ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

ք.Ստեփանակերտ

Ապահովագրական ստաժ սահմանող հանձնաժողովներ ստեղծելու մասին

Համաձայն «Պետական կենսաթոշակների մասին» Լեռնային Ղարաբաղի Հանրապետության օրենքի 48-րդ հոդվածի 5-րդ մասի` Լեռնային Ղարաբաղի Հանրապետության կառավարությունը որոշում է.

1. Լեռնային Ղարաբաղի Հանրապետության շրջանների վարչակազմերում ստեղծել ապահովագրական ստաժ սահմանող հանձնաժողովներ (այսուհետ` հանձնաժողով)` պատերազմական գործողությունների և բռնատեղահանման հետևանքով ստաժը հաստատող փաստաթղթերի ձեռքբերման անհնարինության դեպքում քաղաքացիների ապահովագրական (աշխատանքային) ստաժը սահմանելու համար:

2. Սահմանել, որ հանձնաժողովի կազմում ի պաշտոնե ընդգրկվում են շրջանի վարչակազմի ղեկավարի տեղակալը (հանձնաժողովի նախագահ), կենսաթոշակային ապահովագրության, սոցիալական ապահովության, պետական արխիվի տարածքային ստորաբաժանումների ղեկավարները, համապատասխան համայնքների ղեկավարներ, գործատուների և արհմիությունների ներկայացուցիչներ կամ համապատասխան այլ պաշտոնատար անձինք:

3. Հաստատել ապահովագրական (աշխատանքային) ստաժ սահմանելու կարգը՝ համաձայն հավելվածի:

4. Լեռնային Ղարաբաղի Հանրապետության շրջանների վարչակազմերի ղեկավարներին՝ սույն որոշումն ուժի մեջ մտնելուց հետո՝ յոթօրյա ժամկետում, հաստատել հանձնաժողովի անհատական կազմը, ապահովել նրա անխափան աշխատանքը և համապատասխան միջոցներ ձեռնարկել բնակչությանը սույն որոշման մասին տեղեկացնելու համար:

1. Ապահովագրական ստաժ սահմանող հանձնաժողովը (այսուհետ՝ հանձնաժողով) ապահովագրական (աշխատանքային) ստաժը (այսուհետ՝ ստաժ) սահմանում է արխիվային տվյալների բացակայության մասին տեղեկանքի և առնվազն երկու վկայի ցուցմունքների հիման վրա, եթե նրանք դիմողին ճանաչում են միևնույն հիմնարկում համատեղ աշխատանքից և ունեն այդ ժամանակաշրջանի ստաժի մասին փաստաթղթեր, որոնք հիմք են դիմողի ապահովագրական ստաժը հաստատելու համար:

2. Ստաժը սահմանվում է այն բնակավայրերի քաղաքացիների համար, որոնց ցանկը և նրանցում տեղաբաշխված հիմնարկների (ձեռնարկությունների, կազմակերպությունների, կոլտնտեսությունների) վերացման ստույգ ժամկետները հաստատվել են Լեռնային Ղարաբաղի Հանրապետության Մարտակերտի, Ասկերանի, Շուշիի և Հադրութի շրջաններում լիազոր մարմինների կողմից՝ ԼՂՀ Պաշտպանության Պետական Կոմիտեի 1994 թվականի հունվարի 20‑ի թիվ 365 որոշման համաձայն:

Ստաժը սահմանվում է մինչև սույն կետի առաջին մասում նշված՝ լիազոր մարմինների կողմից հաստատված ժամկետը քաղաքացու աշխատած ժամանակաշրջանի համար:

3. Վկաների ցուցմունքով կարող է հաստատվել «Պետական կենսաթոշակների մասին» Լեռնային Ղարաբաղի Հանրապետության օրենքով պահանջվող (25 տարի) ստաժի պակասող մասը՝ առանց հաշվարկելու սույն կարգի 2-րդ կետով նշված ժամկետից հետո ձեռք բերած ստաժը:

4. Սահմանված ստաժը հիմք է կենսաթոշակների, այդ թվում` արտոնյալ պայմաններով, երկարամյա ծառայության և մասնակի կենսաթոշակների, նշանակման և օրենսդրությամբ սահմանված այլ սոցիալական երաշխիքների համար: