Հիմք ընդունելով «Գնումների մասին» Լեռնային Ղարաբաղի Հանրապետության օրենքի 5 և 17 հոդվածները, հրամայում եմ՝

1. Հաստատել գնումների գործընթացի մոնիտորինգի իրականացման կարգը (կցվում է):

2. Ստեղծել գնումների գործընթացի մոնիտորինգի իրականացման մշտական հիմունքներով գործող խումբ (այսուհետև՝ խումբ) հետևյալ կազմով.

խմբի ղեկավար՝

Մ. Հակոբջանյան - փոխնախարար (բյուջեի գծով)

խմբի անդամներ՝

Ա. Միրզոյան - նախարարի օգնական

Է. Ղուկասյան - գնումների գործընթացի կարգավորման և բյուջետային գործընթացի մեթոդաբանության բաժնի 1-ին կարգի տնտեսագետ

Ա. Միրզոյան - բյուջետային գործընթացի ծրագրավորման կատարման և վերլուծության բաժնի 1-ին կարգի տնտեսագետ

3. Սույն հրամանն ուժի մեջ է մտնում 2003 թվականի հոկտեմբերի 1 -ից:

I. Ընդհանուր դրույթներ

1. Սույնով սահմանվում է պետության և համայնքների կարիքների համար իրականացվող գնումների (այսուհետև՝ գնումներ) գործընթացի լիազոր մարմնի կողմից ուսումնասիրությունների և վերլուծությունների (այսուհետև՝ մոնիտորինգ) իրականացման կարգը:

2. Մոնիտորինգի նպատակն է՝

1) ուսումնասիրել գնումների գործընթացը, հայտնաբերել և հրապարակել այն թերությունները, որոնք առկա են գնումների իրականացման գործում.

2) եզրակացություն կազմել գնման գործընթացի մասին:

3. Մոնիտորինգն իրականացնում է այդ նպատակով կազմավորված և մշտական հիմունքներով գործող աշխատանքային խումբը (այսուհետև՝ խումբ): Խումբը կազմավորվում է լիազոր մարմնի ղեկավարի հրամանով: Խմբի ղեկավարը հանդիսանում է ՀՀ ֆինանսների և էկոնոմիկայի նախարարությունում լիազոր մարմնի լիազորությունների կատարման գործի կազմակերպման համար պատասխանատու ստորաբաժանման (այսուհետև՝ պատասխանատու ստորաբաժանում) ներկայացուցիչը: Խմբի գործունեությանը վերաբերող տեղեկությունները արձանագրվում են փաստաթղթեր կազմելով, որոնք ստորագրում են խմբի՝ մոնիտորինգին մասնակցած անդամները: Խմբի աշխատանքներին խորհրդատվական ձայնի իրավունքով կարող են մասնակցել այլ անձիք՝ լիազոր մարմնի ղեկավարի համաձայնությամբ: Խմբի եզրակացությունները ունեն խորհրդատվական բնույթ:

4. Մոնիտորինգ անցկացվում է պատասխանատու ստորաբաժանման ղեկավարի նախաձեռնությամբ, որը հաստատվում է լիազոր մարմնի ղեկավարի հրամանով:

5. Մոնիտորինգ անցկացնելու մասին լիազոր մարմնի ղեկավարի հրամանը պարունակում է առնվազն հետևյալ տեղեկությունները՝

1) այն պետական և (կամ) տեղական ինքնակառավարման մարմնի (մարմինների) (այսուհետև՝ պատվիրատու) անվանումը և հասցեն, որի կողմից կամ որի կարիքների համար կատարվել է մոնիտորինգի առարկա հանդիսացող գնումը.

2) մոնիտորինգի անցկացման ժամկետները.

3) հարցերի (գործողությունների) այն շրջանակը, որոնք պետք է ենթարկվեն մոնիտորինգի:

6. Մոնիտորին անցկացնելու մասին հրամանը ստորագրվելու օրվանից հետո երեք աշխատանքային օրվա ընթացքում այդ հրամանի պատճենը լիազոր մարմնի կողմից տրամադրվում է պատվիրատուին:

7. Պատասխանատու ստորաբաժանման ղեկավարը մոնիտորինգ անցկացելու նախաձեռնությամբ կարող է հանդես գալ խմբի եզրակացության և (կամ) պատվիրատուի կողմից լիազոր մարմնին ներկայացված փաստաթղթերի ուսումնասիրության հիման վրա: Այն դեպքում, երբ պատասխանատու ստորաբաժանման պաշտոնատար անձը գրավոր կամ բանավոր տեղեկացվել է գնման գործընթացի շրջանակներում այնպիսի հանգամանքների առկայության մասին, որը խոչընդոտում կամ կարող է խոչընդոտել գնման գործընթացին կամ պատճառ հանդիսանալ գնման գործընթացի մասնակիցների շահերի ոտնահարման, ապա տեղեկատվությունը ստանալու օրը այդ պաշտոնատար անձը ստացված տեղեկատվության բովանդակության մասին գրավոր կազմում է տեղեկանք (այսուհետև՝ տեղեկանք): Տեղեկանքում կարող է չնշվել տեղեկատվության սկզբնաղբյուրը:

8. Տեղեկանքը կազմելու օրը այն ներկայացվում է պատասխանատու ստորաբաժանման ղեկավարին, որը տեղեկանքը ուղարկում է խմբի անդամներին: Տեղեկանքն ուղարկվելու օրվանից հինգ աշխատանքային օրվա ընթացքում խումբը պատասխանատու ստորաբաժանման ղեկավարին է ներկայացնում եզրակացություն՝ տեղեկանքի բովանդակության հիման վրա մոնիտորինգ անցկացնելու նպատակահարմարության մասին:

9. Մոնիտորինգի արդյունքները՝ եզրակացությունը, ստորագրում են խմբի՝ մոնիտորինգին մասնակցած անդամները: Եզրակացությունը հրապարակվում է գնումների պաշտոնական տեղեկագրում:

10. Մոնիտորինգն անցկացվում է խմբի անդամների միջև, խմբի ղեկավարի կողմից, մոնիտորինգի ենթակա հարցերի բաժանման և այդ հարցերի ուսումնասիրության միջոցով: Ուսումնասիրության արդյունքները քննարկվում են խմբի կողմից: Մոնիտորինգի արդյունքների մասին եզրակացությունը կազմվում է խմբի կողմից կատարված ուսումնասիրությունների հիման վրա:

11. Պատվիրատուի իրավասու պաշտոնատար անձանց խմբի աշխատանքներին ինքնակամ միջամտելը արգելվում է, բացառությամբ խմբի՝ մոնիտորինգի անցկացման համար, անհրաժեշտ տեխնիկական և տեղեկատվական բնույթի օժանդակության ցուցաբերումից: Մոնիտորինգի ընթացքում խումբը կարող է լիազոր մարմնի անունից պատվիրատուին ներկայացնել մոնիտորինգի համար անհրաժեշտ տեղեկություններ և փաստաթղթեր տրամադրելու պահանջ: Մոնիտորինգի ընթացքում պատվիրատուի կողմից խմբի գործունեության նկատմամբ ձեռքներկված միջոցառումների մասին համառոտ տեղեկությունները արտացոլվում են մոնիտորինգի արդյունքների մասին եզրակացվության մեջ:

12. Մոնիտորինգի արդյունքների մասին եզրակացությունը հաստատվելու օրվանից երեք աշխատանքային օրվա ընթացքում, խմբի ղեկավարը եզրակացության պատճենը ներկայացնում է պատասխանատու ստորաբաժանման ղեկավարին, որը ձեռնարկում է միջոցներ գնումների պաշտոնական տեղեկագրում եզրակացությունը հրապարակելու համար:

13. Ելնելով եզրակացության բովանդակությունից, եզրակացությունը ստանալուց տաս աշխատանքային օրվա ընթացքում, պատասխանատու ստորաբաժանման ղեկավարը լիազոր մարմնի ղեկավարի հաստատմանն է ներկայացնում պատվիրատուին ուղղված մեթոդական ցուցում՝ եզրակացության բովանդակության կապակցությամբ պատվիրատուի կողմից կատարման ենթակա գործողությունների մասին: