ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

ք.Ստեփանակերտ

Համաձայն «Բնակչության զբաղվածության և գործազրկության դեպքում սոցիալական պաշտպանության մասին» Լեռնային Ղարաբաղի Հանրապետության օրենքի 15-րդ հոդվածի 2-րդ մասի 16-րդ կետի` Լեռնային Ղարաբաղի Հանրապետության կառավարությունը որոշում է.

1. Սահմանել այլ վայր աշխատանքի գործուղվող գործազուրկի և աշխատանք փնտրող` չզբաղված հաշմանդամի նյութական ծախսերի հատուցման կարգը` համաձայն հավելվածի:

(1-ին կետը խմբ. 29.12.2011 N 1034-Ն)

2. Լեռնային Ղարաբաղի Հանրապետության սոցիալական ապահովության նախարարին` սույն որոշումն ուժի մեջ մտնելու օրվանից մեկամսյա ժամկետում հաստատել զբաղվածության տարածքային պետական մարմնի, գործազուրկի և գործատուի միջև կնքվող թափուր աշխատատեղը համալրելու մասին եռակողմ պայմանագրի օրինակելի և այլ վայր աշխատանքի գործուղվող գործազուրկի նյութական ծախսերի հատուցման ֆինանսավորման մասին հայտ-պահանջագրի ձևերը:

3. Սույն որոշումն ուժի մեջ է մտնում 2007 թվականի հունվարի 1-ից:

Կ Ա Ր Գ

ԱՅԼ ՎԱՅՐ ԱՇԽԱՏԱՆՔԻ ԳՈՐԾՈՒՂՎՈՂ ԳՈՐԾԱԶՈՒՐԿԻ ԵՎ ԱՇԽԱՏԱՆՔ ՓՆՏՐՈՂ` ՉԶԲԱՂՎԱԾ ՀԱՇՄԱՆԴԱՄԻ ՆՅՈՒԹԱԿԱՆ ԾԱԽՍԵՐԻ ՀԱՏՈՒՑՄԱՆ

(վերնագիրը խմբ. 29.12.2011 N 1034-Ն)

I. Ընդհանուր դրույթներ

1. Սույն կարգով կարգավորվում են Լեռնային Ղարաբաղի Հանրապետության սոցիալական ծառայություններ տրամադրող տարածքային պետական մարմինների (այսուհետ` տարածքային մարմին) առաջարկությամբ այլ վայր (Լեռնային Ղարաբաղի Հանրապետության տարածքում) աշխատանքի գործուղվող գործազուրկի և աշխատանք փնտրող` չզբաղված հաշմանդամի նյութական ծախսերի հատուցման հետ կապված հարաբերությունները:

(1-ին կետը փոփ. 29.12.2011 N 1034-Ն)

2. Սույն կարգի իմաստով այլ վայր աշխատանքի գործուղումը տարածքային մարմնի առաջարկությամբ գործազուրկի և աշխատանք փնտրող` չզբաղված հաշմանդամի բնակության վայրից (համայնքից) դուրս աշխատանքի ընդունվելն է:

(2-րդ կետը փոփ. 29.12.2011 N 1034-Ն)

3. Գործազուրկը և աշխատանք փնտրող` չզբաղված հաշմանդամը տարածքային մարմնի առաջարկությամբ կարող են գործուղվել այլ վայր աշխատանքի 30 կիլոմետրից ավելի հեռավորությամբ այլ բնակավայրում (համայնքում) ժամանակավոր (ոչ պակաս մեկ տարի ժամկետով) կամ մշտական բնակության պայմանով:

(3-րդ կետը փոփ. 29.12.2011 N 1034-Ն)

4. Այլ վայր աշխատանքի գործուղվող գործազուրկի և աշխատանք փնտրող` չզբաղված հաշմանդամի նյութական ծախսերը հատուցվում են Լեռնային Ղարաբաղի Հանրապետության պետական բյուջեի միջոցների հաշվին:

(4-րդ կետը փոփ. 29.01.2009 N 43-Ն, փոփ. 29.12.2011 N 1034-Ն)

5. Գործազուրկին և աշխատանք փնտրող` չզբաղված հաշմանդամին այլ վայր աշխատանքի գործուղման համար նյութական ծախսերի հատուցում տրվում է մեկ անգամ:

(5-րդ կետը փոփ. 29.12.2011 N 1034-Ն)

6. Թափուր աշխատատեղը կարող է առաջարկվել այլ վայր աշխատանքի գործուղվող գործազուրկին և աշխատանք փնտրող` չզբաղված հաշմանդամին միայն այն դեպքում, եթե տարածքային մարմնում տվյալ աշխատատեղի վերաբերյալ տեղեկատվությունն ստացվելուց հետո այն առնվազն 1 ամիս չի համալրվել:

(6-րդ կետը փոփ. 29.01.2009 N 43-Ն, փոփ. 29.12.2011 N 1034-Ն)

II. Այլ վայր աշխատանքի գործուղվող գործազուրկի և աշխատանք փնտրող` չզբաղված հաշմանդամի նյութական ծախսերի հատուցման երաշխիքները

7. Այլ վայր ժամանակավոր կամ մշտական բնակության մեկնող գործազուրկին և աշխատանք փնտրող` չզբաղված հաշմանդամին և նրա հետ մեկնող ընտանիքի անդամներին հատուցվում են`

ա) իր և իր ընտանիքի անդամների տեղափոխման տրանսպորտային ծախսերը` միայն միկրոավտոբուսային երթուղի լինելու դեպքում` միկրոավտոբուսային երթուղիների համար սահմանված սակագնի չափով, իսկ միկրոավտոբուսային և ավտոբուսային երթուղիներ լինելու դեպքում` ավտոբուսային երթուղիների համար սահմանված սակագնի չափով.

բ) իր և իր ընտանիքի անդամների անհրաժեշտ գույքի տեղափոխման տրանսպորտային ծախսերը` 30-50 կմ ճանապարհի համար` 10000 դրամ, 50 կմ-ից ավելի յուրաքանչյուր 50 կմ-ի համար` 8000 դրամ, բայց ոչ ավելի, քան 50000 դրամ.

գ) 30 կիլոմետրից ավել հեռավորությամբ այլ վայր աշխատանքի մեկնելու դեպքում` իր և իր ընտանիքի անդամների օրապահիկը` յուրաքանչյուրին Լեռնային Ղարաբաղի Հանրապետության կառավարության 2006 թվականի մարտի 28-ի «Ծառայողական գործուղման մեկնած աշխատողների գործուղման ծախսերի հատուցման համար կատարվող վճարումների նվազագույն և առավելագույն չափերն ու վճարման կարգը սահմանելու մասին» թիվ 164 որոշմամբ սահմանված չափով:

(7-րդ կետը փոփ. 29.12.2011 N 1034-Ն)

8. Այլ վայր աշխատանքի գործուղվող գործազուրկին և աշխատանք փնտրող` չզբաղված հաշմանդամին տրվում է`

1) միանվագ ֆինանսական աջակցություն` «Նվազագույն ամսական աշխատավարձի մասին» Լեռնային Ղարաբաղի Հանրապետության օրենքի 1-ին հոդվածով սահմանված ամսական աշխատավարձի եռապատիկի չափով.

2) մեկ տարվա ընթացքում 4 անգամ մշտական բնակավայր այցելելու համար տրանսպորտային ծախս միկրոավտոբուսային երթուղի լինելու դեպքում` միկրոավտոբուսային երթուղիների համար սահմանված սակագնի չափով, իսկ միկրոավտոբուսային և ավտոբուսային երթուղիներ լինելու դեպքում` ավտոբուսային երթուղիների համար սահմանված սակագնի չափով.

3) ամսական գումար` բնակարանային վարձի և կոմունալ ծախսերի համար` «Նվազագույն ամսական աշխատավարձի մասին» Լեռնային Ղարաբաղի Հանրապետության օրենքի 1-ին հոդվածով սահմանված ամսական աշխատավարձի չափով:

(8-րդ կետը խմբ. 29.01.2009 N 43-Ն, փոփ. 29.12.2011 N 1034-Ն)

III. Այլ վայր աշխատանքի գործուղվող գործազուրկի և աշխատանք փնտրող` չզբաղված հաշմանդամի նյութական ծախսերի հատուցման պայմանները

9. ԼՂՀ սոցիալական ապահովության նախարարությունը (այսուհետ` նախարարություն) յուրաքանչյուր ամիս տարածքային մարմիններից ստացված տեղեկատվության համաձայն ամփոփում է առնվազն 1 ամիս թափուր մնացած աշխատատեղերի մասին տեղեկատվությունը և տրամադրում տարածքային մարմիններին:

Տարածքային մարմինը, յուրաքանչյուր ամիս, տարածքային մարմնի վարչական շենքի տեսանելի վայրում, տեղադրում է առնվազն 1 ամիս թափուր մնացած աշխատատեղերի մասին տեղեկատվությունը` նշելով գործատուի հասցեն, աշխատանքի բնույթը, պահանջվող մասնագիտական որակավորումը, աշխատանքի պայմանները, աշխատաժամանակը և աշխատավարձի չափը:

(9-րդ կետը փոփ. 29.01.2009 N 43-Ն)

10. Այլ վայր աշխատանքի գործուղվելու համաձայնություն հայտնած գործազուրկին և աշխատանք փնտրող` չզբաղված հաշմանդամին տարածքային մարմնի կողմից տրամադրվում է խորհրդատվություն այլ վայրում առկա թափուր աշխատատեղերի և այլ վայր աշխատանքի գործուղվելու կապակցությամբ գործազուրկի նյութական ծախսերի հատուցման ծրագրի վերաբերյալ:

(10-րդ կետը փոփ. 29.12.2011 N 1034-Ն)

11. Այլ վայր աշխատանքի գործուղվելու ցանկություն ունեցող գործազուրկը և աշխատանք փնտրող` չզբաղված հաշմանդամը գրավոր դիմում է տարածքային մարմին` նշելով համայնքի, գործատուի և թափուր աշխատատեղի անվանումները:

(11-րդ կետը փոփ. 29.12.2011 N 1034-Ն)

12. Եթե գործազուրկին և աշխատանք փնտրող` չզբաղված հաշմանդամին առաջարկվող աշխատանքը գտնվում է այն տարածքային մարմնի սպասարկման համայնքում, որտեղ հաշվառված է գործազուրկը և աշխատանք փնտրող` չզբաղված հաշմանդամը, ապա տվյալ տարածքային մարմնի տնօրենը գործատուի հետ քննարկում է թափուր աշխատատեղը գործազուրկով և աշխատանք փնտրող` չզբաղված հաշմանդամով համալրելու, գործատուի, գործազուրկի և աշխատանք փնտրող` չզբաղված հաշմանդամի և տարածքային մարմնի հետ եռակողմ պայմանագիր կնքելու հետ կապված հարաբերությունները:

(12-րդ կետը փոփ. 29.12.2011 N 1034-Ն)

13. Եթե գործազուրկի և աշխատանք փնտրող` չզբաղված հաշմանդամի դիմումում նշված գործատուն գործունեություն է իրականացնում տվյալ տարածքային մարմնի սպասարկման համայնքից դուրս գտնվող համայնքում, ապա տարածքային մարմինը գործազուրկի և աշխատանք փնտրող` չզբաղված հաշմանդամի դիմումի պատճենը և գործազուրկի և աշխատանք փնտրող` չզբաղված հաշմանդամի հաշվառման քարտի քաղվածքը` կից գրությամբ, ուղարկում է տվյալ գործատուին սպասարկող տարածքային մարմին: Վերջինս գործատուի մոտ առկա թափուր աշխատատեղն այլ համայնքի գործազուրկով և աշխատանք փնտրող` չզբաղված հաշմանդամով համալրելու, գործատուի, գործազուրկի և աշխատանք փնտրող` չզբաղված հաշմանդամի և տարածքային մարմնի հետ եռակողմ պայմանագիր կնքելու հետ կապված հարցերը քննարկում է գործատուի հետ: Տարածքային մարմինը քննարկման արդյունքների մասին եռօրյա ժամկետում տեղեկատվություն է տրամադրում իրեն դիմած տարածքային մարմնին:

(13-րդ կետը փոփ. 29.12.2011 N 1034-Ն)

14. Թափուր աշխատատեղը գործազուրկով և աշխատանք փնտրող` չզբաղված հաշմանդամով համալրելու և առնվազը մեկ տարի անընդմեջ տվյալ գործատուի մոտ աշխատելու հարցում տարածքային մարմնի և գործատուի միջև համաձայնություն ձեռք բերվելու դեպքում` գործազուրկի և աշխատանք փնտրող` չզբաղված հաշմանդամի, գործատուի և գործազուրկին և աշխատանք փնտրող` չզբաղված հաշմանդամին հաշվառած տարածքային մարմնի միջև կնքվում է թափուր աշխատատեղը համալրելու եռակողմ պայմանագիր:

(14-րդ կետը փոփ. 29.12.2011 N 1034-Ն)

15. Սույն կարգի 14-րդ կետում նշված պայմանագիրը կնքելուց հետո գործատուն գործազուրկի և աշխատանք փնտրող` չզբաղված հաշմանդամի հետ կնքում է աշխատանքային պայմանագիր` Լեռնային Ղարաբաղի Հանրապետության օրենսդրությամբ սահմանված կարգով:

(15-րդ կետը փոփ. 29.12.2011 N 1034-Ն)

IV. Այլ վայր աշխատանքի գործուղվող գործազուրկի և աշխատանք փնտրող` չզբաղված հաշմանդամի նյութական ծախսերի հատուցման ֆինանսավորումը

16. Այլ վայր աշխատանքի գործուղվող գործազուրկը և աշխատանք փնտրող` չզբաղված հաշմանդամը սույն կարգի 14-րդ և 15-րդ կետերում նշված պայմանագրերը կնքելուց հետո առևտրային բանկում բացում է բանկային հաշիվ և իրեն հաշվառած տարածքային մարմին է ներկայացնում հետևյալ տեղեկանքները`

ա) նոր բնակության վայրում մշտական կամ ժամանակավոր բնակության մասին.

բ) իր անվամբ բացված բանկային հաշվի համարի և բանկի ռեկվիզիտների մասին:

(16-րդ կետը փոփ. 29.12.2011 N 1034-Ն)

17. Տարածքային մարմինը սույն կարգի 16-րդ կետում նշված փաստաթղթերն ստանալուց հետո կազմում և 3 աշխատանքային օրվա ընթացքում` կից գրությամբ, նախարարություն է ներկայացնում ֆինանսավորման հայտ-պահանջագիր: Կից գրության մեջ նշվում են տվյալ գործազուրկին և աշխատանք փնտրող` չզբաղված հաշմանդամին ֆինանսական միջոցներ տրամադրելու հիմնավորումը, ինչպես նաև գործազուրկի և աշխատանք փնտրող` չզբաղված հաշմանդամի բանկային հաշվի համարը:

(17-րդ կետը փոփ. 29.12.2011 N 1034-Ն)

18. Նախարարությունը 3 աշխատանքային օրվա ընթացքում Լեռնային Ղարաբաղի Հանրապետության ֆինանսների նախարարություն է ներկայացնում ըստ տարածքային մարմինների կազմված ֆինանսավորման հայտ-պահանջագիրը:

(18-րդ կետը փոփ. 29.01.2009 N 43-Ն)

19. Լեռնային Ղարաբաղի Հանրապետության ֆինանսների նախարարությունը տեղական գանձապետական բաժնում նախարարության անվամբ բացված բյուջետային միջոցների գանձապետական հաշվին է փոխանցում ֆինանսավորման հայտ-պահանջագրով նախատեսված գումարը:

(19-րդ կետը խմբ. 29.01.2009 N 43-Ն)

20. Նախարարությունը սույն կարգի 19-րդ կետում նշված գումարն ստանալուց հետո 5 աշխատանքային օրվա ընթացքում փոխանցում է Լեռնային Ղարաբաղի Հանրապետության ֆինանսների նախարարության համապատասխան տեղական գանձապետական բաժիններում նախարարության անվամբ բացված բյուջետային միջոցների գանձապետական հաշիվներին:

(20-րդ կետը փոփ. 29.01.2009 N 43-Ն)

21. Սույն կարգի 20-րդ կետում նշված գումարն ստացվելուց հետո 5 աշխատանքային օրվա ընթացքում փոխանցվում է այլ վայր աշխատանքի գործուղվող գործազուրկի և աշխատանք փնտրող` չզբաղված հաշմանդամի բանկային հաշվի համարին:

(21-րդ կետը փոփ. 29.12.2011 N 1034-Ն)

22. Տարածքային մարմինը յուրաքանչյուր ամիս նախարարություն է ներկայացնում հաշվետվություն ֆինանսական միջոցներ ստացած գործազուրկների և աշխատանք փնտրող` չզբաղված հաշմանդամների և ստացված միջոցների մասին:

(22-րդ կետը փոփ. 29.12.2011 N 1034-Ն)

23. Այլ վայր աշխատանքի գործուղվելու կապակցությամբ գործազուրկին և աշխատանք փնտրող` չզբաղված հաշմանդամին հատուցված նյութական ծախսերը ենթակա են վերադարձման`

ա) գործատուի կողմից, եթե գործատուի և գործուղվողի հետ կնքված աշխատանքային պայմանագիրը լուծվել է գործատուի նախաձեռնությամբ` Լեռնային Ղարաբաղի Հանրապետության աշխատանքային օրենսգրքի 113-րդ հոդվածի առաջին մասի 3-րդ կետով սահմանված հիմքերով` աշխատանքային պայմանագիրը կնքելուց հետո մեկ տարվա ընթացքում.

բ) գործուղվողի կողմից, եթե գործատուի և գործուղվողի հետ կնքված աշխատանքային պայմանագիրը լուծվել է գործուղվողի նախաձեռնությամբ կամ Լեռնային Ղարաբաղի Հանրապետության աշխատանքային օրենսգրքի 113-րդ հոդվածի առաջին մասի 6-րդ և 7-րդ կետերով սահմանված հիմքերով` աշխատանքային պայմանագիրը կնքելուց հետո մեկ տարվա ընթացքում.

գ) գործատուի և գործուղվողի կողմից հավասարապես, եթե աշխատանքային պայմանագիրը լուծվել է Լեռնային Ղարաբաղի Հանրապետության աշխատանքային օրենսգրքի 110-րդ հոդվածի հիմքերով` աշխատանքային պայմանագիրը կնքելուց հետո մեկ տարվա ընթացքում:

(23-րդ կետը փոփ. 29.12.2011 N 1034-Ն)

24. Սույն կարգի պահանջների խախտմամբ տրամադրված ֆինանսական միջոցները ենթակա են վերադարձման` Լեռնային Ղարաբաղի Հանրապետության օրենսդրությամբ սահմանված կարգով: