ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

ք. Ստեփանակերտ

Լեռնային Ղարաբաղի Հանրապետության կառավարությունը որոշում է.

1. Սահմանել, որ Լեռնային Ղարաբաղի Հանրապետության պաշտպանության ժամանակ ստացած վնասվածքի կամ խեղման հետևանքով 1-ին խմբի անժամկետ հաշմանդամ ճանաչված՝ Լեռնային Ղարաբաղի Հանրապետությունում մշտական հաշվառում ունեցող անձանց տրամադրվում են ձեռքի կառավարման ավտոմեքենաներ:

2. Հաստատել՝

ա) հաշմանդամներին ձեռքի կառավարման ավտոմեքենաներ տրամադրելու կարգը՝ համաձայն թիվ 1 հավելվածի,

բ) ձեռքի կառավարման ավտոմեքենա ստանալու իրավունք տվող բժշկական ցուցումների ցանկը՝ համաձայն թիվ 2 հավելվածի:

3. Սույն որոշումն ուժի մեջ է մտնում 2008 թվականի մայիսի 26-ից:

1. Հաշմանդամներին ձեռքի կառավարման ավտոմեքենաների տրամադրումը իրականացվում է Լեռնային Ղարաբաղի Հանրապետության սոցիալական ապահովության նախարարության (այսուհետ՝ նախարարություն) կողմից:

2. Ձեռքի կառավարման ավտոմեքենաներ տրամադրվում են Լեռնային Ղարաբաղի Հանրապետության պաշտպանության ժամանակ ստացած վնասվածքի կամ խեղման հետևանքով 1-ին խմբի անժամկետ հաշմանդամ ճանաչված՝ ձեռքի կառավարման ավտոմեքենա ստանալու իրավունք տվող բժշկական ցուցումներ ունեցող և պարտադիր բժշկական հավատարմագրմամբ այն վարելու համար պիտանի ճանաչված անձանց:

Ձեռքի կառավարման ավտոմեքենա վարելու պիտանիությունը որոշելու համար հաշմանդամի պարտադիր բժշկական հավատարմագրումն իրականացվում է Լեռնային Ղարաբաղի Հանրապետության կառավարության սահմանած պարբերականությամբ և կարգով:

Հաշմանդամի կատարած՝ բժշկական հավատարմագրման տեղեկանք ստանալու համար սահմանված վճարները փոխհատուցվում են Լեռնային Ղարաբաղի Հանրապետության պետական բյուջեի հաշվին:

3. Ձեռքի կառավարման ավտոմեքենա ստանալու իրավունք տվող բժշկական ցուցումների առկայությունն որոշվում է բժշկասոցիալական փորձաքննության ոլորտում իրավասու պետական մարմնի՝ բժշկասոցիալական փորձաքննության կենտրոնի (այսուհետ՝ ԲՍՓԿ) կողմից իրականացվող բժշկական փորձաքննությամբ՝ բժշկական հաստատության կողմից տրված ուղեգրի հիման վրա:

Բժշկական հաստատությունը հաշմանդամին բժշկասոցիալական փորձաքննության ոլորտում իրավասու պետական մարմին ուղեգրելու համար բժշկական քննության է ենթարկում նախարարության հարցմամբ:

(3-րդ կետը փոփ. 31.07.2012 N 528-Ն)

4. Բժշկասոցիալական փորձաքննության ոլորտում իրավասու պետական մարմնում հաշմանդամի բժշկական փորձաքննության ժամանակ կազմվում է փորձաքննական ակտ, որը բժշկական մյուս փաստաթղթերի հետ պահվում է բժշկասոցիալական փորձաքննության ոլորտում իրավասու պետական մարմնում, իսկ փորձաքննական ակտից քաղվածքն ուղարկվում է նախարարություն:

(4-րդ կետը փոփ. 31.07.2012 N 528-Ն)

5. Ձեռքի կառավարման ավտոմեքենա ստանալու իրավունք տվող բժշկական ցուցումների առկայության դեպքում բժշկասոցիալական փորձաքննության ոլորտում իրավասու պետական մարմնի կողմից հաշմանդամին տրվում է համապատասխան տեղեկանք:

(5-րդ կետը փոփ. 31.07.2012 N 528-Ն)

6. Ձեռքի կառավարման ավտոմեքենա վարելու ուսուցումն իրականացվում է Լեռնային Ղարաբաղի Հանրապետության պետական բյուջեի միջոցների հաշվին՝ Լեռնային Ղարաբաղի Հանրապետության օրենսդրությամբ սահմանված կարգով:

7. Ձեռքի կառավարման ավտոմեքենա ստանալու համար գրավոր դիմումի հետ նախարարություն պետք է ներկայացվի հաշմանդամի անձը հաստատող փաստաթուղթը, սոցիալական ապահովության քարտը, հաշմանդամության մասին տեղեկանքը, ձեռքի կառավարման ավտոմեքենա վարելու իրավունքի վկայականը, սույն կարգի 5-րդ կետում նշված տեղեկանքն ու դրանց պատճենները, ինչպես նաև 3 x 4 սմ չափսի 2 լուսանկար:

8. Ձեռքի կառավարման ավտոմեքենա ստանալու դիմում ներկայացրած հաշմանդամները նախարարության համապատասխան ստորաբաժանման կողմից վերցվում են հաշվառման՝ դիմումը գրանցելով հաշվառման մատյանում:

Հաշվառման վերցված յուրաքանչյուր հաշմանդամի համար կազմվում է գործ, որտեղ պահվում են բժշկասոցիալական փորձաքննության ոլորտում իրավասու պետական մարմնի ուղարկած՝ փորձաքննական ակտից քաղվածքը, ինչպես նաև հաշմանդամի դիմումի հետ ներկայացված բոլոր փաստաթղթերը:

(8-րդ կետը փոփ. 31.07.2012 N 528-Ն)

9. Նախարարությունն, անհրաժեշտ բոլոր փաստաթղթերը ստանալու օրվանից ոչ ուշ, քան 2 ամսվա ընթացքում, կայացնում է հաշմանդամին ձեռքի կառավարման ավտոմեքենա տրամադրելու մասին որոշում կամ մերժում է հաշմանդամի դիմումը՝ այդ մասին գրավոր հայտնելով դիմողին:

Նախարարության կողմից որոշում կայացվելուց հետո՝ մեկ տարվա ընթացքում, սեփականության իրավունքով հաշմանդամին տրամադրվում է ձեռքի կառավարման ավտոմեքենա՝ նրա հետ կնքելով գույքի նվիրատվության պայմանագիր՝ Լեռնային Ղարաբաղի Հանրապետության քաղաքացիական օրենսգրքով սահմանված կարգով:

Ավտոմեքենաներ տրամադրելու առաջնահերթությունն ու հերթականությունը սահմանում է նախարարությունը:

(9-րդ կետը փոփ. 31.07.2012 N 528-Ն)

10. Բնակչության սոցիալական պաշտպանության կազմակերպությունում ապրող հաշմանդամին ձեռքի կառավարման ավտոմեքենա չի տրամադրվում:

11. (կետն ուժը կորցրել է 31.07.2012 N 528-Ն)

12. (կետն ուժը կորցրել է 31.07.2012 N 528-Ն)

13. (կետն ուժը կորցրել է 31.07.2012 N 528-Ն)

14. Հաշմանդամներն ազատվում են վարորդական իրավունքի վկայական տրամադրելու համար որակավորման քննությունների, վարորդական իրավունքի վկայական, տրամադրված ձեռքի կառավարման ավտոմեքենայի տեխնիկական անձնագիր ու պետական համարանիշ ստանալու, ինչպես նաև ավտոմեքենան գրանցելու համար պետական տուրքի վճարումից՝ «Պետական տուրքի մասին» Լեռնային Ղարաբաղի Հանրապետության օրենքի 30-րդ հոդվածի առաջին մասի «բ» ենթակետով սահմանված կարգով:

Վճարումները կատարվում են Լեռնային Ղարաբաղի Հանրապետության պետական բյուջեում այդ նպատակով նախատեսված միջոցներից:

15. Հաշմանդամներին հատկացված ձեռքի կառավարման ավտոմեքենաների տարեկան տեխնիկական զննության համար պետական տուրքի, ինչպես նաև այդ ավտոմեքենաներից օդային ավազան վնասակար նյութեր արտանետելու համար բնապահպանական վճարի հետ կապված հարաբերությունները կարգավորվում են «Պետական տուրքի մասին» և «Բնապահպանական և բնօգտագործման վճարների մասին» Լեռնային Ղարաբաղի Հանրապետության օրենքներով:

(15-րդ կետը խմբ. 31.07.2012 N 528-Ն)

16. Ձեռքի կառավարման ավտոմեքենա տրամադրելու՝ նախարարության ներքին ընթացակարգը, սույն կարգի 4-րդ կետում նշված փորձաքննական ակտի, քաղվածքի, 5-րդ կետում նշված տեղեկանքի, 7‑րդ կետում նշված դիմումի և 8-րդ կետում նշված մատյանի ձևերը հաստատում է նախարարությունը:

17. Սույն կարգը խախտողները պատասխանատվություն են կրում օրենքով սահմանված կարգով:

1. Երկու ազդրերի անդամահատում

2. Երկու սրունքների անդամահատում

3. Մեկ ազդրի անդամահատում ցանկացած հատվածից՝ անկախ պրոթեզավորման պիտանիությունից

4. Ազդրի կամ սրունքի անդամահատում՝ մյուս ստորին վերջույթի շարժման կամ կանգնելու ֆունկցիայի զգալի խանգարման դեպքում (ոտնաթաթի անդամահատում, դեֆորմացիա, անոթային հիվանդություն, խոշոր ծայրամասային ներվային բնի ախտահարում և այլն)

5. Ազդրի կամ սրունքի անդամահատում, միաժամանակ վերին վերջույթներից մեկի բացակայություն

6. Ստորին վերջույթների, կոնքի կամ ողնաշարի կայուն դեֆորմացիաներ կամ հիվանդություն կանգնելու և քայլելու նշանակալից խանգարումով (ստորին վերջույթների անկիլոզ պոլիարթրիտներ, ստորին պարապլեգիաներ, պարապարեզներ, ծանր կիֆոսկոլիզներ և սպոնդիլիտներ կոմպրեսիայի երևույթներով, պսևդոարթրոզներ, էնդարտերիտներ 2-3 աստիճանի, փղացում և այլն)

7. Կենտրոնական ծագում ունեցող ստորին վերջույթների պարալիչներ և պարեզներ՝ նստելու հնարավորության, բայց շարժման զգալի դժվարության դեպքում