ք.Ստեփանակերտ

Լեռնային Ղարաբաղի Հանրապետության կառավարությունը ո ր ո շ ու մ է.

1. Սահմանել, որ Ուկրաինայում բնակության իրավունք ունեցող (այդ թվում` Արցախի Հանրապետության և Ուկրաինայի քաղաքացիություն ունեցող)` Ուկրաինայում տեղի ունեցած դեպքերի հետևանքով մշտական բնակության նպատակով Արցախի Հանրապետություն տեղափոխված անձին (այսուհետ` անձ) կենսաթոշակ նշանակվում և վճարվում է Արցախի Հանրապետության օրենսդրությամբ սահմանված կարգով` հաշվի առնելով սույն որոշման դրույթները:

(1-ին կետը փոփ. 11.04.2018 N 242-Ն)

2. Այն դեպքում, երբ Արցախի Հանրապետության օրենսդրության համաձայն` անձին կենսաթոշակ նշանակելու (վճարելու) համար անձը պետք է ներկայացնի Ուկրաինայում կենսաթոշակ նշանակված լինելու (չլինելու) կամ ստանալու (չստանալու) մասին փաստաթուղթ, ապա այդ փաստաթուղթը չի պահանջվում, եթե, ի պատասխան Արցախի Հանրապետության աշխատանքի, սոցիալական և բնակարանային հարցերի նախարարության սոցիալական ապահովության պետական գործակալության կատարած հարցման, ստացվել է պատասխան, որ հայցվող տեղեկատվությունը (փաստաթուղթը) չի կարող տրամադրվել Ուկրաինայում տեղի ունեցած դեպքերի կապակցությամբ, անձի` Ուկրաինայում բնակության վայրում Ուկրաինայի պետական իշխանության մարմինների` ժամանակավորապես իրենց լիազորությունները չիրականացնելու պատճառով:

(2-րդ կետը փոփ. 11.04.2018 N 242-Ն, 14.09.20 N 442-Ն)

3. Եթե անձը դիմում է իր հաշվառման վայրի կենսաթոշակ նշանակող ստորաբաժանում կենսաթոշակի գործը Ուկրաինայից պահանջելու և վճարումը Արցախի Հանրապետությունում շարունակելու համար, և Ուկրաինայից ստացված պատասխանի համաձայն` կենսաթոշակի գործը չի կարող ուղարկվել Ուկրաինայում տեղի ունեցած դեպքերի կապակցությամբ` սույն որոշման 2-րդ կետում նշված պատճառով, ապա այս դեպքում անձին նոր հիմքերով նշանակվում է կենսաթոշակ` հիմք ընդունելով նրա ներկայացրած փաստաթղթերը:

(3-րդ կետը փոփ. 11.04.2018 N 242-Ն)

4. Սույն որոշման 2-րդ և 3-րդ կետերում նշված դեպքերում Ուկրաինայից պատասխանն ստանալու օրվանից հետո տասն օրվա ընթացքում անձին նշանակվում է կենսաթոշակ, որը հաշվարկվում է անձի կողմից դիմումը ներկայացվելու օրվանից:

5. Սույն որոշումն ուժի մեջ է մտնում պաշտոնական հրապարակմանը հաջորդող օրվանից և դրա գործողությունը տարածվում է նաև այն դեպքերի վրա, երբ անձը կենսաթոշակ նշանակելու, կենսաթոշակի գործն Ուկրաինայից պահանջելու դիմումը ներկայացրել է մինչև սույն որոշումն ուժի մեջ մտնելը: