ք. Ստեփանակերտ

Հիմք ընդունելով «Բարձրագույն և հետբուհական մասնագիտական կրթության մասին» օրենքի 21-րդ հոդվածի 1-ին մասի 12-րդ կետը և «Նախնական մասնագիտական (արհեստագործական) և միջին մասնագիտական կրթության մասին» օրենքի 15-րդ հոդվածի 10-րդ կետը` Արցախի Հանրապետության կառավարությունը ո ր ո շ ու մ է.

1. Հաստատել Հայաստանի Հանրապետության պետական բարձրագույն ուսումնական հաստատություններում Արցախի Հանրապետությանը հատկացված տեղերով 2020-2021 ուսումնական տարվա բակալավրի ընդունելության մրցույթի արդյունքներով ընդունված և Արցախի Հանրապետությունում բարձրագույն ուսումնական հաստատությունների բակալավրիատի և միջին մասնագիտական ուսումնական հաստատությունների առկա ուսուցման վճարովի համակարգում սովորող ուսանողների ուսման վարձի պետական բյուջեից փոխհատուցման կարգը` համաձայն հավելվածի:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից, իսկ դրա գործողությունը տարածվում է 2020 թվականի սեպտեմբերի 1-ից հետո ծագած հարաբերությունների վրա:

1. Սույն կարգով սահմանվում է Հայաստանի Հանրապետության պետական բարձրագույն ուսումնական հաստատություններում Արցախի Հանրապետությանը հատկացված տեղերով 2020-2021 ուսումնական տարվա բակալավրի ընդունելության մրցույթի արդյունքներով ընդունված, Արցախի Հանրապետությունում բարձրագույն ուսումնական հաստատությունների բակալավրիատի և միջին մասնագիտական ուսումնական հաստատությունների առկա ուսուցման վճարովի համակարգում սովորող ուսանողների ուսման վարձի պետական բյուջեից փոխհատուցման կարգը (այսուհետ` փոխհատուցում):

2. Փոխհատուցման գումարի չափը համապատասխանում է տվյալ ուսումնական հաստատության կողմից սահմանված ուսման վարձին:

3. Փոխհատուցման գումարը հատկացվում է յուրաքանչյուր ուսումնական տարվա համար՝ յուրաքանչյուր կիսամյակի համար ուսումնական հաստատությունների կողմից ներկայացվող հայտերի հիման վրա՝ ուսման վարձի գումարի նշումով:

4. Հայաստանի Հանրապետության պետական բարձրագույն ուսումնական հաստատություններում Արցախի Հանրապետությանը հատկացված տեղերով 2020-2021 ուսումնական տարվա բակալավրի ընդունելության մրցույթի արդյունքներով հաշվեգրված դիմորդին`

1) փոխհատուցում տրվում է, եթե ընտրել է այնպիսի մասնագիտություն, որը բացակայում է Արցախի Հանրապետության բուհերի 2020-2021 ուսումնական տարվա ընդունելության մասնագիտությունների ցանկից և նրա տվյալները համապատասխանում են սույն ենթակետի պարբերություններով նշված պայմաններից որևէ մեկին.

ա. ընդունելության մրցութային առարկայի քննությունից նա հավաքել է 15.00 և բարձր միավոր,

բ. սպա ծնողը պահեստազորի հաշվառումից հանվել է սահմանային տարիքը լրանալու կամ առողջական վիճակի պատճառով,

գ. սպա ծնողը ծառայում է Արցախի Հանրապետության պաշտպանության նախարարությունում,

դ. սպա ծնողը ծառայում է Հայաստանի Հանրապետության պաշտպանության նախարարությունում կամ զինված ուժերում, իսկ նրա ընտանիքը ապրում և գրանցված է Արցախի Հանրապետությունում,

ե. ուսանողի սպա ծնողը ստանում է զինվորական կենսաթոշակ.

2) փոխհատուցումը դադարեցվում է (կամ չի տրվում), եթե ուսանողը՝

ա. հեռացվել է տվյալ ուսումնական հաստատությունից,

բ. հեռացվել է ակադեմիական պարտքերի առաջացման պատճառով և վերականգնվել է ուսումը շարունակելու նպատակով,

գ. տեղափոխվել է այլ ուսումնական հաստատություն,

դ. բուհի ներսում փոխել է մասնագիտությունը,

ե. ունի կրեդիտներով սահմանված պարտքեր նախորդ կիսամյակներից,

զ. ուսման վարձի փոխհատուցում է ստանում այլ կազմակերպության կամ անհատի կողմից, իսկ մասնակի փոխհատուցման դեպքում վարձի մնացորդ մասը փոխհատուցվում է պետության կողմից:

5. Արցախի Հանրապետության բարձրագույն ուսումնական հաստատություններում`

1) փոխհատուցում տրվում է հետևյալ դեպքերում.

ա. 2020-2021 ուսումնական տարվա ընդունելության արդյունքներով՝ առկա ուսուցման վճարովի համակարգի 1-ին կուրս ընդունված ուսանողներին,

բ. «Արցախի պետական համալսարան» պետական ոչ առևտրային կազմակերպության և «Շուշիի տեխնոլոգիական համալսարան» հիմնադրամի 2-րդ, 3-րդ, 4-րդ կուրսերի առկա ուսուցման վճարովի համակարգում սովորող ուսանողներին,

գ. «Արցախի պետական համալսարան» պետական ոչ առևտրային կազմակերպության և «Շուշիի տեխնոլոգիական համալսարան» հիմնադրամի 1-4-րդ կուրսերի առկա ուսուցման վճարովի համակարգում ուսումը շարունակելու նպատակով ակադեմիական արձակուրդից վերադարձած ուսանողներին.

2) փոխհատուցումը դադարեցվում է (կամ չի տրվում), եթե ուսանողը.

ա. առաջադիմության հիմքով ուսանողի փոխհատուցման (այսուհետ՝ փոխատեղում) արդյունքում վճարովի ուսուցման համակարգից տեղափոխվել է անվճար ուսուցման համակարգ,

բ. հեռացվել է (ազատվել է) տվյալ ուսումնական հաստատությունից,

գ. հեռացվել է ակադեմիական պարտքերի առաջացման պատճառով և վերականգնվել է ուսումը շարունակելու նպատակով,

դ. տեղափոխվել է այլ ուսումնական հաստատություն,

ե. բուհի ներսում փոխել է մասնագիտությունը՝ բացառությամբ «081101.01.6 Ագրոնոմիա, սելեկցիա և գենետիկա», «084101.01.6 Անասնաբուժություն», «011401.04.6 Ֆիզիկա» և «011401.02.6 Քիմիա» մասնագիտությունների, ինչպես նաև այն ուսանողների, ովքեր վերադարձել են ակադեմիական արձակուրդից և տեղափոխվել կրթական այլ ծրագիր իրենց ուսանած կրթական ծրագրի համապատասխան խմբի բացակայության պատճառով,

զ. առկա ուսուցման համակարգ է տեղափոխվել հեռակա ուսուցման համակարգից,

է. ունի կրեդիտներով սահմանված պարտքեր նախորդ կիսամյակներից,

ը. ստանում է երկրորդ մասնագիտություն (ողջ ուսումնառության ընթացքում),

թ. ընդգրկված է Լեռնային Ղարաբաղի Հանրապետության կառավարության 2008 թվականի փետրվարի 14-ի N 66 և 2015 թվականի դեկտեմբերի 28-ի N 910-Ն որոշումներով սահմանված խմբերում,

ժ. ուսման վարձի փոխհատուցում է ստանում այլ կազմակերպության կամ անհատի կողմից, իսկ մասնակի փոխհատուցման դեպքում վարձի մնացորդ մասը փոխհատուցվում է պետական բյուջեից:

6. Միջին մասնագիտական ուսումնական հաստատություններում`

1) փոխհատուցում տրվում է հետևյալ դեպքերում.

ա. «Շուշիի տեխնոլոգիական համալսարան» հիմնադրամի միջին մասնագիտական կրթական ծրագրերով, «Ստեփանակերտի Թամարա Քամալյանի անվան պետական բժշկական քոլեջ» պետական ոչ առևտրային կազմակերպության և «Ստեփանակերտի Սայաթ-Նովայի անվան պետական երաժշտական քոլեջ» պետական ոչ առևտրային կազմակերպության 1-4-րդ կուրսերի առկա ուսուցման վճարովի համակարգում սովորող ուսանողներին,

բ. «Շուշիի տեխնոլոգիական համալսարան» հիմնադրամի միջին մասնագիտական կրթական ծրագրերով, «Ստեփանակերտի Թամարա Քամալյանի անվան պետական բժշկական քոլեջ» պետական ոչ առևտրային կազմակերպության և «Ստեփանակերտի Սայաթ-Նովայի անվան պետական երաժշտական քոլեջ» պետական ոչ առևտրային կազմակերպության 1-4-րդ կուրսերի առկա ուսուցման վճարովի համակարգում ուսումը շարունակելու նպատակով ակադեմիական արձակուրդից վերադարձած ուսանողներին.

2) փոխհատուցումը տվյալ ուսանողի նկատմամբ դադարեցվում է (կամ չի տրվում), եթե ուսանողը.

ա. փոխատեղման արդյունքում վճարովի ուսուցման համակարգից տեղափոխվել է անվճար ուսուցման համակարգ,

բ. հեռացվել է տվյալ ուսումնական հաստատությունից,

գ. ակադեմիական պարտքերի պատճառով հեռացվել է և ուսումը շարունակելու նպատակով վերականգնվել է,

դ. տեղափոխվել է այլ ուսումնական հաստատություն,

ե. միջին մասնագիտական ուսումնական հաստատության ներսում փոխել է մասնագիտությունը,

զ. ունի առարկայական պարտքեր նախորդ կիսամյակներից,

է. ստանում է երկրորդ մասնագիտություն (ողջ ուսումնառության ընթացքում),

ը. օգտվում է Լեռնային Ղարաբաղի Հանրապետության կառավարության 2008 թվականի փետրվարի 14-ի N 66 որոշումով հաստատված փոխհատուցումից,

թ. ուսման վարձի փոխհատուցում է ստանում այլ կազմակերպության կամ անհատ անձի կողմից, իսկ մասնակի փոխհատուցման դեպքում վարձի մնացորդ մասը փոխհատուցվում է պետության կողմից:

7. Եթե բարձրագույն կամ միջին մասնագիտական ուսումնական հաստատության առկա ուսուցման վճարովի համակարգի ուսանողն օգտվում է ուսումնական հաստատության կողմից հաստատված ուսման վարձի մասնակի զեղչի իրավունքից, ապա փոխհատուցվում է վարձի մնացորդ մասը։

8. Արցախի Հանրապետության բարձրագույն և միջին մասնագիտական ուսումնական հաստատությունների կողմից ներկայացվող հայտերը ճշգրտվում են և ուսումնական տարվա յուրաքանչյուր կիսամյակի 1-ին ամսվա ընթացքում ներկայացվում Արցախի Հանրապետության կրթության, գիտության, մշակույթի և սպորտի նախարարություն: Հայաստանի Հանրապետության պետական բարձրագույն ուսումնական հաստատություններում սովորող ուսանողները համապատասխան բուհից յուրաքանչյուր կիսամյակի ավարտին Արցախի Հանրապետության կրթության, գիտության, մշակույթի և սպորտի նախարարություն են ներկայացնում քննաշրջանի արդյունքների վերաբերյալ համապատասխան տեղեկանք, որի հիման վրա որոշում է կայացվում նրա վարձի փոխհատուցումը շարունակելու կամ դադարեցնելու մասին։

9. Փոխհատուցման հատկացման հետ կապված փաստաթղթերը պահվում են Արցախի Հանրապետության կրթության, գիտության, մշակույթի և սպորտի նախարարությունում և ուսումնական հաստատություններում:

10. Ուսումնական հաստատությունները կիսամյակների արդյունքներով փոխհատուցման գումարների վերաբերյալ մեկամսյա ժամկետում հաշվետվություն են ներկայացնում Արցախի Հանրապետության կրթության, գիտության, մշակույթի և սպորտի նախարարություն: