ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ք.Ստեփանակերտ

«Իրավական ակտերի մասին» Լեռնային Ղարաբաղի Հանրապետության օրենքի 13-րդ հոդվածին համապատասխան՝ Լեռնային Ղարաբաղի Հանրապետության կառավարությունը ո ր ո շ ու մ է.

1. Հաստատել Արցախի Հանրապետության զինվորական հաշմանդամություն ունեցող 1-ին, 2-րդ խմբերի հաշմանդամներին, Արցախի Հանրապետության Մարտակերտի շրջանի Թալիշ, Մատաղիս, Տոնաշեն գյուղական համայնքներում փաստացի բնակվող անձանց օգտագործված էլեկտրաէներգիայի և (կամ) բնական գազի դիմաց պետական ֆինանսական աջակցության տրամադրման կարգը՝ համաձայն հավելվածի:

(1-ին կետը լրաց. 22.06.2017 N 446-Ն, փոփ. 25.01.2018 N 42-Ն)

2. Արցախի Հանրապետության աշխատանքի, սոցիալական հարցերի և վերաբնակեցման նախարարությանը՝ յուրաքանչյուր տարվան հաջորդող տարվա մարտ ամսվա պետական ֆինանսական աջակցությունը փաստացի տրամադրելուց հետո ընկերությունների հետ հինգ աշխատանքային օրվա ընթացքում ապահովել բաժանորդների դիմային հաշիվներին և (կամ) հաշվառման քարտերին մուտքագրված մնացորդային գումարների վերադարձը պետական բյուջե, որի չափը չի կարող գերազանցել մեկ տարվա ընթացքում տրամադրված պետական ֆինանսական աջակցության ընդհանուր գումարը:

(2-րդ կետը փոփ. 08.02.19 N 50-Ն)

3. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը, իսկ դրա գործողությունը տարածվում է 2017 թվականի հունվարի 1-ից ծագած հարաբերությունների վրա:

4. Սույն որոշմամբ հաստատված Արցախի Հանրապետության Մարտակերտի շրջանի Թալիշ, Մատաղիս, Տոնաշեն գյուղական համայնքներում փաստացի բնակվող անձանց տրամադրվող պետական ֆինանսական աջակցությանը վերաբերող դրույթները գործելու են մինչև 2019 թվականի դեկտեմբերի 31-ը:

(4-րդ կետը լրաց. 25.01.2018 N 42-Ն, փոփ. 08.02.19 N 50-Ն)

1. Սույն կարգը կարգավորում է Արցախի Հանրապետության զինվորական հաշմանդամություն ունեցող 1-ին, 2-րդ խմբերի հաշմանդամներին (այսուհետ՝ Շահառու) օգտագործված էլեկտրաէներգիայի և (կամ) բնական գազի դիմաց պետական ֆինանսական աջակցության տրամադրման իրավական հիմքերի, ֆինանսավորման մեխանիզմների և վերահսկողության հետ կապված հարաբերությունները:

Սույն կարգի իմաստով Շահառու է համարվում նաև Արցախի Հանրապետության Մարտակերտի շրջանի Թալիշ, Մատաղիս, Տոնաշեն գյուղական համայնքներում փաստացի բնակվող անձը:

(1-ին կետը լրաց. 22.06.2017 N 446-Ն, փոփ. 25.01.2018 N 42-Ն)

2. Սույն կարգի նպատակը Շահառու հանդիսացող Արցախի Հանրապետության քաղաքացիների սոցիալ-կենցաղային խնդիրների լուծմանն ուղղված աջակցության տրամադրումն է:

(2-րդ կետը փոփ. 25.01.2018 N 42-Ն)

3. Սույն կարգում օգտագործվող հիմնական հասկացություններն են՝

1) Արցախի Հանրապետության զինվորական հաշմանդամություն ունեցող 1-ին, 2-րդ խմբի հաշմանդամ՝ առողջության խաթարմամբ պայմանավորված, կենսագործունեության սահմանափակումների հետևանքով սոցիալական պաշտպանության անհրաժեշտություն ունեցող անձ.

2) ընտանիք՝ ընդհանուր տնտեսություն վարող Շահառու և ամուսին կամ Շահառու և (կամ) ամուսին և երեխա(ներ) կամ Շահառու և (կամ) ծնող(ներ) և (կամ) մինչև 23 տարեկան առկա ուսուցմամբ սովորող քույր(եր) և (կամ) եղբայր(ներ): Շահառուի խնամակալության կամ հոգաբարձության տակ գտնվող Շահառուի ծնող(ներ)ը և (կամ) քույր(եր)ը և (կամ) եղբայր(ներ)ը՝ անկախ Շահառուի ընտանեկան կարգավիճակից, համարվում են նրա ընտանիքի անդամ(ներ).

3) պետական ֆինանսական աջակցություն՝ սույն կարգով սահմանված պետական բյուջեի միջոցների հաշվին տրամադրվող աջակցության ձև, որն արտահայտվում է Շահառուի և նրա ընտանիքի յուրաքանչյուր անդամի հաշվով օգտագործված էլեկտրաէներգիայի և բնական գազի, իսկ սույն կարգի 1-ին կետի 2-րդ պարբերությունում նշված Շահառուի հաշվով` օգտագործված էլեկտրաէներգիայի դիմաց ամսական ֆիքսված դրամական փոխհատուցմամբ (այսուհետ՝ աջակցություն).

4) ընկերություն՝ Արցախի Հանրապետության օրենսդրությանը համապատասխան էլեկտրաէներգիայի և բնական գազի բաշխման ծառայություններ մատուցելու լիցենզիա ունեցող իրավաբանական անձ.

5) բաժանորդ՝ ընկերության կողմից մատուցվող ծառայություններից օգտվելու համար ընկերության հետ էներգամատակարարման և (կամ) գազամատակարարման պայմանագիր կնքած ֆիզիկական անձ.

6) բաժանորդի դիմային հաշիվ կամ հաշվառման քարտ՝ բաժանորդի օգտագործած էլեկտրաէներգիայի կամ բնական գազի ծախսերը և վճարումները հաշվառելու հաշիվ կամ քարտ.

7) ցուցակ՝ Շահառուի և նրա ընտանիքին տրամադրվող աջակցության չափի վերաբերյալ տվյալներ պարունակող փաստաթուղթ.

8) իրավասու մարմին՝ Արցախի Հանրապետության աշխատանքի, սոցիալական հարցերի և վերաբնակեցման նախարարության (այսուհետ՝ նախարարություն) աշխատակազմի սոցիալական ծառայության տարածքային գործակալություն.

9) աջակցություն ապահովող մարմին՝ նախարարություն.

10) բանկ՝ վճարահաշվարկային ծառայություններ մատուցող ֆինանսավարկային կազմակերպություն:

(3-րդ կետը լրաց. 22.06.2017 N 446-Ն, փոփ. 25.01.2018 N 42-Ն, 08.02.19 N 50-Ն)

4. Աջակցությունը տրամադրվում է Շահառուի ընտանիքի յուրաքանչյուր անդամի հաշվով՝ ամսական 60 կիլովատտ/ժամ էլեկտրաէներգիայի և տասը խորանարդ մետր բնական գազի համար:

5. Չգազաֆիկացված բնակավայրերում կամ բնակարաններում (բնակելի տներում) աջակցությունը տրամադրվում է Շահառուի ընտանիքի յուրաքանչյուր անդամի հաշվով՝ ամսական 78 կիլովատտ/ժամ էլեկտրաէներգիայի համար:

5.1. Սույն կարգի 1-ին կետի 2-րդ պարբերությունում նշված Շահառուին աջակցությունը տրամադրվում է ամսական 78 կիլովատտ/ժամ էլեկտրաէներգիայի համար:

Սույն կետում նշված աջակցությունը Շահառուին տրամադրվում է բնակարանում, բնակելի տանը օգտագործած էլեկտրաէներգիայի համար:

(5.1-ին կետը լրաց. 22.06.2017 N 446-Ն)

6. Փոխհատուցվող գումարները կրում են կուտակային բնույթ: Այն դեպքում, երբ հաշվետու ամսում բաժանորդի դիմային հաշվին և (կամ) հաշվառման քարտին փոխանցված գումարը Շահառուի ընտանիքի օգտագործած էլեկտրաէներգիայի և (կամ) բնական գազի դիմաց վճարման ենթակա գումարից ավելին է, այն կուտակվում է բաժանորդի դիմային հաշվին և (կամ) հաշվառման քարտին:

7. Շահառուի սեփականության ներքո մեկից ավելի բնակարան (բնակելի տուն) լինելու դեպքում աջակցությունը տրամադրվում է այն բնակարանի (բնակելի տան) համար, որտեղ Շահառուն բնակվում է փաստացի:

8. Աջակցություն ստանալու համար Շահառուն կամ նրա օրինական ներկայացուցիչն իր բնակության վայրը սպասարկող իրավասու մարմին է ներկայացնում.

1) դիմում.

2) բաժանորդի դիմային հաշիվը և (կամ) հաշվառման քարտը.

3) հաշմանդամությունը հաստատող փաստաթղթի պատճենը.

4) ընտանիքի կազմի մասին լիազոր մարմնի կողմից տրված տեղեկանքը.

5) իր և իր ընտանիքի յուրաքանչյուր անդամի անձը հաստատող փաստաթղթերի պատճենները.

6) քաղաքացուն անգործունակ կամ սահմանափակ գործունակ ճանաչելու մասին դատարանի վճռի ու խնամակալության և հոգաբարձության մարմինների կողմից տրված համապատասխան որոշման պատճենները.

7) առկա ուսուցմամբ սովորելու մասին ուսումնական հաստատության կողմից տրված տեղեկանքը.

8) անհրաժեշտության դեպքում սույն կարգով սահմանված դրույթներին համապատասխան այլ փաստաթղթեր:

Վարձակալական հիմունքներով բնակվող Շահառուն, սույն կետում նշված փաստաթղթերից բացի, աջակցություն ստանալու համար, իրավասու մարմին է ներկայացնում նաև վարձակալության պայմանագրի պատճենը:

Սույն կարգի 1-ին կետի 2-րդ պարբերությունում նշված Շահառուներից կազմված ընտանիքի անունից աջակցություն ստանալու համար բնակության վայրը սպասարկող իրավասու մարմին է դիմում ընտանիքում բաժանորդ հանդիսացող անդամը՝ ներկայացնելով սույն կետի 1-2-րդ, 4-5-րդ և 8-րդ ենթակետերով նախատեսված փաստաթղթերը:

(8-րդ կետը լրաց. 22.06.2017 N 446-Ն)

9. Իրավասու մարմինը, սույն կարգի 8-րդ կետով նախատեսված Շահառուի կամ նրա օրինական ներկայացուցչի դիմումը և փաստաթղթերը ստանալուց հետո, ստուգում է դրանց հավաստիությունը և եռօրյա ժամկետում ընդունում որոշում՝ աջակցություն տրամադրելու մասին՝ սահմանելով Շահառուի ընտանիքին տրամադրվող աջակցության չափը:

10. Աջակցությունը տրամադրվում է՝

1) 2017 թվականի հունվարի 1-ից, եթե Շահառուն կամ նրա օրինական ներկայացուցիչը դիմումը և փաստաթղթերը իրավասու մարմին են ներկայացնում մինչև Լեռնային Ղարաբաղի Հանրապետության կառավարության 2017 թվականի փետրվարի 15-ի N 80-Ն որոշումն ուժի մեջ մտնելու ամսվան հաջորդող ամսվա վերջին աշխատանքային օրը.

2) իրավասու մարմին դիմելու ամսվան հաջորդող ամսվա 1-ից, եթե Շահառուն կամ նրա օրինական ներկայացուցիչը դիմումը և փաստաթղթերը իրավասու մարմին են ներկայացնում սույն կետի 1-ին ենթակետում նշված ժամկետից հետո:

11. Իրավասու մարմին դիմած յուրաքանչյուր Շահառուի համար կազմվում է անձնական գործ, որտեղ պահվում են սույն կարգով պահանջվող փաստաթղթերը:

12. Ներկայացրած փաստաթղթերի հավաստիության համար պատասխանատվությունը կրում է Շահառուն: Շահառուն պարտավոր է հնգօրյա ժամկետում իրավասու մարմնին տեղեկացնել իր ընտանիքի կազմին վերաբերող այն փոփոխությունների մասին, որոնք կարող են հանգեցնել աջակցության չափը փոփոխելուն կամ դրա տրամադրումը դադարեցնելուն:

Սույն կետում նշված փոփոխությունների հիման վրա աջակցությունը նոր չափով տրամադրվում է Շահառուի կողմից համապատասխան փոփոխության մասին իրավասու մարմին տեղեկություն ներկայացնելու ամսվան հաջորդող ամսվա 1-ից:

Շահառուի ընտանիքի անդամի մահվան կամ Շահառուի ամուսնալուծության կամ բժշկասոցիալական փորձաքննության ոլորտում իրավասու պետական մարմնի կողմից Շահառուին հաշմանդամ չճանաչելու դեպք(եր)ում աջակցությունը տրամադրվում է Շահառուի ընտանիքի անդամի մահվան կամ Շահառուի ամուսնալուծության պետական գրանցման կամ Շահառուին հաշմանդամ չճանաչելու մասին որոշման ընդունման ամսվա համար ներառյալ:

13. Սույն կարգի 5-րդ կետում նշված բնակավայրը կամ բնակարանը (բնակելի տունը) գազաֆիկացվելու դեպքում Շահառուին տրամադրվում է սույն կարգի 4-րդ կետով նախատեսված աջակցություն՝ Շահառուի կողմից իրավասու մարմին բաժանորդի հաշվառման քարտը ներկայացնելու ամսվան հաջորդող ամսվա 1-ից:

14. Շահառուի մահվան դեպքում աջակցության տրամադրումը դադարեցվում է: Սույն կարգի 1-ին կետի 2-րդ պարբերությունում նշված Շահառուներից կազմված ընտանիքի անդամի մահվան դեպքում աջակցության տրամադրումը դադարեցվում է ընտանիքի մահացած անդամի մասով: (նախ-ը լրաց. 22.06.2017 N 446-Ն)

(14-րդ կետը լրաց. 22.06.2017 N 446-Ն)

15. Սույն կարգի 11-րդ կետում նշված անձնական գործերի հիման վրա իրավասու մարմինը մինչև յուրաքանչյուր ամսվա տասը նախարարություն է ներկայացնում նախորդ ամսվա հաստատված ցուցակները՝ կնքված և ստորագրված: Ցուցակները պետք է պարունակեն Շահառուի վերաբերյալ հետևյալ տեղեկությունները.

1) անունը, հայրանունը, ազգանունը.

2) ծննդյան օրը, ամիսը, տարին.

3) անձը հաստատող փաստաթղթի սերիան, համարը.

4) հաշվառման և (կամ) փաստացի բնակության հասցեն.

5) բաժանորդի դիմային հաշիվը և (կամ) հաշվառման քարտը.

6) տրամադրվող աջակցության չափը:

(15-րդ կետը փոփ. 08.02.19 N 50-Ն)

16. (կետն ուժը կորցրել է 08.02.19 N 50-Ն)

17. Նախարարությունը մինչև յուրաքանչյուր ամսվա՝

1) 12-ը նախորդ ամսվա հաստատված ցուցակները ներկայացնում է ընկերություն.

2) 13-ը սույն կարգի 15-րդ կետում նշված ցուցակների հիման վրա Արցախի Հանրապետության ֆինանսների նախարարություն է ներկայացնում հայտ:

(17-րդ կետը փոփ. 25.01.2018 N 42-Ն, խմբ. 08.02.19 N 50-Ն)

18. Նախարարությունը, աջակցություն տրամադրելու համար անհրաժեշտ ֆինանսական միջոցները ստանալուց հետո, մեկ բանկային օրվա ընթացքում դրանք փոխանցում է բանկում ընկերության անվամբ բացված հաշվարկային հաշվին:

(18-րդ կետը փոփ. 08.02.19 N 50-Ն)

19. Բանկը, համապատասխան ֆինանսական միջոցներն ընդունելուց հետո, երկու բանկային օրվա ընթացքում դրանք մուտքագրում է բաժանորդների դիմային հաշիվներին և (կամ) հաշվառման քարտերին:

20. Ընկերությունը մինչև յուրաքանչյուր ամսվա 20-ը նախարարություն է ներկայացնում նախորդ ամսվա համար բաժանորդների դիմային հաշիվներին և (կամ) հաշվառման քարտերին մուտքագրված ֆինանսական միջոցների, մնացորդային գումարների մասին հաշվետվություն:

(20-րդ կետը փոփ. 08.02.19 N 50-Ն)

21. Սույն կարգի պահանջներից բխող հարաբերությունները կարգավորվում են նախարարության և ընկերության միջև կնքվող ծառայությունների մատուցման պայմանագրով, որի դրույթները չպետք է հակասեն սույն կարգով նախատեսված պահանջներին:

(21-րդ կետը փոփ. 08.02.19 N 50-Ն)

22. (կետն ուժը կորցրել է 08.02.19 N 50-Ն)

(Հավելվածը լրաց. 22.06.2017 N 446-Ն, փոփ. 25.01.2018 N 42-Ն, փոփ., խմբ. 08.02.19 N 50-Ն)