ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ՆԱԽԱԳԱՀԻ

 

Հ Ր Ա Մ Ա Ն Ա Գ Ի Ր Ը

 

ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ՇՐՋԱՆՆԵՐՈՒՄ ՊԵՏԱԿԱՆ ԿԱՌԱՎԱՐՄԱՆ ՄԱՍԻՆ

 

Ելնելով «Տեղական ինքնակառավարման մասին» ԼՂՀ օրենքի հոդված 61-ից և նպատակ ունենալով ապահովել Լեռնային Ղարաբաղի Հանրապետության շրջաններում պետական կառավարման արդյունավետ իրականացումը, որոշում եմ.

Սահմանել Լեռնային Ղարաբաղի Հանրապետության շրջաններում պետական կառավարման իրականացման հետևյալ կարգը.

 

ԸՆԴՀԱՆՈՒՐ ԴՐՈՒՅԹՆԵՐ

 

1. Լեռնային Ղարաբաղի Հանրապետության շրջաններում պետական կառավարման ոլորտի հարաբերությունները կարգավորվում են Սահմանադրությամբ, օրենքներով, սույն հրամանագրով և այլ իրավական ակտերով:

2.Պետական կառավարումը շրջանում ապահովվում է շրջանի տարածքում կառավարության տարածքային քաղաքականության իրականացման և հանրապետական գործադիր մարմինների տարածքային ծառայությունների գործունեության համակարգման միջոցով:

Շրջանի վարչակազմի ղեկավարը, օրենսդրությամբ իրեն վերապահված իրավասության սահմաններում, շրջանի տարածքում կառավարության տարածքային քաղաքականությունն իրականացնում է հետևյալ բնագավառներում՝

- ֆինանսներ,

- քաղաքաշինություն, բնակարանային և կոմունալ տնտեսություն,

- տրանսպորտ և ճանապարհաշինություն,

- գյուղատնտեսություն և հողօգտագործում,

- կրթություն,

- առողջապահություն,

- սոցիալական ապահովություն,

- մշակույթ և սպորտ,

- բնության և շրջակա միջավայրի պահպանություն,

- առևտուր, հանրային սնունդ և սպասարկում:

Տարածքային քաղաքականությունը նշված բնագավառներում շրջանի վարչակազմի ղեկավարն իրականացնում է շրջանի վարչակազմի աշխատակազմի և շրջանային ենթակայության կազմակերպությունների միջոցով:

(4-րդ մասը հանվել է 09.03.2004 ՆՀ-90)

(2-րդ կետը լրաց., խմբ., փոփ. 09.03.2004 ՆՀ-90)

3. Շրջանի վարչակազմի ղեկավարը համակարգում է ազգային անվտանգության, պաշտպանության, ներքին գործերի, կապի, էներգետիկայի, առևտրի և սպասարկումների, հարկային, արտակարգ իրավիճակների և քաղաքացիական պաշտպանության ու այլ ոլորտներում հանրապետական գործադիր մարմինների տարածքային ծառայությունների գործունեությունը:

Շրջանում հանրապետական գործադիր մարմինների տարածքային ծառայությունների գործունեության համակարգումը, շրջանի վարչակազմի ղեկավարին օրենսդրությամբ վերապահված իրավասության սահմաններում, ընդգրկում է՝

ա) հանրապետական գործադիր մարմինների տարածքային ծառայությունների և շրջանի վարչակազմի աշխատակազմի ու տեղական ինքնակառավարման մարմինների համատեղ և համաձայնեցված գործունեության կազմակերպումը,

բ) հանրապետական գործադիր մարմինների համապատասխան շրջանի տարածքային ծառայություններից կառավարության կողմից սահմանված կարգով տեղեկատվության ստացումը,

գ) այլ լիազորությունների իրականացումը:

(3-րդ կետը փոփ. 09.03.2004 ՆՀ-90)

4. Շրջաններում պետական կառավարումն իրականացվում է պետական և համայնքային շահերի ներդաշնակման, ինչպես նաև շրջանների վարչակազմերի ղեկավարների և հանրապետական գործադիր մարմինների ու վերջիններիս տարածքային ծառայությունների համագործակցության և գործողությունների փոխհամաձայնեցման հիման վրա:

5. Շրջանում պետական կառավարումն իրականացնում է շրջանի վարչակազմի ղեկավարը:

Շրջանի վարչակազմի ղեկավարը պաշտոնի է նշանակվում և պաշտոնից ազատվում կառավարության կողմից և հաշվետու ու պատասխանատու է կառավարության առջև:

Շրջանի վարչակազմի ղեկավարն ունի տեղակալ:

Շրջանի վարչակազմի ղեկավարի տեղակալին պաշտոնի նշանակում և ազատում է շրջանի վարչակազմի ղեկավարը՝ վարչապետի համաձայնությամբ: Շրջանի վարչակազմի ղեկավարի տեղակալը չի կարող լինել համայնքի ավագանու անդամ, զբաղեցնել այլ պաշտոն կամ կատարել վճարովի այլ աշխատանք՝ բացի մանկավարժական, գիտական և ստեղծագործական աշխատանքից, և զբաղվել ձեռնարկատիրական գործունեությամբ:

Շրջանի վարչակազմի ղեկավարի տեղակալը փոխարինում է վարչակազմի ղեկավարին նրա բացակայության ժամանակ, իրականացնում է վարչակազմի ղեկավարի աշխատակազմի կանոնադրությամբ իրեն վերապահված լիազորությունները, վարչակազմի ղեկավարի հանձնարարությամբ իրականացնում է այլ լիազորություններ:

Շրջանի վարչակազմի ղեկավարը նաև՝

ա) ապահովում է Լեռնային Ղարաբաղի Հանրապետության օրենքների, Լեռնային Ղարաբաղի Հանրապետության նախագահի հրամանագրերի, կարգադրությունների, կառավարության և վարչապետի որոշումների, ինչպես նաև այլ նորմատիվ իրավական ակտերի կատարումը,

բ) խորհրդակցական ձայնի իրավունքով կարող է մասնակցել կառավարության նիստերին: Սահմանված կարգով կառավարության, վարչապետի և հանրապետական գործադիր մարմինների քննարկմանն է ներկայացնում վերջիններիս իրավասությանը վերապահված հարցերը,

գ) համագործակցում է հանրապետական գործադիր մարմինների հետ և դրանց քննարկմանն է ներկայացնում վերջիններիս իրավասությանը վերաբերող շրջանին առնչվող հարցերը,

դ) սահմանված կարգով նախապատրաստում և առաջարկություններ է ներկայացնում կառավարություն՝ շրջանում պետական կառավարման իրականացման համար պետական բյուջեից անհրաժեշտ ամենամյա հատկացումների վերաբերյալ,

ե) սահմանված կարգով մասնակցում է պետական բյուջեի նախագծի, ինչպես նաև կառավարության տարածքային քաղաքականության մշակման աշխատանքներին,

զ) ամենամյա հաշվետվություններ է ներկայացնում կառավարություն՝ իր գործունեության և շրջանի ընդհանուր սոցիալ-տնտեսական վիճակի մասին, ընթացիկ հաշվետվություններ է ներկայացնում վարչապետին,

է) անհրաժեշտության դեպքում առաջարկություն է ներկայացնում համապատասխան հանրապետական գործադիր մարմիններին՝ նրանց տարածքային ծառայությունների և վերջիններիս ղեկավարների աշխատանքի վերաբերյալ,

ը) պարտադիր քննության է առնում հանրապետական գործադիր մարմինների կողմից շրջանի վարչակազմի աշխատակազմի կառուցվածքային ստորաբաժանումների և դրանց ղեկավարների աշխատանքի վերաբերյալ առաջարկությունները և սահմանված ժամկետում այդ մարմիններին տեղեկացնում է ձեռնարկված միջոցների մասին,

թ) ընդհանրացնում է օրենսդրության կիրառման գործափորձը, օրենսդրության կատարելագործման վերաբերյալ առաջարկություններ է ներկայացնում կառավարություն,

ժ) իր իրավասության սահմաններում միջոցներ է ձեռնարկում քաղաքացիների իրավունքներն ու ազատություններն ապահովելու համար,

ժա) օրենսդրությամբ սահմանված կարգով վերացնում կամ կասեցնում է շրջանային ենթակայության կազմակերպությունների ղեկավարների՝ օրենսդրությանը հակասող իրավական ակտերը,

ժբ) օրենսդրությամբ իրեն վերապահված լիազորությունների շրջանակներում միջոցներ է ձեռնարկում շրջանի տարածքում պետական սեփականության, բնական ռեսուրսների, պատմության և մշակույթի հուշարձանների, հատուկ պահպանվող այլ օբյեկտների պահպանության և արդյունավետ օգտագործման ուղղությամբ,

ժգ) օրենսդրությամբ սահմանված կարգով լուծում է շրջանի տարածքում հանրահավաքներ, երթեր, ցույցեր և զանգվածային այլ միջոցառումներ անցկացնելու համար թույլտվություն տալու հարցը,

ժդ) սահմանված կարգով տեղեկություններ է տալիս համապատասխան հանրապետական գործադիր մարմնին իր կողմից տվյալ բնագավառում կառավարության տարածքային քաղաքականության իրականացման վերաբերյալ,

ժե) օրենսդրությամբ սահմանված կարգով վերահսկում է պետության կողմից համայնքներին պատվիրակված լիազորությունների կատարման ընթացքը և պարտադիր լիազորությունների կատարումը,

ժզ) իրականացնում է օրենսդրությամբ սահմանված այլ լիազորություններ,

ժէ) շրջանի վարչակազմի աշխատակազմում օրենսդրությամբ սահմանված կարգով նշանակում և պաշտոնից ազատում է քաղաքացիական ծառայության բարձրագույն խմբում, ինչպես նաև գլխավոր պաշտոնների 1-ին ենթախմբում ընդգրկված անձանց:

Շրջանի վարչակազմի ղեկավարն իր իրավասության սահմաններում, ղեկավարվելով ԼՂՀ օրենսդրությամբ, ընդունում է որոշումներ, արձակում կարգադրություններ:

Շրջանի վարչակազմի ղեկավարի՝ օրենսդրությանը հակասող որոշումները և կարգադրությունները ուժը կորցրած են ճանաչվում վարչապետի կամ դատարանի որոշմամբ:

Շրջանի վարչակազմի ղեկավարը չի կարող լինել համայնքի ավագանու անդամ, զբաղեցնել այլ պաշտոն կամ կատարել վճարովի այլ աշխատանք՝ բացի մանկավարժական, գիտական և ստեղծագործական աշխատանքից, և զբաղվել ձեռնարկատիրական գործունեությամբ:

Պաշտոնեական պարտականությունները ոչ պատշաճ կատարելու դեպքում շրջանի վարչակազմի ղեկավարի կամ նրա տեղակալի նկատմամբ կարող են կիրառվել հետևյալ կարգապահական տույժերը՝

ա. նկատողություն,

բ. խիստ նկատողություն,

գ. պաշտոնից ազատում:

Պաշտոնեական պարտականությունները բարեխիղճ և օրինակելի կատարելու համար շրջանի վարչակազմի ղեկավարի կամ նրա տեղակալի նկատմամբ կարող են կիրառվել խրախուսանքի հետևյալ միջոցները՝

ա. շնորհակալագրով պարգևատրում,

բ. հուշանվերով կամ թանկարժեք նվերով պարգևատրում,

գ. հուշամեդալով պարգևատրում:

Սույն հրամանագրով նախատեսված կարգապահական տույժերը, բացառությամբ 5-րդ կետի 10-րդ պարբերության «գ» ենթակետով նախատեսված կարգապահական տույժի, ինչպես նաև խրախուսանքի միջոցները կիրառում է Լեռնային Ղարաբաղի Հանրապետության Նախագահը կամ վարչապետը: 5-րդ կետի 10-րդ պարբերության «գ» ենթակետով նախատեսված կարգապահական տույժը կիրառում է պաշտոնի նշանակելու իրավասություն ունեցող պաշտոնատար անձը՝ Լեռնային Ղարաբաղի Հանրապետության օրենսդրությամբ սահմանված կարգով:

(5-րդ կետը խմբ., փոփ., լրաց. 09.03.2004 ՆՀ-90, խմբ., լրաց. 13.12.2008 ՆՀ-140-Ն)

6.Շրջանի վարչակազմի ղեկավարը պետական կառավարումը և կառավարության տարածքային քաղաքականությունը շրջանում իրականացնում է շրջանի վարչակազմի աշխատակազմի միջոցով:

Շրջանի վարչակազմի աշխատակազմի կանոնադրությունը և կառուցվածքը հաստատում է կառավարությունը, իսկ աշխատողների թվաքանակը՝ վարչապետը:

Շրջանի վարչակազմի ղեկավարը Լեռնային Ղարաբաղի Հանրապետության քաղաքացիական ծառայության խորհրդի հաստատմանն է ներկայացնում շրջանի վարչակազմի քաղաքացիական ծառայության պաշտոնների անվանացանկը:

Շրջանի վարչակազմի ղեկավարի խորհրդականի, օգնականի և մամուլի քարտուղարի պաշտոնները և թվաքանակը սահմանվում է շրջանի վարչակազմի կանոնադրությամբ: Շրջանի վարչակազմի ղեկավարի խորհրդականին, օգնականին և մամուլի քարտուղարին պաշտոնի նշանակում և պաշտոնից ազատում է շրջանի վարչակազմի ղեկավարը:

(6-րդ կետը խմբ. 09.03.2004 ՆՀ-90)

7. Շրջանի վարչակազմի գործունեությունն իրականացվում է շրջանի վարչակազմի ղեկավարի տեղակալի, խորհրդականի, օգնականի, մամուլի քարտուղարի և շրջանի վարչակազմի աշխատակազմի միջոցով:

Շրջանի վարչակազմի աշխատակազմի աշխատողներ են համարվում տվյալ շրջանի վարչակազմի աշխատակազմի քաղաքացիական ծառայության պաշտոններ զբաղեցնող անձինք, տեխնիկական սպասարկում իրականացնող անձնակազմը:

Շրջանի վարչակազմի աշխատակազմն իրականացնում է Լեռնային Ղարաբաղի Հանրապետության օրենսդրությամբ, ինչպես նաև շրջանի վարչակազմի կանոնադրությամբ սահմանված գործառույթներ ու լիազորություններ:

Շրջանի վարչակազմի ղեկավարի նստավայրը և շրջանի վարչակազմի շենքը գտնվում են շրջանի վարչական կենտրոնում:

Շրջանի վարչակազմի շենքի վրա և շրջանի վարչակազմի ղեկավարի աշխատասենյակում տեղադրվում են Լեռնային Ղարաբաղի Հանրապետության դրոշը և Լեռնային Ղարաբաղի Հանրապետության զինանշանը:

Շրջանի վարչակազմի աշխատակազմի գործունեության կազմակերպումն ու ղեկավարումն իրականացնում է շրջանի վարչակազմի աշխատակազմի ղեկավարը:

Շրջանի վարչակազմի աշխատակազմի ղեկավարը՝

ա) իր լիազորությունների շրջանակներում կազմակերպում է շրջանի վարչակազմի աշխատակազմի գործունեությունը և իրականացնում է կառուցվածքային ստորաբաժանումների աշխատանքների վարչական համակարգումը.

բ) ապահովում է շրջանի վարչակազմի ղեկավարի որոշումների, կարգադրությունների և հանձնարարականների կատարման ընթացքը և զեկուցում շրջանի վարչակազմի ղեկավարին.

գ) մշակում և շրջանի վարչակազմի ղեկավարի հաստատմանն է ներկայացնում շրջանի վարչակազմի աշխատակազմի աշխատանքային տարեկան և եռամսյակային ծրագրերը, վերահսկողություն է իրականացնում դրանց կատարման ժամկետայնության նկատմամբ, արդյունքների մասին զեկուցում է շրջանի վարչակազմի ղեկավարին.

դ) շրջանի վարչակազմի աշխատակազմում օրենսդրությամբ սահմանված կարգով նշանակում և պաշտոնից ազատում է շրջանի վարչակազմի աշխատակազմի քաղաքացիական ծառայության գլխավոր պաշտոնների 2-րդ և 3-րդ ենթախմբերում, առաջատար և կրտսեր պաշտոնների խմբերում ընդգրկված անձանց.

ե) ապահովում է շրջանի վարչակազմի աշխատակազմի բյուջետային ծախսերի կատարումը.

զ) կազմակերպում է քաղաքացիների ընդունելությունը, նրանց առաջարկությունների, դիմումների ու բողոքների՝ սահմանված կարգով քննարկումը.

է) իրականացնում է օրենքով նախատեսված այլ լիազորություններ:

Շրջանի վարչակազմի աշխատակազմի տեխնիկական սպասարկում իրականացնող անձինք աշխատանքի են ընդունվում և աշխատանքից ազատվում շրջանի վարչակազմի աշխատակազմի ղեկավարի կողմից:

Համապատասխան հանրապետական գործադիր մարմնի ղեկավարը կարող է շրջանի վարչակազմի ղեկավարին գրավոր, փաստարկված առաջարկություն ներկայացնել շրջանի վարչակազմի աշխատակազմի համապատասխան կառուցվածքային ստորաբաժանման գործունեությունը բարելավելու վերաբերյալ:

Շրջանի վարչակազմի ղեկավարը պարտադիր քննության է առնում հանրապետական գործադիր մարմնի ղեկավարի առաջարկությունը և մեկամսյա ժամկետում տեղեկացնում նրան արդյունքների մասին:

Ձեռնարկված միջոցներն անբավարար համարելու դեպքում հանրապետական գործադիր մարմնի ղեկավարը հարցը կարող է ներկայացնել Լեռնային Ղարաբաղի Հանրապետության վարչապետի քննարկմանը՝ վերջնական լուծման համար:

Շրջանային ենթակայության կազմակերպությունների ղեկավարներին օրենքով նախատեսված դեպքերում և կարգով նշանակում և պաշտոնից ազատում է շրջանի վարչակազմի ղեկավարը:

(7-րդ կետը խմբ. 09.03.2004 ՆՀ-90)

8. Շրջանի խորհրդի նիստերում շրջանի վարչակազմի ղեկավարը՝

ա) համայնքների ղեկավարներին ծանոթացնում է Լեռնային Ղարաբաղի Հանրապետության օրենքներին, Հանրապետության Նախագահի հրամանագրերին և կարգադրություններին, կառավարության և վարչապետի որոշումներին, իր որոշումներին ու կարգադրություններին և դրանցից բխող՝ տեղական ինքնակառավարման մարմինների խնդիրներին,

բ) ծանոթանում է համայնքներում տիրող իրավիճակին, տարվող աշխատանքների ընթացքին և ծագած խնդիրներին,

գ) լսում է համայնքների ղեկավարների առաջարկությունները և դիտողությունները շրջանի վարչակազմի աշխատակազմի, շրջանային ենթակայության կազմակերպությունների վերաբերյալ,

դ) ապահովում է շրջանի վարչակազմի ղեկավարի աշխատակազմի և տեղական ինքնակառավարման մարմինների ներդաշնակ գործունեությունը, լուծում կազմակերպման այլ հարցեր:

(8-րդ կետը խմբ. 09.03.2004 ՆՀ-90)

9. Շրջանի վարչակազմի ղեկավարը շրջանի խորհրդի քննարկմանն է ներկայացնում՝

ա) կառավարությանը և վարչապետին ներկայացվող իր հաշվետվությունները շրջանի ընդհանուր սոցիալ-տնտեսական վիճակի և իր գործունեության մասին,

բ) իր առաջարկությունները շրջանի սոցիալ-տնտեսական զարգացման տարեկան և հեռանկարային ծրագրերի վերաբերյալ,

գ) իր առաջարկությունները Լեռնային Ղարաբաղի Հանրապետության պետական բյուջեի նախագծի՝ շրջանին վերաբերող հատվածի, ինչպես նաև պետական բյուջեից համայնքների բյուջեներին կատարվող հատկացումների վերաբերյալ:

Շրջանի խորհրդի նիստերին շրջանի վարչակազմի ղեկավարի հրավերով կարող են մասնակցել հանրապետական գործադիր մարմինների, նրանց տարածքային ծառայությունների ղեկավարները, շրջանի վարչակազմի աշխատակազմի կառուցվածքային ստորաբաժանումների ղեկավարները և այլ անձինք:

(9-րդ կետը փոփ. 09.03.2004 ՆՀ-90)

 

ՇՐՋԱՆԻ ՎԱՐՉԱԿԱԶՄԻ ՂԵԿԱՎԱՐԻ ԳՈՐԾՈՒՆԵՈՒԹՅՈՒՆԸ ԿԱՌԱՎԱՐՈՒԹՅԱՆ ՏԱՐԱԾՔԱՅԻՆ ՔԱՂԱՔԱԿԱՆՈՒԹՅԱՆ ԻՐԱԿԱՆԱՑՄԱՆ ԱՌԱՆՁԻՆ ԲՆԱԳԱՎԱՌՆԵՐՈՒՄ

 

10. Ֆինանսների բնագավառում շրջանի վարչակազմի ղեկավարը՝

ա) տնօրինում է շրջանի բյուջեի կազմավորման, հաստատման և կատարման, շրջանային հարկերի, տուրքերի և վճարների նշանակման, շրջանային նշանակության մյուս բոլոր ֆինանսական հարցերի լուծումը,

բ) սահմանված կարգով մշակում և կառավարության քննարկմանը առաջարկություններ է ներկայացնում պետական բյուջեի նախագծի՝ շրջանին վերաբերող հատվածի, ինչպես նաև շրջանի տարածքի համայնքների բյուջեներին պետական բյուջեից հատկացումների վերաբերյալ,

գ) տնօրինում է պետական բյուջեով շրջանին հատկացված միջոցները, վերահսկում այդ միջոցների նպատակային օգտագործումը,

դ) սահմանված կարգով վերահսկում է պետական բյուջեից համայնքների բյուջեներին հատկացված միջոցների ընթացիկ ֆինանսավորումը և դրանց նպատակային օգտագործումը,

ե) աջակցում և մեթոդական օգնություն է ցույց տալիս տեղական ինքնակառավարման մարմիններին՝ համայնքի բյուջեի նախագծի նախապատրաստման ընթացքում:

11. Քաղաքաշինության, բնակարանային և կոմունալ տնտեսության բնագավառներում շրջանի վարչակազմի ղեկավարը՝

ա) սահմանված կարգով կազմակերպում է շրջանի բնակավայրերի գլխավոր հատակագծերի նախագծերի կազմումը և ներկայացնում կառավարության հաստատմանը,

բ) սահմանված կարգով առաջարկություններ է ներկայացնում կառավարություն՝ շրջանի բնակավայրերի և համայնքների սահմանների փոփոխման վերաբերյալ,

գ) եզրակացություն է տալիս հանրապետության տարածքային զարգացման և տարաբնակեցման նախագծերի և ուրվագծերի վերաբերյալ,

դ) իր իրավասության սահմաններում կազմակերպում է բնակարանային և այլ շինարարություն, իրականացնում է կապիտալ շինարարության և կապիտալ վերանորոգման պատվիրատուի գործառույթներ, քաղաքաշինական գործունեության հսկողություն, միջոցներ է ձեռնարկում ապօրինի շինարարության կանխման, կասեցման և վերացման ուղղությամբ,

ե) վերահսկողություն է իրականացնում շրջանի տարածքում գտնվող շենքերի և շինությունների տեխնիկական վիճակի և շահագործման նկատմամբ՝ համագործակցելով համապատասխան մասնագիտացված կազմակերպությունների հետ,

զ) վերահսկողություն է իրականացնում շրջանի տարածքում բնակարանային ֆոնդի ընդլայնման, նորոգման, բարեկարգման և շահագործման նկատմամբ,

է) օրենսդրությանը համապատասխան ապահովում է շրջանում գույքային կադաստրի վարումը,

ը) կազմակերպում և վերահսկում է շրջանային ենթակայության ջրմուղ-կոյուղու, ջրերի մաքրման և այլ կոմունալ կազմակերպությունների աշխատանքը,

թ) վերահսկում է աղբահանությունը, կազմակերպում է աղբի ու թափոնների վերամշակումը,

ժ) կազմակերպում է շրջանի կառուցապատումը և սանիտարական մաքրումը, համայնքների վարչական սահմաններից դուրս գտնվող տարածքներում, իր իրավասության շրջանակում, սահմանված կարգով, համակարգում է կառուցապատումը:

(11-րդ կետը փոփ. 09.03.2004 ՆՀ-90)

12. Տրանսպորտի և ճանապարհաշինության բնագավառներում շրջանի վարչակազմի ղեկավարը՝

ա) կազմակերպում է միջհամայնքային հասարակական տրանսպորտի աշխատանքը, շրջանային ենթակայության տրանսպորտային կազմակերպությունների գործունեությունը,

բ) կազմակերպում է շրջանային նշանակության ճանապարհների, կամուրջների, թունելների, այլ ինժեներական կառույցների շինարարությունը, պահպանումը և շահագործումը, աջակցում է հանրապետական նշանակության ճանապարհների շինարարության, պահպանման ու շահագործման աշխատանքների կազմակերպմանը:

(12-րդ կետը փոփ. 09.03.2004 ՆՀ-90)

13. Գյուղատնտեսության և հողօգտագործման բնագավառներում շրջանի վարչակազմի ղեկավարը՝

ա) օրենսդրությամբ սահմանված կարգով տիրապետում և օգտագործում է համայնքների վարչական սահմաններից դուրս գտնվող պետական սեփականության հողերը,

բ) օրենսդրությամբ սահմանված կարգով կազմակերպում է շրջանի տարածքում հողաշինարարության, հողօգտագործման և հողի պահպանման աշխատանքները, կանխում, կասեցնում և վերացնում է ապօրինի հողօգտագործումը,

գ) (ենթակետն ուժը կորցրել է 13.12.2008 ՆՀ-140-Ն)

դ) համայնքների վարչական սահմաններից դուրս գտնվող տարածքներում իրականացնում է պատվիրատուի գործառույթներ,

ե) վերահսկում է շրջանի սահմանանիշների և գեոդեզիական կետերի պահպանումը,

զ) շրջանի հողերի օգտագործման սխեմաները սահմանված կարգով ներկայացնում է կառավարության հաստատմանը,

է) օրենսդրությամբ սահմանված կարգով կազմում է շրջանի հողային հաշվեկշիռը և ներկայացնում կառավարության հաստատմանը,

ը) օրենսդրությամբ սահմանված կարգով պայմանագրեր է կնքում հողի և ամրակայված գույքի սեփականատերերի և (կամ) հողօգտագործողների հետ՝ շրջանի տարածքում շրջանային ենթակայության օբյեկտների կառուցման համար համապատասխան հողի և ամրակայված գույքի օգտագործման և դրա հետ կապված փոխհատուցումների վերաբերյալ,

թ) իրականացնում է շրջանային նշանակության ոռոգման ցանցերի կառուցումը, պահպանումը և շահագործումը, միջոցներ է ձեռնարկում հանրապետական նշանակության ոռոգման համակարգերի նպատակային շահագործման ուղղությամբ,

ժ) համակարգում է գյուղատնտեսական մշակաբույսերի հիվանդությունների և վնասատուների, մոլախոտերի դեմ պայքարի, կարանտինային պահանջների կատարման և ագրոկանոնների պահպանմանն ուղղված աշխատանքները,

ժա) համակարգում է շրջանի տարածքում անասնաբուժական ծառայության, հակահամաճարակային միջոցառումների իրականացման և կենդանիների հիվանդությունների կանխման ու վերացման աշխատանքները,

ժբ) աջակցում է գյուղացիական և գյուղացիական կոլեկտիվ տնտեսություններին, ագրարային ոլորտի տնտեսավարող այլ սուբյեկտներին՝ արտադրության կազմակերպման և զարգացման գործում,

ժգ) համակարգում է շրջանի տարածքում ջրատնտեսական և ոռոգման կազմակերպությունների գործունեությունը,

ժդ) համակարգում է շրջանի տարածքում սերմնաբուծական կազմակերպությունների, տոհմաբուծարանների և արհեստական սերմնավորման կայանների գործունեությունը:

(13-րդ կետը փոփ. 09.03.2004 ՆՀ-90, փոփ. 13.12.2008 ՆՀ-140-Ն)

14. Կրթության բնագավառում շրջանի վարչակազմի ղեկավարը՝

ա) իրագործում է պետական հանրակրթական ծրագրերը, կազմակերպում է շրջանային ենթակայույթան պետական կրթական հաստատությունների գործունեությունը և ուսումնադաստիարակչական աշխատանքները, վերահսկում է ոչ պետական կրթական հաստատությունների գործունեության համապատասխանությունը օրենսդրությանը,

բ) կազմակերպում է շրջանային ենթակայության կրթական հաստատությունների շենքերի կառուցումը, պահպանումն ու շահագործումը:

15. Առողջապահության բնագավառում շրջանի վարչակազմի ղեկավարը՝

ա) իրագործում է պետական առողջապահական ծրագրերը, կազմակերպում է շրջանային ենթակայության պետական առողջապահական հաստատությունների աշխատանքը, օրենսդրությամբ սահմանված կարգով ապահովում է բնակչության անվճար բուժօգնության իրականացումը, վերահսկում է ոչ պետական առողջապահական հաստատությունների գործունեության համապատասխանությունը օրենսդրությանը,

բ) շրջանի տարածքում կազմակերպում և իրականացնում է հակահամաճարակային և կարանտինային միջոցառումներ, կազմակերպում է սանիտարահիգիենիկ միջոցառումներ վարակիչ և զանգվածային ոչ վարակիչ հիվանդությունների ու թունավորումների կանխարգելման նպատակով,

գ) աջակցում է պետական հիգիենիկ և հակահամաճարակային ծառայության մարմիններին՝ բնակավայրերի ջրամատակարարման աղբյուրների, բնակելի շենքերի, դպրոցների և այլ օբյեկտների սանիտարական վիճակի նկատմամբ վերահսկողություն իրականացնելիս,

դ) կազմակերպում է շրջանային ենթակայության առողջապահական հաստատությունների շենքերի կառուցումը, պահպանումն ու շահագործումը:

16. Սոցիալական ապահովության բնագավառում շրջանի վարչակազմի ղեկավարը՝

ա) իրագործում է բնակչության պետական սոցիալական ապահովության ծրագրերը, կազմակերպում է շրջանային ենթակայության սոցիալական ապահովության հաստատությունների և կազմակերպությունների գործունեությունը, վերահսկում է շրջանի տարածքում սոցիալական ապահովության ոչ պետական կազմակերպությունների գործունեության համապատասխանությունը օրենսդրությանը,

բ) կազմակերպում է սոցիալական աջակցության կարիք ունեցող բնակչության հաշվառումը, համակարգում է մարդասիրական օգնության բաշխումը,

գ) աջակցում է գործազուրկների հաշվառման և բնակչության զբաղվածության հետ կապված խնդիրների լուծմանը,

դ) աջակցում է պետական կենսաթոշակների և նպաստների նշանակման ու վճարման աշխատանքներին,

ե) կազմակերպում է շրջանային ենթակայության սոցիալական ապահովության հաստատությունների շենքերի կառուցումը, պահպանումն ու շահագործումը,

զ) աջակցում է սոցիալական ապահովության խնդիրներ իրականացնող հասարակական կազմակերպությունների գործունեությանը:

17. Մշակույթի և սպորտի բնագավառներում շրջանի վարչակազմի ղեկավարը՝

ա) կազմակերպում է շրջանային ենթակայության մշակութային և սպորտային հաստատությունների աշխատանքը, շրջանային մշակութային և սպորտային, ինչպես նաև պետական ազգային ու այլ տոների հետ կապված զանգվածային միջոցառումներ, նպաստում է ավանդական ազգային ծեսերի վերականգնմանն ու տարածմանը, վերահսկում է շրջանի տարածքում ոչ պետական մշակութային և սպորտային կազմակերպությունների գործունեության համապատասխանությունը օրենսդրությանը,

բ) իրականացնում է օրենքով սահմանված լիազորություններ պատմության և մշակույթի հուշարձանների պահպանության և օգտագործման ուղղությամբ,

գ) կազմակերպում է շրջանային ենթակայության մշակութային և սպորտային օբյեկտների կառուցումը, հանգստի գոտիների ստեղծումը, պահպանումն ու շահագործումը,

դ) համագործակցում է շրջանի տարածքում գործող պետական գրանցում ունեցող կրոնական կազմակերպությունների հետ:

18. Բնության և շրջակա միջավայրի պահպանության բնագավառներում շրջանի վարչակազմի ղեկավարը՝

ա) մասնակցում է բնության և շրջակա միջավայրի պահպանության պետական ծրագրերի մշակմանը և իր լիազորության շրջանակում ապահովում է դրանց իրականացումը շրջանի տարածքում,

բ) վերահսկում է ջրերի, անտառների, կանաչ գոտիների, ընդերքի պահպանության և օգտագործման բնագավառում համապատասխան պետական մարմինների տարածքային ծառայությունների գործունեությունը,

գ) աջակցում է արգելոցների, արգելավայրերի, հատուկ պահպանվող գոտիների պահպանությանը և օգտագործմանը, որսագողության, ապօրինի ձկնորսության, ծառահատումների դեմ կազմակերպվող միջոցառումների իրականացմանը,

դ) համագործակցում է բնապահպանական խնդիրներ իրականացնող հասարակական կազմակերպությունների, ինչպես նաև քաղաքացիների հետ:

18/1. Առևտրի, հանրային սննդի և սպասարկման բնագավառներում շրջանի վարչակազմի ղեկավարը միջոցներ է ձեռնարկում շրջանի տարածքում առևտրի, հանրային սննդի և սպասարկման ոլորտի տնտեսավարող սուբյեկտների գործունեության ընդլայնման և արդյունավետության ապահովման ուղղությամբ:

(18/1-րդ կետը լրաց. 09.03.2004 ՆՀ-90)

19. Շրջանի վարչակազմի ղեկավարի գործունեությանն առնչվող սույն հրամանագրով չկանոնակարգված հարցերը կարգավորվում են օրենսդրության այլ ակտերով և շրջանի վարչակազմի աշխատակազմի կանոնադրությամբ:

(19-րդ կետը փոփ. 09.03.2004 ՆՀ-90)

 

ՀԱՆՐԱՊԵՏԱԿԱՆ ԳՈՐԾԱԴԻՐ ՄԱՐՄԻՆՆԵՐԻ ՏԱՐԱԾՔԱՅԻՆ ԾԱՌԱՅՈՒԹՅՈՒՆՆԵՐԻ ԳՈՐԾՈՒՆԵՈՒԹՅԱՆ ՀԱՄԱԿԱՐԳՈՒՄԸ

 

20. Շրջանի վարչակազմի ղեկավարը շրջանի տարածքում ոստիկանության և ազգային անվտանգության ոլորտներին, ինչպես նաև զինապարտների հաշվառման, զորակոչի, զորահավաքի և վարժական հավաքների կազմակերպմանը վերաբերող խնդիրների առնչությամբ հրավիրում է հանրապետական գործադիր մարմինների համապատասխան տարածքային ծառայությունների ղեկավարներին, անց է կացնում խորհրդակցություններ և վերջիններիս ուշադրությունն է հրավիրում ծագած խնդիրների լուծման անհրաժեշտության վրա:

(20-րդ կետը խմբ. 09.03.2004 ՆՀ-90)

21. Շրջանի տարածքում հասարակական կարգի պահպանման և ամրապնդման նպատակով շրջանի վարչակազմի ղեկավարն իրավասու է ոստիկանության և ազգային անվտանգության ոլորտի հանրապետական գործադիր մարմինների տարածքային ծառայությունների ղեկավարներին հանձնարարականներ տալ և կարգադրություններ անել՝

ա) տարերային և տեխնոլոգիական աղետների վտանգի նվազեցման, դրանց հետևանքների վերացման, շրջանի տարածքում քաղաքացիական պաշտպանության, հակահամաճարակային և կարանտինային հատուկ միջոցառումների կազմակերպման վերաբերյալ.

բ) ապօրինի շինարարության, ընդերքի օգտագործման, ապօրինի ծառահատումների, ինչպես նաև հողազավթումների և որսագողության դեպքերի կանխման և արգելման վերաբերյալ.

գ) ժողովների, հանրահավաքների, երթերի, ցույցերի և այլ զանգվածային միջոցառումների անցկացման ընթացքում հասարակական կարգի պահպանման վերաբերյալ.

դ) համայնքներում զորակոչի, զորահավաքի և վարժական հավաքների անցկացումը կազմակերպելու վերաբերյալ:

(21-րդ կետը խմբ. 09.03.2004 ՆՀ-90)

22. Շրջանի վարչակազմի ղեկավարը հանդիսանում է շրջանի քաղաքացիական պաշտպանության պետը և պատասխանատվություն է կրում շրջանի քաղաքացիական պաշտպանության համակարգի պատրաստականության համար:

Օրենսդրությամբ իրեն վերապահված լիազորությունների շրջանակներում շրջանի վարչակազմի ղեկավարը կազմակերպում և համակարգում է շրջանի տարածքում համապատասխան շրջանային ծրագրերով նախատեսված արտակարգ իրավիճակների հետևանքների վերացման, տարերային և տեխնոլոգիական աղետների կանխման, սեյսմիկ ռիսկի ու վտանգի նվազեցման և հետևանքների վերացման ուղղությամբ աշխատանքները, մասնակցում է հանրապետական համապատասխան ծրագրերով նախատեսված, ինչպես նաև օպերատիվ բնույթի միջոցառումների իրականացմանը, տեղական ինքնակառավարման մարմիններին, բնակչությանը ներգրավում է քաղաքացիական պաշտպանության միջոցառումների իրականացմանը, տարերային և տեխնոլոգիական աղետների հետևանքների վերացման աշխատանքներին:

Շրջանի վարչակազմի ղեկավարը իր իրավասության սահմաններում համապատասխան հանձնարարականներ է տալիս և կարգադրություններ անում արտակարգ իրավիճակների և քաղաքացիական պաշտպանության ոլորտի հանրապետական գործադիր մարմնի տարածքային ծառայության ղեկավարին:

(22-րդ կետը խմբ. 09.03.2004 ՆՀ-90)

23. Շրջանի տարածքում հարկային մարմինների գործունեության, կապի, էլեկտրամատակարարման, ջերմամատակարարման, ջրամատակարարման, ջրահեռացման և գազամատակարարման խնդիրների առնչությամբ շրջանի վարչակազմի ղեկավարն անց է կացնում հանրապետական գործադիր մարմնի համապատասխան տարածքային ծառայությունների ղեկավարների հետ խորհրդակցություն և նրանց ուշադրությունն է հրավիրում ծագած խնդիրների լուծման անհրաժեշտության վրա:

Շրջանի վարչակազմի ղեկավարն իրավասու է կապի, էներգետիկայի ոլորտների հանրապետական գործադիր մարմինների տարածքային ծառայությունների ղեկավարներին պարտադիր կատարման համար կարգադրություններ անել՝

ա) շրջանի տարածքում քաղաքացիական պաշտպանության և հակահամաճարակային միջոցառումների կազմակերպման վերաբերյալ.

բ) տարերային և տեխնոլոգիական աղետների վտանգի նվազեցման և դրանց հետևանքների վերացման վերաբերյալ:

Շրջանի տարածքում ոստիկանության և ազգային անվտանգության ոլորտներին, զինապարտների հաշվառման, զորակոչի, զորահավաքի ու վարժական հավաքների կազմակերպմանը վերաբերող խնդիրների առնչությամբ, ինչպես նաև հարկային մարմնի գործունեության, կապի, էլեկտրամատակարարման, ջերմամատակարարման, ջրամատակարարման, ջրահեռացման, գազամատակարարման խնդիրների լուծման հարցերում շրջանի վարչակազմի ղեկավարը օժանդակում է հանրապետական գործադիր մարմինների համապատասխան տարածքային ծառայությունների գործունեությանը, ապահովում դրանց համագործակցությունը տեղական ինքնակառավարման մարմինների ու բնակչության հետ:

(23-րդ կետը խմբ. 09.03.2004 ՆՀ-90)

24. Հանրապետական գործադիր մարմնի ղեկավարը համապատասխան տարածքային ծառայության ղեկավարի նշանակման և պաշտոնից ազատման մասին եռօրյա ժամկետում տեղեկացնում է շրջանի վարչակազմի ղեկավարին:

Շրջանի վարչակազմի ղեկավարը կարող է համապատասխան հանրապետական գործադիր մարմնին գրավոր, փաստարկված առաջարկություն ներկայացնել՝ վերջինիս տարածքային ծառայության գործունեության, ինչպես նաև ղեկավարի՝ զբաղեցրած պաշտոնին անհամապատասխանության վերաբերյալ՝ նրա նշանակվելուց վեց ամիս հետո:

Հանրապետական գործադիր մարմինը պարտադիր քննության է առնում շրջանի վարչակազմի ղեկավարի առաջարկությունը և մեկամսյա ժամկետում նրան տեղեկացնում արդյունքների մասին:

Ձեռնարկված միջոցները անբավարար համարելու դեպքում շրջանի վարչակազմի ղեկավարը հարցը կարող է ներկայացնել Լեռնային Ղարաբաղի Հանրապետության վարչապետին՝ վերջնական լուծման համար:

(24-րդ կետը խմբ. 09.03.2004 ՆՀ-90)

25. (կետը հանվել է 09.03.2004 ՆՀ-90)

 

	Ա.ՂՈՒԿԱՍՅԱՆ
27 հուլիսի 1998թ. թ. ՆՀ-42 ք.Ստեփանակերտ