ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

ք.Ստեփանակերտ

ԳՈՐԾԱԶՈՒՐԿԻ ՄԱՀՎԱՆ ԴԵՊՔՈՒՄ ԹԱՂՄԱՆ ՆՊԱՍՏԻ ՎՃԱՐՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Համաձայն «Բնակչության զբաղվածության և գործազրկության դեպքում սոցիալական պաշտպանության մասին» Լեռնային Ղարաբաղի Հանրապետության օրենքի 15-րդ հոդվածի 2-րդ մասի 24-րդ կետի և 35-րդ հոդվածի` Լեռնային Ղարաբաղի Հանրապետության կառավարությունը  ո ր ո շ ու մ  է.

(նախաբանը փոփ. 29.12.2011 N 1034-Ն)

1. Սահմանել առնվազն մեկ տարվա սոցիալական վճարներ կատարած կամ մինչև 1995 թվականի հունվարի 1-ը առնվազն մեկ տարվա աշխատանքային ստաժ ունեցող գործազուրկի մահվան դեպքում թաղման նպաստի վճարման կարգը` համաձայն հավելվածի:

(1-ին կետը լրաց. 29.12.2011 N 1034-Ն)

2. Լեռնային Ղարաբաղի Հանրապետության սոցիալական ապահովության նախարարին` սույն որոշումն ուժի մեջ մտնելու օրվանից մեկամսյա ժամկետում հաստատել առնվազն մեկ տարվա սոցիալական վճարներ կատարած կամ մինչև 1995 թվականի հունվարի 1-ը առնվազն մեկ տարվա աշխատանքային ստաժ ունեցող գործազուրկի մահվան դեպքում նպաստի ֆինանսավորման հայտ-պահանջագրի ձևերը:

(2-րդ կետը լրաց. 29.12.2011 N 1034-Ն)

3. Սույն որոշումն ուժի մեջ է մտնում 2007 թվականի հունվարի 1-ից:

Կ Ա Ր Գ

ԳՈՐԾԱԶՈՒՐԿԻ ՄԱՀՎԱՆ ԴԵՊՔՈՒՄ ԹԱՂՄԱՆ ՆՊԱՍՏԻ ՎՃԱՐՄԱՆ

I. Ընդհանուր դրույթներ

1. Սույն կարգով կարգավորվում են սոցիալական ծառայություններ տրամադրող տարածքային պետական մարմինների (այսուհետ` տարածքային մարմին) կողմից առնվազն մեկ տարվա սոցիալական վճարներ կատարած կամ մինչև 1995 թվականի հունվարի 1-ը առնվազն մեկ տարվա աշխատանքային ստաժ ունեցող գործազուրկի մահվան դեպքում թաղման նպաստի վճարման հետ կապված հարաբերությունները:

(1-ին կետը փոփ. 29.12.2011 N 1034-Ն)

2. Գործազուրկի մահվան դեպքում հուղարկավորությունը կատարած անձին վճարվում է գործազրկության նպաստի եռապատիկի չափով թաղման նպաստ` թաղման նպաստ ստանալու մասին դիմումը և անհրաժեշտ փաստաթղթերը գործազուրկի մահվանից հետո 6 ամսվա ընթացքում տարածքային մարմին ներկայացվելու դեպքում:

3. Նշված գումարը վճարվում է դիմումը ներկայացվելուց հետո՝ մեկ ամսվա ընթացքում:

4. Թաղման նպաստը վճարվում է Լեռնային Ղարաբաղի Հանրապետության պետական բյուջեի միջոցներից:

(4-րդ կետը փոփ. 29.01.2009 N 40-Ն)

II. Թաղման նպաստի նշանակման և վճարման համար անհրաժեշտ փաստաթղթերը և ֆինանսավորումը

5. Թաղման նպաստ ստանալու համար հուղարկավորությունը կատարած անձը դիմումի հետ միասին տարածքային մարմին է ներկայացնում՝

ա) իր անձնագիրը.

բ) գործազուրկի մահվան վկայականը և դրա պատճենը:

6. Տարածքային մարմինը գործազուրկի մահվան վկայականի բնօրինակի վրա դնում է կնիք, որի վրա կատարում է գրառում` «Թաղման նպաստը վճարված է»: Գործազուրկի մահվան վկայականի պատճենը մնում է տարածքային մարմնում, իսկ բնօրինակը և հուղարկավորությունը կատարած անձի անձնագիրը վերադարձվում է:

7. Տարածքային մարմինը սույն կարգի 5-րդ կետում նշված փաստաթղթերի հիման վրա լրացնում է թաղման նպաստի վճարման համար անհրաժեշտ գումարի ֆինանսավորման հայտ-պահանջագիրը (այսուհետ` ֆինանսավորման հայտ-պահանջագիր), որը կից գրությամբ, 3 աշխատանքային օրվա ընթացքում ներկայացնում է Լեռնային Ղարաբաղի Հանրապետության սոցիալական ապահովության նախարարություն (այսուհետ` նախարարություն):

8. Նախարարությունը տարածքային մարմնից ստացված ֆինանսավորման հայտ-պահանջագիրը 3 աշխատանքային օրվա ընթացքում ներկայացնում է Լեռնային Ղարաբաղի Հանրապետության ֆինանսների նախարարություն:

(8-րդ կետը փոփ. 29.01.2009 N 40-Ն)

9.  Լեռնային Ղարաբաղի Հանրապետության ֆինանսների նախարարությունը տեղական գանձապետական բաժնում նախարարության անվամբ բացված բյուջետային միջոցների գանձապետական հաշվին է փոխանցում ֆինանսավորման հայտ-պահանջագրով նախատեսված գումարը:

(9-րդ կետը խմբ. 29.01.2009 N 40-Ն)

10. Նախարարությունը սույն կարգի 9-րդ կետում նշված գումարն ստանալուց հետո 5 աշխատանքային օրվա ընթացքում փոխանցում է Լեռնային Ղարաբաղի Հանրապետության ֆինանսների նախարարության համապատասխան տեղական գանձապետական բաժիններում նախարարության անվամբ բացված բյուջետային միջոցների գանձապետական հաշիվներին:

(10-րդ կետը փոփ. 29.01.2009 N 40-Ն)

11. Սույն կարգի 10-րդ կետում նշված գումարն ստացվելուց հետո վճարվում է գործազուրկի մահվան դեպքում հուղարկավորությունը կատարած անձին:

III. Հաշվետվությունը

12. Տարածքային մարմինը յուրաքանչյուր ամիս նախարարություն է ներկայացնում թաղման նպաստի վճարման և ծախսված ֆինանսական միջոցների չափի մասին հաշվետվություն:

13. Նախարարությունն ամփոփում է տարածքային մարմիններից ստացված հաշվետվությունները և յուրաքանչյուր եռամսյակ` թաղման նպաստի ֆինանսավորման և փաստացի կատարված վճարումների մասին տեղեկություն է ներկայացնում Լեռնային Ղարաբաղի Հանրապետության ֆինանսների նախարարություն:

(13-րդ կետը փոփ. 29.01.2009 N 40-Ն)