ք.Ստեփանակերտ

Ղեկավարվելով «Արցախի Հանրապետության արտակարգ իրավիճակների պետական ծառայության մասին» օրենքի 75-րդ հոդվածով` Լեռնային Ղարաբաղի Հանրապետության կառավարությունը ո ր ո շ ու մ է.

(նախաբանը փոփ. 10.02.2015 N 39-Ն,10.06.20 N 68-Ն)

1. Սահմանել ծառայության ժամանակ զոհված (մահացած) փրկարարական ծառայողների հուղարկավորության, գերեզմանների բարեկարգման, տապանաքարերի պատրաստման և տեղադրման հետ կապված ծախսերի հատուցման կարգը` համաձայն հավելվածի:

(1-ին կետը փոփ. 10.06.20 N 68-Ն)

2. Լեռնային Ղարաբաղի Հանրապետության կառավարության 2000 թվականի դեկտեմբերի 26-ի «Զինծառայության ընթացքում զոհված (մահացած) զինծառայողների հուղարկավորության, գերեզմանների բարեկարգման, տապանաքարերի պատրաստման և տեղադրման հետ կապված ծախսերը փոխհատուցելու մասին» թիվ 256 որոշման մեջ կատարել հետևյալ փոփոխությունները`

որոշման 3-րդ կետից հանել «ԼՂՀ կառավարությանն առընթեր արտակարգ իրավիճակների վարչությունը», իսկ 6-րդ կետից` «ԼՂՀ կառավարությանն առընթեր արտակարգ իրավիճակների վարչությանը» բառերը:

3. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

1. Սույն կարգով սահմանվում են փրկարարական ծառայության ժամանակ զոհված (մահացած), օրենքով սահմանված կարգով զոհված (մահացած) ճանաչված փրկարարական ծառայողների (այսուհետ նաև` զոհված ծառայողներ) հուղարկավորության, գերեզմանների բարեկարգման, տապանաքարերի պատրաստման և տեղադրման հետ կապված` Արցախի Հանրապետության պետական բյուջեի միջոցների հաշվին կատարվող ծախսերի չափն ու վճարման կարգը:

2. Փրկարարական ծառայության ժամանակ զոհված ծառայողների հուղարկավորության հետ կապված ծախսերը հատուցվում են նրանց ընտանիքների անդամներին Արցախի Հանրապետության պետական բյուջեի հաշվին` 700 000 (յոթ հարյուր հազար) ՀՀ դրամի չափով:

3. Փրկարարական ծառայության ժամանակ զոհված ծառայողների (բացառությամբ եղբայրական գերեզմանոցներում հուղարկավորվածների) գերեզմանների բարեկարգման, տապանաքարերի պատրաստման և տեղադրման համար նրանց ընտանիքների անդամներին Արցախի Հանրապետության պետական բյուջեից հատկացվում է 1 400 000 (մեկ միլիոն չորս հարյուր հազար) ՀՀ դրամ:

4. Ծախսերի հատուցումը նշանակվում է զոհված ծառայողների ընտանիքների՝ Արցախի Հանրապետությունում մշտական հաշվառում ունեցող հետևյալ անդամներից մեկին՝

1) ամուսնուն, կամ

2) հուղարկավորությունը կատարած հարազատներից մեկին (ծնող, զավակ, եղբայր, քույր, պապ, տատ և այլն )՝ ամուսնու բացակայության դեպքում: Սույն կարգի իմաստով՝ ամուսնու բացակայություն է համարվում, եթե`

ա. զոհված ծառայողը ամուսնացած չէր, կամ

բ. զոհված ծառայողի ամուսինը մահացած է, կամ չունի Արցախի Հանրապետությունում մշտական հաշվառում կամ Արցախի Հանրապետության տարածքում տվյալ պահին փաստացի չի բնակվում:

5. Զոհված ծառայողների հուղարկավորության, գերեզմանների բարեկարգման, տապանաքարերի պատրաստման և տեղադրման հետ կապված ծախսերի հատուցման նպատակով Արցախի Հանրապետության արտակարգ իրավիճակների պետական ծառայությունը կազմում ու Արցախի Հանրապետության աշխատանքի, սոցիալական և բնակարանային հարցերի նախարարություն (այսուհետ՝ նախարարություն) է ներկայացնում այն զոհված ծառայողների ցուցակը, որոնց ընտանիքներին նախատեսվում է Արցախի Հանրապետության պետական բյուջեից հատուցել զոհված ծառայողների հուղարկավորության, գերեզմանների բարեկարգման, տապանաքարերի պատրաստման և տեղադրման հետ կապված ծախսերը: Ցուցակում նշվում են զոհված ծառայողի անձնական տվյալները (անունը, ազգանունը, հայրանունը), մահվան տարեթիվը, մահվան վկայականի համարը, զոհված ծառայողի ընտանիքի` հատուցման գումար ստացող անդամի անունը, ազգանունը, հայրանունը, անձնագրի տվյալները, յուրաքանչյուր զոհված ծառայողի մասով հատուցման ենթակա գումարի չափը, ինչպես նաև զոհված ծառայողի ընտանիքի բնակության վայրի հասցեն:

6. Նախարարությունը սույն կարգի 5-րդ կետի համաձայն ներկայացված տեղեկատվության հիման վրա Արցախի Հանրապետության պետական բյուջեից հատուցման ենթակա գումարների ֆինանսավորման նպատակով երեք աշխատանքային օրվա ընթացքում կազմում է ֆինանսավորման հայտ և ներկայացնում Արցախի Հանրապետության ֆինանսների նախարարություն:

7. Արցախի Հանրապետության ֆինանսների նախարարության կողմից հատուցման ենթակա գումարները ստանալուց հետո նախարարությունն այն փոխանցում է «Արցախբանկ» փակ բաժնետիրական ընկերության տարանցիկ հաշվին, որտեղից սույն կարգի 5-րդ կետում նշված՝ հատուցման գումարը ստանալու իրավունք ունեցող ընտանիքի անդամն անձնագիրը ներկայացնելու դեպքում կարող է ստանալ գումարը:

8. Սույն կարգի 7-րդ կետում նշված գումարն «Արցախբանկ» փակ բաժնետիրական ընկերության տարանցիկ հաշվին փոխանցելուց հետո նախարարությունն այդ մասին գրավոր տեղեկացնում է Արցախի Հանրապետության արտակարգ իրավիճակների պետական ծառայությանը:

9. Եթե զոհված փրկարարական ծառայողների հուղարկավորությունը, գերեզմանների բարեկարգումն, տապանաքարերի պատրաստումն և տեղադրումն իրականացվել է նրանց ընտանիքների անդամների ուժերով, ապա համապատասխան փաստաթղթեր ներկայացվելու դեպքում հատուցվում է սույն կարգի 2-րդ և 3-րդ կետերում նշված գումարը:

10. Արցախի Հանրապետությունից դուրս այլ վայրերում փրկարարական ծառայողների հուղարկավորության, գերեզմանների բարեկարգման, տապանաքարերի պատրաստման և տեղադրման ծախսերը հատուցվում են զոհված ծառայողների ընտանիքների բնակության վայրում:

11. Ծառայողական պարտականությունները կատարելիս անհայտ կորած և օրենքով սահմանված կարգով մահացած ճանաչված փրկարարական ծառայողների ընտանիքներին հատուցումը կատարվում է սույն կարգի 3-րդ կետով նախատեսված գումարի չափով:

(Հավելվածը խմբ. 10.06.20 N 68-Ն)