ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ

Օ Ր Ե Ն Ք Ը

Ընդունված է 2004 թվականի

դեկտեմբերի 22-ին

ՆՎԱԶԱԳՈՒՅՆ ԱՄՍԱԿԱՆ ԱՇԽԱՏԱՎԱՐՁԻ ՄԱՍԻՆ

Հոդված 1. Լեռնային Ղարաբաղի Հանրապետությունում նվազագույն ամսական աշխատավարձը սահմանել 55000 դրամ:

(1-ին հոդվածը փոփ. 27.12.2006 ՀՕ-325, փոփ. 19.12.2007 ՀՕ-100, փոփ. 24.12.2008 ՀՕ-78-Ն, փոփ. 25.11.2010 ՀՕ-52-Ն, փոփ. 26.12.2012 ՀՕ-46-Ն, փոփ. 27.06.2013 ՀՕ-31-Ն, փոփ. 26.12.2013 ՀՕ-102-Ն, փոփ. 25.12.2014 ՀՕ-67-Ն)

Հոդված 2. Գործավարձով և ժամավճարով վարձատրվող աշխատակիցների համար ժամային տարիֆային դրույքի նվազագույն չափը սահմանել`

- աշխատաժամանակի նորմալ տևողության դեպքում (40-ժամյա աշխատանքային շաբաթ)՝ 330 դրամ.

- աշխատաժամանակի կրճատ տևողության դեպքում (36-ժամյա աշխատանքային շաբաթ)` 367 դրամ.

- աշխատաժամանակի կրճատ տևողության դեպքում (24-ժամյա աշխատանքային շաբաթ)` 550 դրամ:

(2-րդ հոդվածը փոփ. 27.12.2006 ՀՕ-325, փոփ. 19.12.2007 ՀՕ-100, լրաց., փոփ. 24.12.2008 ՀՕ-78-Ն, փոփ. 25.11.2010 ՀՕ-52-Ն, փոփ. 26.12.2012 ՀՕ-46-Ն, փոփ. 27.06.2013 ՀՕ-31-Ն, փոփ. 26.12.2013 ՀՕ-102-Ն, փոփ. 25.12.2014 ՀՕ-67-Ն)

Հոդված 2.1. Առողջապահության, հոգաբարձության (խնամակալության), մանկական-դաստիարակչական, էներգամատակարարման, գազամատակարարման, ջերմամատակարարման, կապի և աշխատանքի այլ առանձնահատուկ բնույթ ունեցող բնագավառների աշխատողների նվազագույն ժամային տարիֆային դրույքը որոշվում է սույն օրենքի առաջին հոդվածով սահմանված նվազագույն ամսական աշխատավարձը բաժանելով Լեռնային Ղարաբաղի Հանրապետության օրենսդրությամբ այդ աշխատողների ամսվա համար սահմանված աշխատաժամանակի նորմալ տևողությանը:

(2.1-րդ հոդվածը լրաց. 25.11.2010 ՀՕ-52-Ն)

Հոդված 3. Լեռնային Ղարաբաղի Հանրապետության օրենսգրքերի, օրենքների, Լեռնային Ղարաբաղի Հանրապետության Նախագահի հրամանագրերի, Լեռնային Ղարաբաղի Հանրապետության կառավարության և վարչապետի որոշումների, նախարարությունների և գերատեսչությունների, տեղական ինքնակառավարման մարմինների, առանձին իրավաբանական անձանց ակտերի իմաստով որպես հաշվարկային հիմք չի կարող ընդունվել սույն օրենքով սահմանված նվազագույն ամսական աշխատավարձը:

Նշված ակտերում որպես հաշվարկային հիմք պահպանվում է գործող 1000 դրամը:

Հոդված 4. Նվազագույն ամսական աշխատավարձի, գործավարձով և ժամավճարով վարձատրվող աշխատակիցների համար սահմանված ժամային տարիֆային դրույքի նվազագույն չափերի մեջ չեն ներառվում աշխատավարձից վճարվող հարկերը, հավելումները, հավելավճարները, պարգևատրումները և խրախուսման այլ վճարները:

Հոդված 5. Սույն օրենքն ուժի մեջ մտնելու պահից ուժը կորցրած ճանաչել «Նվազագույն աշխատավարձի մասին» Լեռնային Ղարաբաղի Հանրապետության 1999 թվականի մարտի 15-ի ՀՕ-48 օրենքը:

Հոդված 6. Սույն օրենքն ուժի մեջ է մտնում 2005 թվականի հունվարի 1-ից: