գործող իրավաբանական անձանց, իրավաբանական անձի կարգավիճակ չունեցող ձեռնարկությունների, անհատ ձեռներեց հանդիսացող տնտեսվարող սուբյեկտների ստուգումների կազմակերպման և անցկացման կանոնակարգը (կցվում է):

2. Ուժը կորցրած ճանաչել ԼՂՀ կառավարության 1995 թվականի սեպտեմբերի 5-ի թիվ 215 որոշմամբ հաստատված` Լեռնային Ղարաբաղի Հանրապետության տարածքում գործող ձեռնարկություններում, հիմնարկներում, կազմակերպություններում և այլ իրավաբանական կամ ֆիզիկական անձ հանդիսացող տնտեսավարող սուբյեկտներում ստուգումների կազմակերպման և անցկացման կանոնակարգը:

1. Սույն կանոնակարգը կարգավորում է ԼՂՀ տարածքում գործող իրավաբանական անձանց, իրավաբանական անձի կարգավիճակ չունեցող ձեռնարկությունների, անհատ ձեռներեց հանդիսացող տնտեսվարող սուբյեկտների (այսուհետ` ստուգվող օբյեկտներ) գործունեության ստուգումների կազմակերպման և անցկացման կապակցությամբ ծագող հարաբերությունները:

2. Ստուգումներ իրականացնող պետական մարմիններն իրենց գործունեության ընթացքում ղեկավարվում են ԼՂՀ օրենսդրությամբ և սույն կանոնակարգով:

Արտագերատեսչական ստուգումներ իրականացնող պետական մարմինները

3. Լեռնային Ղարաբաղի Հանրապետությունում արտագերատեսչական ստուգումներ իրականացնելու իրավասությամբ օժտված են`

ա/ ԼՂՀ կառավարության աշխատակազմը (իր կառուցվածքային ստորաբաժանումները),

բ/ ԼՂՀ ֆինանսների նախարարությունը,

գ/ ԼՂՀ քաղաքաշինության նախարարությունը,

դ/ ԼՂՀ գյուղատնտեսության նախարարությունը,

ե/ ԼՂՀ հարկային պետական վարչությունը,

զ/ ԼՂՀ վիճակագրության, պետական ռեգիստրի և վերլուծության պետական վարչությունը,

է/ ԼՂՀ մաքսային վարչությունը,

ը/ ԼՂՀ արտակարգ իրավիճակների վարչությունը,

թ/ ԼՂՀ բնության պահպանության վարչությունը,

ժ/ ԼՂՀ պետական կենսաթոշակային հիմնադրամը,

ժա/ ԼՂՀ «Արցախէներգո» պետական փակ բաժնետիրական ընկերությունը (ՊՓԲԸ) և Ստեփանակերտ քաղաքի ու ԼՂՀ շրջանների «Էլեկտրացանց» ՊՓԲԸ-ները,

ժբ/ ԼՂՀ սանիտարահամաճարակաբանական կայանը,

ժգ/ ԼՂՀ պետական հակահրդեհային պահպանության մարմինները,

ժդ/ ԼՂՀ ստանդարտացման, չափագիտության և սերտիֆիկացման կենտրոնը:

4. Սույն կանոնակարգի 3-րդ կետում նշված մարմիններից բացի` այլ պետական մարմիններ ստուգումներ կատարելու իրավասություն չունեն` բացառությամբ այն դեպքերի, երբ նման իրավասություն նրանց տրված է ԼՂՀ օրենսդրությամբ:

5. Սույն կանոնակարգի 3-րդ կետում նշված պետական մարմինները ստուգումներն իրականացնում են միայն ԼՂՀ օրենսդրությամբ իրենց վերապահված իրավասությունների շրջանակում:

6. Ստուգումն սկսելուց առաջ համապատասխան մարմնի պաշտոնատար անձն ստուգվող օբյեկտի ղեկավարին կամ նրան փոխարինող պաշտոնատար անձին ներկայացնում է ստուգում իրականացնելու մասին որոշումը (հրամանագիրը, կարգադրությունը, հանձնարարագիրը, հրամանը), որի մեջ նշվում են ստուգման նպատակը, ժամկետը, ստուգումն անմիջականորեն անցկացնող պաշտոնատար անձը (անձինք), ստուգման իրավական հիմքերը:

Նշված որոշման (հրամանագրի, կարգադրության, հանձնարարագրի, հրամանի) պատճենի մեկ օրինակը տրվում է ստուգվող օբյեկտի ղեկավարին կամ նրան փոխարինող պաշտոնատար անձին, իսկ երկրորդ օրինակն ստորագրվում է ստուգվող օբյեկտի ղեկավարի կամ նրան փոխարինող պաշտոնատար անձի կողմից և հանձնվում ստուգող պետական մարմնին:

7. Ստուգման ժամկետը կարող է սահմանել ոչ ավելի, քան` 15 օր:

8. Ստուգման ժամկետը չպետք է գերազանցի ստուգում իրականացնելու մասին համապատասխան պետական մարմնի որոշման (հրամանագրի, կարգադրության, հանձնարարագրի, հրամանի) մեջ նշված ժամկետը: Անհրաժեշտության դեպքում ստուգումն իրականացնող անձանց կամավոր հիմնավորմամբ այն կարող է երկարաձգել միայն համապատասխան ստուգող պետական մարմնի ղեկավարը` այդ մասին գրավոր տեղեկացնելով ստուգվող օբյեկտի ղեկավարին:

9. Ստուգումը կատարող պաշտոնատար անձը (անձինք) ստուգումն իրականացնելու մասին որոշման (հրամանագրի, կարգադրության, հանձնարարագրի, հրամանի) մեջ նշված նպատակի շրջանակներից դուրս գալու իրավունք չունի (չունեն):

Ստուգման ընթացքում նոր հանգամանքներ բացահայտվելու և անհրաժեշտություն առաջանալու դեպքում ստուգումը կատարող պաշտոնատար անձի (անձանց) գրավոր հիմնավորմամբ ստուգման նպատակները և շրջանակները կարող են փոփոխվել համապատասխան մարմնի կողմից:

10. Եթե ստուգման ընթացքում ծագում են այնպիսի հարցեր, որոնք դուրս են գալիս ստուգումն իրականացնող պետական մարմնի իրավասության շրջանակներից, ապա համապատասխան իրավասու պետական մարմնին այդ մասին տեղեկացվում է:

11. Կրկնական ստուգումներ կարող են իրականացվել հետևյալ դեպքերում`

ա/ օբյեկտի լուծարման դեպքում,

բ/ օբյեկտի ղեկավարի խնդրանքով,

գ/ պետական կան պետական մասնակցություն ունեցող օբյեկտի պետական կառավարման վերադաս մարմնի խնդրանքով,

դ/ ստուգումն իրականացնող պետական մարմնի ղեկավարի թույլտվությամբ,

ե/ ԼՂՀ վարչապետի, փոխվարչապետի հանձնարարությամբ կամ համաձայնությամբ:

12. Ստուգման արդյունքներով կազմվում է ակտ, որում արձանագրվում են ակտը կազմելու ամսաթիվն ու տեղը, ստուգումն իրականացնող համապատասխան պետական մարմնի և ստուգվող օբյեկտի անվանումները, ստուգումն անմիջականորեն կատարող պաշտոնատար անձանց կազմը, ստուգման նպատակը, ժամկետը, արդյունքները, ստուգվող օբյեկտի ներկայացուցիչների բացատրությունները (հատուկ կարծիքը), ակտի օրինակների քանակը և ակտի հերթական համարը: Կազմած ակտը ստորագրում են ստուգումն անմիջականորեն կատարող պաշտոնատար անձինք և ստուգվող օբյեկտի ղեկավարը կամ նրան փոխարինողը:

Տարաձայնություններ առաջանալու դեպքում ստուգվող օբյեկտի պաշտոնատար անձինք պարտավոր են ստորագրել ակտը` համապատասխան վերապահումով, և ոչ ուշ, քան ակտն ստորագրելուց մինչև 5-րդ օրը ներկայացնել գրավոր բացատրություններ:

13. Ակտի պատճենի մեկ օրինակը հանձնվում է ստուգվող օբյեկտին: Եթե վերջինս պետական մարմին է, ապա ակտի պատճենի մեկ օրինակը կարող է ուղարկվել պետական կառավարման վերադաս մարմնին:

14. Ստուգումն իրականացնող անձինք իրավունք ունեն`

ա/ իրենց լիազորություններն իրականացնելիս ստուգվող օբյեկտի ներկայացուցչի մասնակցությամբ անարգել մուտք գործել ստուգվող օբյեկտ և դրա ցանկացած արտադրական, պահեստային և այլ շինություններ, եթե չեն խախտվել սույն կանոնակարգի 6-9-րդ կետերի պահանջները,

բ/ պահանջել փաստաթղթեր, տվյալներ և այլ տեղեկություններ, բացատրություններ, տեղեկանքներ, որոնք անմիջականորեն առնչվում են իրենց իրավասության շրջանակներում իրականացվող ստուգման նպատակներին,

գ/ անհրաժեշտության դեպքում սահմանված կարգով ստուգումներում ներգրավել ստուգվող օբյեկտի մասնագետներին,

դ/ պահանջել սահմանված ժամկետում վերացնել բացահայտված թերություններն ու խախտումները,

ե/ օրենքով սահմանված կարգով վերցնել կամ առգրավել փաստաթղթեր, իրեր, փորձանմուշներ և այլ անհրաժեշտ նյութեր, որոնք անմիջականորեն առնչվում են ստուգման նպատակներին:

Փաստաթղթեր և իրեր ժամանակավորապես վերցնելու կամ առգրավելու դեպքում այդ մասին կազմվում է արձանագրություն, որի մեկ օրինակը հանձնվում է ստուգվող օբյեկտի ղեկավարին: Ստուգումն իրականացնող անձինք պատասխանատվություն են կրում ժամանակավորապես վերցրած կամ առգրաված փաստաթղթերի, իրերի պահպանության համար:

զ/ ԼՂՀ օրենսդրությամբ սահմանված կարգով կիրառել ներգործության համապատասխան միջոցներ,

է/ իրականացնել ԼՂՀ օրենսդրությամբ սահմանված այլ լիազորություններ:

15. Ստուգումն իրականացնող անձինք պարտավոր են`

ա/ պահպանել ԼՂՀ գործող օրենսդրությունը,

բ/ չհրապարակել ստուգվող օբյեկտի մասին ցանկացած, այդ թվում` առևտրային գաղտնիք կազմող տեղեկություններ,

գ/ պահպանել ստուգվող օբյեկտի` օրենքով սահմանված իրավունքներն ու օրինական շահերը,

դ/ չխոչընդոտել ստուգվող օբյեկտի բնականոն աշխատանքին,

ե/ ծանոթացնել ստուգվող օբյեկտի պաշտոնատար անձանց իրենց իրավունքներին ու պարտականություններին:

16. Կենսապահովման և անընդհատ ցիկլով արտադրությունների առանձին օբյեկտների կապարակնքումն իրականացվում է միայն ԼՂՀ կառավարության թույլտվությամբ: Վերջիններիս ամենօրյա հաշվառման և շահագործման նպատակով ստեղծվում է ժամանակավոր հանձնաժողով` ստուգվող օբյեկտի և ստուգումն իրականացնող պաշտոնատար անձանց մասնակցությամբ:

17. Ստուգվող օբյեկտի պաշտոնատար անձինք իրավունք ունեն`

ա/ արգելել ստուգում իրականացնող անձանց մուտքը ստուգվող օբյեկտ, եթե վերջիններիս կողմից խախտվել են սույն կանոնակարգի 6-9-րդ կետերի պահանջները,

բ/ ծանոթանալ ստուգումների ակտերին,

գ/ ներկայացնել բացատրություններ, հարուցել միջնորդություններ, սահմանված կարգով գանգատարկել ստուգումն իրականացնող անձանց գործողությունները,

դ/ պահանջել ստուգումն իրականացնող անձանց ապօրինի գործողությունների հետևանքով պատճառված վնասի հատուցում,

ե/ չկատարել ստուգումն իրականացնող անձանց իրավասություններից, ինչպես նաև ստուգման նպատակներից չբխող պահանջներ,

զ/ ստուգվող օբյեկտի շահերի պաշտպանության նպատակով ստուգումներին մասնակից դարձնել մասնագետների, փորձագետների, փաստաբանների:

18. Ստուգվող օբյեկտի պաշտոնատար անձինք պարտավոր են`

ա/ չխոչընդոտել ստուգումների ընթացքին, կատարել ստուգումն իրականացնող անձանց օրինական պահանջներն ու ցուցումները,

բ/ ներկայացնել պահանջվող փաստաթղթեր, տվյալներ, գրավոր բացատրություններ և այլ տեղեկություններ,

գ/ անհրաժեշտ պայմաններ ստեղծել ստուգումն իրականացնող անձանց գործունեության համար,

դ/ սահմանված ժամկետում վերացնել ստուգման արդյունքների ակտում նշված թերություններն ու խախտումները:

19. Ստուգում իրականացնող անձանց գործողությունները կարող են գանգատարկվել այն պետական մարմնին, որին անմիջականորեն ենթարկվում է ստուգող անձը (անձինք):

20. Գանգատները քննության են առնվում, և դրանց վերաբերյալ որոշումներ են ընդունվում ոչ ուշ, քան գանգատն ստացվելու օրվանից 30-օրյա ժամկետում: Նշված ժամկետում գանգատի վերաբերյալ պատասխան չտրվելու դեպքում գանգատում բերված պատճառաբանությունները համարվում են ընդունված:

21. Ընդունված որոշմանը համաձայն չլինելու դեպքում ստուգվող օբյեկտի ղեկավարը կամ նրան փոխարինող պաշտոնատար անձն իրավունք ունի այն գանգատարկել պետական կառավարման վերադաս մարմնին կամ դիմել դատարան:

22. Ստուգման արդյունքներով բացահայտված իրավախախտումների վերաբերյալ գործերի քննությունը կատարվում է ԼՂՀ օրենսդրությամբ սահմանված կարգով: